Tag Archives: សុខ ឥសាន

មហាក្សត្រ នរោត្តម សីហមុនី ចាត់តាំងលោក ហ៊ុន សែន បន្តជានាយករដ្ឋមន្រ្តី យ៉ាងប្រញាប់ប្រញាល់ ជារឿង​រំលោភ​រដ្ឋធម្មនុញ្ញ

កាលពីថ្ងៃទី១៥ ខែសីហា ឆ្នាំ​២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសលទ្ធផល​នៃ​ការបោះឆ្នោតជាផ្លូវការ ថា គណបក្សប្រជាជនកម្ពុជា របស់លោក ហ៊ុន សែន ឈ្នះការបោះឆ្នោត ១២៥ អាសនៈ លើ ១២៥ នៃអាសនៈរដ្ឋសភាទាំងអស់ ស្របពេលដែលគណបក្សប្រឆាំង CNRP និងក្រុមប្រទេសលោកសេរី បានហៅការបោះឆ្នោតនៅកម្ពុជា ជាការបោះឆ្នោតក្លែងក្លាយ និងគួរឲ្យអាមាស ដែលជាការសម្លាប់លទ្ធិប្រជាធិបតេយ្យ។

ព្រះមហាក្សត្រ នរោត្តម សីហមុនី តែតាំងលោក ហ៊ុន សែន បន្តជានាយករដ្ឋមន្រ្តី មុនពេលរដ្ឋសភា ចូលប្រជុំដំបូង និងមុនពេលសមាជិកសភាថ្មី ចូលស្បថសច្ចាប្រនិធាន។ នោះលោក ហ៊ុន សែន មិនត្រឹមតែ​យក​ស្ថាប័នព្រះមហាក្សត្រ ទៅលេងសើចប៉ុណ្ណោះទេ ប៉ុន្តែថែមទាំងរំលោភរដ្ឋធម្មនុញ្ញ និងច្បាប់បទដ្ឋាននានាតាមអំពើចិត្ត។ (អត្ថបទបន្ថែមដោយ ម៉ែន ណាត)


HunSen

ព្រះមហាក្សត្រ​ត្រាស់​បង្គាប់​តែងតាំង​លោក ហ៊ុន សែន ឲ្យ​បន្ត​កាន់​អំណាច

(ដោយវិទ្យុអាស៊ីសេរី  RFA Khmer/ 17-8-2018)

ព្រះមហាក្សត្រ​ចេញ​ព្រះរាជក្រឹត្យ​ចាត់តាំង លោក ហ៊ុន សែន ឲ្យ​ដឹកនាំ​សមាសភាព​គណៈរដ្ឋមន្ត្រី​ថ្មី នៃ​របប​ក្រុងភ្នំពេញ តាម​សំណើ​របស់​ព្រឹទ្ធិ​សមាជិក​រដ្ឋសភា លោក ហេង សំរិន និង​សំណើ​របស់​គណបក្ស​ប្រជាជន​កម្ពុជា។ អ្នកនាំពាក្យ​បក្ស​ប្រជាជន​កម្ពុជា ថា បើទោះជា​មិនទាន់​បង្កើត​រដ្ឋសភា​អាណត្តិ​ទី​៦ ក៏​គណបក្ស​កាន់អំណាច​មាន​លទ្ធភាព ស្នើ​ព្រះមហាក្សត្រ តាម​ផ្លូវ​រដ្ឋធម្មនុញ្ញ​បន្ថែម​បាន​ដែរ។ ប៉ុន្តែ សំណើ​របស់​បក្ស​កាន់អំណាច និង​សំណើ​របស់​លោក ហេង សំរិន ដែល​សុំ​ចាត់តាំង​នាយករដ្ឋមន្ត្រី មុន​បង្កើត​រដ្ឋសភា​បែបនេះ មិន​ស្របតាម​មាត្រា​១១៩​ថ្មី នៃ​រដ្ឋធម្មនុញ្ញ​ឡើយ។

អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន្ដ អះអាង​ថា ការ​ចេញ​ព្រះរាជក្រឹត្យ​របស់​ព្រះមហាក្សត្រ គឺ​ជា​រឿង​ត្រឹមត្រូវ ព្រោះ​គណបក្ស​កាន់អំណាច បាន​ប្រើប្រាស់​មាត្រា​៤ នៃ​រដ្ឋធម្មនុញ្ញ​បន្ថែម សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ ដើម្បី​ទៅ​ព្រះមហាក្សត្រ ឲ្យ​ចាត់​តាំង​លោក ហ៊ុន សែន ជា​នាយករដ្ឋមន្ត្រី។ «»

ព្រះមហាក្សត្រ ព្រះបាទ សម្ដេច​ព្រះ បរមនាថ នរោត្តម សីហមុនី នៅ​ថ្ងៃ​ទី​១៧ សីហា បាន​ចេញ​ព្រះរាជក្រឹត្យ ត្រាស់បង្គាប់​ចាត់តាំង លោក ហ៊ុន សែន ជា​នាយករដ្ឋមន្ត្រី។ ព្រះរាជក្រឹត្យ​នេះ គឺ ធ្វើឡើង​ភ្លាមៗ បន្ទាប់ពី​គណបក្ស​ប្រជាជន​កម្ពុជា បាន​ដាក់​សំណើ​នៅ​ថ្ងៃ​ទី​១៧ សីហា ដែរ ដើម្បី​ស្នើសុំ​ចាត់តាំង​នាយករដ្ឋមន្ត្រី សម្រាប់​នីតិកាល​ទី​៦ និង​តាម​សំណើ​របស់​សមាជិក​រដ្ឋសភា​ចាស់​ជាងគេ គឺ​លោក ហេង សំរិន។

ឆ្លើយ​តប​នឹង​ការ​តែងតាំង​នេះ លោក ហ៊ុន សែន ទូល​ព្រះមហាក្សត្រ​ថា លោក​នឹង​រៀបចំ​សមាសភាព​របប​ថ្មី​បញ្ជូន​ទៅ​ព្រឹទ្ធសមាជិក​រដ្ឋសភា នីតិកាល​ទី​០៦ ដើម្បី​សុំ​ការ​ផ្តល់​សេចក្តី​ទុកចិត្ត ពី​សមាជិក សមាជិកា​នៃ​រដ្ឋសភា ដែល​នឹង​ប្រជុំ​នៅ​ថ្ងៃ​ទី៦ ខែ​កញ្ញា ឆ្នាំ​២០១៨ ខាងមុខនេះ។ ក្នុង​លិខិត​តប​ថ្វាយ​ព្រះមហាក្សត្រ លោក ហ៊ុន សែន សន្យា​ថា លោក​នឹង​ខិតខំ​ឲ្យ​អស់​ពី​កម្លាំង​កាយ​ចិត្ត និង​ស្មារតី ដើម្បី​បម្រើ​ជាតិ មាតុភូមិ​កម្ពុជា។

សំណើ​របស់​បក្ស​កាន់អំណាច និង​សំណើ​របស់លោក ហេង សំរិន ដែល​សុំ​ចាត់តាំង​នាយករដ្ឋមន្ត្រី មុន​បង្កើត​រដ្ឋសភា​បែបនេះ មិន​ស្របតាម​មាត្រា​១១៨​ ថ្មី នៃ​រដ្ឋធម្មនុញ្ញ​ទេ។ វាក្យ​ខណ្ឌ​ទី​២ នៃ​មាត្រា​១១៨​ថ្មី ចែងថា តាម​សេចក្ដីស្នើ​ពី​ប្រធាន ដោយ​មាន​មតិ​ឯកភាព​ពី​អនុប្រធាន​ទាំងពីរ​នៃ​រដ្ឋសភា ព្រះមហាក្សត្រ​ទ្រង់​ចាត់តាំង​វរជន​មួយ​រូប ក្នុងចំណោម​តំណាងរាស្ត្រ​នៃ​គណបក្ស​ដែល​ឈ្នះ​ឆ្នោត​ឱ្យ​បង្កើត​រាជរដ្ឋាភិបាល។

ប៉ុន្ដែ ការ​បង្កើត​គណៈរដ្ឋមន្ត្រី​ថ្មី នៃ​របប​ក្រុងភ្នំពេញ​លើក​នេះ គណបក្ស​កាន់អំណាច​នៅ​តែ​ប្រើប្រាស់​តាម​មាត្រា​៤ នៃ​រដ្ឋធម្មនុញ្ញ​បន្ថែម សំដៅ​ធានា​នូវ​ដំណើរការ​ប្រក្រតី​នៃ​ស្ថាប័ន​ជាតិ ដែល​ត្រូវ​បាន​អនុម័ត​កាលពី​ថ្ងៃ​ទី​០៨ ខែ​កក្កដា ឆ្នាំ​២០០៤ ដែល​ជា​ច្បាប់​ដ៏​ចម្រូងចម្រាស ចុះ​ហត្ថលេខា ដោយ​ប្រធាន​រដ្ឋ​ស្ដីទី លោក ញឹក ប៊ុនឆៃ។

មាត្រា​៤ នៃ​រដ្ឋធម្មនុញ្ញ​បន្ថែម ចែងថា តាម​សេចក្ដីស្នើ​ពី​គណបក្ស​នយោបាយ ដែល​មាន​អាសនៈ​ច្រើន​ជាងគេ​ក្នុង​រដ្ឋសភា តាមរយៈ​ព្រឹទ្ធិ​សមាជិក​រដ្ឋសភា ព្រះមហាក្សត្រ​ទ្រង់​ចាត់តាំង​វរជន​មួយ​រូប ក្នុង​ចំណោម​តំណាងរាស្ត្រ នៃ​គណបក្ស​នយោបាយ​ឈ្នះ​ឆ្នោត ឲ្យ​បង្កើត​រាជរដ្ឋាភិបាល។

រដ្ឋធម្មនុញ្ញ​បន្ថែម​នេះ ត្រូវ​បាន​អ្នកវិភាគ​យល់ថា ជា​ច្បាប់​ដ៏​ចម្រូងចម្រាស ដែល​គណបក្ស​ប្រជាជន​កម្ពុជា បង្កើត​ឡើង ក្រោយ​ជាប់​គាំង​នយោបាយ នៅ​ឆ្នាំ​២០០៣ និង​ដោយសារ​ភាព​មិន​ទុកចិត្ត​គ្នា នៅ​ក្នុង​ជួរ​គណបក្ស​ប្រជាជន​កម្ពុជា ដែល​កាលណោះ មាន លោក ជា ស៊ីម ជា​ប្រធាន​គណបក្ស។

លោក​មេធាវី ផែង ហេង រំលឹក​ថា កាល​រដ្ឋធម្មនុញ្ញ​បន្ថែម អនុម័ត​រួច ក្នុង​រាជ​ព្រះបាទ នរោត្តម សីហនុ សមាជិក​រដ្ឋសភា ធ្លាប់​ប្រើប្រាស់​វិធីសាស្ត្រ​បែប​នេះ ម្ដង​ហើយ។ «»

កាលណោះ សមាសភាព​សមាជិក​រដ្ឋសភា មាន​៣​គណបក្ស គឺ មក​ពី​កូតា បក្ស​ប្រជាជន​កម្ពុជា បក្ស​សម រង្ស៊ី និង​បក្ស​ហ៊្វុនស៊ិនប៉ិច។ អ្នកវិភាគ​ថា កាលណោះ ដោយសារ​មាន​ភាព​ជាប់​គាំង​នយោបាយ នៅ​ឆ្នាំ​២០០៣ គណបក្ស​ប្រជាជន​កម្ពុជា ត្រូវ​ធ្វើ​ជា​រដ្ឋាភិបាល​ចាំផ្ទះ​ជាង​មួយ​ឆ្នាំ ទើប​បង្កើត​ច្បាប់​ចម្រូងចម្រាស​នេះ​ឡើង កាលពី​ឆ្នាំ​២០០៤ ហើយ​ដោយ​សារ ការ​មិន​ទុក​ចិត្ត​គ្នា ក្នុង​ជួរ​បក្ស​កាន់អំណាច និង​ភាព​មិន​ទុកចិត្ត​គ្នា ក្នុង​ការ​សន្យា​បង្កើត​រដ្ឋាភិបាលចម្រុះ រវាង​គណបក្ស​ប្រជាជន​កម្ពុជា និង​គណបក្ស​ហ៊្វុនស៊ិនប៉ិច ទើប​មានការ​បង្កើត​រដ្ឋធម្មនុញ្ញ​នេះ​ឡើង៕39303874_224177691587881_86793154384101376_n

Advertisements

របប ហ៊ុន សែន ប្រតិកម្មធ្ងន់ៗប្រឆាំង ក្រុមប្រឹក្សាឃ្លាំមើលកម្ពុជា ហើយ​ចោទថា «ឧទ្ទាម និងធ្វើសកម្មភាព​ភេរវកម្ម» ប៉ុន្តែត្រូវបានច្រានចោល

Captureewrer

របប ហ៊ុន សែន ប្រតិកម្មធ្ងន់ៗប្រឆាំង ក្រុមប្រឹក្សាឃ្លាំមើលកម្ពុជា ហើយចោទប្រកាន់ថា «ជាក្រុមឧទ្ទាម និង ធ្វើសកម្មភាពភេរវកម្ម»។ ប៉ុន្តែនៅថ្ងៃទី២៣ ខែកុម្ភៈ ឆ្នាំ២០១៨ នេះ ក្រុមប្រឹក្សាឃ្លាំមើលកម្ពុជា លោក ម៉ែន ណាត បានច្រានចោលការចោទប្រកាន់នានាពីរបប ហ៊ុន សែន ហើយថារបប ហ៊ុន សែន បានក្លាយជារបបខុសច្បាប់ តាំងពីថ្ងៃទី១៦ ខែវិច្ឆិកា ឆ្នាំ២០១៧ ខណៈពេលដែលតុលាការកំពូល​ ប្រកាសសាលក្រម រំលាយបក្សសង្គ្រោះជាតិ។ (សូមទាញយកសេចក្តីថ្លែងការណ៍ ឬអានអត្ថបទរូបភាពខាងក្រោម។)


អ្នកឃ្លាំមើលកម្ពុជា អំពាវនាវទៅប្រជាពលរដ្ឋ កុំ​ចេញ​ទៅ​បោះ​ឆ្នោត​  បើ​គ្មាន​បក្ស​ប្រឆាំង​ចូល​រួម

(VOD HotNews / 22-2-2018)
រាជធានី​ភ្នំពេញ៖ ក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅក្រៅប្រទេស បានអំពាវនាវទៅ​ប្រជាពលរដ្ឋ កុំឲ្យ​ទៅបោះឆ្នោត​ នា​ពេល​ខាង​មុខ​នេះ ដោយ​ថា បើគ្មានគណបក្ស​សង្គ្រោះជាតិ ចូលរួមប្រកួតប្រជែងនោះ។

ក្នុងសេចក្ដីអំពាវនាវ​កាល​ពី​ថ្ងៃ​ម្សិល​មិញ​នេះ ក្រុម​ប្រឹក្សា​ឃ្លាំ​មើល​កម្ពុជា បាន​លើក​ឡើង​ថា លោក​នាយករដ្ឋ​មន្ត្រី ហ៊ុន សែន ត្រូវ​ការ​ពលរដ្ឋ​ចេញ​ទៅ​បោះ​ឆ្នោត​ច្រើន​ជាង ៥០​% ​នៃ​ចំនួន​ពលរដ្ឋ​មាន​សិទ្ធិ​បោះ​ឆ្នោត​សរុប​នៅ​ទូទាំង​ប្រទេស។ បើ​តាម​សេចក្ដី​អំពាវ​នាវ​ដដែល​នោះ ក្រុម​ប្រឹក្សា​ឃ្លាំ​មើល​កម្ពុជា ​​បាន​លើក​ឡើង​បន្ថែម​ថា លោក ហ៊ុន សែន ត្រូវ​ការ​បែប​នេះ ដើម្បី​បង្ហាញ​ប្រាប់​ទៅ​សហគមន៍​អន្តរជាតិ​ថា ពលរដ្ឋ​កម្ពុជា​ពេញ​ចិត្ត​នឹង​របប​ដឹកនាំ​បច្ចុប្បន្ន។ ផ្ទុយ​ទៅ​វិញ ប្រសិន​បើ​ចំនួន​ពលរដ្ឋ​ ចេញ​ទៅ​បោះ​ឆ្នោត​តិច​ជាង ៥០​ % ក្រុម​ប្រឹក្សាដែល​មាន​មូលដ្ឋាន​នៅ​ក្នុង​ប្រទេស​ន័រវេស បាន​អះ​អាង​ថា ពលរដ្ឋ​មិន​ពេញ​ចិត្ត​នឹង​របប​ដឹកនាំ​ដោយ​លោក ហ៊ុន សែន នោះ​ឡើយ។

ក្រុមប្រឹក្សាឃ្លាំមើលកម្ពុជា ​បាន​អំពាវនាវឲ្យប្រជាពលរដ្ឋដែលមានសិទ្ធិ និងឯកសារបោះឆ្នោត កុំទៅ​បោះឆ្នោត នៅថ្ងៃទី ២៩ ខែកក្កដា ខាងមុខនេះ បើគ្មានវត្តមានគណបក្សសង្គ្រោះជាតិ ចូលរួមដោយស្មើភាព សេរីត្រឹមត្រូវ និងយុត្តិធម៌នោះទេ។

ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ចាត់ទុកការអំពាវនាវនេះថា ជាការបិទសិទ្ធិរបស់​ប្រជាពលរដ្ឋ មិនឲ្យអនុវត្តសិទ្ធិនយោបាយ ដែលមានចែងនៅក្នុងរដ្ឋធម្មនុញ្ញ។ លោកថា៖ «ជាការបិទសិទ្ធិប្រជាពលរដ្ឋ មិនឲ្យអនុវត្តសិទ្ធិនយោបាយរបស់ខ្លួន ដែលមានចែងនៅក្នុងរដ្ឋធម្មនុញ្ញ។ អញ្ចឹង សកម្មភាពនេះ អាចចាត់ទុកថា ជាវិច្ឆេទកម្មនយោបាយយ៉ាងពេញទំហំហឹង ហើយជាបញ្ហាមួយដែលយើងអាចចោទ ក្រុមឃ្លាំមើលកម្ពុជា​ នេះ ក៏ចូលដៃចូលជើងជាមួយ ក្រុមឧទ្ទាមនិយមក្រៅច្បាប់ដែលកំពុងធ្វើសកម្មភាព ដើម្បីសម្លាប់លទ្ធិប្រជាធិបតេយ្យ នៅកម្ពុជា​ពីក្រៅប្រទេសមក»។

ទោះជាយ៉ាងណា មន្ត្រីជាន់ខ្ពស់​នៃ​កម្មវិធី​ផ្នែក​អង្កេត​របស់ ​អង្គការ​ខុមហ្វ្រែល លោក កង សាវាង្ស លើក​ឡើង​ថា គ្មាន​ច្បាប់​ណា​មួយ​បាន​កំណត់​ទាក់​ទង​នឹង​ចំនួន​ពលរដ្ឋ ​ចេញ​ទៅ​បោះ​ឆ្នោត​នោះ​ទេ ប៉ុន្តែលោក​ថា ដើម្បី​ធានា​ថា ការ​បោះ​ឆ្នោត​ដំណើរការ​ទៅ​ដោយ​សេរី ត្រឹមត្រូវ និង​យុត្តិធម៌​នោះ លោក​ថា ត្រូវ​មាន​គណបក្ស​ប្រឆាំង ​ចូល​រួម​ផង​ដែរ។ លោកថា៖ «អ្វីដែលជាចំណុលល្អ គឺថា កម្លាំងនៃគណបក្សប្រឆាំង ដែលជាបក្ស​ប្រឆាំងដ៏ធំមួយ នៅក្នុងប្រទេសកម្ពុជាហ្នឹង បើកឲ្យមានការចូលរួមប្រកួតប្រជែង។ វាជាចំណុលល្អមួយ នៅក្នុងការបោះឆ្នោត។ បើសិនអត់មានការប្រកួតប្រជែងទេ មានន័យថា មានតែគណបក្សមួយដែលកម្លាំងធំ នឹងការប្រកួតប្រជែង វាអត់ស្មើភាពគ្នាទេ។ អញ្ចឹង យើងនៅតែចង់ឃើញការប្រកួតប្រជែងមួយ​ដោយស្មើភាព ដោយត្រឹមត្រូវ​ដដែល សម្រាប់ការយល់ឃើញរបស់យើង»

