Tag Archives: វិទ្យុ ​VOA

រដ្ឋាភិបាល ហ៊ុន សែន បង្រ្កាប​បណ្តាញ​សារព័ត៌មាន ជា​ចំណាត់ការ​ចម្បង​ មុន​ការ​បោះឆ្នោត​ជាតិ ឆ្នាំ​២០១៨

1A4-ACC96

ចំណាត់ការ​យ៉ាង​មុតមាំ​ ដោយ​រដ្ឋាភិបាល​កម្ពុជា​ ដឹកនាំ​ដោយ​លោក​នាយករដ្ឋមន្ត្រី​ ហ៊ុន សែន​ ដែល​បាន​កាន់​អំណាច​អស់​រយៈពេល​ជាង​ ៣ ​ទសវត្សរ៍​មក​នេះ កើត​​ឡើង​ បន្ទាប់​ពី​មាន​ការ​កើន​ឡើង ​ការ​គាំទ្រ​បក្ស​ប្រឆាំង ជាពិសេស​ក្នុង​ចំណោម ​អ្នក​បោះឆ្នោត​វ័យ​ក្មេង។

(VOA, 31-8-2017, Ron Corben, ប្រែសម្រួលបន្ថែមដោយ ណឹម សុភ័ក្រ្តបញ្ញា)

បាងកក — ចំណាត់ការ​នាពេលថ្មីៗ​នេះ​ ពី​សំណាក់​រដ្ឋាភិបាល​កម្ពុជា ​ក្នុង​ការ​បង្រ្កាប​បណ្តាញ​ផ្សព្វផ្សាយឯករាជ្យ ដែល​រួម​មាន​វិទ្យុ និង​សារព័ត៌មាន ត្រូវ​បាន​ក្រុម​អ្នក​វិភាគ និង​ក្រុម​សកម្មជន​យល់​ឃើញ​ថា ជា​ចំណាត់ការ​ចម្បង​មួយ​ របស់​រដ្ឋាភិបាល​ ដើម្បី​ពង្រឹង​ការ​គ្រប់គ្រង ​នៅ​មុន​ការ​បោះឆ្នោត​ជាតិ​ នៅ​ឆ្នាំ ២០១៨។

ចំណាត់ការ​យ៉ាង​មុតមាំ​ ដោយ​រដ្ឋាភិបាល​កម្ពុជា​ ដឹកនាំ​ដោយ​លោក​នាយករដ្ឋមន្ត្រី​ ហ៊ុន សែន​ ដែល​បាន​កាន់​អំណាច​អស់​រយៈពេល​ជាង​ ៣ ទសវត្សរ៍​មក​នេះ កើតឡើង​ បន្ទាប់​ពី​មាន​ការ​កើន​ឡើង ​ការ​គាំទ្រ​បក្ស​ប្រឆាំង ជាពិសេស​ ក្នុង​ចំណោម​អ្នក​បោះឆ្នោត​វ័យ​ក្មេង។

ការ​ចោទប្រកាន់​ពី​យុទ្ធនាការ​ រដ្ឋាភិបាល​ ប្រឆាំង​នឹង​ក្រុម​សកម្មជន​សិទ្ធិ​មនុស្ស

ក្រុម​សកម្មជន​សិទ្ធិមនុស្ស​ ក៏​បាន​លើកឡើង​ ពីយុទ្ធសាស្រ្ត​ទូលំទូលាយ​មួយ​ របស់​រដ្ឋាភិបាលប្រឆាំង​ នឹង​បណ្តាញ​ផ្សព្វផ្សាយ និង​ក្រុម​សកម្មជន​សិទ្ធិ​មនុស្ស។

អង្គការ​វេទិកា​អាស៊ាន​ ដើម្បី​សិទ្ធិ​មនុស្ស និង​ការ​អភិវឌ្ឍ​ បាន​ថ្កោលទោស​ការ​វាយប្រហារ​ នា​ពេល​ថ្មីៗ​នេះ​ប្រឆាំង​នឹង​អង្គការ​សង្គមស៊ីវិល និង​បណ្តាញ​ផ្សព្វផ្សាយ។ អង្គការ​វេទិកា​អាស៊ាន​នេះ​ បាន​និយាយ​នៅ​ក្នុង​សេចក្តីថ្លែងការណ៍​មួយ​ថា៖ «វិធានការ​គាប​សង្កត់​ទាំង​នេះ​កើត​ឡើង​ នៅ​ចំ​ចំណុច​របត់​សំខាន់​មួយ​ សម្រាប់​កម្ពុជា និង​បាន​ប៉ះពាល់​យ៉ាង​ខ្លាំង ​ទៅ​លើ​ភាព​ស្របច្បាប់ និង​យុត្តិធម៌​នៃ ​ការ​បោះឆ្នោត​នៅ​ឆ្នាំ​ក្រោយ»។

អង្គការ​នេះ​ ក៏​បាន​លើកឡើង​ ពី​ការ​បាញ់​សម្លាប់​សកម្មជន​មួយ​រូប គឺ​លោក ​កែម ឡី​ ក្នុង​ខែ​កក្កដា កាល​ពី​ឆ្នាំ​មុន​ផង​ដែរ ក៏ដូចជា​ ការ​ឃុំ​ខ្លួន​អ្នក​នយោបាយ ​បក្ស​ប្រឆាំង​ ដទៃ​ទៀត និង​បាន​បន្ថែម​ថា «វប្បធម៌​ភាព​ភ័យខ្លាច ​កំពុង​តែ​រីករាលដាល​ពេញ​ផ្ទៃ​ប្រទេស»។

យុទ្ធនាការ​បង្រ្កាប​ក្នុង​ទម្រង់​ខុសៗ​គ្នា

យុទ្ធនាការ​បង្រ្កាប​បណ្តាញ​ផ្សព្វផ្សាយ​ ​រួម​មាន​ការ​ទាមទារ ​ឲ្យ​បង់ពន្ធ​ក្នុង​ទឹកប្រាក់ ៦,៣ លាន​ដុល្លារ​ ពី​កាសែត​ជា​ភាសា​អង់គ្លេស The Cambodia Daily ដែល​បាន​ចេញ​ផ្សាយ​ចាប់​តាំង​ពី​ឆ្នាំ ១៩៩៣​ មក ដោយ​បង្ខំ​ឲ្យ​កាសែតនេះ​ បញ្ឈប់​ដំណើរការ ប្រសិន​បើ​ មិន​បង់​ប្រាក់​ត្រឹម ​ថ្ងៃ​ទី ០៤ ខែ​កញ្ញា ​ខាង​មុខ​នេះ។

​គោលដៅ​នៃ​ការ​បង្រ្កាប​ដទៃ​ទៀត​ រួម​មាន​វិទ្យុ​ក្នុង​ស្រុក​មួយ​ចំនួន នៅ​កម្ពុជា​ ដែល​ផ្សព្វផ្សាយ​ព័ត៌មាន ​ពី​ វិទ្យុ​អាស៊ី​សេរី និង ​វិទ្យុ​សំឡេង​សហរដ្ឋអាមេរិក (VOA) ដោយ​រដ្ឋាភិបាល​ បាន​អះអាង​ថា វិទ្យុ​ទាំង​ពីរ​នេះ​មិន​មាន​អាជ្ញាប័ណ្ណ​ត្រឹមត្រូវ និង​ចោទ​ប្រកាន់​ថា ការិយាល័យ​វិទ្យុ​ទាំងពីរ​ «មិនបាន​ចុះបញ្ជី» ត្រឹមត្រូវ​ជាមួយ​អាជ្ញាធរ។

នៅ​ចុង​ខែ​សីហា ក្រសួង​ការបរទេសនៅ​កម្ពុជា បាន​បញ្ជា​ឲ្យ​បិទ ​វិទ្យាស្ថានប្រជាធិបតេយ្យ​ជាតិ (NDI) ដែល​ជា​អង្គការ​អន្តរជាតិ​ គាំទ្រ​លទ្ធិ​ប្រជាធិបតេយ្យ​មួយ ដោយ​បញ្ជា​ឲ្យ​បុគ្គលិក​បរទេស​ របស់​អង្គការ​នេះ​ចាកចេញ​ ពី​ប្រទេស​កម្ពុជា មុន​ចុង​ខែ​ សីហា ​នេះ។

​លោក Billy Chai-Lung Tai អ្នក​វិភាគ​ឯករាជ្យ​ផ្នែក​សិទ្ធិមនុស្ស និង​ការ​គ្រប់គ្រង​គម្រោង​ និយាយ​ថា ចំណាត់ការ​ប្រឆាំង​ នឹង​បណ្តាញ​ផ្សព្វផ្សាយ​ព័ត៌មាន​ បាន​ធ្វើ​ឲ្យ​មាន​ការ​កាត់​ផ្តាច់​កាន់​តែ​ខ្លាំង ​រវាង​រដ្ឋាភិបាល និង​បណ្តាញ​ផ្សព្វផ្សាយព័ត៌មាន​ ក៏ដូចជា​ ការ​តស៊ូ​មតិ​ជា​សាធារណៈ។

អ្នក​វិភាគ​និយាយ​ថា ចិន​ជា​កត្តា​នៅ​ពី​ក្រោយ​មួយ

​លោក Chai-Lung Tai បាន​លើកឡើង​ក្នុង​សារអេឡិចត្រូនិច (អ៊ីម៉ែល) មួយ​មក​កាន់ VOA ថា៖ «ជាក់ស្តែង​គឺថា ការ​វាយប្រហារ ​ដើម្បី​ប្រយោជន៍​ កំពុង​កើត​មាន​ហើយ»។ លោក​បាន​បន្ថែម​ថា រដ្ឋាភិបាល​ក៏​លែង​សូវ​មាន​ការ​សម្រប​ខ្លួន​ដូច​មុន​ ចំពោះ​ការ​រក្សា​ «រូបភាព​គាំទ្រ​សិទ្ធិមនុស្ស​ ដើម្បី​បង្ហាញ​ទៅ​ ប្រទេស​ផ្តល់​ជំនួយ​បរទេស​ ត​ទៅ​ទៀត​ហើយ»។

កម្ពុជា​ កំពុង​តែ​ថមថយ​ ក្នុង​ការ​ពឹងផ្អែក​លើ​ ជំនួយ​អភិវឌ្ឍន៍​បរទេស​ ពី​បស្ចឹម​ប្រទេស​ នា​ពេល​ប៉ុន្មាន​ឆ្នាំ​ថ្មីៗ​នេះ ខណៈ​ដែល​សេដ្ឋកិច្ច​ប្រទេសនេះ ​បាន​រីកចម្រើន ហើយ​រដ្ឋាភិបាល​កម្ពុជា ​បាន​ពង្រឹង​ចំណង​កាន់​តែ​ជិតដិត ​ជាមួយនឹង​ប្រទេស ​ចិន។

ការ​លើកឡើង​ផ្សេងៗ​ ដែល​ថា រដ្ឋាភិបាល ​ព្រួយបារម្ភ​ពី​ការ​បោះឆ្នោត

លោក Nathan Thompson ប្រធាន​ក្លឹប​អ្នក​សារព័ត៌មាន​បរទេស នៅ​កម្ពុជា (OPCC) បាន​និយាយ​ថា ការ​បោះឆ្នោត​ឆ្នាំ ២០១៨​ ជា​ហេតុផល​ចម្បង ​នៅ​ក្រោយ​ការ​បង្រ្កាប ​ទៅ​លើ​បណ្តាញ​ផ្សព្វផ្សាយ។ ​

លោក Thompson បាន​ប្រាប់​ VOA តាម​សារអេឡិចត្រូនិច (អ៊ីម៉ែល) ថា៖ «គណបក្ស​កាន់អំណាច​ ព្រួយបារម្ភ​យ៉ាង​ខ្លាំង ​អំពី​ការ​ចាញ់​ការ​បោះឆ្នោត​ នៅ​ឆ្នាំ ២០១៨ ដូច្នេះ​ហើយ ​បាន​ជា​ពួកគេ​ ធ្វើ​ការ​បង្រ្កាប​លើ​គ្រប់​សំឡេង​ប្រឆាំង»។ លោក​ ក៏​បាន​លើកឡើង​ពី​ការ​ទទួល​បាន​សំឡេង​ឆ្នោត​យ៉ាង​ច្រើន​របស់​ បក្ស​ប្រឆាំង​ នៅ​ក្នុង​ការ​បោះឆ្នោត​ឃុំសង្កាត់​ កន្លង​ទៅ​នេះ ដោយនិយាយ​ថា លទ្ធផល​ពី​ការ​បោះឆ្នោត​ឃុំសង្កាត់ «ត្រឹម​តែធ្វើ​ពួកគេ ព្រួយបារម្ភកាន់​តែ​ខ្លាំង​ឡើង​ប៉ុណ្ណោះ»។ លោក​បាន​និយាយ​ថា ក៏​មាន​ការ​ព្រួយបារម្ភ​ថា រដ្ឋាភិបាល​កម្ពុជា ​ប្រហែល​ត្រូវ​ពង្រឹង​ច្បាប់​ទិដ្ឋាការ និង​អាជ្ញាប័ណ្ណ​ការងារ ដោយ​ការណ៍​នេះ​នឹង​ធ្វើឲ្យ​កាន់តែ​ងាយស្រួល ​ចំពោះរដ្ឋាភិបាល​ ក្នុង​ការ​បដិសេធ​ទិដ្ឋាការ ​សម្រាប់​ទាំង​អ្នកសារព័ត៌មាន ​មិន​ក្រោម​អង្គភាព​ណាមួយ និង​ទាំង​អ្នកឆ្លើយឆ្លង​ព័ត៌មាន​បរទេស។

​អង្គការ​ឃ្លាំមើល​សិទ្ធិ​មនុស្ស​ ចោទប្រកាន់​រដ្ឋាភិបាល​ថា ចង់​បង្រ្កាបក្រុម​អ្នក​រិះគន់

អនុប្រធាន​ អង្គការ​ឃ្លាំ​មើល​សិទ្ធិ​មនុស្ស ​លោក Phil Robertson បាន​និយាយ​ថា រដ្ឋាភិបាល​កំពុង​តែ​បង្ហាញ​ភាព​ផ្តាច់ការ ដើម្បី​គ្រប់គ្រង​លើ​បណ្តាញ​ផ្សព្វផ្សាយ និង​ «កម្ចាត់» មេដឹកនាំ​នានា​ ក្នុង​ជួរ​បក្ស​ប្រឆាំង និង​អង្គការ​ក្រៅ​រដ្ឋាភិបាល​ ដែល​រិះគន់​មក​លើ​ខ្លួន តាមរយៈ «ការ​ចោទប្រកាន់​ ពី​បទឧក្រិដ្ឋ​មិន​ពិត ដែល​ត្រូវ​វិនិច្ឆ័យ​ដោយ​ចៅក្រម​ ជិតដិត​នឹង​ [លោក​នាយករដ្ឋមន្រ្តី]»។

លោក​ Robertson បាន​និយាយ​ថា យុទ្ធសាស្រ្ត​របស់​លោក ហ៊ុន សែន​ គឺ «បន្ទុចបង្អាក់​គ្រប់​បណ្តាញ​ផ្សព្វផ្សាយ​ឯករាជ្យ​ ដែល​នៅ​សេសសល់​នានា មិនថា​ជា វិទ្យុ ឬ​សារព័ត៌មាន មុនពេល​ធ្វើ​យុទ្ធនាការ​ឃោសនា ​សម្រាប់​ការ​បោះឆ្នោត​នៅ ​ខែ ​កក្កដា ឆ្នាំ​២០១៨»។ Read more

Advertisements

ប៉ាង សុខឿន៖ ស្អីគេទៅជា NDI រៀបចំផែនការផ្តួលរំលំរដ្ឋាភិបាល ហ៊ុន សែន? CPP ពិតជាមិនថ្លៃថ្នូរសោះ!

21015823_1364334320354377_4914115636251646839_o

រដ្ឋាភិបាល ហ៊ុន​ សែន បញ្ជាបិទវិទ្យាស្ថានប្រជាធិបតេយ្យ (NDI) របស់អាមេរិក នៅថ្ងៃទី២៤ ខែសីហា ឆ្នាំ២០១៧ នេះ បន្ទាប់ពីលោក ហ៊ុន សែន ចោទប្រកាន់ថា វិទ្យាស្ថានេះ ជួយគណបក្សប្រឆាំង CNRP ក្នុងផែនការផ្តួលរំលំរដ្ឋាភិបាល {តាមរយៈការបោះឆ្នោតពេលខាង}។ ស្របពេលជាមួយគ្នានេះ រដ្ឋាភិបាល ហ៊ុន សែន ក៏បានព្រមានបិទកាសែត The Cambodia Daily របស់អាមេរិក ក្នុង​បទចោទ​ប្រកាន់រឿងមិនបង់ពន្ធដារ ១០ឆ្នាំមកនេះ។ ដូចគ្នានេះដែរ រដ្ឋាភិបាល បញ្ជាឲ្យផ្អាក ការផ្សាយបន្ត របស់វិទ្យុ VOA និង RFA តាមវិទ្យុក្នុងស្រុក កាលពីថ្ងៃទី២៣ ខែសីហា ម្សិលមិញ។

ក្រុមអ្នកវិភាគ និងអ្នកសង្កេតការណ៍នយោបាយខ្មែរ មើលឃើញថា បក្សកាន់អំណាច CPP របស់ ហ៊ុន សែន បើកយុទ្ធនាការកំចាត់អង្គការ ស្ថាប័នប្រជាធិបតេយ្យ និង អង្គភាពសារព័ត៌មានខាងលើនេះ ក្នុងបំណងបំបិទសេរីភាព ទទួលព័ត៌មានរបស់ពលរដ្ឋ និង បង្កភាពអាប់អួរស្ថានភាពការបោះឆ្នោតជាតិ ឆ្នាំ២០១៨ {CPP បារម្ភខ្លាចចាញ់ការបោះឆ្នោត ដូច្នេះត្រូវរៀបចំអំពើទុច្ចរិតរបស់ខ្លួន}។ (អត្ថបទដោយ ម៉ែន ណាត /ថ្ងៃទី២៤ សីហា ២០១៧)


