បញ្ចូលអត្ថបទ៖ CWCI Cambodia
ប៉ុន្មានឆ្នាំចុងក្រោយនេះ នៅលើបណ្តាញសង្គម ជាពិសេសបណ្តាញហ្វេសប៊ុក គេឃើញតម្លៃសីលធម៌ និងសុជីវធម៌ក្នុងសង្គមខ្មែរ មានការធ្លាក់ចុះកាន់តែធ្ងន់ធ្ងរ តាមរយៈការជេរប្រមាថ ការលាបពណ៌ និងការកាត់តរូបភាពនានា ដែលពាក់ព័ន្ធវិស័យនយោបាយ សង្គម និងសិល្បៈ។
ក្រុមការងារយើង សូមលើកយកទស្សនៈមួយជ្រុង មកឆ្លុះបញ្ចាំងអំពីវិស័យនយោបាយកម្ពុជា ដែលកំពុងស្ថិតក្នុងស្ថានភាពវិបត្តិជាច្រើនអន្លើ ខណៈពេលរដ្ឋាភិបាលនៃលោក ហ៊ុន សែន រំលោភបំពានរដ្ឋធម្មនុញ្ញផង និងគោលការណ៍ច្បាប់អន្តរជាតិនានាផង។ ជាមួយគ្នានេះ ទាំងអ្នកនយោបាយស្រប អ្នកនយោបាយប្រឆាំង និងអ្នកគាំទ្ររបស់ពួកគេមួយចំនួន បានបង្កើតទស្សនៈជ្រុលនិយម បង្កការបែកបាក់ជាតិធ្ងន់ធ្ងរមួយកម្រិតទៀត។
ការជេរប្រមាថរបស់ក្រុមជ្រុលនិយម ហាក់ដូចជាចូលរួមជួយលោក ហ៊ុន សែន ជាជាងបម្រើមនសិការ លើការតស៊ូមតិរបស់ក្រុមខ្លួន ក្នុងនាមជាអ្នកនយោបាយប្រឆាំង នៃភាគីរបស់លោក សម រង្ស៊ី អតីតមេដឹកនាំបក្សប្រឆាំង ដែលសព្វថ្ងៃនៅក្រៅប្រទេស។ ពេលខ្លះ គណបក្សប្រជាជនកម្ពុជា របស់លោក ហ៊ុន សែន បានដើរតួនាទីជាជនរងគ្រោះ ពីការជេរប្រមាថរបស់អ្នកមាននិន្នាការប្រឆាំង នៃភាគីលោក សម រង្ស៊ី នៅប៉ុន្មានឆ្នាំមកនេះ ថ្វីត្បិតតែលោក ហ៊ុន សែន គឺជាដើមចម នៃការរំលោភរដ្ឋធម្មនុញ្ញ ឈានទៅការរំលាយគណបក្សប្រឆាំង និង ប្លន់យកកៅអីរដ្ឋសភា ព្រមទាំងក្រុមប្រឹក្សាឃុំសង្កាត់ទាំងអស់ ពីគណបក្សប្រឆាំង នៅចុងឆ្នាំ២០១៧ ក៏ដោយ។ នេះពុំទាន់រាប់បញ្ចូលការចាប់ឃុំខ្លួន លោក កឹម សុខា មេដឹកនាំគណបក្សប្រឆាំងនេះ ទាំងបំពានអភ័យឯកសិទ្ធិសភា ផងទេ។
មានមតិខ្លះលើកឡើងថា នាយករដ្ឋមន្ត្រី ហ៊ុន សែន ជាអ្នកនយោបាយមានទេពកោសល្យ បានផ្សាភ្ជាប់ការជេរប្រមាថទាំងនេះ ទៅនឹងប្រជាពលរដ្ឋខ្មែរ ដែលជាអ្នកកាន់ព្រះពុទ្ធសាសនា ដើម្បីយកប្រៀបខាងនយោបាយ ក្នុងពេលខ្លួនគាត់ ក៏ជាមេដឹកនាំជេរប្រមាថ និងលាបពណ៌គេឯង ដែលមានទស្សនៈមិនស្របនឹងខ្លួនដែរ។