វត្តមាន​របស់​គណបក្ស​សង្គ្រោះ​ជាតិ​ ​នៅ​ក្នុង​ការ​បោះ​ឆ្នោត ​នា​ខែ​កក្កដា​ ខាង​មុខ នៅ​តែ​មិន​ទាន់​មាន​ភាព​ច្បាស់​លាស់​នៅ​ឡើយ​ទេ​ រហូត​មក​ដល់​ពេល​នេះ បន្ទាប់ពី​បក្ស​ប្រឆាំង​ដ៏​ធំ​មួយ​នេះ ត្រូវ​បាន​តុលាការ​កំពូល ​សម្រេច​រំលាយ​ចោល​ កាល​ពី​ពាក់​កណ្ដាល​ខែ​វិច្ឆិកា​ ឆ្នាំ​មុន ទៅ​តាម​បណ្ដឹង​របស់​រដ្ឋាភិបាល។

សហគមន៍​អន្តរជាតិ ដែល​នាំ​មុខ​ដោយ​សហភាព​អឺរ៉ុប និង​អាមេរិក នៅ​តែ​បន្ត​ទាម​ទារ​ទៅ​រដ្ឋាភិបាល​កម្ពុជា ឲ្យ​ស្ដារ​លទ្ធិ​ប្រជាធិបតេយ្យ ​នៅ​កម្ពុជា​ឡើង​វិញ តាម​រយៈ​ការ​អនុញ្ញាត​ឲ្យ​បក្ស​ប្រឆាំង ​ចូល​រួម​នៅ​ក្នុង​ការ​បោះ​ឆ្នោត​ ដោយ​សេរី​ត្រឹម​ត្រូវ និង​ការ​ដោះ​លែង​មេដឹកនាំ​បក្ស​ប្រឆាំង​ កំពុង​ជាប់​ឃុំ​ គឺលោក កឹម សុខា៕ អត្ថបទភ្ជាប់៖ http://vodhotnews.com/22/02/2018/


លោក ផៃ ស៊ី​ផាន​៖ «​ការអំពាវនាវ មិន​ឲ្យ​ពលរដ្ឋ​ទៅ​បោះឆ្នោត ជា​អំពើ​ភេរវកម្ម​»

(កាសែតថ្មីៗ / 22-2-2018)
ភ្នំពេញ​៖ លោក ផៃ ស៊ី​ផាន អ្នកនាំពាក្យ​នៃ ​ទីស្តីការគណៈរដ្ឋមន្ត្រី បានចាត់ទុក​ការអំពាវនាវ​របស់​អង្គការ​មួយ មិន​ឲ្យ​ប្រជាពលរដ្ឋ​កម្ពុជា ចូលរួម​ការបោះឆ្នោត​ជ្រើសតាំង​តំណាងរាស្ត្រ ​នីតិកាល​ទី​៦ ដែល​នឹង​ប្រព្រឹត្តទៅ​នៅ​ថ្ងៃទី​២៩ ខែកក្កដា ឆ្នាំ​២០១៨ ថា​អំពើ​នៃ​ក្រុម​ឧទ្ទាម​។ លោក បន្តថា ទង្វើ​បែបនេះ គឺ​ប្រឆាំងនឹង​លទ្ធិប្រជាធិបតេយ្យ និង​សិទ្ធិ​នយោបាយ ក្នុងការ​ជ្រើសរើស​អ្នកតំណាង​។

អ្នកនាំពាក្យ​នៃ​ទីស្តីការគណៈរដ្ឋមន្ត្រី​រូបនេះ បាន​ព្រមាន​ធ្ងន់ៗ តាមរយៈ​ការ​បង្ហោះ​សា​រ លើ​គណនី​ហ្វេ​ស​ប៊ុ​ក នៅ​ថ្ងៃទី​២២ ខែកុម្ភៈ ឆ្នាំ​២0១៨ យ៉ាង​ដូច្នេះ​ថា​៖ «​លទ្ធិប្រជាធិបតេយ្យ គឺជា​កម្មសិទ្ធិ​ផ្ទាល់​របស់​ប្រជាពលរដ្ឋ​មា្ន​ក់ៗ ហើយ​ជា​សកម្មភាព​នយោបាយ ក្នុងការ​ជ្រើសរើស​និង​ទទួលខុសត្រូវ​ លើ​ជោគវាសនា​របស់គេ​។ សិទ្ធិ​ស្វ័យ​សម្រេច​របស់​ប្រជាពលរដ្ឋ ត្រូវបាន​ទទួលស្គាល់​ដោយ​ធម្មនុញ្ញ​អង្គការសហប្រជាជាតិ រួមទាំង​កម្ពុជា​ផងដែរ​។ ដូច្នេះ យុទ្ធនាការ​របស់​បុគ្គ​ល​ណា ឬ​ក្រុម​ណា​ ប្រឆាំងនឹង​សិទ្ធិ​នេះ គឺ​មិន​ត្រឹមតែ​ជា [​អំពើ​នៃ​ក្រុម​] «ឧទ្ទាម» ​ប៉ុណ្ណោះ​ទេ តែ​ក៏​ជា​«សកម្មភាព​ភេរវកម្ម» ប្រឆាំងនឹង​អំណាច​ប្រជាពលរដ្ឋ ដែល​រដ្ឋាភិបាល មិន​អនុគ្រោះ​ជាដាច់ខាត​»​។​

​សារ​របស់លោក ផៃ ស៊ី​ផាន គឺធ្វើឡើង​ដើម្បី​ប្រតិកម្ម​នឹង​ ក្រុមប្រឹក្សា​ឃ្លាំមើល​កម្ពុជា (CWCI) ដែល​បាន​អំពាវនាវ មកកាន់​ប្រជាពលរដ្ឋ​កម្ពុជា កុំ​ឲ្យ​ចូលរួម​ការបោះឆ្នោត បើ​អវត្តមាន​គណបក្ស​សង្គ្រោះ​ជាតិ​។ តាមរយៈ​សេចក្តីអំពាវនាវ ក្រុមប្រឹក្សា​ឃ្លាំមើល​កម្ពុជា ដែលមាន​មូលដ្ឋាន​នៅ​ប្រទេស​ន័​រវេ​ស  ហើយ​តែងតែ​ប្រឆាំង​គណបក្សកាន់អំណាច​ និង​រដ្ឋាភិបាល​កម្ពុជា បានស្នើ​ឡើង​យ៉ាង​ដូច្នេះ​ថា​៖ «​បើ​អ្នក​ទៅ​បោះឆ្នោត មាន​ចំនួន​តិចជាង​ ៥០ ​ភាគរយ មានន័យថា​ប្រជាពលរដ្ឋ មិន​ពេញចិត្ត​នឹង​របប​ដឹកនាំ​របស់លោក [​នាយករដ្ឋមន្ត្រី​] ហ៊ុន សែន ហើយ​សហគមន៍​អន្តរជាតិ ក៏​មិន​ទទួលស្គាល់​ដែរ​។  [….] នេះហើយ ជា​ក្តីបារម្ភ​របស់លោក ហ៊ុន សែន និង​គណបក្សកាន់អំណាច​។ ក្រុមប្រឹក្សា​ឃ្លាំមើល​កម្ពុជា សូម​អំពាវនាវ​ដល់​ព​ល​រដ្ឋ​ខ្មែរ កុំទៅ​បោះឆ្នោត​»៕ អត្ថបទភ្ជាប់៖ https://www.thmeythmey.com/


ខាងក្រោមនេះជាអត្ថបទដើម ជាមួយប្រតិកម្មរបស់ ក្រុមប្រឹក្សាឃ្លាំមើលកម្ពុជា ច្រានចោលការចោទប្រកាន់ ពីសំណាក់របប ហ៊ុន សែន។

CWCI ថ្លែងការណ៍រឿង ពហិការការបោះឆ្នោត ខែកក្កដាCWCI អំពាវនាវពលរដ្ឋ កុំទៅបោះឆ្នោត ខែកក្កដា ២០១៨3cfb336974931fc05efbd014fc8af0c9photo_2017-11-27_14-38-538b0099db31cfa44270ec8be4f75b162b10670187_918366958259408_8520807832688678037_n

Brad Adams ថា សុខ ឥសាន ជាអ្នកនាំពាក្យបក្សកាន់អំណាច ល្ងិតល្ងង់ ខ្វះចំណេះដឹងទូទៅ

f0bad31ទាំងលោក សុខ ឥសាន អ្នកតំណាងរាស្រ្ត ជាអ្នកនាំពាក្យបក្សកាន់អំណាច និងអ្នកគាំទ្រ លោក ហ៊ុន សែន នាយករដ្ឋមន្រ្តីទំនើង តែងតែនាំគ្នាបន្ទរ នូវអ្វីដែលលោក ហ៊ុន សែន និយាយ និងចំណាត់ការការងារ ទោះបីស្របច្បាប់ ឬខុសច្បាប់ក្តី។ ថ្មីៗនេះលោក សុខ ឥសាន និយាយចំអកឡកលើយ ឲ្យលោក Brad Adams នៃអង្គការសិទ្ធិមនុស្ស Human Rights Watch និងវិទ្យុរបស់អាមេរិក (ភាសាខ្មែរ) រឿងការចាប់ឃាត់ខ្លួន តំណាងរាស្រ្តអាមេរិក រយៈពេលខ្លី កាលពីប៉ុន្មានថ្ងៃមុននេះ។ ប៉ុន្តែ លោក Brad Adams ឆ្លើយតបវិញថា សុខ ឥសាន ជាអ្នកនាំពាក្យល្ងិតល្ងង់ ខ្វះចំណេះដឹងទូទៅ។ (អត្ថបទបន្ថែមដោយ ម៉ែន ណាត) /២៨ កញ្ញា ២០១៧


មន្ត្រី​នៅ​ក្បែរ​លោក ហ៊ុន សែន ចូល​ចិត្ត​និយាយ​សម្ដី​អត់​បាន​ការ

(ដោយ អាស៊ីសេរី, 2017-09-27)
មន្ត្រី​ជាន់ខ្ពស់​គណបក្ស​ប្រជាជន​កម្ពុជា ចំអក​ដាក់​មន្ត្រី​ជាន់ខ្ពស់​នៃ​អង្គការ​សិទ្ធិ​មនុស្ស អ្នក​វិភាគ​ រួម​ទាំង​បណ្ដាញ​ផ្សាយ​ព័ត៌មាន​ផង​ថា នៅ​ស្ងៀម​ស្ងាត់ ពេល​មាន​ការ​ចាប់​ខ្លួន​តំណាងរាស្ត្រ​អាមេរិក កាលពី​ពេល​ថ្មីៗនេះ​។ ប៉ុន្តែ មន្ត្រី​ជាន់ខ្ពស់​នៃ​អង្គការ​សិទ្ធិ​មនុស្ស​អន្តរជាតិ ថា​ការ​ចំអក​បែប​នេះ បង្ហាញ​ថា មន្ត្រី​នៅ​ក្បែរ​លោក​នាយករដ្ឋមន្ត្រី​ ហ៊ុន សែន មាន​ចំណេះដឹង​ទូទៅ​នៅ មាន​កម្រិត​នៅឡើយ។

