(អត្ថបទដោយ នគរ / ១០ មេសា ២០២០)
ជុំវិញការចាប់ឃុំខ្លួនលោក សុវណ្ណ រិទ្ធី ចាងហ្វាងផ្សាយព័ត៌មានអនឡាន ធីវីអេហ្វប៊ី (TVFB) ធ្វើឲ្យមានប្រតិកម្មជាច្រើនពីអង្គការជាតិ និងអន្តរជាតិ ទាមទារឲ្យមានការដោះលែងរូបលោក ឲ្យមានសរីភាពឡើងវិញ។
លោក ហ្វីល រ៉ូបឺតសុន (Phil Robertson) នាយករងអង្គការសិទ្ធិមនុស្សអន្តរជាតិ យូមែនរ៉ៃត៍វ៉ច្ឆ (Human Rights Watch) ប្រចាំអាស៊ី នៅថ្ងៃទី ១០ ខែមេសា ឆ្នាំ២០២០ ថា «ការចាប់ខ្លួន លោក សុវណ្ណ រិទ្ធី ជាការបង្ហាញពីការធ្លាក់ចុះធ្ងន់ធ្ងរ នូវសេរីភាពសារព័ត៌មាន នៅកម្ពុជា»។ លោក Robertson បន្ថែមថា «រដ្ឋាភិបាល ត្រូវតែដោះលែងអ្នកសារព័ត៌មានរូបនេះ និង អ្នកផ្សេងទៀត ដែលត្រូវបានចាប់ឃុំខ្លួនដោយសារតែការសម្តែងមតិ ឬការភ័យខ្លាចរបស់ពួកគេ អំពីជំងឺកូវីដ-១៩»។
លោក សុវណ្ណ រិទ្ធី ត្រូវបានសមត្ថកិច្ចក្រុងភ្នំពេញ ចាប់ខ្លួនកាលពីថ្ងៃ ០៧ ខែ មេសា ក្រោយពេលលោក ដកស្រង់សម្ដីនាយករដ្ឋមន្ត្រី លោក ហ៊ុន សែន សរសេរថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ។ តុលាការក្រុងភ្នំពេញ បានចោទលោក សុវណ្ណ រិទ្ធី ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ហើយសម្រេចឃុំខ្លួន ជាបណ្ដោះអាសន្ននៅពន្ធនាគារភ្នំពេញ (PJ) នាថ្ងៃទី ០៨ មេសា។
សេចក្តីថ្លែងការណ៍អង្គការសិទ្ធិមនុស្ស Human Rights Watch បានបញ្ជាក់ថា មានមនុស្ស ២៣ នាក់ហើយ ត្រូវបានអាជ្ញាធរកម្ពុជា ចាប់ខ្លួន ក្រោមបទចោទប្រកាន់ថា «បានផ្សព្វផ្សាយព័ត៌មានក្លែងក្លាយ អំពីជំងឺកូវីដ-១៩»។
ទន្ទឹមនឹងគ្នានេះ ក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅប្រទេសន័រវេស៍ (Norway) បានចេញសេចក្តីថ្លែងការណ៍កាលពីថ្ងៃទី ០៨ ខែមេសា បានអំពាវនាវឲ្យរដ្ឋាភិបាល លោក ហ៊ុន សែន ដោះលែងលោក សុវណ្ណ រិទ្ធី ឲ្យមានសេរីភាពឡើងវិញ និងស្នើឲ្យក្រសួងព័ត៌មាន ផ្តល់អាជ្ញាប័ណ្ណការផ្សាយរបស់អង្គភាព លោក សុវណ្ណ រិទ្ធី ដូចធម្មតា។
លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា ថ្លែងវិទ្យុអាស៊ីសេរីថា «លោក សុវណ្ណ រិទ្ធី គ្មានកំហុសទេ ហើយក៏គ្មានចំណុចត្រង់ណា បញ្ជាក់ពីការសរសេរញុះញង់ ដូចការចោទប្រកាន់ពីអាជ្ញាធរនោះដែរ ព្រោះលោកគ្រាន់តែដកស្រង់សំដីលោក ហ៊ុន សែន តែប៉ុណ្ណោះ»។
ចំណែកអង្គការអ្នកសារព័ត៌មានគ្មានព្រំដែន (Reporters Without Borders (RSF)) ក៏បានទាមទារឱ្យអាជ្ញាធរ ដោះលែងលោក សុវណ្ណ រិទ្ធី នាយកផ្សាយព័ត៌មានអនឡាន TVFB ជាបន្ទាន់ផងដែរ។ ហើយអង្គការនេះ បានអំពាវនាវឱ្យក្រសួងព័ត៌មាន ផ្ដល់អាជ្ញាប័ណ្ណព័ត៌មាន ដល់ស្ថាប័នព័ត៌មានអនឡាញរបស់លោក សុវណ្ណ រិទ្ធី ឡើងវិញ៕
អត្ថបទពាក់ព័ន្ធ៖ សូមដោះលែងលោក សុវណ្ណ រិទ្ធី ដែលដកស្រង់សំដីលោក ហ៊ុន សែន៖ «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ»