RFA Khmer /ដោយ ទីន ហ្សាការីយ៉ា
17-7-2023
មន្ត្រីគណបក្សប្រឆាំង និងអ្នកវិភាគ រិះគន់រដ្ឋាភិបាល ដែលបន្តសង់ស្តូបអនុស្សាវរីយ៍វិមានឈ្នះឈ្នះ នៅខេត្តកោះកុង ថា ជាការបំផ្លាញថវិកាដោយឥតប្រយោជន៍ និងជាការបន្តដឹងគុណ ដល់ប្រទេស វៀតណាម (Vietnam) ដែលបានលើកបន្តុបលោក ហ៊ុន សែន ធ្វើនាយករដ្ឋមន្ត្រីតែប៉ុណ្ណោះ។ ប្រតិកម្មនេះធ្វើឡើង បន្ទាប់ពីមន្ត្រីជាន់ខ្ពស់ក្រសួងការពារជាតិ ចូលរួមអបអរសាទរ ក្នុងពិធីបិទបញ្ចប់ការងារចាក់បេតុង ៣ជ្រុង នៃការស្តូបអនុស្សាវរីយ៍វិមាន ឈ្នះឈ្នះ នៅខេត្តកោះកុង នៅព្រឹកថ្ងៃទី ១៧ កក្កដា។
មន្ត្រីគណបក្សប្រឆាំង និង អ្នកវិភាគ លើកឡើងថា ការសង់ស្តូបអនុស្សាវរីយ៍ឈ្នះឈ្នះនេះ នឹងមិនបានផលប្រយោជន៍អ្វីដល់ពលរដ្ឋ និងសង្គមជាតិឡើយ។
មន្ត្រីជាន់ខ្ពស់គណបក្សសង្គ្រោះជាតិ លោក អ៊ុំ សំអាន មានប្រសាសន៍ថា រដ្ឋាភិបាលគួរតែយកប្រាក់ដែលសង់ស្តូបអនុស្សាវរីយ៍នេះ ទៅជួយដល់ប្រជាពលរដ្ឋក្រីក្រ និង យកទៅធ្វើផ្លូវឱ្យពលរដ្ឋធ្វើដំណើរប្រសើរជាង ពីព្រោះលោកថា ស្តូបនេះ មិនបានប្រយោជន៍អ្វីដល់ប្រទេសជាតិឡើយ។ លោកចាត់ទុកការបន្តសង់ស្តូបអនុស្សាវរីយ៍វិមានឈ្នះឈ្នះរបស់រដ្ឋាភិបាលឯកបក្សនេះថា ធ្វើឡើងដើម្បីបន្តដឹងគុណវៀតណាម ដែលលើកបន្តុបឱ្យលោក ហ៊ុន សែន ធ្វើនាយករដ្ឋមន្ត្រីតែប៉ុណ្ណោះ។
លោក អ៊ុំ សំអាន៖ «ហើយយើងដឹងហើយ នៅពេលដែលកម្ពុជាដឹងគុណវៀតណាម មិនចេះចប់ អីចឹងវាធ្វើឱ្យកម្ពុជា កាន់តែបាត់បង់ទឹកដីបន្ថែមទៀត ទៅប្រទេសវៀតណាម ហើយវៀតណាម កាន់តែកើនឡើងថែមទៀតនៅកម្ពុជា។ ឈ្នះដល់តែខ្មែរនឹងឈ្នះទាំងអស់គ្នា ប៉ុន្តែឈ្នះសព្វថ្ងៃនេះនេះ គឺឈ្នះតែគណបក្សប្រជាជន ដែលក្រុមគ្រួសារត្រកូល ហ៊ុន និងអ្នកមានអំណាចមួយក្ដាប់តូចហ្នឹង។ តែខ្មែរភាគច្រើន គឺមិនឈ្នះផង នឹងក្រីក្រតោកយ៉ាក ទៅធ្វើការនៅថៃ នៅម៉ាឡេស៊ី និង នៅកូរ៉េខាងត្បូង អីជាដើម ហើយអ្នកដែលមានបានឈ្នះហ្នឹង គឺតែក្រុមគ្រួសារអ្នកមានមួយក្ដាប់តូប ដែលកាន់អំណាចសព្វថ្ងៃនឹងឯង»។
ប្រតិកម្មរបស់មន្ត្រីគណបក្សប្រឆាំងនេះ ធ្វើឡើង បន្ទាប់ពីរដ្ឋមន្ត្រីក្រសួងការពារជាតិ លោក ទៀ បាញ់ ចូលរួមអបអរសាទរពិធីបញ្ចប់ការងារចាក់បេតុង ៣ជ្រុង នៃការសង់ស្តូបអនុស្សាវរីយ៍នយោបាយឈ្នះ ឈ្នះ នៅខេត្តកោះកុង នៅព្រឹកថ្ងៃទី១៧ កក្កដា។ លោក ទៀ បាញ់ មានប្រសាសន៍នៅចំពោះនាយទាហានមន្ត្រីរាជការ និងប្រជាពលរដ្ឋរាប់ពាន់នាក់ថា ការសង់ស្តូបនេះ ដើម្បីធ្វើជាភស្តុតាងផង និងជាការរក្សាទុកឯកសារប្រវត្តិសាស្ត្រដ៏ជូរចត់ ដែលកម្ពុជាបានឆ្លងកាត់កន្លងមកផង។
លោក ទៀ បាញ់៖ «ហ្នឹងជាមេរៀនសម្រាប់អ្នកជំនាន់ក្រោយរៀនសូត្រ គោរពដឹងគុណសម្ដេច ហ៊ុន សែន ស្ថាបនិក និងជាប្រតិបត្តិករនៃនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ»។
ទោះជាយ៉ាងណា អ្នកវិភាគនយោបាយ លោក គឹម សុខ មើលឃើញថា ការសង់ស្តូបនេះ ជាការបំផ្លាញថវិកាជាតិឥតប្រយោជន៍ និងជាការកាឡៃប្រវត្តិសាស្ត្រ ដែលវៀតណាម ចូលមកឈ្លានពានកម្ពុជា។
លោក គឹម សុខ៖ «ក្រុមលោក ហ៊ុន សែន យកដំណើររឿងឈ្លានពានទាំងឡាយរបស់វៀតណាម ចូលកម្ពុជា ដំណើររឿងដែល ហ៊ុន សែន បំពេញមហិច្ឆតាឈ្លានពានរបស់វៀតណាមសោះ ប៉ុន្តែគេក្រឡៃទៅជាការសង្គ្រោះកម្ពុជា ក្រឡៃទៅជាការកសាងសន្តិភាព របស់លោក ហ៊ុន សែន ទៅវិញ រហូតទៅដល់គេលើកតម្កើងថា លោក ហ៊ុន សែន ជាស្ថាបត្យករ សន្តិភាពអស់ហ្នឹង ហើយគឺជារឿងក្រឡៃប្រវត្តិសាស្ត្រ។ ពីព្រោះប្រវត្តិសាស្ត្រតម្លៃចុងក្រោយធំបំផុត គឺកិច្ចព្រមព្រៀងសន្តិភាពទីក្រុងប៉ារីស»។
រដ្ឋាភិបាលលោក ហ៊ុន សែន បានសាងសង់ស្តូបអនុស្សាវរីយ៍នេះ នៅរាជធានីភ្នំពេញ ខេត្តកំពង់ស្ពឺ បន្ទាយមានជ័យ ឧត្តរមានជ័យ ប៉ៃលិន និងខេត្តកោះកុង ហើយរដ្ឋាភិបាល ក៏គ្រោងសង់នៅតាមខេត្តទូទាំងប្រទេសបន្តទៀត។
កន្លងមករដ្ឋាភិបាលលោក ហ៊ុន សែន ធ្លាប់រងការរិះគន់ច្រើន ពាក់ព័ន្ធការសាងសង់ស្តូបអនុស្សាវរីយ៍នយោបាយឈ្នះឈ្នះនេះ។ ស្តូបនេះ ត្រូវគណបក្សប្រជាជនកម្ពុជា រួមទាំងមេដឹកនាំទីក្រុងភ្នំពេញ លោក ហ៊ុន សែន ផង មានមោទនភាពខ្លាំងបំផុត ដែលបានសាងសង់ស្តូបនេះឡើង នៅក្នុងសម័យរបស់លោក ថា ជានិមិត្តរូបសន្តិភាពក្រោយពីបានផ្ដួលរលំរបបខ្មែរក្រហម បានជោគជ័យ។
អ្នកវិភាគ លើកឡើងថា ការសង់ស្តូបនេះ ជាការចង់បង្ហាញឲ្យពលរដ្ឋ និងសហគមន៍អន្តរជាតិ មើលឃើញពីស្នាដៃរបស់គណបក្សកាន់អំណាច ដឹកនាំប្រទេស ទទួលបានជ័យជម្នះ ពីមួយដំណាក់កាលទៅមួយដំណាក់កាល ក្រោមរូបភាពគោលនយោបាយឈ្នះឈ្នះ របស់លោក ហ៊ុន សែន ដែលជាស្នាដៃមួយដ៏អាក្រក់ សម្រាប់បន្សល់ទុកឲ្យក្មេងជំនាន់ក្រោយ ថ្វីត្បិតនយោបាយឈ្នះឈ្នះនេះ ចែងអំពីខ្មែរគ្រប់ភាគីឈ្នះទាំងអស់គ្នាក្ដី ផ្ទុយទៅវិញនយោបាយនេះ បង្កប់នូវភាពពិសពុលកម្ទេចខ្មែរគ្នាឯង ធ្វើឲ្យក្រុមបក្សប្រឆាំង អ្នកមានមតិផ្ទុយពីរដ្ឋាភិបាល និងពលរដ្ឋរងគ្រោះដីធ្លីស្ទើរពេញមួយនគរ រងការឈឺចាប់ ក្រោមរូបភាពអភិវឌ្ឍន៍ផ្សេងៗ។ លើសពីនេះទៀត ក្រុមបក្សពួកលោក ហ៊ុន សែន ដែលជាអ្នកទទួលបានជ័យជម្នះនោះ រស់នៅលើទ្រព្យសម្បត្តិស្ដុកស្ដម្ភ តាមរយៈការប្រព្រឹត្តិអំពើពុករលួយ និងតួនាទី ឋានៈ បុណ្យស័ក្ដិ ដែលធ្វើឲ្យមានគម្លាតអ្នកមាន អ្នកក្រ កាន់តែឆ្ងាយដាច់ពីគ្នា និងអំពើអយុត្តិធម៌នៅក្នុងសង្គម៕