អត្ថបទដោយ ប៉ាង សុខឿន (ហេ្វសប៊ុក៖ ខ្មែរ សុវណ្ណភូមិ)៖ ព័ត៌មានបក្សកាន់អំណាច CPP ថាជាបែកធ្លាយព័ត៌មាន ពីខាងក្នុង NDI ធ្វើឲ្យរដ្ឋាភិបាល សម្រេចបិទទ្វារអង្គការនេះ ដោយចោទអង្គការនេះថា មានផែនការរួមគ្នា ជាមួយគណបក្សប្រឆាំង ដើម្បីផ្តួលរំលំរដ្ឋាភិបាលកម្ពុជា។ តាមពិតទៅ វាមិនមែនជាការបែកធ្លាយស្អីទេ តាមពិតវាផែនការនោះ គេហៅថា គំរោងការងារប្រចាំឆមាស ឬប្រចាំឆ្នាំរបស់អង្គការតែប៉ុណ្ណោះ គឺអង្គការណា ក៏ធ្វើបែបនេះដែរ ចំពោះការចោទនោះវិញគឺខុសស្រឡះ ពីព្រោះ ហ៊ុន សែន ឬរដ្ឋាភិបាលអាយ៉ងយួន ផ្តោតលើកម្មវិធីរៀបចំអប់រំបណ្តុះបណ្តាលមន្រ្តី ឬសកម្មជនបក្សប្រឆាំង និងបក្សតូចៗ ៣ ផ្សេងទៀត រួមទាំងបក្សប្រជាជន ចូលរួមផងដែរ ក្នុងវគ្គបណ្តុះបណ្តាល «អំពីភាពជាអ្នកដឹកនាំ ការរៀបចំផែនការដឹកនាំ ផែនការគ្រប់គ្រង ផែនការអភិវឌ្ឍន៍មូលដ្ឋាន» ។ល។ នេះបើតាមបទសម្ភាសន៍វិទ្យុអាស៊ីសេរី ជាមួយ ប្រធានអង្គការ NDI។ ហ៊ុន សែន បែរជាយកលេសនេះថា ជាផែនការក្បត់ ជាផែនការបដិវត្តិន៍ សម្រាប់ផ្តួលរំំរដ្ឋាភិបាលឯណាស្កុយទៅវិញ។

ក្រៅពីគំរោងបណ្តុះបណ្តាលទាំងនេះ វិទ្យាស្ថាន NDI ក៏មានរៀបចំវេទិកាជជែកពិភាក្សារតុមូល រវាងគណបក្សនយោបាយ មុនរាល់ការបោះឆ្នោត និង វេទិការាស្រ្ត និងអ្នកតំណាងរាស្រ្តផងដែរ។ កម្មវិធីបណ្តុះបណ្តាលអ្នកនយោបាយ សកម្មជនបក្សនយោបាយ និងមន្រ្តីរដ្ឋាភិបាល ឬបក្សប្រឆាំងនេះ មានតាំងឆ្នាំ ២០០០ មកម្ល៉េះ ហើយ{ខ្ញុំ} ខ្មែរ សុវណ្ណភូមិ ក៏ធ្លាប់បានចូលរួមដែរ លើវគ្គបណ្តុះបណ្តាល «យុវជន និងភាពជាអ្នកដឹកនាំ ក្នុងកិច្ចការនយោបាយ»។

និយាយរួម ការបិទអង្គការនេះ គឺជាការខាតបង់សេដ្ឋកិច្ចខ្មែរ រាប់លានដុល្លាក្នុង ១ ឆ្នាំ ដែលអង្គការនេះ យកមកចំណាយ នៅលើទឹកដីខ្មែរ និងបង្កើនចំណេះដឹង ដល់ពលរដ្ឋខ្មែរ រួមទាំងការងារផង។ ផ្ទុយទៅវិញ ផែនការរបស់ ហ៊ុន សែន គឺចង់ទាញកម្ពុជា ទៅរកកុម្មុយនីស្ត ដូច យួន ឬកូរ៉េខាងជើងសុទ្ធសាធ ហើយជានយោបាយ មនោគមន៍វិជ្ជា យួន ឲ្យខ្មែរ ស្អប់អាមេរិក និងបន្តដឹងគុណបក្សប្រជាជន និង យួន តទៅទៀតតែប៉ុណ្ណោះ៕

King Father-PM Hun Sen-001

ក្រសួងការបេទេសសហរដ្ឋអាមេរិក​ ស្នើ​ឲ្យ​កម្ពុជា ​កុំ​បណ្តេញ​អង្គការ និង​សារព័ត៌មាន​ឯករាជ្យ

