The Cambodia Daily
19-12-2022
ក្រុមអ្នកឃ្លាំមើលសង្គមរស់នៅក្រៅស្រុក រិះគន់ថា ការអនុញ្ញាតឱ្យយុវជនសង្គម ធ្វើបាតុកម្មប្រឆាំងតវ៉ានឹងការផ្តល់ប័ណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតដេប៉ាតឺម៉ង់សិក្សាភាសាវៀតណាម របស់សាលារាជធានីភ្នំពេញ គឺទំនងជាលោក ហ៊ុន សែន បានរងនូវសម្ពាធធ្ងន់ធ្ងរពីសហគមន៍អឺរ៉ុប កាលពីពេលថ្មីៗ។
ប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១៩ ធ្នូ នេះថា ការចូលរួមកិច្ចប្រជុំអាស៊ាន-អឺរ៉ុប កាលពីពេលថ្មីៗនេះ លោក ហ៊ុន សែន ត្រូវបានមេដឹកនាំនៃសហគមន៍អឺរ៉ុប ដាស់តឿន និងក្រើនរំលឹកដោយចំៗអំពីបញ្ហាសិទ្ធិមនុស្ស ដូចជាប្រធានាធិបតីបារាំង លោក អេម៉ានុយអែល ម៉ាក្រុង ដែលបានលើកឡើងអំពីការចុះហត្ថលេខាលើកិច្ចព្រមព្រៀងទីក្រុងប៉ារីស ឆ្នាំ១៩៩១ ស្ដីពីសន្តិភាពនៅកម្ពុជា បន្ទាប់ពីកិច្ចព្រមព្រៀងអន្តរជាតិមួយនេះ ត្រូវគេមើលឃើញថា រដ្ឋាភិបាលកម្ពុជា បានទុកចោលមិនអនុវត្តអស់រយៈពេលជាង ៣០ឆ្នាំកន្លងមក។
ប្រធានវេទិកាពលរដ្ឋ រូបនេះ បញ្ជាក់ថា បន្ទាប់ពីទទួលរងនូវសម្ពាធនានាពីមេដឹកនាំ នៃបណ្តាប្រទេសនៅសហគមន៍អឺរ៉ុបបែបនេះហើយ ទើបលោក ហ៊ុន សែន ប្រើវិធីសាស្ត្របន្ធូរស្ថានការណ៍ ដើម្បីឆ្លើយតបទៅនឹងការជំរុញរបស់មេដឹកនាំទាំងនោះ ប៉ុន្តែបាតុកម្មនេះ គឺត្រូវស្ថិតក្នុងការតាមដាន និងឃ្លាំមើលរបស់អាជ្ញាធរកម្ពុជាគ្រប់ពេលវេលាទាំងអស់ ដូច្នេះការបើកឱ្យធ្វើបាតុកម្មនេះ គ្រាន់តែជាវិធីបង្គ្រប់កិច្ច របស់រដ្ឋាភិបាលលោក ហ៊ុន សែន ដើម្បីឱ្យសហគមន៍អឺរ៉ុប មើលរូបភាពពីខាងក្រៅប៉ុណ្ណោះ។
លោក គឹម សុខ អំពាវនាវឱ្យយុវជនខ្មែរ នាំគ្នាចូលរួមធ្វើបាតុកម្មនេះឱ្យបានច្រើនតាមដែលអាចធ្វើទៅបាន ដើម្បីប្រឆាំងនឹងការផ្តល់ប័ណ្ណស្នាក់នៅ ដល់ជនអន្តោប្រវេសន៍ដែលកំពុងរស់នៅដោយខុសច្បាប់ នៅកម្ពុជា និងបញ្ឈប់ការបង្កើតដេប៉ាតឺម៉ង់ភាសាវៀតណាម នៅសាកលវិទ្យាល័យភូមិន្ទភ្នំពេញ នៅពេលនេះ។
កាលពីចុងសប្តាហ៍កន្លងទៅ អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានអះអាងថា សាលារាជធានីភ្នំពេញ បានយល់ព្រមអនុញ្ញាតឱ្យក្រុមយុវជនសង្គម ដែលបានស្នើសុំធ្វើបាតុកម្ម នៅទីលានប្រជាធិបតេយ្យ ប្រឆាំងតវ៉ានឹងការផ្តល់ប័ណ្ណស្នាក់នៅអចិន្ត្រៃយ៍ដល់ជនបរទេស និង លុបចោលគម្រោងបង្កើតដេប៉ាតឺម៉ង់សិក្សាភាសាវៀតណាម តាមការស្នើសុំរួចរាល់ហើយ។
លោក ម៉េត មាសភក្ដី អះអាងថា បើទោះបីជាសាលារាជធានីភ្នំពេញ អនុញ្ញាតឱ្យក្រុមយុវជនធ្វើបាតុកម្មនៅទីលានប្រជាធិបតេយ្យ នៅចុងខែធ្នូនេះក៏ដោយ ក៏ពួកគេត្រូវកំណត់ចំនួនអ្នកចូលរួមឱ្យបានជាក់លាក់ផងដែរ ក្នុងចំនួនអ្នកចូលរួម មិនត្រូវឱ្យលើស ២០០នាក់ឡើយ។
កាលពីថ្ងៃទី១៨ ខែធ្នូ ឆ្នាំ២០២២ យុវជនជាអ្នកចូលរួមដឹកនាំបាតុកម្ម ឈ្មោះ អ៊ំ ឈុម ដែលបានដាក់លិខិតទៅកាន់ សាលារាជធានីភ្នំពេញដោយផ្ទាល់ ត្រូវបានសារព័ត៌មានក្នុងស្រុក វីអូឌី ដកស្រង់សម្ដីចុះផ្សាយថា រដ្ឋបាលរាជធានីភ្នំពេញបានសម្រេចអនុញ្ញាតឱ្យក្រុមខ្លួន ធ្វើបាតុកម្មនៅទីលានប្រជាធិបតេយ្យ ប្រឆាំងនឹងការចេញប័ណ្ណស្នាក់នៅអចិន្ត្រៃយ៍ដល់ជនបរទេស និង លុបចោលគម្រោងបង្កើតអគារសិក្សាភាសាវៀតណាម នៅសាកលវិទ្យាល័យភូមិន្ទភ្នំពេញ នៅថ្ងៃទី២៤ និងថ្ងៃទី២៥ ខែធ្នូ ឆ្នាំ២០២២ នេះហើយ។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily ថា រដ្ឋាភិបាល គួរតែដោះលែងលោក ថែល ធីឡែន សកម្មជនសង្គម រួមទាំងក្រុមសកម្មជននយោបាយផ្សេងទៀត ដើម្បីស្វែងរកការផ្សះផ្សាជាតិឡើងវិញ ឆ្ពោះទៅរកការការពារអធិបតេយ្យភាពជាតិ និងបូរណភាពទឹកដី ស្របតាមស្មារតីនៃកិច្ចព្រមព្រៀងក្រុងប៉ារីស និងរដ្ឋធម្មនុញ្ញ។
មាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខ័ណ្ឌនៃ ច្បាប់ ខណៈមាត្រា៤១ ចែងថា ប្រជាពលរដ្ឋខ្មែរ មានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម៕
.