ចាប់ពីឆ្នាំ១៩៧៩ រហូតមកដល់បច្ចុប្បន្ន គណបក្សប្រជាជនកម្ពុជា និងលោក ហ៊ុន សែន បន្តក្រាញអំណាច ក្នុងការសម្រេចគោលបំណងរបស់ខ្លួនគឺ «ធ្វើមានបានសម្រាប់ក្រុមគ្រួសារខ្លួន បក្ខពួកខ្លួន និងការពារអំណាចរបស់ខ្លួនគ្រប់តម្លៃ ដោយប្រើពាក្យការពារសន្តិភាព មកបិទបាំងការពិត» បើទោះបីជារដ្ឋាភិបាលរបស់គាត់ បន្តរំលោភគោលការណ៍នីតរដ្ឋ, ប្រព្រឹត្តអំពើពុករលួយ, រំលោភសិទ្ធិសេរីភាពប្រជាពលរដ្ឋ, ប្រើប្រព័ន្ធតុលាការ និងកងកម្លាំងប្រដាប់អាវុធ សម្លុតគំរាមកំហែងបំបិទមាត់ប្រជាពលរដ្ឋ, បំផ្លាញធនធានធម្មជាតិ, និងខ្វះខាតសំបើមនូវប្រព័ន្ធសុខុមាភាពសង្គមសម្រាប់ជួយជនខ្សត់ខ្សោយ ជាពិសេសធ្វើឲ្យយុវជនខ្មែររាប់សែននាក់ ធ្វើចំណាកស្រុក ជាដើម។ល។
តើប្រជាពលរដ្ឋខ្មែរ យល់ដឹងបញ្ហាទាំងនេះច្បាស់លាស់ឬទេ? – ប្រាកដណាស់ថា ប្រជាពលរដ្ឋខ្មែរ អាចដឹងគ្រប់សព្វអំពីបញ្ហាសង្គមទាំងនេះ។ – ចុះហេតុអ្វីប្រជាពលរដ្ឋខ្មែរមួយភាគ នៅតែអត់ឱនឱ្យគណបក្សប្រជាជនកម្ពុជា ជាពិសេសគឺលោក ហ៊ុន សែន?
មានកត្តាជាច្រើនដែលធ្វើឱ្យប្រជាពលរដ្ឋខ្មែរ យល់ថា មេដឹកនាំប្រឆាំង មានភាពទន់ខ្សោយ មិនអាចយកឈ្នះលោក ហ៊ុន សែន បាន។
កត្តាទី១៖ លោក ហ៊ុន សែន និងលោក សម រង្សុី ជាអ្នកនយោបាយ បានធ្វើការដោះដូរផលប្រយោជន៍គ្នាទៅវិញទៅមក ដោយមិនបានបម្រើផលប្រយោជន៍ប្រទេសជាតិ និងប្រជាពលរដ្ឋ ដែលប្រាថ្នាចង់បាន ដោយជាក់លាក់ទេ ៖
– លោក ហ៊ុន សែន និងលោក សម រង្ស៊ី បានព្រមព្រៀងគ្នា កែប្រែរដ្ឋធម្មនុញ្ញ ពី ២ភាគ៣ (២/៣) មកត្រឹម ៥០បូក១ (៥០%បូក១) នៅថ្ងៃទី ១៥ មីនា ២០០៦ ដែលជាការដោះដូរនយោបាយកាលនោះ។ រឿងនេះហើយ បានធ្វើឱ្យអ្នកប្រឆាំង បាក់កម្លាំងពីមួយឆ្នាំទៅមួយឆ្នាំ និងពីមួយអាណត្តិទៅមួយអាណត្តិ រហូតដល់សព្វថ្ងៃ។
– ការបង្កើតជម្លោះនយោបាយ ជាលក្ខណៈបុគ្គល រួចហើយផ្សះផ្សានយោបាយក៏ជាលក្ខណៈបុគ្គលច្រំដែលៗ ដែលបានធ្វើឱ្យប្រជាពលរដ្ឋ មើលឃើញថា «ពួកគាត់ទាំងពីរនាក់ នឹងត្រូវរូវគ្នាវិញ ហើយក៏ទាស់គ្នាវិញ នៅថ្ងៃណាមួយ» ពោលគឺ «មិននាំមកផលចំណេញសម្រាប់ជាតិ និងពលរដ្ឋជាក់លាក់ទេ»។ ជាក់ស្តែង នៅឆ្នាំ២០១៣ ជាឆ្នាំធំបំផុត ដែលប្រជាពលរដ្ឋខ្មែរ ផ្តល់សេចក្តីទុកចិត្ត ដល់លោក សម រង្សុី និងលោក កឹម សុខា នៃគណបក្សសង្គ្រោះជាតិ ដែលបានប្រកាសថា «ឈ្នះការបោះឆ្នោតជាតិ និងដឹកនាំមហាបាតុកម្មរាប់លាននាក់»។ ពេលនោះ នៅថ្ងៃទី២៤ ខែកញ្ញា ឆ្នាំ២០១៣ ក្រុមសមាជិកសភាជាប់ឆ្នោត ៥៥ រូប នៃគណបក្សសង្គ្រោះជាតិ បានទៅស្បថសច្ចានៅមុខអង្គរវត្ត ខេត្តសៀមរាប