13EBBBF0-E42A-46D5-B1A4-ACC960BCDF99_w650_r0_s

អ្នកនាំពាក្យក្រសួងការបរទេសសហរដ្ឋអាមេរិក (USA) លោកស្រី Heather Nauert ធ្វើសន្និសីទសារព័ត៌មាន អំពីស្ថានភាពតានតឹងនយោបាយនៅកម្ពុជា ដែលរដ្ឋាភិបាល ហ៊ុន សែន បានព្រមានបិទ វិទ្យាស្ថានជាតិប្រជាធិបតេយ្យ (NDI) និង កាសែត The Cambodia Daily ហើយរឹតបន្តឹងលើសេរីភាព នៃការបញ្ចេញមតិ និង អង្គការសង្គមស៊ីវិល មុនការបោះឆ្នោតជាតិ ឆ្នាំ ២០១៨។ វិទ្យុ VOA Khmer និងវិទ្យុ RFA Khmer ក៏ត្រូវបានរដ្ឋាភិបាលបញ្ជាឲ្យផ្អាក ការផ្សាយបន្ត ជាមួយវិទ្យុក្នុងស្រុក កាលពីថ្ងៃទី ២៣ ខែសីហា ឆ្នាំ២០១៧។ (ដោយ ម៉ែន ណាត)


អាមេរិក​ ស្នើ​ឲ្យ​កម្ពុជា ​កុំ​បណ្តេញ​អង្គការ និង​សារព័ត៌មាន​ឯករាជ្យ

(VOA, ដោយ សុខ ខេមរា, 24-8-2017)

ក្រសួង​ការ​បរទេស​សហរដ្ឋ​អាមេរិក ​បាន​ជំរុញ​ឲ្យ​រដ្ឋាភិបាល​ប្រទេស​កម្ពុជា ​អនុញ្ញាត​ឲ្យ​អង្គការ និង​សាព័ត៌មាន​ឯករាជ្យ បន្ត​កិច្ចការ​របស់​ពួកគេ ​ដើម្បី​លទ្ធិប្រជាធិបតេយ្យ។ ការ​ទទូច​ដូច្នេះ​កើត​ឡើង ក្រោយ​ពេល​ដែល​រដ្ឋាភិបាល​កម្ពុជា ​ព្រមាន​បណ្តេញ​អង្គការ​របស់ សហរដ្ឋអាមេរិក (ស.រ.អា) និង ​សារព័ត៌មាន​ឯករាជ្យ​មួយ​ចំនួន ​ចាកចេញ​ពី​ប្រទេស​កម្ពុជា ​ដោយ​ហេតុផល​ផ្សេងៗ។

ក្រសួង​ការបទេស ​ស.រ.អា.បាន​ជំរុញ​ឲ្យរដ្ឋាភិបាល​កម្ពុជា​ បន្ត​ច្បាប់​ជូន​អង្គការ​ឯករាជ្យ​នានា​ សារព័ត៌មាន​ឯករាជ្យ​នានា​ ដូចជា​វិទ្យាស្ថាន​ជាតិ​ប្រជាធិបតេយ្យ​ (NDI) របស់​ ស.រ.អា.​ និង​កាសែត ​The Cambodia ​Daily ​ជាដើម ​ដោយ​មិន​ត្រូវ​បណ្តេញ​ចេញ​ ឬ​បញ្ឈប់​សកម្មភាព​ពួកគេ​ទេ។​ ការនេះ​គឺ​ដើម្បី​ធានា​ភាព​សេរី និង​យុត្តិធម៌​សម្រាប់​ការ​បោះ​ឆ្នោត។​ អ្នកនាំពាក្យ​ក្រសួងការ​បរទេស​អាមេរិក​ម្នាក់ ​គឺ​អ្នកស្រី ​Heather Nauert ​បាន​ទទូច​តាម​ខ្លឹមសារ​ដើម​ថា៖

«យើង​ជំរុញ​ឲ្យ​រដ្ឋាភិបាល​ អនុញ្ញាត​ឲ្យ​អង្គការ​ វិទ្យាស្ថានជាតិ​ប្រជាធិបតេយ្យ ​NDI និង ​កាសែត​ The Cambodia Daily ​ហើយនឹង​អង្គការ​ព័ត៌មាន ​និង​ក្រុម​អង្គការ​សង្គម​ស៊ីវិល​ឯករាជ្យ​ផ្សេងទៀត ​បន្ត​សកម្មភាព​ដ៏​មាន​សារៈសំខាន់​របស់​ពួកគេ។ ដូច្នេះ​ ការ​បោះឆ្នោត​ជាតិ​ នៅឆ្នាំ​ ២០១៨ ​អាចប្រពឹត្ត​ទៅ​ដោយ​មាន​បរិយាកាស​សេរី និង​បើក​ទូលាយ‍»។

