អត្ថបទ CWCI Cambodia
08th-12-2023
លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា នៅប្រទេសន័រវែស និងជាអនុប្រធានវេទិកាពលរដ្ឋ ដែលមានមូលដ្ឋាននៅសហរដ្ឋអាមេរិក បានសម្តែងសេចក្តីព្រួយបារម្ភ ជុំវិញដំណើរទស្សនកិច្ច ទៅវិញទៅមកជាញឹកញាប់ របស់មេដឹកនាំកម្ពុជា-វៀតណាម ទាំងកម្រិតមេដឹកនាំរដ្ឋសភា និងរដ្ឋាភិបាល។
ការព្រួយបារម្ភនេះ កើតឡើងដោយឃើញតែភាគីវៀតណាម ស្នើមកកាន់ភាគីកម្ពុជា ត្រូវផ្តលសិទ្ធិស្របច្បាប់ ដល់ជនជាតិវៀតណាមខុសច្បាប់នៅកម្ពុជា ការពន្លឿនការងារតំបន់ត្រីកោណអភិវឌ្ឍន៍ នៅតាមខេត្តភាគឥសាន និងការពង្រឹងការងារព្រំដែននៃប្រទេសទាំងពីរ ខណៈរដ្ឋាភិបាលលោក ហ៊ុន សែន កន្លងមក បានចុះហត្ថលេខាមិនប្រក្រតី និងមិនស្របច្បាប់ ទៅលើសន្ធិសញ្ញាព្រំដែន និងកិច្ចព្រមព្រៀងមួយចំនួន។ ចំណែកឯភាគីកម្ពុជា មិនដែលហ៊ានស្នើឲ្យរដ្ឋាភិបាលវៀតណាម ជួយសម្រួល ឬបង្កលក្ខណៈងាយស្រួលដល់ពលរដ្ឋខ្មែរ នៅលើទឹកដីកំណើតកម្ពុជាក្រោម បានម្តងណាទេ។
ខណៈនេះលោក ម៉ែន ណាត បានលើកឡើង ៣ ចំណុចទៅកាន់លោកនាយករដ្ឋមន្ត្រី ហ៊ុន ម៉ាណែត ដែលគ្រោងទៅទស្សនកិច្ចនៅទីក្រុងហាណូយ ប្រទេសវៀតណាម នៅថ្ងៃទី១១-១២ ខែធ្នូ ឆ្នាំ២០២៣។ សូមអានខ្លឹមសារអត្ថបទទាំងស្រុងរបស់លោក ម៉ែន ណាត ដូចខាងក្រោម៖
ជុំវិញគម្រោងរបស់លោក ហ៊ុន ម៉ាណែត ទៅស្រុកយួន (វៀតណាម) ថ្ងៃទី១១-១២ ក្នុងខែធ្នូនេះ យើងខ្ញុំសូមធ្វើការកត់សម្គាល់ថា៖
១. ជាជំនួបប្តូរវេនតាមប្រពៃណី រវាងមេដឹកនាំនៃប្រទេសទាំងពីរ យូរយារមកហើយ តាំងតែពីលោក ហ៊ុន សែន និងបក្សប្រជាជនកម្ពុជា (CPP) ត្រូវបានវៀតណាម លើកបន្តុបឲ្យកាន់អំណាច នៅកម្ពុជា។ នៅក្នុងករណីកម្ពុជា ដើរតាមគន្លងប្រជាធិបតេយ្យត្រឹមត្រូវ ឧទាហរណ៍នៅអាណត្តិទី១ (១៩៩៣-១៩៩៨) ពួកគេនៅតែជួបប្រជុំជាធម្មតា គឺក្នុងកម្រិតមេដឹកនាំបក្ស CPP ជាមួយមេដឹកនាំប្រទេសវៀតណាម។
២. ភាគីកម្ពុជារបស់ ហ៊ុន ម៉ាណែត គ្មានអ្វីក្រៅពីរាយការណ៍ជូនមេដឹកនាំវៀតណាម និង ទទួលយកសំណើ ឬផែនការយុទ្ធសាស្ត្ររបស់វៀតណាម មកអនុវត្តនៅកម្ពុជា។ ឧទាហរណ៍ រឿងព្រំដែន រឿងផ្តល់សញ្ជាតិ និងផ្តល់ប័ណ្ណស្នាក់នៅ ឲ្យជនជាតិវៀតណាមខុសច្បាប់ នៅកម្ពុជា ហើយនិងរឿងបើកឲ្យរៀនភាសាវៀតណាម នៅសាកលវិទ្យាល័យភូមិន្ទភ្នំពេញ ជាដើម។ល។
៣. ក្នុងចិត្តរបស់ក្រុមមន្ត្រីនៃរដ្ឋាភិបាលថ្មី រួមទាំង ហ៊ុន ម៉ាណែត ផង កំពុង«ច្រឡំខ្លួនឯងជាខ្លា តែតាមពិតគឺជាឆ្មា»សោះ ដែលមានន័យថា ពួកគេខំអួតអាងពីសមិទ្ធផលនេះ ឬសមិទ្ធិផលនោះ ប៉ុន្តែតាមការពិតទៅ ប្រទេសកម្ពុជា កំពុងជួបហានិភ័យធ្ងន់ធ្ងរ ទាំងបញ្ហាបាត់បង់នូវ បូរណភាពទឹកដីជាតិ, អធិបតេយ្យ, គ្មានឯកភាពជាតិ, វិបត្តិសេដ្ឋកិច្ច និងវិបត្តិសង្គម។
លោក ម៉ែន ណាត
នៃ វេទិកាពលរដ្ឋ /
ក្រុមប្រឹក្សាឃ្លាំមើលកម្ពុជា
ថ្ងៃទី០៧ ធ្នូ ២០២៣
