អ្នកវិភាគ៖ លោក ហ៊ុន ម៉ាណែត ទៅវៀតណាមដើម្បីស្បថធ្វើជាអ្នកបម្រើសហព័ន្ធកុម្មុយនីស្តឥណ្ឌូចិន បន្តពីលោក ហ៊ុន សែន
The Cambodia Daily
13-12-202
ក្រុមអ្នកវិភាគនយោបាយ ព្រមានថា អធិបតេយ្យជាតិខ្មែរ ដែលបានធ្លាក់ទៅក្នុងការគ្រប់គ្រងរបស់វៀតណាម ដោយសារលោក ហ៊ុន សែន មិនអាចស្រោចស្រង់មកវិញបានទេ នៅក្នុងជំនាន់ដឹកនាំដោយកូនប្រុសរបស់គាត់ ព្រោះថា លោក ហ៊ុន ម៉ាណែត ដែលបានទៅទស្សនកិច្ចនៅប្រទេសវៀតណាម នៅពេលនេះ គឺទៅប្រកាសខ្លួនស្បថធ្វើជាអ្នកបម្រើ «សហព័ន្ធកុម្មុយនីស្តឥណ្ឌូចិន ប្រចាំនៅកម្ពុជា» ចំពោះមុខមេដឹកនាំវៀតណាម បន្តពីលោក ហ៊ុន សែន ប៉ុណ្ណោះ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១១ ធ្នូ នេះថា លោក ហ៊ុន ម៉ាណែត មិនមែនជានាយករដ្ឋមន្ត្រីតំណាងឱ្យឆន្ទៈរបស់ប្រជាពលរដ្ឋខ្មែរទេ ព្រោះការឡើងកាន់អំណាចរបស់គាត់ មិនបានឆ្លងកាត់ការបោះឆ្នោត ស្របតាមគោលការណ៍ប្រជាធិបតេយ្យ និងបំណងពិតប្រាកដរបស់ពលរដ្ឋខ្មែរឡើយ គឺតាមតែការចាត់ចែងរបស់លោក ហ៊ុន សែន ដែលជាឪពុករបស់គាត់ និងមេដឹកនាំវៀតណាម ប៉ុណ្ណោះ។
លោក គឹម សុខ លើកឡើងថា ក្រោយឡើងកាន់អំណាច លោក ហ៊ុន ម៉ាណែត មិនត្រឹមតែមិនមែនជានាយករដ្ឋមន្ត្រីតំណាងពលរដ្ឋខ្មែរទេ ប៉ុន្តែគាត់ក៏មិនទាន់ត្រូវបានមេដឹកនាំវៀតណាម ទទួលស្គាល់ថា ជាសមាជិកបក្សកុម្មុយនីស្តឥណ្ឌូចិនរបស់វៀតណាម ដែរ ប៉ុន្តែក្រោយការស្បថប្រកាសខ្លួនជាអ្នកបម្រើវៀតណាម កាលពីថ្ងៃទី១១ ខែធ្នូ ឆ្នាំ២០២៣ នេះ វៀតណាមទំនងជានឹងទទួលស្គាល់គាត់ ជាសមាជិកកុម្មុយនីស្តឥណ្ឌូចិនដែរហើយ ដើម្បីឱ្យគាត់ជំនួសលោក ហ៊ុន សែន បម្រើមហិច្ឆតារបស់វៀតណាម បន្តទៀត។
អ្នកវិភាគនយោបាយរូបនេះ បញ្ជាក់ថា ក្រោយការទទួលយកលោក ហ៊ុន ម៉ាណែត ជាអ្នកបម្រើរបស់ខ្លួន វៀតណាម ប្រាកដជានឹងចង្អុលឱ្យនាយករដ្ឋមន្ត្រីបន្តពូជរូបនេះ អនុវត្តនូវសន្ធិសញ្ញា និងកិច្ចព្រមព្រៀងខុសច្បាប់នានាទៅថ្ងៃមុខ ដើម្បីផលប្រយោជន៍របស់វៀតណាម ដូចដែលលោក ហ៊ុន សែន ធ្លាប់ធ្វើកន្លងមកជាមិនខាន ជាពិសេសគឺការផ្តល់សញ្ជាតិខ្មែរ ដល់ជនបរទេសវៀតណាម ផ្តល់ប័ណ្ណស្នាក់នៅអចិន្ត្រៃយ៍ និងកិច្ចសហប្រតិបត្តិការនានា ជាច្រើនទៀត ជាដើម។