បើតាម​សេចក្តី​ប្រកាស​ព័ត៌មាន ​របស់​ក្រសួង​ការបរទេស​ ដែល​ចេញ​ផ្សាយ​នៅថ្ងៃពុធ​ ទី២៣​ ខែសីហា​នេះ​ ឱ្យដឹងថា​ អាជ្ញាធរ​កម្ពុជា​សម្រេច​បញ្ឈប់​សកម្មភាព​របស់​ វិទ្យាស្ថាន​ជាតិ​ប្រជាធិបតេយ្យ ​(NDI)​ ទាំងស្រុង​ក្នុង​ប្រទេស​ ដើម្បី​ធានា​ការអនុវត្តន៍​ត្រឹមត្រូវ​ និង​ប្រសិទ្ធ​ភាពច្បាប់​ ពង្រឹង​នីតិរដ្ឋ ​និង​គោរព​អធិបតេយ្យ​ភាព​របស់​កម្ពុជា។​ ក្រសួងការ​បរទេស​កម្ពុជា​ ដែល​ទុក​រយៈពេល​ ៧ ថ្ងៃ​ ដល់​អង្គការ​នេះ បាន​យោង​ថា អង្គការ​នេះ​បានធ្វើ​សកម្មភាព​មិនស្រប​ច្បាប់ បន្ថែមពីលើការចោទ​ប្រកាន់​ដែលថា អង្គការនេះ​ធ្វើសកម្មភាព​ប៉ុនប៉ង ​ផ្តួល​រំលំរដ្ឋាភិបាល។

បន្ថែម​លើនេះ​លោក​នាយក​រដ្ឋមន្ត្រី ​ហ៊ុន សែន​ បាន​ព្រមាន​បណ្តេញ​ចេញ​កាសែត​ The Cambodia Daily​ ដែល​ជា​កាសែត​ឯករាជ្យ​មួយ​ថា​ មិន​បាន​បង់​ពន្ធ ​ជូន​រដ្ឋ​អស់​រយៈពេល​ ១០ ឆ្នាំ​ ទោះបីជា​កាសែតនេះ​ ទាមទារ​ឲ្យមាន​ការ​ធ្វើ​សវនកម្ម និង​ត្រួត​ពិនិត្យ​ដោយ​តម្លាភាព ​តាម​ច្បាប់​ជាមុន​ក្តី។​ កាសែត​នេះ ​ត្រូវបាន​រដ្ឋាភិបាល ​ទុក​ឳសានវាទ​ បង់ពន្ធ​នូវ​ចំនួន​ទឹកប្រាក់​ ៦ លាន​ ៣ សែនដុល្លារ​ ត្រឹមថ្ងៃ​ទី ៤ ខែកញ្ញា​ ខាងមុខ។

ទោះជា​យ៉ាងណា​ក៏ដោយ ​ក្រសួងការ​បរទេស​ ស.រ.អា ​សម្តែង​ក្តីបារម្ភ​យ៉ាង​ខ្លាំង ​ចំពោះ​បរិយាកាស​ប្រជាធិបតេយ្យ​ ក្នុង​ប្រទេស​កម្ពុជា ​ក្នុងរយៈ​ពេល​ប៉ុន្មាន​សប្តាហ៍​ថ្មីៗនេះ​ នៅពេល​ដែល​កម្ពុជា ​បាន​ប្រែក្លាយ​ពី​ប្រទេស ​ដែល​មាន​ការ​ទទួល​ស្គាល់​ថា​ បាន​រៀបចំ​ការ​បោះឆ្នោត​ ឃុំសង្កាត់ ​ដោយ​តម្លាភាព ​និង​អហិង្សា​ ទៅកាន់​សកម្មភាព​ដែល​បន្ថយ​សេរីភាព​ព័ត៌មាន និង ​ប្រតិបត្តិការ​របស់​ អង្គការ​សង្គម​ស៊ីវិល។

