អត្ថបទ The Cambodia Daily / 18-11-2020 / សម្រួលអត្ថបទដោយ CWCI Cambodia
ក្រុមអ្នកឃ្លាំមើលបញ្ហាព្រំដែន ជំរុញឲ្យរដ្ឋាភិបាលកម្ពុជា មានភាពក្លាហានក្នុងការតវ៉ា លើករណីទាហានវៀតណាម បោះតង់ ឬបោះជំរំ ជាសំណង់រឹងមាំ នៅតាមព្រំដែនខ្មែរ។ ពួកគេថា បញ្ហានេះជាសញ្ញាបង្ហាញអំពីការឈ្លានពានគ្មានកោតញញើត មកលើបូរណភាពទឹកដី របស់កម្ពុជា ដែលជាសកម្មភាពរំលោភលើគោលការណ៍ច្បាប់ជាតិ និងអន្តរជាតិនានា មិនអាចប្រកែកបាន។
ប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត រិះគន់ថា រដ្ឋាភិបាលលោក ហ៊ុន សែន កំពុងលាក់បាំងពលរដ្ឋខ្មែរ ដោយខំព្យាយាមសម្រាលការបោះតង់ខុសច្បាប់របស់វៀតណាមថា ជារឿងតូចតាច ឬ ជារឿងកំប៉ិកកំប៉ុក។
លោកថា «ផ្ទុយគ្នាស្រឡះពីជម្លោះជាមួយថៃ ក្នុងតំបន់ប្រាសាទព្រះវិហារ កាលពីឆ្នាំ២០០៨ និងជម្លោះជាមួយលាវ កាលពីឆ្នាំ២០១៧ ដែលរដ្ឋាភិបាលកម្ពុជា បានលើកទ័ព ទាំងកងពល ទៅទប់ទល់ក្នុងជម្លោះនោះ ដើម្បីទាមទារឯករាជ អធិបតេយ្យ និងបូរណភាពទឹកដី»។
លោក ម៉ែន ណាត អះអាងថា មន្ត្រីរដ្ឋាភិបាលរបស់លោក ហ៊ុន សែន មិនទទួលខុសត្រូវ ក្នុងការងាររបស់ពួកគេទាល់តែសោះ ត្បិតពេលមានបញ្ហា ពួកគេតែងឆ្លើយដាក់គ្នាទៅវិញទៅមក ទាំងមន្ត្រីក្រសួងការបរទេស ទាំងគណៈកម្មាធិការព្រំដែន និងក្រុមអភិបាលខេត្តមួយចំនួនទៀត ដើម្បីរកលេសដោះសារ គេចវេសរៀងៗខ្លួន ។ លោក ព្រមានថា ការធ្វើផែនទីខុសច្បាប់ថ្មី និងធ្វើច្បាប់ថ្មីៗ ដូចជាសេចក្តីព្រាង ស្តីពីពិធីសារខណ្ឌសីមា និងបោះបង្គោលព្រំដែន ជាដើម ជាមួយវៀតណាម ដោយផ្អែកតាមសន្ធិសញ្ញាខុសច្បាប់ ឆ្នាំ១៩៨៥ គឺជាការធ្វើសម្បទានថ្មីបន្ថែមទៀត ក្នុងការកាត់ឆ្វៀលបូរាណភាពទឹកដីខ្មែរ ទៅឲ្យវៀតណាម ជាថ្នូរនឹងការរក្សាអំណាចរបស់លោក ហ៊ុន សែន ឲ្យបានយូរអង្វែង។
ការរិះគន់នេះធ្វើឡើង បន្ទាប់ពីទាហានវៀតណាម បានរំលោភបំពានបង្កើនការបោះតង់ខុសច្បាប់បន្ថែមទៀត នៅភូមិពោធិ៍ ឃុំមេសថ្ងក ស្រុកចន្រ្ទា ខេត្តស្វាយរៀង នៅថ្ងៃទី១៧ ខែវិច្ឆិកា ឆ្នាំ២០២០ នេះ។