ថា «មិនចូលរួមជាមួយសភាជាតិ ដើម្បីបង្គ្រប់ទឹក ឱ្យគណបក្សប្រជាជនកម្ពុជា នៃលោក ហ៊ុន សែន ទេ» ខណៈភាគីលោក ហ៊ុន សែន ចូលស្បថស្បែរក្នុងថ្ងៃប្រជុំរដ្ឋសភាដំបូង នៅទីក្រុងភ្នំពេញ នាថ្ងៃទី២៤ ខែកញ្ញា ដដែលនោះដែរ។ លុះដល់ខែកក្កដា ឆ្នាំ២០១៤ លោក សម រង្សុី និងគណបក្សសង្គ្រោះជាតិទាំងមូល ប្រកាសចូលប្រជុំរដ្ឋសភា យ៉ាងតល់ក្រហល់ បន្ទាប់ពីសម្របសម្រួលស្ងាត់ៗ ជាមួយលោក ហ៊ុន សែន រួចរាល់។
– ការកំណត់គោលដៅនយោបាយ «មានសុី (សម រង្ស៊ី) អត់សែន (ហ៊ុន សែន) ឬមានសែន អត់សុី» បានធ្វើឱ្យបែកបាក់ស្មារតីផ្សះផ្សាជាតិ និងឯកភាពជាតិ កាន់តែធ្ងន់ធ្ងរ ហើយមិនបានបម្រើផលប្រយោជន៍ប្រទេសជាតិជាដុំកំភួនសោះ ដែលផ្ទុយពីសេចក្តីត្រូវការរបស់ប្រជាពលរដ្ឋខ្មែរ ដែលប្រថ្នាចង់ឃើញ «អ្នកនយោបាយខ្មែរ ចេះនិយាយរកគ្នា ចេះគោរពគ្នា និងចេះយោគយល់គ្នា»។
កត្តាទី២៖ សកម្មភាពជ្រុលនិយមនានា នៅពិភពនយោបាយខ្មែរ គេអាចមើលឃើញថា អ្នកនយោបាយខ្មែរ ប្រើវោហារសាស្ត្រវាយប្រហារគ្នា តាមរូបភាពជេរប្រមាថ លាបពណ៌ ញុះញង់ មូលបង្កាច់គ្នាទៅវិញទៅមក នៅតែបន្តកើតមាន។ បច្ចុប្បន្ននេះ មានតឹកតាងសំបូរបែបបង្ហាញថា លោក ហ៊ុន សែន មេដឹកនាំបក្សកាន់អំណាច, លោក សម រង្សុី អតីតមេដឹកនាំបក្សប្រឆាំង និងលោក ខឹម វាសនា មេដឹកនាំបក្សជួង ហាក់ដូចជាដើរទិសដៅស្របគ្នា ចូលរួមយ៉ាងសកម្ម និងបណ្តែតបណ្តោយឲ្យក្រុមអ្នកគាំទ្ររបស់ខ្លួន នៅលើបណ្តាញសង្គម ដើរជេរប្រមាថ លាបពណ៌ និងបង្អាប់បន្តុះព្រះពុទ្ធសាសនា ព្រះមហាក្សត្រ និងប្រជាពលរដ្ឋ ដែលមានទស្សនៈផ្ទុយពីក្រុមរបស់ខ្លួន។
ការលើកឡើងលើ ជាការបង្ហាញនូវក្តីព្រួយបារម្ភសង្គម អាចនាំទៅរកហានីភ័យធ្ងន់ធ្ងរ ទាំងការស្រុតចុះតម្លៃសីលធម៌ សុជីវធម៌ និងទាំងការលែងស្គាល់ច្បាប់ទម្លាប់ ដែលបង្កការបែកបាក់សង្គមបន្ថែមទៀត។ ដូច្នេះ អ្នកនយោបាយខ្មែរគ្រប់ភាគី និងពលរដ្ឋខ្មែរខ្លួនឯងក្នុងចំនួនណាមួយនោះ គម្បីប្រញាប់ភ្ញាក់រលឹក នាំគ្នាកែប្រែស្ថានភាពសង្គម និង កែប្រែប្រក្រតីភាពខាងនយោបាយឡើងវិញ ស្របតាមទំនៀមទម្លាប់ដ៏ល្អរបស់ដូនតាខ្មែរ, ស្របតាមរដ្ឋធម្មនុញ្ញ និងស្របតាមយន្តការច្បាប់អន្តរជាតិ៕
អត្ថបទដោយលោក ទូច វិបុល និងលោក ម៉ែន ណាត នៃចលនានិស្សិតដើម្បីលទ្ធិប្រជាធិបតេយ្យ
.
.