លោកស្រី​ Heather Nauert ​បាន​បញ្ជាក់​ថា​ រឿង​នោះ​ គឺ​កើត​ឡើង​ដោយ​ការ​សម្រេច​ចិត្ត ​របស់​រដ្ឋាភិបាល​ ក្នុងការ​បណ្តេញ​អង្គការ ​NDI ​កាលពីថ្ងៃ​ទី២៣ ​ខែសីហា​ពី​កម្ពុជា​ របាយកាណ៍​ស្តី​អំពី​ការបិទ​វិទ្យុ​ដែល​មាន​សម្ព័ន្ធភាព​ ជាមួយ​គណបក្ស​ជំទាស់​ ហើយនឹង​ការ​ស៊ើប​អង្កេត​ពន្ធ​ លើ​សារព័ត៌មាន​ និង​អង្គការ​ឯករាជ្យ រួមទាំង​កាសែត ​The Cambodia Daily ​វិទ្យុ​សំឡេងស.រ.អា ​VOA​ វិទ្យុ​អាស៊ី​សេរី (RFA) ​ហើយនឹង​អង្គការ​នានា​ ដូចជា​អង្គការ​អាដហុក​ អង្គការ​ខុមហ្វ្រែល​ជាដើម។

លោកស្រី​បាន​បន្ត​ថា​ រដ្ឋមន្ត្រី​ក្រសួងការ​បរទេស ​Rex Tillerson បាន​ពិ​ភាក្សា​ជាមួយ​សមភាគី​កម្ពុជា​ របស់​លោក ​កាលពី​ខែមុន​ និង​សប្តាហ៍​ថ្មី ​ហើយ​ឯកអគ្គរដ្ឋ​ទូត​ ស.រ.អា. ​ប្រចាំ​កម្ពុជា ​ក៏បាន​ពិភាក្សា​ជាមួយ​ អគ្គនាយកដ្ឋាន​ពន្ធដារ​ និង​នាយក​រដ្ឋ​មន្ត្រី ហ៊ុន សែន ​ផងដែរ​អំពី​បញ្ហា​កម្ពុជា។ «មាន​កិច្ចពិភាក្សា​ជាច្រើន​ នៅ​ពី​ក្រោយ​ឆាក ​ដែល​យើង​ បាន​ធ្វើ​តាមរយៈ​ការទូត​ ក្នុង​កិច្ច​ប្រជុំ​បិទទ្វារ​ ពីព្រោះ​នៅក្នុង​ប្រទេស​ខ្លះ​ ការធ្វើ​ដូច្នេះ​ ជា​វិធី​ដែល​មាន​ប្រសិទ្ធភាព​ សម្រាប់​រដ្ឋាភិបាល​នានា​ ដើម្បី​ធ្វើ​កិច្ចការ​ផ្សេងៗ។​ ដូច្នេះ​យើងនឹង​បន្ត​កិច្ចពិភាក្សា​គ្នា‍»។

លោក​ស្រី​ថ្លែង​ដូច្នេះ ក្រោយ​ពេល​ដែល​មាន​ការ​លើក​សំណួរ​ថា​ ប្រសិន​បើ​កម្ពុជា​ មិន​ព្រម​ធ្វើ​តាម តើ​នឹង​មាន​ផលវិបាក​អ្វី​កើត​ឡើង។ លោកស្រី​ បាន​បន្ថែម​ថា លោកស្រី ​មិនចង់​ទស្សន៍ទាយ​ពី​ការណ៍​នោះ​ទេ។ តែ​លោកស្រី​ថា ស.រ.អា នៅមាន​កិច្ចពិភាក្សា​បន្ត។

ប្រទេស​កម្ពុជា​ នឹង​ធ្វើការ​បោះឆ្នោត​ជាតិ​ នៅខែ​ កក្កដា​ ឆ្នាំ ​២០១៨ ​ខាងមុខ​ ក្រោយពី​ការ​បោះឆ្នោត​ជ្រើសរើស​ក្រុមប្រឹក្សា​ឃុំសង្កាត់​ បាន​ធ្វើ​រួច​ កាល​ពីខែ ​មិថុនា។​ ការ​បោះឆ្នោត​ជ្រើសរើស​ក្រុមប្រឹក្សា​ឃុំសង្កាត់​ ដែល​មាន​លក្ខណៈ​សេរី ​យុត្តិធម៌ ​អាច​ទទួល​យក​បាន​នោះ​ បាន​ធ្វើឲ្យ​ គណបក្ស​ជំទាស់​ កើន​សំឡេង​យ៉ាង​ខ្លាំង​ ពី​ចំនួន​ក្រុម​ប្រឹក្សា​ឃុំសង្កាត់​ជាង​ ៤០​ មក​ដល់​ជិត ៥០០​ ក្នុង​ចំណោម​ជាង ១៦០០ ​ឃុំសង្កាត់ ​សរុប​នៅ​ទូទាំង​ប្រទេស​ ជាពិសេស​គណបក្ស​ជំទាស់​ បាន​ឈ្នះ ​នៅក្នុង​តំបន់​សេដ្ឋកិច្ច​សំខាន់ៗ ​សឹងពាស​ពេញ​ប្រទេស៕