{ពលរដ្ឋនៅព្រំដែន បញ្ជាក់ថា ទាហានវៀតណាម បោះតង់ ៤ ទីតាំង នៅចន្លោះបង្គោលព្រំដែន លេខ ១៨៣ ដល់ ១៨៩ ក្នុងស្រុកចន្ទ្រា ប៉ុន្តែមន្រ្តីសាលាខេត្តស្វាយរៀង បានបដិសេធ។ នេះបើតាមវិទ្យុអាស៊ីសេរី ផ្សាយនៅថ្ងៃទី ១៨ វិច្ឆិកា}។
ពាក់ព័ន្ធនឹងការបោះតង់នេះ លោក អ៊ុំ សំអាន តំណាងរាស្ត្រអតីតគណបក្សសង្គ្រោះជាតិ បានលើកឡើងលើទំព័រហ្វេសប៊ុកថា ទាហានយួន បោះតង់លើដីខ្មែរ តែលោក {ហ៊ុន សែន} គ្មានប្រតិកម្មអ្វីបន្តិចសោះ។ លោក រិះគន់ថា «រដ្ឋាភិបាល លោក ហ៊ុន សែន ខ្លាំងបានតែជាមួយប្រជាពលរដ្ឋខ្មែរតែប៉ុណ្ណោះ ហើយសូម្បីសេចក្តីព្រាងច្បាប់ស្តីពី ពិធីសារខណ្ឌសីមា និងបោះបង្គោលព្រំដែន កម្ពុជា-វៀតណាម កាលពីពេលថ្មីៗនេះក៏ធ្វើឡើង ដើម្បីបំពេញចិត្តវៀតណាម ឲ្យឈ្លានពានកម្ពុជា ដោយស្របច្បាប់ផងដែរ»។
ចាប់តាំងពីដើម ខែមេសា ឆ្នាំ២០២០ មក ទាហានវៀតណាម បានបោះតង់ចំនួនជិត ៣០០ កន្លែង នៅតំបន់ដែលមិនទាន់ឯកភាពគ្នា រួមមាន ខេត្តតាកែវ ខេត្តព្រៃវែង ខេត្តស្វាយរៀង ខេត្តកំពត ខេត្តត្បូងឃ្មុំ ខេត្តរតនគិរី និងខេត្តមណ្ឌលគិរី ក្រោមលេសថា ដើម្បីទប់ស្កាត់ការឆ្លងជម្ងឺកូវីដ-១៩។
ជាងនេះទៅទៀត យ៉ាងហោចណាស់មានតង់ ១៦ កន្លែងហើយ ដែលកងទ័ពវៀតណាមប្រែក្លាយតង់ទាំងនោះ ជាជម្រករឹងមាំ ស្ថិតក្នុងស្រុកលើកដែក និងស្រុកកោះធំ ខេត្តកណ្ដាល តំបន់ថ្ម ៣ដុំ ក្នុងខេត្តតាកែវ និងស្រុកកំពង់ត្រាច ខេត្តកំពត មកក្រោមលេសថា ដើម្បីការពារសុវត្ថិភាព ក្នុងរដូវទឹកជំនន់ ។
ទោះជាយ៉ាងណាក៏ដោយ លោកបណ្ឌិត ឡៅ ម៉ុងហៃ អ្នកវិភាគឯករាជ្យ អះអាងថា បរទេសមកត្រួតត្រាខ្មែរ បណ្តាលឲ្យខ្មែរ បាត់បង់ឯករាជ្យជាតិ បាត់បង់សមត្ថភាពគ្រប់គ្រងខ្លួនឯង បាត់បង់សន្តិភាព បាត់បង់ឯកភាពជាតិ និងឈានទៅដល់ការបាត់បង់ បូរណភាពទឹកដីទាំងមូលថែមទៀត។
ក្រុមអ្នកឃ្លាំមើលសង្គម អំពាវនាវឲ្យរដ្ឋាភិបាលលោក ហ៊ុន សែន ធ្វើមោឃភាព ឬនារាករណ៍ ទៅលើសន្ធិសញ្ញា និងឯកសារមិនស្របច្បាប់នានា ផ្ទុយពីស្មារតីនៃរដ្ឋធម្មនុញ្ញ ឆ្នាំ១៩៩៣ និងមិនស្របកិច្ចព្រមព្រៀងទីក្រុងប៉ារីស ឆ្នាំ១៩៩១ ដើម្បីបើកផ្លូវក្នុងការប្តឹងប្រទេសវៀតណាម តាមយន្តការអន្តរជាតិ ជាធរមាន៕
.
.