បន្ទាប់ពីលោក ហ៊ុន ម៉ាណែត ត្រូវបានតែងតាំងជានាយករដ្ឋមន្ត្រីខ្មែរ កាលពីថ្ងៃទី២២ ខែសីហា និងតែងតាំងជាអនុប្រធានគណបក្សប្រជាជនកម្ពុជា កាលពីថ្ងៃទី១០ ខែធ្នូ ឆ្នាំ២០២៣ នេះ លោក ហ៊ុន ម៉ាណែត បានធ្វើដំណើរទៅប្រទេសវៀតណាម កាលពីថ្ងៃចន្ទ ទី១១ ធ្នូ ភ្លាមៗដែរ ដើម្បីជួបជាមួយមេដឹកនាំវៀតណាមជាច្រើននាក់ ដូចជា នាយករដ្ឋមន្ត្រីវៀតណាម លោក ផាម មិញជីញ (Pham Minh Chinh), អគ្គលេខាធិការមជ្ឈិមបក្សកុម្មុយនីស្តវៀតណាម លោក ង្វៀន ហ្វូចុង (Nguyen Phu Trong), លោក វ៉ វ៉ាន់ធឿង (Vo Van Thuong) ប្រធានរដ្ឋវៀតណាម និងលោក វឿង ឌិញហ្វេ (Vuong Dinh Hue) ប្រធានរដ្ឋសភាវៀតណាម ផងដែរ ដើម្បីចុះហត្ថលេខាលើកិច្ចព្រមព្រៀងមួយចំនួន រវាងកម្ពុជា និងវៀតណាម។
ក្នុងជំនួបនេះ លោក ហ៊ុន ម៉ាណែត បានលើកឡើងពីការសហការរវាងកម្ពុជា និងវៀតណាម ទៅថ្ងៃមុខ ដែលត្រូវបានពូនជ្រំមិត្តភាព រវាងប្រទេសទាំងពីរឱ្យកាន់តែស៊ីជម្រៅ ដើម្បីផលប្រយោជន៍ សម្រាប់ប្រជាជាតិទាំងពីរ។
យ៉ាងណាក៏ដោយ តំណាងរាស្ត្រអតីតគណបក្សសង្គ្រោះជាតិ លោក អ៊ុំ សំអាន អះអាងកាលពីពេលថ្មីៗនេះថា បក្សកុម្មុយនីស្តឥណ្ឌូចិនសម័យថ្មី ដែលបន្តវេន ពីមេដឹកនាំវៀតណាម លោក ហូ ជី មិញ នឹងខិតខំប្រែក្លាយកម្ពុជា វៀតណាម និងឡាវ ឱ្យទៅជាប្រទេសតែមួយ ប៉ុន្តែត្រូវដាក់ឱ្យស្ថិតក្រោមការគ្រប់គ្រងរបស់វៀតណាម នាពេលអនាគត។
ជាក់ស្តែង កាលពីថ្ងៃទី១៨ ខែតុលា ឆ្នាំ២០២៣ ក្នុងជំនួបជាមួយលោក វ៉ វ៉ាន់ធឿង អំឡុងពេលចូលរួមវេទិកាខ្សែក្រវាត់ និងផ្លូវនៅសាធារណរដ្ឋប្រជាមានិតចិន ប្រធានរដ្ឋវៀតណាម បានស្នើឱ្យលោក ហ៊ុន ម៉ាណែត បន្តយកចិត្តទុកដាក់បង្កើតលក្ខខណ្ឌកាន់តែងាយស្រួល សម្រាប់សហគមន៍វៀតណាម នៅកម្ពុជាផងដែរ ខណៈនាយករដ្ឋមន្ត្រីកម្ពុជា លោក ហ៊ុន ម៉ាណែត ក៏មិនបានបដិសេធនឹងសំណើនេះដែរ ក្នុងនោះ រដ្ឋាភិបាលកម្ពុជា បានចេញប័ណ្ណស្នាក់នៅអចិន្ត្រៃយ៍ ដល់ជនជាតិវៀតណាមខុសច្បាប់ ជាបន្តបន្ទាប់ផងដែរ សព្វថ្ងៃនេះ៕
*****
លោក ហ៊ុន ម៉ាណែត អះអាងថាទំនាក់ទំនងរវាងកម្ពុជានិងវៀតណាម នៅតែបន្តរឹងមាំជានិច្ច
The Cambodia Daily
13-12-2023
នាយករដ្ឋមន្ត្រីបន្តពូជថ្មីលោក ហ៊ុន ម៉ាណែត អះអាងថា ទំនាក់ទំនងរវាងកម្ពុជា-វៀតណាម នៅតែបន្តរឹងមាំជានិច្ច ទោះសភាពការណ៍តំបន់ និងពិភពលោក មានការវិវឌ្ឍបែបណាក៏ដោយ ព្រោះទំនាក់ទំនងនេះ គឺដើម្បីប្រជាជន និងប្រជាជននៃប្រទេសទាំងពីរ ដែលសំដៅធ្វើយ៉ាងណាធានាឱ្យបាន នូវផលប្រយោជន៍ឱ្យគ្នាទៅវិញទៅមក។
