ឯកសារហិរញ្ញវត្ថុ បានបង្ហាញចំនួនទឹកប្រាក់រាប់លានដុល្លារអាមេរិក របស់អ្នកស្រី ហ៊ុន ម៉ាលី កូនស្រីរបស់លោក ហ៊ុន សែន នាយករដ្ឋមន្ត្រីខ្មែរ ជាមួយស្វាម៉ីរបស់គាត់ គឺលោក សុខ ពុទ្ធិវុធ ជាកូនប្រុសរបស់លោក សុខ អាន អតីតឧបនាយករដ្ឋមន្រ្តី ដែលបានផ្ញើទុកនៅធនាគារបរទេស ឈ្មោះ HSBC ។
ក្នុងឯកសារនោះ សរសេរចំនួនទឹកប្រាក់ជាង ៤២ លានដុល្លារអាមេរិក (៤២.៨០៧.៦២២,៦៨ ដុល្លារ) ដែលជាលុយរបស់អ្នកស្រី ហ៊ុន ម៉ាលី ជាកូនស្រីលោក ហ៊ុន សែន និងត្រូវជាប្រពន្ធរបស់លោក សុខ ពុទ្ធិវុធ គិតត្រឹមឆ្នាំ២០១២ តែក្នុងកុងធនាគារមួយ នៃធនាគារក្រៅប្រទេស ឈ្មោះ HSBC។ នេះមិនទាន់បានរាប់បញ្ចូលលុយរបស់គាត់ នៅកុងធនាគារផ្សេងៗទៀតនៅឡើយទេ ដូចជា កាណាឌីយ៉ា អេស៊ីលីដា មែប៊ែង និងធនាគារ នៅស្រុកថៃ បន្ថែមទៀតទេ។ ចុះមកដល់ពេលសព្វថ្ងៃនេះ តើអ្នកស្រី ហ៊ុន ម៉ាលី មានលុយប៉ុន្មានទៅ?
ចំនួនទឹកប្រាក់ខាងលើ មិនរាប់បញ្ចូលឈ្មោះបងស្រី និងបងប្រុសរបស់គាត់ផងទេ គឺអ្នកស្រី ហ៊ុន ម៉ាណា លោក ហ៊ុនម៉ា ណែត លោក ហ៊ុន ម៉ានី និងលោក ហ៊ុន ម៉ានិត។ ចំពោះអ្នកស្រី ហ៊ុន ម៉ាណា គឺជាអ្នកកាន់កាប់សេដ្ឋកិច្ចធំជាងគេនៅកម្ពុជា ដែលរកស៊ីពោរពេញដោយការរំលោភសិទ្ធិមនុស្ស រំលោភច្បាប់ រំលោភអំណាច និង ការបន្លំពន្ធរដ្ឋថែមទៀត ដោយសារមានឪពុករបស់គាត់ គឺលោកនាយករដ្ឋមន្ត្រី ហ៊ុន សែន ជាអ្នកជួយការពារ។ នេះបើតាមរបាយការណ៍របស់អង្គការ Global Witness ឆ្នាំ២០១៦ កន្លងទៅ។
ក្រុមគ្រួសាររបស់ ហ៊ុន សែន កាលពីចុងឆ្នាំ ២០១៧ ត្រូវបានគេទម្លាយឯកសារម្តងរួចហើយដែរថា ត្រកូលនេះ មានលុយជាង ១០០០លានដុល្លារអាមេរិក ដែលបានមកពីអំពើពុករលួយ ការកេងប្រវញ្ចទ្រព្យសម្បត្តិជាតិ និងការរកស៊ីបំពានច្បាប់។ ឯកសារនោះ វាស៊ីសង្វាក់គ្នាទៅនឹងរបាយការណ៍របស់អង្គការ Global Witness បានរកឃើញ កាលពីឆ្នាំ២០១៦ ថាត្រកូល ហ៊ុន មានទ្រព្យសម្បត្តិប្រមាណពី ៥០០លានដុល្លារ ទៅ ១០០០លានដុល្លារអាមេរិក ដែលបានមកពីការកេងប្រវញ្ចជាតិ៕ – (អត្ថបទដោយ នគរ / ៣១ មីនា ២០១៨)