នាយក​ប្រតិបត្តិ​ទទួល​បន្ទុក​កិច្ចការ​តំបន់​អាស៊ី របស់​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) ស្នើ​ឲ្យ​មន្ត្រី​នាំ​ពាក្យ​គណបក្ស​កាន់​អំណាច លោក សុខ ឥសាន សិក្សា​ឲ្យ​បាន​លម្អិត និង កុំ​ហា​ស្ដី​អ្វី​ ឲ្យ​រួច​តែមាត់ ព្រោះ​ការ​និយាយ​ខ្វះ​ការ​ត្រិះរិះ​ពិចារណា​ល្អិតល្អន់​បែបនេះ វា​នាំ​ឲ្យ​ឃើញ​ពី​ភាព​ខ្វះ​ព័ត៌មាន​គ្រប់​ជ្រុង​ជ្រោយ​របស់​មន្ត្រី​ទាំងនោះ តែប៉ុណ្ណោះ៖ «មន្ត្រី​រូប​នេះ ជា​គំរូ​នៃ​មន្ត្រី​ក្នុង​ជួរ​ថ្នាក់​ដឹកនាំ របស់​​គណបក្ស​ប្រជាជន​កម្ពុជា ដែល​នៅ​ហែហម​លោក​ ហ៊ុន​ សែន គឺ​ពូកែ​ខាង​និយាយ​សម្ដី​ឥត​បាន​ការ ខំ​ប្រឹង​ប្រៀបធៀប​អ្វី​ដែល​កើតឡើង​នៅ​សហរដ្ឋអាមេរិក ទៅ​នឹង​ស្រុក​ខ្មែរ។ បើ​គាត់​មិន​ចង់​ក្លាយ​ជា​មនុស្ស​ខ្វះ​ការ​យល់​ដឹង​ជាង​នេះ​ទៀត​ទេ គាត់​គួរ​បើក​មើល​គេហទំព័រ​ របស់​អង្គការ​ឃ្លាំមើល​សិទ្ធិមនុស្ស​អន្តរជាតិ​ផង ថា​តើ​អង្គការ​នេះ និយាយ​អ្វី​ខ្លះ​ អំពី​បញ្ហា​សិទ្ធិ​មនុស្ស​នៅ​សហរដ្ឋអាមេរិក។ យើង​មិន​ដែល​នៅ​ស្ងៀម​ទេ ពេល​សហរដ្ឋអាមេរិក រំលោភ​បទដ្ឋាន​សិទ្ធិមនុស្ស​អន្តរជាតិ»។

កាល​ពី​ថ្ងៃ​ទី​១៩ ខែ​កញ្ញា កន្លង​ទៅ​នេះ តំណាងរាស្រ្ត​អាមេរិក​បី​រូប និង​អ្នកនាំពាក្យ​របស់​ក្រុមប្រឹក្សា​ក្រុង​ញូវយ៉ក (New York) ផង ត្រូវ​បាន​ចាប់​ខ្លួន​ភ្លាមៗ បន្ទាប់​ពី​ពួកគាត់​តវ៉ា​ដោយ​អហិង្សា មិនព្រម​ចាក​ចេញ​ពី​ផ្លូវ​លេខ​៥ នៅមុខ​អគារ​របស់​លោក ដូណាល់ ត្រាំ (Donald Trump) នៅ​ទីក្រុង​ញូវយ៉ក។ ពួកគាត់​តវ៉ា​ ជំទាស់​នឹង​សេចក្ដី​សម្រេច​របស់​លោក​ប្រធានាធិបតី ដូណាល់ ត្រាំ ដែល​បញ្ជា​ឲ្យ​បញ្ជូន​កូនៗ​របស់​​ជន​អន្តោប្រវេសន៍ ត្រឡប់​ទៅ​ស្រុក​កំណើត​ខ្លួន​វិញ។

ប្រតិកម្ម​របស់​នាយក​ប្រតិបត្តិ​ទទួល​បន្ទុក​កិច្ចការ​តំបន់​អាស៊ី​ នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ​នេះ ធ្វើ​ឡើង​ក្រោយពី​លោក សុខ ឥសាន កាលពី​ថ្ងៃ​ទី ២១ ខែ កញ្ញា ថ្លែង​តាម​ប្រព័ន្ធ​តេឡេក្រាម​របស់​គាត់ ដោយ​ចំអក​ដាក់​លោក ប្រ៊ែដ អាដាម ដោយ​ហៅ​លោក ថា​ជា៖ «មេ​ក្លោង​សិទ្ធិមនុស្ស ទៅ​ណា​បាត់​អស់​ហើយ​ មាន​បាន​បើក ភ្នែក​មើល​សិទ្ធិមនុស្ស​នៅ សហរដ្ឋអាមេរិក ដែរ​ប្ញទេ

លោក សុខ ឥសាន សរសេរ​បន្ត​ ថា​តំណាងរាស្ត្រ​បីរូប ដែល​ត្រូវ​បាន​ចាប់​ខ្លួន​នោះ គឺ​ជា​តំណាងរាស្ត្រ​ពី​គណបក្ស​សាធារណៈ​រដ្ឋ​ របស់​លោក ដូណាល់ ត្រាំ និង​ត្រូវ​បាន​ចាប់​ខ្លួន​ ទាំង​មាន​អភ័យឯកសិទ្ធិសភា​ទៀត​ផង។ ដោយ​អត់​ទ្រាំ​នឹង​ការ​ឆ្លើយ​តប​មិន​ទាន់​ពេល លោក សុខ ឥសាន បាន​ថ្លែង​ប្រាប់​កាសែត​ក្នុង​ស្រុក ដែល​ស្និទ្ធ​នឹង​រដ្ឋាភិបាល​លោក ហ៊ុន សែន នៅ​ថ្ងៃទី២៤ ខែ​កញ្ញា​ ថែម​ទៀត ដោយ​ម្ដង​ណេះ វាយប្រហារ​រហូត​ដល់​វិទ្យុ​អាស៊ីសេរី ដែល​មិន​បាន​ផ្សាយ​រឿង​ចាប់​តំណាងរាស្រ្ត​នៅ​អាមេរិក​នេះ។ លោក សុខ ឥសាន ត្រូវ​បាន​សារព័ត៌មាន​នោះ​ ដកស្រង់​សម្ដី​ថា៖ «នៅ​ពេល​ចាប់​តំណាងរាស្ត្រ​នៅ​កម្ពុជា វិទ្យុ​អាស៊ីសេរី ក៏​ដូច​វិទ្យុ​នានា​ផ្សាយ​ឥត​ឈប់ ដោយ​សង្កត់ធ្ងន់​ថា រំលោភ​អភ័យឯកសិទ្ធិ​សភា និង​រដ្ឋធម្មនុញ្ញ។ ឥឡូវ​ដល់​មាន​ការ​ចាប់​តំណាងរាស្ត្រ​អាមេរិក អត់​មាន​ឮ​ការ​ផ្សាយ​ពី​វិទ្យុ​អាស៊ីសេរី និង​វិទ្យុ​នានា​ទេ។ នេះ​បាន​ហៅ​ថា​វិទ្យុ​ឯករាជ្យ និង​មាន​វិជ្ជាជីវៈ​មែន។ តើ​អស់​លោក​បណ្ឌិត និង​អ្នក​វិភាគ​នយោបាយ មាន​បាន​មើល​ឃើញ និង​ដឹង​ពី ព័ត៌មាន​ចាប់​ខ្លួន​តំណាងរាស្ត្រ នៅ​សហរដ្ឋអាមេរិក​ដែរ​ឬទេ បាន​ជា​ស្ងាត់ឈឹង​ ដូច​ចោរ​លួច​សេះ​អ៊ីចឹង

លោក ប្រ៊ែដ អាដាម បញ្ជាក់​ថា​អង្គការ​របស់​លោក មិន​បាន​និយាយ​អ្វី អំពី​ការ​ចាប់​តំណាងរាស្ត្រ​របស់​សហរដ្ឋ​អាមេរិក​នោះ​ទេ ព្រោះ​ករណី​ចាប់​ខ្លួន​អ្នក​ទាំងនេះ វា​គ្រាន់​តែ​ជា​បទ​ល្មើស​ធម្មតា នៃ​ការ​ធ្វើ​ឲ្យ​កក​ស្ទះ​ចរាចរ​លើ​ផ្លូវ​សាធារណៈ​ប៉ុណ្ណោះ៖ “ការ​ចាប់​ខ្លួន​តំណាងរាស្ត្រ​ទាំងនេះ មិន​មែន​ជា​រឿង​រំលោភ​បទដ្ឋាន​សិទ្ធិ​មនុស្ស​អន្តរជាតិ​នោះ​ទេ​។ ប៉ុន្តែ ក្រោម​ការដឹកនាំ​របស់​លោក​ប្រធានាធិបតី ដូណាល់ ត្រាំ បាន​រំលោភ​បទដ្ឋាន​សិទ្ធិ​មនុស្ស​អន្តរជាតិ ជា​ហូរហែ ដូចជា​ពាក់ព័ន្ធ​នឹង​ជនអន្តោប្រវេសន៍ និង ជនភៀសខ្លួន​ជាដើម។ ក្នុង​ករណី​ទាំងនេះ អង្គការ​របស់​យើង​ មិន​ដែល​នៅ​ស្ងៀម​នោះ​ទេ។ គ្មាន​នរណា​ម្នាក់​នៅ​ក្នុង​ជួរ​រដ្ឋាភិបាល​អាមេរិក ថា​អង្គការ​យើង​នៅ​ស្ងៀម មិន​តវ៉ា​រឿង​នេះ​នោះ​ទេ» Read more

ពលរដ្ឋខ្មែរនៅ អឺរ៉ុប អូស្ត្រាលី អាមេរិក និង កាណាដា ​បាតុកម្ម​ទាមទាររដ្ឋាភិបាល ហ៊ុន សែន ដោះលែងលោក កឹម សុខា និងសេរីភាពព័ត៌មាន

image (1)

