សារព័ត៌មាន The Cambodia Daily / 09th-4-2021
ក្រុមអ្នកតស៊ូរមតិ លើកឡើងថា ការផ្លាស់ប្ដូរ ឬមិនផ្លាស់ប្ដូរ ក្បាលម៉ាស៊ីនបក្សកុម្មុយនិស្តវៀតណាម មិនមានអ្វីល្អសម្រាប់កម្ពុជានោះទេ ព្រោះផែនការរំលោភអធិបតេយ្យ និង {បូរណភាពទឹកដី}របស់កម្ពុជា គឺជាគោលការណ៍រួមរបស់រដ្ឋការក្រុងហាណូយ ដូច្នេះទោះជាមេដឹកនាំវៀតណាមមួយណាឡើងកាន់អំណាច ក៏នៅតែបន្តផែនការនេះដដែល។
ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃនេះថា ការឡើងកាន់តំណែងរបស់នាយករដ្ឋមន្ត្រីថ្មី របស់វៀតណាម គឺជាសញ្ញាបង្ហាញឲ្យឃើញថា កម្ពុជា នឹងត្រូវធ្វើសម្បទានថ្មីបន្ថែមទៀត តាមសំណើរបស់វៀតណាម ជាមិនខាន។
លោកអះអាងថា ជាទំនៀមទម្លាប់ចំពោះទំនាក់ទំនងរវាងកម្ពុជា-វៀតណាមទៅហើយ រាល់ពេលវៀតណាម តែងតាំងមេដឹកនាំថ្មី គឺកម្ពុជា តែងតែយកអធិបតេយ្យជាតិរបស់ខ្លួន ធ្វើជាកាដូជូនវៀតណាម តាមរយៈការធ្វើសម្បទាននានា ដូចជា ការកែប្រែផែនទីថ្មី និងការបង្កើតសន្ធិសញ្ញាផ្សេងៗច្រើនទៀត ជាដើម ដែលផ្តល់សិទ្ធិឲ្យវៀតណាម អាចឈ្លានពានកម្ពុជាបន្តទៀតដោយស្របច្បាប់។
ការរិះគន់នេះ ធ្វើឡើងបន្ទាប់ពីសភាជាតិ របស់ប្រទេសវៀតណាម បានបោះឆ្នោតជ្រើសរើសនាយករដ្ឋមន្ត្រីថ្មី ជំនួសលោក ង្វៀន សួនហ្វ៊ុក (Nguyen Xuan Phuc) ដែលត្រូវបានតែងតាំងជាប្រធានាធិបតី កាលពីដើមខែមេសា ឆ្នាំ២០២១ នេះ។
សភាបក្សកុម្មុយនិស្តវៀតណាម បានបោះឆ្នោតកាលពីថ្ងៃទី ៥ ខែមេសា ឆ្នាំ២០២១ ជ្រើសលោក ផាម មិញជីញ (Pham Minh Chinh) ដែលអតីតមន្ត្រីជាន់ខ្ពស់ផ្នែកសន្តិសុខជាតិ ធ្វើជានាយករដ្ឋមន្ត្រីថ្មី សម្រាប់ដឹកនាំសាធារណរដ្ឋប្រជាមានិតកុម្មុយនិស្តវៀតណាម បន្តទៀត។
អ្នកសង្កេតការណ៍រិះគន់ថា នាយករដ្ឋមន្ត្រីរបស់កម្ពុជា ពិតប្រាកដគឺវៀតណាម ទៅវិញទេ ខណៈនាយករដ្ឋមន្ត្រីស្រមោលរបស់ខ្មែរ គឺជានាយករដ្ឋមន្ត្រីកម្ពុជាបច្ចុប្បន្ននេះ ត្បិតរាល់ពេលផ្លាស់ប្ដូរមេដឹកនាំធំៗវៀតណាមម្តងៗ លោក ហ៊ុន សែន តែងធ្វើសម្បទានព្រំដែន ឬការអនុញ្ញាតឲ្យជនជាតិវៀតណាម ចូលមកកម្ពុជា រស់នៅខុសច្បាប់ កាន់តែច្រើនបន្ថែមទៀត។
កាលពីឆ្នាំ១៩៨២ រដ្ឋមន្ត្រីការបរទេសវៀតណាម លោក ង្វៀង កូថាច់ បានចុះហត្ថលេខាខុសច្បាប់ កំណត់ព្រំដែនទឹក{ប្រវត្តិសាស្ត្រ} ឆ្នាំ១៩៨២ និងចុះហត្ថលេខាលើសន្ធិសញ្ញាកំណត់ព្រំដែនរដ្ឋ ដោយខុសច្បាប់ ឆ្នាំ១៩៨៥ ជាមួយលោក ហ៊ុន សែន ដែលជារដ្ឋមន្ត្រីការបរទេស នាពេលនោះ។
ជាងនេះទៀត កាលពីឆ្នាំ២០០៥ នាយករដ្ឋមន្ត្រីវៀតណាម លោក ផាន វ៉ាន់ខាយ បានសហការជាមួយប្រមុខរដ្ឋាភិបាលខ្មែរ លោក ហ៊ុន សែន ចុះហត្ថលេខាទទួលស្គាល់សន្ធិសញ្ញាបំពេញបន្ថែមឆ្នាំ២០០៥ ដោយខុសច្បាប់ ដែលផ្ទុយទៅនឹងខ្លឹមសារកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ទាំងស្រុង។
មិនត្រឹមតែប៉ុណ្ណោះ កាលពីឆ្នាំ២០១៩ ក្រោមការដឹកនាំរបស់លោក ង្វៀន ស៊ុនហ្វុក ជានាយករដ្ឋមន្ត្រីវៀតណាម នៅពេលនោះ បានទាមទារឲ្យលោក ហ៊ុន សែន ចុះហត្ថលេខាខុសច្បាប់លើ សន្ធិសញ្ញាបំពេញបន្ថែម ឆ្នាំ២០១៩ មួយទៀត ដើម្បីបញ្ជាក់ពីសុពលភាពកិច្ចព្រមព្រៀងខុសច្បាប់នានា រវាងកម្ពុជា-វៀតណាម កន្លងមក ដែលបាន«មោឃភាព»ដោយកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ថា នៅតែមានសុពលភាពសម្រាប់ប្រទេសទាំងពីរ។
ក្រសួងការបរទេស និងសហប្រតិបត្តិការអន្តរជាតិ របស់កម្ពុជា បានចេញសេចក្តីប្រកាសព័ត៌មាន កាលពីថ្ងៃទី៦ ខែមេសា ឆ្នាំ២០២១ នេះ ស្ដីពីខ្លឹមសារជំនួបតាមទូរស័ព្ទ រវាងនាយករដ្ឋមន្ត្រីថ្មី របស់វៀតណាម លោក ផាម ម៉ិញជិញ និងលោក ហ៊ុន សែន ថា កម្ពុជា-វៀតណាម នឹងរឹតចំណងមិត្តភាព និងធ្វើកិច្ចសហប្រតិបត្តិការគ្រប់ជ្រុងជ្រោយ ឲ្យកាន់តែខ្លាំងបន្ថែមទៀត៕
.