កូនប្រុសច្បងមេបក្សក្រាញអំណាច លោក ហ៊ុន ម៉ាណែត បានលើកឡើងនៅក្នុងជំនួបជាមួយមេដឹកនាំវៀតណាមជាច្រើននាក់ កាលពីថ្ងៃទី១១ ខែធ្នូ ឆ្នាំ២០២៣ នេះថា ដំណើរទស្សនកិច្ចរបស់លោកនៅពេលនេះ គឺដើម្បីលើកកម្ពស់ទំនាក់ទំនងកិច្ចសហប្រតិបត្តិការទ្វេភាគី និងបន្តពូនជ្រំរវាងប្រទេសទាំងពីរ ឱ្យកាន់តែជិតស្និទ្ធបន្ថែមទៀត។
លោក ហ៊ុន ម៉ាណែត បញ្ជាក់ថា មេដឹកនាំវៀតណាម បានអះអាងថា ដំណើរទស្សនកិច្ចរបស់លោកនេះ បានឆ្លុះបញ្ចាំងយ៉ាងច្បាស់ អំពីការបន្តពង្រឹងទំនាក់ទំនងទ្វេភាគីកម្ពុជា-វៀតណាម ឱ្យកាន់តែជិតស្និទ្ធរឹងមាំបន្ថែមទៀត ក្នុងស្មារតីមិត្តភាព និងសាមគ្គីភាពដ៏ល្អ រវាងប្រទេស និងប្រជាជនទាំងពីរ។
កាលពីថ្ងៃទី១១ ខែធ្នូ ឆ្នាំ២០២៣ លោក ហ៊ុន ម៉ាណែត បានធ្វើដំណើរទស្សនកិច្ចនៅប្រទេសវៀតណាម ដើម្បីជួបពិភាក្សាការងារជាមួយមេដឹកនាំសំខាន់ៗ របស់វៀតណាម ដូចជាប្រធានរដ្ឋសភាវៀតណាម ប្រធានរដ្ឋវៀតណាម នាយករដ្ឋមន្ត្រីវៀតណាម និងអគ្គលេខាធិការបក្សកុម្មុយនីស្តវៀតណាម ផងដែរ។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១២ ធ្នូ នេះថា ការធ្វើដំណើរទស្សនកិច្ចទៅកាន់ប្រទេសវៀតណាម របស់លោក ហ៊ុន ម៉ាណែត ក្នុងនាមជានាយករដ្ឋមន្ត្រីខ្មែរ និងមន្ត្រីជាន់ខ្ពស់របស់បក្សប្រជាជនកម្ពុជា នៅពេលនេះ មិនមែនដើម្បីទំនាក់ទំនងការទូត រវាងប្រទេស និងប្រទេសនោះទេ ប៉ុន្តែជាដំណើរទស្សនកិច្ច ដើម្បីរាយការណ៍ជូនមេដឹកនាំវៀតណាម និង ទទួលយកផែនការយុទ្ធសាស្ត្ររបស់វៀតណាម មកអនុវត្តនៅកម្ពុជា បន្តទៀតតែប៉ុណ្ណោះ។
លោក ម៉ែន ណាត លើកឡើងថា ផែនការដែលវៀតណាមតម្រូវឱ្យលោក ហ៊ុន ម៉ាណែត អនុវត្តបន្តនោះ ទំនងជាការចុះកិច្ចព្រមព្រៀង ស្ដីពីបញ្ហាព្រំដែនរវាងប្រទេសទាំងពីរបន្ថែមទៀត ការផ្តល់សញ្ជាតិ និងការផ្តល់ប័ណ្ណស្នាក់នៅអចិន្ត្រៃយ៍ដល់ជនជាតិវៀតណាមខុសច្បាប់ នៅកម្ពុជា ឱ្យបានកាន់តែច្រើន និងការបើកផ្លូវឱ្យភាសាវៀតណាម កាន់តែរីកធំ នៅសាកលវិទ្យាល័យនានារបស់កម្ពុជា ជាដើម។