បន្ថែមលើអត្ថបទវិទ្យុអាស៊ីសេរីថា តាមពិតគឺពលរដ្ឋខ្មែរនៅ អឺរ៉ុប (នៅបារាំង និងអាល្លឺម៉ង់) អូស្ត្រាលី អាមេរិក (រដ្ឋកាលីហ្វ័នញ៉ា) និង កាណាដា ធ្វើបាតុកម្មក្នុងថ្ងៃទី ០៩ ខែកញ្ញា ឆ្នាំ២០១៧ ម្សិលមិញ ក្នុងប្រធានបទ ទាមទារឲ្យរដ្ឋាភិបាល ហ៊ុន សែន ដោះលែងលោក កឹម សុខា និងសេរីភាពសារព័ត៌មានឡើងវិញ ដើម្បីធានាប្រក្រតីភាព ការបោះឆ្នោតជាតិ ខែកក្កដា ឆ្នាំ២០១៨ ខាងមុខ។ (ដោយ ម៉ែន ណាត)


សហគមន៍​ខ្មែរ​នៅ​ក្រៅ​ប្រទេស ​ធ្វើ​បាតុកម្ម​ប្រឆាំង​រដ្ឋាភិបាល​កម្ពុជា

(RFA, 10-9-2017, ដោយ ខែ សុណង)
សហគមន៍​ខ្មែរ​ក្នុង​ប្រទេស​​ ៣ នៅ​ថ្ងៃ​សៅរ៍ ទី​ ០៩ ខែ​កញ្ញា ជួបជុំ​គ្នា​នៅ​តាម​ទីក្រុង​មួយ​ចំនួន ​ធ្វើ​បាតុកម្ម​ប្រឆាំង​រដ្ឋាភិបាល​កម្ពុជា ជុំវិញ​ការ​ចាប់​ខ្លួន ​លោក កឹម សុខា ការ​បញ្ឈប់​លែង​ឲ្យ ​អង្គការ​អន្តរជាតិ អិន.ឌី.អាយ (NDI) ធ្វើ​ការងារ​ឃ្លាំមើល​កិច្ចការ​បោះឆ្នោត និង​ ការ​បិទ​ស្ថានីយ​ផ្សាយ​ព័ត៌មាន​បន្ត ​ឲ្យ​វិទ្យុ​បរទេស និង​បិទ​ស្ថាប័ន​កាសែត ឌឹ ខេមបូឌា ដេលី (The Cambodia daily) ។ បញ្ហា​នេះ ត្រូវ​បាន​អ្នក​នាំ​ពាក្យ​គណបក្ស​កាន់​អំណាច ​ចាត់​ទុក​ថា រដ្ឋាភិបាល​អនុវត្ត​តាម​ច្បាប់។

សហគមន៍​ខ្មែរ​នៅ​ក្រៅ​ប្រទេស រួម​មាន​នៅ​​ប្រទេស​អូស្ត្រាលី (Australia) កាណាដា (Canada) និង​ប្រទេស​បារាំង (France) រាប់​រយ​នាក់​ បាន​នាំ​គ្នា​ធ្វើ​បាតុកម្ម​លើក​បដា ​ដើម្បី​ទាមទារ​ឲ្យ​រដ្ឋាភិបាល​កម្ពុជា ដោះលែង​លោក កឹម សុខា ស្នើ​ឲ្យ​គោរព​សិទ្ធិ​មនុស្ស និង​សេរីភាព​ខាង​សារព័ត៌មាន​ នៅ​កម្ពុជា។

តំណាងរាស្ត្រ​ខ្មែរ-​អូស្ត្រាលី លោក ហុង លីម មាន​ប្រសាសន៍​ថា បាតុកម្ម​ធ្វើ​ឡើង​នៅ​មុខ​សាលាក្រុង​ស្ព្រីងវែល (Springvale Town Hall) ក្នុង​រដ្ឋ​វ៉ិកតូរីយ៉ា (Victoria) មាន​ពលរដ្ឋ​ប្រមាណ​ជាង ៤០០​នាក់។ លោក​ថា ពលរដ្ឋ​ខ្មែរ-​អូស្ត្រាលី មិន​នៅ​ស្ងៀម​ឡើយ​ចំពោះ​វិធានការ​របស់​រដ្ឋាភិបាល​ដែល​បាន​ព្យាយាម​កម្ចាត់​មេដឹកនាំ​គណបក្ស​ប្រឆាំង​តាម​រូបភាព​ចាប់​ខ្លួន និង​ចោទ​ប្រកាន់​ថា ប្រព្រឹត្ត​អំពើ​ក្បត់​ជាតិ ដោយ​អយុត្តិធម៌។ ក្រៅ​ពី​នេះ​លោក​ថា សហគមន៍​ខ្មែរ​ក៏​ទាមទារ​ឲ្យ​សហគមន៍​អន្តរជាតិ​ធ្វើ​យ៉ាង​ណា​អន្តរាគមន៍​ឲ្យ​មេដឹកនាំ​ប្រទេស​កម្ពុជា អនុវត្ត​ស្មារតី​នៃ​សន្ធិសញ្ញា​សន្តិភាព​ទីក្រុង​ប៉ារីស ឲ្យ​បាន​ពេញលេញ​ដែល​លោក​ឃើញ​ថា កំពុង​ធ្លាក់​ចុះ​យ៉ាង​ខ្លាំង៖ «ពេល​នេះ​មាន​អ្នក​តំណាងរាស្ត្រ​ពី​សហព័ន្ធ​បាន​មក​ពីរ​នាក់ ម្នាក់​ជា​រដ្ឋមន្ត្រី​ស្រមោល គាត់​ថា​ស្អីៗ​ដែល​លោក កឹម សុខា ធ្វើ គឺ​ជា​តួនាទី​ភារៈ​ជា​មុខ​របរ​ជា​ប្រធាន​គណបក្ស​ប្រឆាំង គេ​ត្រូវ​ធ្វើ​ម៉េច​ទាក់ទាញ​ឲ្យ​ធ្លាក់​រដ្ឋាភិបាល​ដែល​គេ​ផ្សព្វផ្សាយ​ជា​គំនិត​យោបល់ ហើយ​មក​ចាប់​គេ​ដាក់​គុក វា​ហួស​ចិត្ត​មិន​ដែល​មាន»

លោក ហុង លីម បញ្ជាក់​ថា ទន្ទឹម​នឹង​គ្នា​នេះ សហគមន៍​ខ្មែរ​នៅ​រដ្ឋ​ពីរ​ទៀត​ក៏​ធ្វើ​បាតុកម្ម​ដូច​គ្នា​ដែរ។ ក្នុង​នោះ​រួម​មាន​សហគមន៍​ខ្មែរ​ធ្វើ​នៅ​មុខ​រដ្ឋ​សភា​នៅ​ទីក្រុង​អាឌីឡែត (Adelaide) ភាគ​ខាង​ត្បូង​ប្រទេស​អូស្ត្រាលី និង​ទីក្រុង​ស៊ីដនី (Sydney) ធ្វើ​នៅ​ទីតាំង​វត្ត​បូណារិត ហៅ​វត្ត​ខេមសារាម។

នៅ​ថ្ងៃ​សៅរ៍​ដដែល សហគមន៍​ខ្មែរ​ប្រមាណ ៣០០​ នាក់ ក៏​ជួបជុំ​គ្នា​បាតុកម្ម​ នៅ​មុខ​រដ្ឋ​សភា នា​ទីក្រុង​អូតាវ៉ា (Ottawa) ប្រទេស​កាណាដា (Canada) ដូច​គ្នា​ដែរ។ Read more

ព្រឹទ្ធសមាជិកអាមេរិក John McCain ថ្លែងថា ហ៊ុន សែន ប្រើយុទ្ធសាស្ដ្រ ផ្ដាច់ការ បំបិទសម្លេងប្រឆាំង មុនការបោះឆ្នោតជាតិ

Phot345345frgeso_Template_872x562

សមាជិកព្រឹទ្ធសភាអាមេរិក John McCain ថ្លែងថា ហ៊ុន សែន ប្រើយុទ្ធសាស្ដ្រ ផ្ដាច់ការ បំបិទសម្លេងប្រឆាំង មុនការបោះឆ្នោតជាតិ ឆ្នាំ២០១៨ ចំពេលរដ្ឋាភិបាល ហ៊ុន សែន ប្រើលេសនានា ចាត់វិធានការយ៉ាងក្រពុលមុខ លើអង្គការសង្គមស៊ីវិល និងបណ្តាញផ្សព្វផ្សាយឯករាជ្យ នៅប៉ុន្មាថ្ងៃនេះ។


សមាជិកព្រឹទ្ធសភាអាមេរិក៖ លោក ហ៊ុន សែន នឹងប្រើយុទ្ធសាស្ដ្រ ផ្ដាច់ការបំបិទសំឡេងប្រឆាំង

(VOD, ដោយ ពេជ្រ ចំរុង, 25-8-2017)

សមាជិកព្រឹទ្ធិសភា ដ៏មានឥទ្ធិពលម្នាក់ នៅសហរដ្ឋអាមេរិក រិះគន់ថា លោកនាយករដ្ឋមន្ដ្រី ហ៊ុន សែន កំពុងភ័យខ្លាចការបោះឆ្នោតថ្នាក់ជាតិ នាពេលខាងមុខ ដោយថា លោកនឹងប្រើមធ្យោបាយបែបផ្ដាច់ការ ដើម្បីបំបិទសំឡេងប្រឆាំង។ ប្រតិកម្មនេះ ធ្វើឡើងបន្ទាប់ពីរដ្ឋាភិបាលកម្ពុជា កាលពីថ្ងៃទី២៣ សីហា បានសម្រេចបិទអង្គការអាមេរិកមួយឈ្មោះ «វិទ្យាស្ថានជាតិប្រជាធិបតេយ្យ» ឬ «NDI» ដោយចោទអង្គការនេះថា មិនបានចុះបញ្ជីត្រឹមត្រូវ និងខកខានកាតព្វកិច្ចបង់ពន្ធ។

ក្នុងសេចក្ដីថ្លែងការណ៍ ចេញផ្សាយនៅថ្ងៃទី២៤ សីហា ម្សិលមិញ ព្រឹទ្ធិសភាសហរដ្ឋអាមេរិក និងជាប្រធានគណៈកម្មការសេវាកងទ័ពនៃព្រឹទ្ធសភា លោក John McCain បានបង្ហាញក្ដីបារម្ភអំពីការគោរពសិទ្ធិមនុស្ស និងលទ្ធិប្រជាធិបតេយ្យ ក្នុងប្រទេសកម្ពុជា បន្ទាប់ពីរដ្ឋាភិបាលលោក ហ៊ុន សែន បានបណ្ដេញបុគ្គលិកអង្គការ NDI ចេញពីប្រទេស។

