ច្បាប់ស្តីពីការគ្រប់គ្រងប្រទេសក្នុងភាពអាសន្ន ដែលព្រឹទ្ធសភាកម្ពុជា គ្រោងអនុម័តក្រោយពេលចូលឆ្នាំថ្មី កំពុងទទួលរងការរិះគន់បន្ថែមទៀត ពីសំណាក់អង្គការសហប្រជាជាតិ (អ.ស.ប «UN») និងអ្នកជំនាញផ្នែកសិទ្ធិមនុស្សអន្តរជាតិថា ជាច្បាប់ ធ្វើឡើងក្នុងគោលដៅរឹតបន្តឹងហួសហេតុ នូវសេរីភាព របស់ពលរដ្ឋ រួមមានសេរីភាពដើរហើរ សេរីភាពជួបប្រជុំ និងសេរីភាពបញ្ចេញមតិ។
កាលពីថ្ងៃទី ០៩ មេសា ឆ្នាំ២០២០ លោកស្រី រ៉ូណា ស្ម៊ីត (Rhona Smith) អ្នករាយការណ៍ពិសេសនៃ អង្គការសហប្រជាជាតិ (អ.ស.ប) បានផ្ញើលិខិតទៅរដ្ឋាភិបាលកម្ពុជា (សូមទាញយក Download) សម្តែងការព្រួយបារម្ភ យ៉ាងដូច្នេះថា «យើងយល់អំពីស្ថានភាពនៃ វិធានការបង្ការសុខភាពពលរដ្ឋ ពីការឆ្លងជំងឺកូវីដ-១៩។ ទោះជាយ៉ាងក្តី យើងមានការព្រួយបារម្ភថា ការធ្វើច្បាប់នេះឡើង មានការរឹតត្បឹតធ្ងន់ធ្ងរ នូវសេរីភាពបញ្ចេញមតិ សេរីភាពប្រមូលផ្តុំដោយសន្តិវិធី និងសេរីភាពដើរហើរ ដែលមានចែងក្នុងកតិកាសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ»។
ក្នុងលិខិតជាភាសាអង់គ្លេស មាន ៤ ទំព័រ លោកស្រី រ៉ូណា ស្ម៊ីត បញ្ជាក់បន្ថែមថា «អ្នកជំនាញឯករាជ្យបានស្នើសុំឲ្យរដ្ឋាភិបាលកម្ពុជា ផ្តល់ព័ត៌មានជាក់លាក់ ស្តីពីវិធានការទាំងឡាយដែលត្រូវអនុវត្ត ហើយត្រូវធានាថា សេចក្តីព្រាងច្បាប់នេះ ស្របតាមកាតព្វកិច្ចរបស់កម្ពុជា ក្រោមច្បាប់នានា និងបទដ្ឋានសិទ្ធិមនុស្សអន្តរជាតិ»។
បើតាមវិទ្យុសម្លេងសហរដ្ឋអាមេរិ វីអូអេ (VOA) បានដកសារអេឡិចត្រូនិច លោក ប្រាឌីប វ៉ាហ្កល (Pradeep Wagle) តំណាងឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ប្រចាំប្រទេសកម្ពុជា (UNHCR Cambodia) ឲ្យដឹងថា «លិខិតបង្ហាញពីសេចក្តីព្រួយបារម្ភ របស់លោកស្រី រ៉ូណា ស្មីត ត្រូវបានផ្ញើទៅរដ្ឋាភិបាលកម្ពុជា តាមរយៈស្ថានបេសកកម្មអចិន្ត្រៃយ៍របស់កម្ពុជា ប្រចាំអង្គការសហប្រជាជាតិ (អ.ស.ប) នៅទីក្រុងហ្សឺណែវ ប៉ុន្តែមិនទាន់អាចបញ្ជាក់ថា រដ្ឋាភិបាលកម្ពុជា មានការឆ្លើយតប ឬយ៉ាងណានៅឡើយទេ»។
អ្នកនាំពាក្យនៃ គណៈកម្មាធិការសិទ្ធិមនុស្សរដ្ឋាភិបាលកម្ពុជា នៅថ្ងៃទី ១៥ ខែមេសានេះ គឺលោក កត្តា អ៊ន ត្រូវបានវិទ្យុវីអូឌី (VOD) ដកស្រង់សម្តីថា «ស្ថានភាពសិទ្ធិមនុស្សនៅកម្ពុជា គឺពុំមានការប៉ះពាល់នោះទេ។ ផ្ទុយទៅវិញ គឺមានការជ្រោមជ្រែងឡើងនៃសិទ្ធិមនុស្ស ទៅវិញទេ»។
បើតាមវិទ្យុអាមេរិក វីអូអេ ផ្សាយថា គណៈកម្មាធិការសិទ្ធិមនុស្សរដ្ឋាភិបាលកម្ពុជា ចេញសេចក្តីថ្លែងការណ៍ កាលពីថ្ងៃទី ១៣ ខែមេសា ការពារសេចក្តីព្រាងច្បាប់ដាក់ប្រទេសក្នុងភាពអាសន្នថា «មិនមានចរិតជាការរំលោភសិទ្ធិមនុស្ស ឬជាឧបករណ៍ប្រមូលផ្តុំអំណាច ដូចការចោទប្រកាន់បែបអគតិ របស់ក្រុមប្រឆាំងមួយក្តាប់តូចនោះទេ»។
ចំណែកលោក Brad Adam នាយកអង្គការសិទ្ធិមនុស្សអន្តរជាតិ HumanRights Watch ប្រចាំអាស៊ី បានហៅថា «ច្បាប់ដាក់ប្រទេសក្នុងភាពអាសន្ននេះ ធ្វើឡើងដើម្បីផ្តល់អំណាចគ្មានដែនកំណត់ ឲ្យនាយករដ្ឋមន្រ្តី ហ៊ុន សែន ដែលក្នុងនោះមានទាំងអំណាចអាជ្ញាសឹក»។ លោក Brad Adams បន្ថែមថា «ហើយវា {ច្បាប់នេះ} ក៏អនុញ្ញាតឲ្យរដ្ឋាភិបាល អានសារអ៊ីម៉ែល និងស្តាប់ការសន្ទនា តាមទូរស័ព្ទផងដែរ»។
មេដឹកនាំកម្ពុជា លោក ហ៊ុន សែន បានថ្លែងការពារខ្លួនថា ច្បាប់នេះ មិនមែនធ្វើឡើងដើម្បីបំបិទមាត់ក្រុមប្រឆាំងនោះទេ គឺធ្វើឡើងដើម្បីការពារអាយុជីវិតរបស់ប្រជាពលរដ្ឋ។
របាយការណ៍របស់ អង្គការសិទ្ធិមនុស្សអន្តរជាតិ Human Right Watch ឲ្យដឹងថា រដ្ឋាភិបាលលោក ហ៊ុន សែន បានចាប់ឃុំខ្លួនអ្នករិះគន់ចំនួន ២៣ នាក់ហើយមកដល់ពេលនេះ ដោយសារតែពួកគេ គ្រាន់តែបញ្ចេញមតិ អំពីការព្រួយបារម្ភរបស់ពួកគេ ជុំវិញស្ថានភាពរីករាលដាលជំងឺកូរ៉ូណា ឬកូវីដ-១៩៕
អត្ថបទដោយលោក ម៉ែន ណាត នៃក្រុមប្រឹក្សាឃ្លាំមើលកម្ពុជា
.