អនុប្រធានវេទិកាពលរដ្ឋ រូបនេះ បញ្ជាក់ថា លោក ហ៊ុន ម៉ាណែត មិនមែនជាមេដឹកនាំដែលមានសក្ដានុពល ក្នុងការស្វែងរកផលប្រយោជន៍ឱ្យជាតិខ្មែរនោះទេ ព្រោះថា ការដឹកនាំរបស់គណបក្សប្រជាជនកម្ពុជា តាំងពីអំឡុងទសវត្សរ៍១៩៨០ មក គឺត្រូវស្ថិតនៅក្រោមការគ្រប់គ្រងរបស់រដ្ឋាភិបាលវៀតណាម ជានិច្ច ខណៈវិស័យសេដ្ឋកិច្ចខ្មែរ ក៏កំពុងជាប់បំណុលវ័ណ្ឌក ក្រោមឥទ្ធិពលប្រទេសចិន ដែរ ដូច្នេះ ទាំងវៀតណាម និងចិន សុទ្ធតែកំពុងហែកប្រយោជន៍ជាតិខ្មែររៀងៗខ្លួន ខណៈរដ្ឋាភិបាលក្រោមការគ្រប់គ្រងរបស់បក្សប្រជាជនកម្ពុជា បានត្រឹមតែជួយបែងចែកផលប្រយោជន៍ជាតិខ្លួនឯង ឱ្យប្រទេសទាំងពីរ ដើម្បីកុំឱ្យគេឈប់ជួយជ្រោមជ្រែងអំណាចរបស់ខ្លួន តែប៉ុណ្ណោះ។
ចំណែកមន្ត្រីជាន់ខ្ពស់អតីតគណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី១២ ធ្នូ នេះដែរថា ទំនាក់ទំនងរវាងកម្ពុជា និងវៀតណាម លោកមើលមិនឃើញថា កម្ពុជាទទួលបានប្រយោជន៍អ្វីពីប្រទេសវៀតណាមទេ។ ជាក់ស្តែង រាល់ជំនួប រវាងមន្ត្រីរដ្ឋាភិបាលវៀតណាម ជាមួយមន្ត្រីរដ្ឋាភិបាលកម្ពុជាម្តងៗ វៀតណាមតែងស្នើសុំឱ្យពីភាគីកម្ពុជា ជួយសម្រួលដល់ការស្នាក់នៅ ដល់ជនជាតិវៀតណាម ដែលកំពុងរស់នៅដោយខុសច្បាប់ តាំងពីជំនាន់លោក ហ៊ុន សែន នៅដឹកនាំ រហូតដល់លោក ហ៊ុន ម៉ាណែត ដឹកនាំបន្តនៅពេលនេះ។
លោក មាជ សុវណ្ណារ៉ា លើកឡើងថា ក្រោយរដ្ឋាភិបាលថ្មី របស់កម្ពុជាប្រកាសជាផ្លូវការ មន្ត្រីរដ្ឋាភិបាលជាន់ខ្ពស់របស់វៀតណាម បានស្នើមកនាយករដ្ឋមន្ត្រីថ្មីរបស់កម្ពុជាផង និងស្នើទៅកាន់ប្រធានរដ្ឋសភាថ្មី របស់កម្ពុជាផង ឱ្យជួយបន្តយកចិត្តទុកដាក់លើជនជាតិវៀតណាម ដែលកំពុងរស់នៅដោយខុសច្បាប់ លើទឹកដីកម្ពុជាសព្វថ្ងៃនេះ ខណៈរដ្ឋាភិបាលថ្មីក្រោមការដឹកនាំរបស់ គណបក្សប្រជាជនកម្ពុជា ក៏បានចេញប័ណ្ណស្នាក់នៅអចិន្ត្រៃយ៍ ដល់ជនជាតិវៀតណាមទាំងនោះ ជាបន្តបន្ទាប់ដែរ ដែលគិតមកទល់នឹងពេលនេះ មានរបាយការណ៍ខ្លះទម្លាយថា មានចំនួនប្រមាណជា ១សែននាក់ ទៅហើយនោះ។
មន្ត្រីជាន់ខ្ពស់អតីតបក្សប្រឆាំងរូបនេះ បញ្ជាក់ថា បើពិនិត្យលើទំនាក់ទំនងរវាងកម្ពុជា និងវៀតណាម កន្លងមក គឺមានតែវៀតណាម ទាញយកផលប្រយោជន៍ពីកម្ពុជាតែប៉ុណ្ណោះ សូម្បីតំបន់ត្រីកោណអភិវឌ្ឍន៍ ដែលកម្ពុជា វៀតណាម និងឡាវ កំពុងសហការគ្នា ដោយការដាក់ខេត្តចំនួន ១៣ ចូលគ្នាសព្វថ្ងៃនេះ ក៏វៀតណាមកំពុងទាញផលប្រយោជន៍ពីខេត្តខ្មែរ ដែលបានដាក់ចូលក្នុងតំបន់ត្រីកោណនេះ ដែរ៕