លោក John McCain យល់ថា លោក ហ៊ុន សែន កំពុងព្យាយាមបំបិទសំឡេងភាគី នៃលទ្ធិប្រជាធិបតេយ្យ ធ្វើបាបក្រុមអង្គការសង្គមស៊ីវិល និងរិតត្បិតសិទ្ធិសេរីភាពសារព័ត៌មាន នៅមុនការបោះឆ្នោតថ្នាក់ជាតិ នាឆ្នាំក្រោយ។ លោកថា៖ «នេះគឺជាសកម្មភាពចុងក្រោយបង្អស់ ក្នុងយុទ្ធនាការរបស់រដ្ឋាភិបាល ដើម្បីបំបិទសំឡេងភាគី នៃលទ្ធិប្រជាធិបតេយ្យ យីយាដល់ក្រុមសង្គមស៊ីវិល និងរឹតបន្តឹងប្រព័ន្ធផ្សព្វផ្សាយ ដើម្បីរារាំងដល់ដំណើរការបោះឆ្នោតជាតិដោយចំហ និងសេរីនៅឆ្នាំក្រោយ។ តាមរយៈការបណ្តេញបុគ្គលិកអង្គការ  NDI នាយករដ្ឋមន្រ្តីកម្ពុជា លោក ហ៊ុន សែន គឺកំពុងបង្ហាញថា គាត់ភ័យខ្លាចសង្គមមួយ ដែលមានការបើកចំហ និងការពិភាក្សាដេញដោល។ ហើយថា លោក ហ៊ុន សែន នឹងហ៊ានប្រើយុទ្ធសាស្ដ្របែបផ្ដាច់ការ ដើម្បីគាបសង្កត់ពួកគេ»។

លោកអះអាងថា NDI ជាអង្គការដ៏សំខាន់មួយ ដែលធ្វើការផ្នែកលទ្ធិប្រជាធិបតេយ្យ និងពង្រឹងនីតិរដ្ឋ នៅលើពិភពលោក ដោយថា អង្គការមនុស្សធម៌មួយនេះ បានជួយធានានូវសុចរិតភាពនៃដំណើរបោះឆ្នោត នៅប្រទេសកម្ពុជាផងដែរ។

នៅថ្ងៃតែមួយនៃការបិទអង្គការ NDI ស្ថានទូតអាមេរិកប្រចាំកម្ពុជា និងក្រសួងការបរទេសអាមេរិក បានលើកឡើងនូវក្ដីបារម្ភ ជុំវិញបញ្ហាប្រជាធិបតេយ្យដ៏ក្មេងខ្ចីរបស់កម្ពុជា ដោយពួកគេចោទសួរថា «តើប្រទេសកម្ពុជាមានការប្តេជ្ញាចិត្ត ចំពោះលទ្ធិប្រជាធិបតេយ្យ ដែរឬទេ?» និងថា ប្រជាធិបតេយ្យដើរទៅមុខ ឬថយក្រោយ គឺកម្ពុជាខ្លួនឯង ជាអ្នកសម្រេច។

ទូតអាមេរិកប្រចាំកម្ពុជាថា អង្គការ NDI មានអនុស្សារណៈយោគយល់ត្រឹមត្រូវ​ និងថា អង្គការនេះ បានដាក់ពាក្យស្នើសុំចុះបញ្ជីជាមួយក្រសួងការបរទេសកម្ពុជា កាលពីថ្ងៃទី២១ កញ្ញា ឆ្នាំ២០១៦ ប៉ុន្ដែមិនទាន់ទទួលបានការឆ្លើយតប ពីក្រសួងការបរទេសខ្មែរឡើយ មកទល់ពេលនេះ។

អ្នកនាំពាក្យក្រសួងការបរទេសកម្ពុជា លោក ជុំ សន្ទរី មិនអាចទាក់ទងបានទេ ចាប់ពីថ្ងៃប្រកាសបិទអង្គការ NDI មក។

អ្នកនាំពាក្យគណបក្សប្រជាជន លោក សុខ ឥសាន លើកឡើងថា ការបិទអង្គការ NDI និងការហាមឃាត់ប្រព័ន្ធផ្សព្វផ្សាយ កាលពីពេលថ្មីៗនេះ គឺដោយសារពួកគេមានទំនោរទៅរកគណបក្សប្រឆាំង និងថា បានរំលោភច្បាប់នៃព្រះរាជាណាចក្រកម្ពុជា។ លោកថា នេះជាការអនុវត្តច្បាប់ ក្នុងសង្គមប្រជាធិបតេយ្យ។ លោកថា៖ «គាត់ថា យើងរដ្ឋាភិបាលអ្នកបំបាត់សំឡេងខាងប្រឆាំង អញ្ចឹងបានសេចក្ដីថា អាអង្គការ NDI IRI ស្អីហ្នឹង អាហ្នឹងសុទ្ធតែខាងប្រឆាំងហើយ អាហ្នឹងមិនខុសទេ ការបិទហ្នឹង ពីព្រោះអ្នកឯងលម្អៀងខាងនយោបាយ មិនគោរពលក្ខន្ដិករបស់ខ្លួន ដែលតម្កល់នៅក្រសួងការបរទេស ហើយនៅក្រសួងមហាផ្ទៃ ដល់អញ្ចឹងឲ្យធ្វើការម៉េចកើត មានយុត្តិធម៌សង្គមមកពីណា ហើយប្រព័ន្ធផ្សព្វផ្សាយមួយចំនួនហ្នឹង ក៏លម្អៀងខាងនយោបាយដែរ ហើយមិនគោរពច្បាប់ទៅទៀត ថាតើឲ្យយើងអនុវត្តនីតិរដ្ឋ លទ្ធិប្រជាធិបតេយ្យម៉េចកើត»។

អ្នកវិភាគនយោបាយ លោកបណ្ឌិត ឡៅ ម៉ុងហៃ យល់ថា កម្ពុជាហាក់កំពុងយកគំរូតាមប្រទេសរុស្ស៊ី ដែលចោទអាមេរិកថា បានបង្កើតចលនាបដិវត្តន៍ពណ៌ ផ្ដួលរំលំរដ្ឋាភិបាល។ លោកថា គំរូនេះ ស្ដែងឡើងតាមរយៈការបិទអង្គការ NDI របស់អាមេរិក ការរិតត្បិតក្រុមអង្គការសង្គមស៊ីវិល និងបណ្ដាញសារព័ត៌មាន ដោយថា ដើម្បីឲ្យបក្សកាន់អំណាច អាចយកឈ្នះការបោះឆ្នោតនាពេលខាងមុខ។

លោកថា៖ «គឺរបៀបអញ្ចឹង ហើយក៏ប្រហែលជាមានឥទ្ធិពលមកលើរបបគ្របគ្រង់ក្នុងប្រទេសកម្ពុជា […] វិធានការសព្វថ្ងៃ ដូចជា NDI គឺក្នុងក្របខណ្ឌ គោលនយោបាយដែលប្រឆាំង ឬបដិវត្ដន៍ពណ៌ ការផ្លាស់ប្ដូររបប ដែលគេយល់ថា អង្គការទាំងនោះ ជួយឲ្យមានបដិវត្ដន៍ពណ៌។ ហើយខាងប្រព័ន្ធផ្សព្វផ្សាយក៏អញ្ចឹងដែរ វានៅក្នុងក្របខណ្ឌហ្នឹង ដើម្បីកាត់បន្ថយហានិភ័យក្នុងការផ្លាស់ប្ដូររបប»។

នៅថ្ងៃសុក្រនេះដែរ អង្គការឃ្លាំមើលសិទ្ធិមនុស្សអន្ដរជាតិ (Human Rights Watch) បានចេញថ្លែងការណ៍រិះគន់រដ្ឋាភិបាលកម្ពុជា ដោយថា លោក ហ៊ុន សែន គួរបញ្ឈប់សកម្មភាពគំរាមកំហែងទាំងនេះ ដោយថា បើពុំដូច្នោះទេ លទ្ធផលបោះឆ្នោតឆ្នាំ២០១៨ នឹងពុំអាចជឿទុកចិត្តបានឡើយ។

ទំនាក់ទំនងកម្ពុជា-អាមេរិក កាន់តែមានភាពរង្គោះរង្គើខ្លាំងឡើងៗ ដោយប្រតិកម្មរបស់សហរដ្ឋអាមេរិក ជុំវិញការបិទអង្គការ NDI ត្រូវបានមន្ដ្រីរដ្ឋាភិបាលចោទថា ជាការញុះញង់ និងព្រមានធ្វើបាតុកម្មតវ៉ា នៅមុខស្ថានទូតអាមេរិកប្រចាំនៅកម្ពុជាទៀតផង។

ការបិទអង្គការ NDI ធ្វើឡើងបន្ទាប់ពីអង្គភាពសារព័ត៌មាន ដែលគេថា ស្និទ្ធនឹងរដ្ឋាភិបាល បានចុះផ្សាយ ដោយថា អង្គការ NDI បានជួយរៀបចំនិងជ្រោមជ្រែងឲ្យគណបក្សប្រឆាំង ផ្ដួលរំលំរដ្ឋាភិបាល ក្នុងការបោះឆ្នោតជាតិនៅឆ្នាំ២០១៨ ខាងមុខ៕

ផៃ ស៊ីផាន, សុខ ឥសាន ដែលគាំទ្រ សុខ ទូច ក៏ត្រូវមានទោសពីបទសមគំនិត «សហចារី» ប្រើប្រាស់ទឹកដីខ្មែរ បម្រើមហិច្ឆតាយួន រឿងភូមិកំណើត ហេង សំរិន

c2b9a5d8672cd003e1937dca4c9b5db1-1

តើនាយករដ្ឋមន្ត្រី ហ៊ុន សែន ត្រូវទុកដាក់យ៉ាងណាចំពោះ សុខ ទូច ប្រធានរាជបណ្ឌិត្យសភាកម្ពុជា ដែលហ៊ាននិយាយថា ភូមិកំណើតប្រធានរដ្ឋសភា ហេង សំរិន (ឃុំកក់ ពញាក្រែក ត្បូងឃ្មុំ) ស្ថិតនៅលើទឹកដី យួន ?
តាមដំណឹងមកថាតា ហេង សំរិន និងសាច់ញាតិ សំដែងការខឹងសម្បា ចំពោះការលើកឡើងរបស់លោក សុខ ទូច ពីព្រោះទីនេោះ ជាស្រុកភូមិរបស់ពួកគេ តាំងពីបូរមបូរាណមក។ លោក សុខ ទូច លើកឡើងមកនោះ បានរំលោភមាត្រា២ និង មាត្រា៥៥ នៃរដ្ឋធម្មនុញ្ញ ដែលមានទោសទណ្ឌ ស្មើនឹង អំពើក្បត់ជាតិ។ ដូចគ្នានេះដែរ ករណីលោក សុខ ឥសាន និងលោក ផៃ ស៊ីផាន ថ្លែងគាំទ្រការលើកឡើង របស់លោក សុខ ទូច នោះក៏ត្រូវមានទោស ពីបទសមគំនិត ក្នុងការប្រើប្រាស់ទឹកដីកម្ពុជា ដើម្បីបម្រើមហិច្ឆតា របស់បរទេសជិតខាង ឈ្លានពានទឹកដីខ្មែរ

រដ្ឋធម្មនុញ្ញ មាត្រា២. «បូរណភាព​ទឹកដី​របស់​ព្រះរាជាណាចក្រ​កម្ពុជា​​​ មិន​អាច​រំលោភ​បាន​ដាច់​ខាត​ក្នុង​ព្រំដែន​របស់​ខ្លួន​ដែល​មាន​កំណត់​​ ក្នុង​ផែនទី​ខ្នាត​ ១/១០០.០០០​ ធ្វើ​នៅ​ចន្លោះ​ឆ្នាំ​១៩៣៣​-១៩៥៣ ហើយ​ដែល​ត្រូវ​បាន​ទទួល​ស្គាល់​ជា​អន្តរជាតិ​នៅ​ចន្លោះ​ ឆ្នាំ ១៩៦៣-១៩៦៩»។

រដ្ឋធម្មនុញ្ញ មាត្រា៥៥. «សន្ធិសញ្ញា​ និង​ កិច្ច​ព្រមព្រៀង​ទាំងឡាយ​ណា​ ដែល​មិន​ស្រប​នឹង​ឯករាជ្យ​ អធិបតេយ្យ​ បូរណភាព​ទឹកដី​ អព្យាក្រឹតភាព​ និង​ឯកភាព​ជាតិ​របស់​​ព្រះរាជាណាចក្រ​កម្ពុជា​ ត្រូវ​លុប​ចោល។»

បញ្ជាក់៖ ការអនុវត្តសន្ធិសញ្ញាព្រំដែនបំពេញបន្ថែម ឆ្នាំ២០០៥ ព្រមទាំងប្រើផែនទីព្រំដែន ដែលអមសន្ធិសញ្ញាព្រំដែន ឆ្នាំ១៩៨៥ ខ្នាត ១/១០០ ពាន់ «បោះពុម្ភឡើងវិញដោយ វៀតណាម» និង ផែនទី ខ្នាត ១/៥០ ពាន់ នោះវាផ្ទុយនឹងរដ្ឋធម្មនុញ្ញ មាត្រាទី២ និងមាត្រា៥៥ ព្រមទាំងផ្ទុយពីកិច្ចព្រមព្រៀងក្រុងប៉ារីស ឆ្នាំ១៩៩១ ដែលតម្រូវឲ្យរដ្ឋាភិបាល ហ៊ុន សែន លុបចោលសន្ធិសញ្ញាខុសច្បាប់ និងកិច្ចព្រមព្រៀងខុសច្បាប់នានា ដែលធ្វើឡើងនៅមុន ឆ្នាំ១៩៩០។ – (អត្ថបទដោយ ម៉ែន ណាត)


មន្ត្រី​ CPP (សុខ ឥសាន និង ផៃ ស៊ីផាន) គាំទ្រ​ថា​ភូមិ​លោក​ ហេង សំរិន ស្ថិត​ក្នុង​ទឹកដី​វៀតណាម
(Mon, 21-8-2017, មាស សុខជា, Phnom Penh Post)

ភ្នំពេញៈ ខណៈ​សាធារណជន ​កំពុង​រិះគន់​ប្រធាន​រាជបណ្ឌិត្យ​សភា​ លោក សុខ ទូច ដែល​និយាយ​ថា​ភូមិកំណើត​របស់​លោក​ ហេង សំរិន ប្រធាន​រដ្ឋសភា​ ស្ថិត​នៅ​ក្នុង​ទឹកដី​វៀតណាម មន្ត្រី​គណបក្ស​កាន់​អំណាច​ បាន​ការពារ​ការ​លើក​ឡើង​នេះ ​ដោយ​ថ្លែង​ថា ​ការ​លើក​ឡើង​របស់​លោក សុខ ទូច គឺ​ត្រឹមត្រូវ។

អ្នក​នាំពាក្យ ​គណបក្ស​ប្រជាជន​លោក សុខ ឥសាន និង​អ្នក​នាំ​ពាក្យរដ្ឋាភិបាល​ លោក​ ផៃ ស៊ីផាន បាន​ថ្លែង​កាលពី​ម្សិលមិញ​ថា ​ការ​លើក​ឡើង​របស់​ លោក សុខ ទូច ​គឺ​មិន​ខុស​ទេ ​ពីព្រោះ​ភូមិ​របស់​លោក ហេង សំរិន ពិត​ជា​ស្ថិត​នៅ​ក្នុង ​ទឹកដី​វៀតណាម ​មែន បើ​យោង​តាម​ផែនទី​ខ្នាត ១/១០០.០០០ ដែល​ចេញ​ដោយ​ ក្រុម​ភូមិសាស្ត្រ​ឥណ្ឌូចិន និង​រៀបចំ​ដោយ​អាណានិគម​បារាំង​។ លោក ឥសាន បាន​ប្រាប់​ភ្នំពេញ​ប៉ុស្តិ៍​ថា​៖ «​ខ្សែ​ផែនទី​ ដែល​រត់​នៅ​ខាង​លិច ​នៃ​ផ្ទះ​របស់​សម្តេច ហេង [​សំរិន​] វា​ជាក់ស្តែង​ដូច​នេះ​»​។ លោក​បន្ត​ថា ​កាលពី​មុន ​មិន​មាន​នរណា​គូស​ខ្សែ​ផែនទី​ កាត់​កន្លែង​ណា​នោះ​ទេ ដោយសារ​ផែនទី​ ខ្នាត​ ១/១០០.០០០ ដែល​ចេញ​ដោយ​អ្នក​ជំនាញ​បារាំង ​មិន​ត្រូវ​បាន​ប្រើប្រាស់​សម្រាប់​ការ​គូសបន្ទាត់​ព្រំដែន​។ លោក​បន្ត​ថា​៖ «​ប្រជាពលរដ្ឋ​មិន​ដឹង​ខ្សែ​ព្រំដែន ​នៅ​កន្លែង​ណា​ដោយសារ​យើង​ នៅ​លើ​ដី​ជាក់ស្តែង​»​។ លោក​បន្ត​ថា​៖ «​លោក សុខ ទូច បាន​និយាយ​ត្រឹមត្រូវ​ណាស់​លោក​បាន​និយាយ​ថា ​សម្តេច ហេង សំរិន បាន​ទៅ​រស់នៅ​ក្នុង ​ដី​វៀតណាម​។ ឯកឧត្តម សុខ ទូច ចូលចិត្ត​និយាយ​ខ្លាំងៗ​»​។ លោក ឥសាន បន្ត​ថា​ គណបក្ស​កាន់​អំណាច​ មិន​មាន​ប្រតិកម្ម​អ្វី​ ចំពោះ​លោក សុខ ទូច ទេ ​ដោយសារ​ផ្អែក​លើ​ផែនទី​បារាំង ភូមិ​របស់​លោក ហេង សំរិន ឈ្មោះ​ ភូមិ​ថ្លុកត្រាច​ដែល​ស្ថិត​នៅ​ក្នុង​ ស្រុក​ពញាក្រែក ខេត្ត​ត្បូងឃ្មុំ​ ពិតជា​នៅ​ក្នុង​ ដី​វៀតណាម ​ទោះ​យ៉ាង​ណា​ក្តី​ លោក ហេង សំរិន នៅ​តែ​ត្រូវ​បាន​អនុញ្ញាត​ ឲ្យ​រស់នៅ​ក្នុង​ភូមិ​របស់​លោក​ ដោយសារ​គ្រួសារ​របស់​លោក ​បាន​និង​កំពុង​រស់នៅ​ក្នុង​ភូមិ​នោះ​ ជា​យូរ​មក​ហើយ​។

ជាង​នេះ​ទៀត ​នៅ​លើ​ហ្វេសប៊ុក ​របស់​លោក ​កាលពី​ម្សិលមិញ​អ្នក​នាំ​ពាក្យ​រដ្ឋាភិបាល ​លោក​ ផៃ ស៊ីផាន ក៏​បាន​ការពារ​ការ​ថ្លែង​របស់​ លោក​ សុខ ទូច ​ផង​ដែរ​ថា​ផ្អែក​តាម​ផែនទី​ ខ្នាត ១/១០០.០០០ ភូមិសាស្ត្រ​ផ្ទះ​របស់​ លោក ហេង សំរិន គឺ​ស្ថិត​នៅ​ក្នុង​ ដី​វៀតណាម​ បច្ចុប្បន្ន និង​បាន​លើក​ឡើង ​នូវ​សំណួរ​មួយ​ថា ហេតុ​អ្វី​កម្ពុជា​ អាច​កាន់កាប់​តំបន់​នេះ​បាន​។ លោក ស៊ីផាន សរសេរ​ថា​៖ «​មាន​ន័យ​ថា​ក្នុង​សម័យកាល​អាណានិគម​បារាំង ​មិន​បាន​គូស​ព្រំដែន​រដ្ឋ​ទេ​ គឺ​មាន​តែ​​ព្រំដែន​រដ្ឋបាល​ រវាង​កម្ពុជា និង​កូសាំងស៊ីន ទី​ ២). ក្នុង​ន័យ​នេះ​បារាំង​ បាន​គូស​ផែនទី​ព្រំដែន​រដ្ឋបាល ​ដែល​យើង​ធ្លាប់​ស្គាល់​តាមរយៈ​ផែនទី «​បោន Bonne ខ្នាត​ ១/១០០.០០០» នេះ​ឯង​។ ដូច្នេះ​ប្រជាជន​ទាំង​សង​ខាង​នា​សម័យ​កាល​នោះ​ អាច​តាំង​លំនៅ​បន្ត​តាម​ទម្លាប់​តពី​ដូនតា​»​។ Read more

អ្នកវិភាគ៖ កម្ពុជា កំពុងវិវត្តទៅរករបបមួយ គួរឲ្យបារម្ភ ប៉ុន្តែមិនយូរ វានឹងផ្លាស់ប្តូរ!

9d88b3d4-64d1-4b2b-88d0-9542c74d1fb3

កាលពីថ្ងៃទី១៤ ខែសីហា ឆ្នាំ២០១៧ លោក ហ៊ុន សែន បានព្រមានថា លោកជាប្រមុខរដ្ឋាភិបាល មានអំណាចបំផុត ហើយលោកបញ្ជាក់ថា «គ្មានអ្នកណាម្នាក់ អាចទទឹងជាមួយ ហ៊ុន សែន បានទេ!»។ ជាមួយគ្នានេះ ក្រុមអ្នកឃ្លាំមើលនយោបាយ បានផ្តល់យោបល់ថា «កម្ពុជា កំពុងវិវត្តទៅរករបបមួយ គួរឲ្យបារម្ភ»។ តាមទស្សនៈសង្គមវិជ្ជា និងវិទ្យាសាស្រ្តនយោបាយ តែងតែរំលឹកថា «របបយោធានិយម ឬផ្តាច់ការ វានឹងផ្លាស់ប្តូរ ខណៈពេលពលរដ្ឋ កាន់តែលែងពញចិត្តនឹងការដឹកនាំនៃរបបនោះ» ។ (ដោយ ម៉ែន ណាត)


អ្នក​វិភាគ​ថា​ យោធា​ការពារ​មេដឹកនាំ​ អាច​ជា​ថ្នូរនឹង​ការ​ការពារ​ប្រយោជន៍​ផ្ទាល់​ខ្លួន
(ដោយ តាំង សារ៉ាដា, RFA Khmer, 16-8-2017)

អ្នក​ឃ្លាំមើល​សង្គម​ខ្លះ​បារម្ភ​ថា មន្ត្រី​យោធា​ជាន់​ខ្ពស់​ជា​ច្រើន ​មាន​ជាប់​ពាក់ព័ន្ធ​ នឹង​ផល​ប្រយោជន៍​ផ្ទាល់​ខ្លួន​នោះ អាច​នាំ​ឲ្យ​មាន​វណ្ណៈ​សង្គម​ពិសេស​មួយ ដែល​ក្រុម​យោធា​ចេញ​មុខ​ ការពារ​អំណាច​របស់​ នាយករដ្ឋមន្ត្រី​ ជា​ថ្នូរ​នឹង​ការ​ការពារ​ទ្រព្យ​សម្បត្តិ​ផ្ទាល់​ខ្លួន ​របស់​ពួកគេ។ ប៉ុន្តែ​មន្ត្រី​ជាន់​ខ្ពស់​របស់​រដ្ឋាភិបាល ​បដិសេធ​ការ​ចោទ​ប្រកាន់​នេះ។

អ្នក​វិភាគ​នយោបាយ​ក្នុង​ស្រុក ​វាយ​តម្លៃ​ថា កម្ពុជា ​កំពុង​បោះ​ជំហាន​ដ៏​ធំ​របស់​ខ្លួន ​ទៅ​រក​វណ្ណៈ​សង្គម​ពិសេស​មួយ ហើយ​ប្រើប្រាស់​អំណាច​ទាំង​នោះ​ ដើម្បី​កេង​ប្រវ័ញ្ច​លុយ​ជាតិ និង ​ផល​ល​ប្រយោជន៍​ផ្សេងៗ​ទៀត​ សម្រាប់​គ្រួសារ​របស់​ខ្លួន។ ការវិវត្តន៍​ដែល​គួរ​ភ័យ​ខ្លាច​នេះ ជា​បញ្ហា​ដែល​ធ្លាប់​កើត​មាន​ នៅ​ក្នុង​ប្រទេស​ដែល​ឆ្លងកាត់​សង្គ្រាម និង​របប​ផ្ដាច់ការ ​ហើយ​ឈាន​ទៅ​ចាប់​យក​ លទ្ធិប្រជាធិបតេយ្យ​សេរី។

អ្នក​វិភាគ​ឯករាជ្យ ​លោក​បណ្ឌិត ឡៅ ម៉ុងហៃ មាន​ប្រសាសន៍​ថា  ដោយសារ​តែ​មន្ត្រី​យោធា​ជាន់​ខ្ពស់​ របស់​ខ្មែរ​មួយ​ចំនួន​ មាន​ជាប់​ពាក់ព័ន្ធ​នឹង​ផល​ប្រយោជន៍​ផ្ទាល់​ខ្លួន ​ដូចជា​ករណី​ដីធ្លី ករណី​ភាគហ៊ុន​ ក្នុង​ស្រុក និង​ក្រៅ​ស្រុក​ជា​ដើម​នោះ អាច​នាំ​ឲ្យ​ក្រុម​យោធា​ ក្លាយ​ទៅ​ជា​ក្រុម​មួយ ឬ​វណ្ណៈ​មួយ ​ដែល​នាំ​ឲ្យ​ពួកគេ​ចេញ​មុខ​ ការពារ​អំណាច​នាយករដ្ឋមន្ត្រី ក៏​ដូចជា​ការពារ​អំណាច និង​ទ្រព្យ​សម្បត្តិ​ផ្ទាល់​ខ្លួន​ឯង​អ៊ីចឹង​ដែរ៖ «ប្រទេស​មាន​បញ្ហា​ដែល​គេ​ហៅ​ថា បញ្ហា​អង្គរក្ស គឺ​យោធា​នេះ​ឯង ហើយ​មួយ​ទៀត​ពាក់ព័ន្ធ​ ជាមួយគ្នា​ហ្នឹង​គឺ​ការ​ប្រើប្រាស់​ កង​ប្រដាប់​អាវុធ​ហ្នឹង គឺ​ធានា​សន្តិសុខ និង​របប​គ្រប់គ្រង​ហ្នឹង​ទៅ ហើយ​ក្រុម​យោធា​ហ្នឹង​ បាន​ក្លាយ​ទៅ​ក្រុម​ពិសេស​មួយ​ ដូចជា​វណ្ណៈ​អ៊ីចឹង​ ដែល​ការពារ​ផល​ប្រយោជន៍​ខ្លួន​ឯង ​ជា​ជាង​ការពារ​ប្រយោជន៍​ជាតិ»

​លោក​បន្ត​ថា បញ្ហា​នេះ​ដោយសារ​តែ​កម្ពុជា នៅ​មិន​ទាន់​មាន​យន្តការ​តាមដាន ឬ​ត្រួត​ពិនិត្យ​សកម្មភាព​របស់​យោធា និង​កងកម្លាំង​នគរបាល។ ក្នុង​រយៈពេល​ចុង​ក្រោយ​នេះ គេ​សង្កេត​ឃើញ​មេបញ្ជាការ​កងទ័ព​ជា​ច្រើន​បាន​ចាប់​អារម្មណ៍​ខ្លាំង ​ចំពោះ​កិច្ចការ​ថែរក្សា​សន្តិសុខ ​ច្រើន​ជាង​កិច្ច​ការពារ​បញ្ហា​ព្រំដែន តាម​រយៈ​ការ​ធ្វើ​សេចក្ដី​ថ្លែងការណ៍​ប្រឆាំង ​នឹង​បដិវត្តន៍​ពណ៌ ឬ​ការ​ធ្វើ​សម​យុទ្ធ​ ក្នុង​ន័យ​ដាក់​សម្ពាធ​ ដល់​គណបក្ស​ប្រឆាំង​ជាដើម។

​ក្នុង​ពិធី​ប្រារព្ធ​ខួប​លើក​ទី​៨ នៃ​ការ​បង្កើត​ទីបញ្ជាការ​កង​អង្គរក្ស​ របស់​មេដឹកនាំ​រដ្ឋាភិបាល​ ទីក្រុង​ភ្នំពេញ កាល​ពី​ដើម​ខែ​ កញ្ញា ឆ្នាំ​២០១៦ កន្លង​ទៅ អគ្គ​មេបញ្ជាការ​កង​យោធពល​ខេមរភូមិន្ទ លោក ប៉ុល សារឿន បាន​ចេញ​បទបញ្ជា​ឲ្យ ​«កង​អង្គរក្ស​ការពារ ​លោក​នាយករដ្ឋមន្ត្រី ហ៊ុន សែន និង​គ្រួសារ ហើយ​ការពារ​កុំ​ឲ្យ​មាន​បដិវត្តន៍​ពណ៌​ នៅ​កម្ពុជា»

ចំណែក​ឧត្ដមសេនីយ៍​ផ្កាយ​មាស៤ លោក ជា តារា កាល​ពី​ខែ​កក្កដា ឆ្នាំ​២០១៥ ក៏​ធ្លាប់​បាន​រំឭក​ថា «កង​ទាហាន​ទាំង​អស់​ជា​របស់​ គណបក្ស​ប្រជាជន​កម្ពុជា ដោយសារ​មាន​តែ​លោក ហ៊ុន សែន ទេ​ ដែល​ជា​អ្នក​ចិញ្ចឹម​បីបាច់​ថែរក្សា​ ដឹក​នាំ​បញ្ជា​កងទ័ព»

ចំណែក​ លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ កន្លង​មក​ព្រមាន​ «វាយ​បំបែក​ធ្មេញ​» ចំពោះ​ជន​ណា​ដែល​ហ៊ាន​តវ៉ា​លទ្ធផល​បោះឆ្នោត​ ឆ្នាំ​២០១៨ ខាង​មុខ។

ក្រុម​អ្នកឃ្លាំមើល​ខ្លះ​និយាយ​ថា «ខណៈ​ក្រុម​មេបញ្ជាការ​កងទ័ព គ្រាក់ៗ​មួយ​ចំនួន​ បាន​ចេញ​មុខ​ការពារ​របប​ដែល​ដឹកនាំ​ដោយ​ លោក ហ៊ុន សែន ដូច្នេះ ហាក់​ធ្វើ​ឲ្យ​កម្ពុជា កំពុង​ខិត​ទៅ​រក ​របប​យោធា​និយម ​អ៊ីចឹង​ដែរ»Read more

« Older Entries