អត្ថបទ The Cambodia Daily
22-12-2023
រដ្ឋមន្ត្រីក្រសួងមហាផ្ទៃ លោក ស សុខា សម្រេចបណ្តេញនាយរងការិយាល័យរដ្ឋបាលសរុបនៃ មន្ទីរប្រឆាំងបទល្មើសគ្រឿងញៀន ចំណុះអគ្គស្នងការដ្ឋាននគរបាលជាតិ ចេញពីក្របខ័ណ្ឌនគរបាលជាតិ បន្ទាប់ពីរកឃើញថា មន្ត្រីរូបនេះ បានពាក់ព័ន្ធនឹងបទល្មើសរក្សាទុកគ្រឿងញៀន។
លោក ស សុខា បានចេញសេចក្តីប្រកាសមួយ ស្ដីពីការបណ្ដេញចេញពីក្របខ័ណ្ឌមន្ត្រីនគរបាលជាតិ កាលពីថ្ងៃទី១៩ ខែធ្នូ ឆ្នាំ២០២៣ ដែលត្រូវបានផ្សព្វផ្សាយ នៅថ្ងៃទី២១ ធ្នូ នេះថា ដោយផ្អែកតាមសំណើអគ្គនាយកនៃ អគ្គនាយកដ្ឋានធនធានមនុស្ស ក្រសួងមហាផ្ទៃ សម្រេចអនុវត្តពិន័យចំពោះវរសេនីយ៍ត្រី លោក សួន តុសិត្យពិទូរ្យ ដែលមានតួនាទីជានាយរងការិយាល័យរដ្ឋបាលសរុប នៃមន្ទីរប្រឆាំងបទល្មើសគ្រឿងញៀន ចំណុះអគ្គស្នងការដ្ឋាននគរបាលជាតិ ដោយសារតែរកឃើញនូវ ការប្រព្រឹត្តល្មើសវិន័យកម្លាំងនគរបាលជាតិ។
លោក ស សុខា បញ្ជាឱ្យអគ្គលេខាធិការដ្ឋាន នៃអគ្គស្នងការដ្ឋាននគរបាលជាតិ កាត់ផ្ដាច់ប្រាក់បៀវត្សរ៍ និងរបបឧបត្ថម្ភផ្សេងៗ ព្រមទាំងលុបឈ្មោះចេញពីក្របខ័ណ្ឌនគរបាលជាតិ ចាប់ខែមីនា ឆ្នាំ២០២៤ ខាងមុខនេះតទៅ យោងតាមបទបញ្ជា ស្ដីពីវិន័យរបស់កងកម្លាំងនគរបាលជាតិ ឆ្នាំ១៩៩៥។
ការបណ្តេញមន្ត្រីនគរបាល ចេញពីក្របខ័ណ្ឌនគរបាលជាតិនេះ ធ្វើឡើងបន្ទាប់ពីក្រសួងមហាផ្ទៃ បានចាប់ផ្តើមអនុវត្តវិធានការលើមន្ត្រីនគរបាល ដែលជាប់ពាក់ព័ន្ធនឹងគ្រឿងញៀន កាលពីពេលថ្មីៗនេះ។
អ្នកនាំពាក្យរងក្រសួងមហាផ្ទៃ លោក ទូច សុខៈ បានអះអាងកាលពីពេលថ្មីៗនេះថា លោក សួន តុសិត្យពិទូរ្យ ត្រូវបានរកឃើញជាប់ពាក់ព័ន្ធនឹងការប្រើប្រាស់ហិង្សា រក្សាទុក និងប្រើប្រាស់គ្រឿងញៀនខុសច្បាប់ ដែលបានប្រព្រឹត្តតាំងពីខែកញ្ញា ឆ្នាំ២០១៩ មកម្ល៉េះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២១ ធ្នូ នេះថា ការអនុវត្តវិធានការដោយការដាក់ពិន័យលើមន្ត្រី ដែលពាក់ព័ន្ធនឹងគ្រឿងញៀនរបស់ លោក ស សុខា នៅពេលនេះ គឺជាគំរូមួយសម្រាប់មន្ត្រីដឹកនាំស្ថាប័នផ្សេងទៀត ដែលគួរតែអនុវត្តតាម ព្រោះថា មន្ត្រីរដ្ឋាភិបាលដែលកាន់តំណែងតាមសែស្រឡាយបក្ខពួកដុះស្នឹម ក្រោមការគ្រប់គ្រងរបស់ គណបក្សប្រជាជនកម្ពុជាមួយភាគធំ សព្វថ្ងៃនេះ សុទ្ធសឹងតែជាប់ពាក់ព័ន្ធនឹងគ្រឿងញៀន ទាំងការប្រើប្រាស់ និងការចែកចាយ ក្នុងនោះក៏មានអ្នកប្រព្រឹត្តតាមបញ្ជាអ្នកមានអំណាច និងអ្នកដែលប្រព្រឹត្តដោយខ្លួនឯងដែរ។
លោក ម៉ែន ណាត លើកឡើងថា ប្រសិនបើមន្ត្រីដឹកនាំស្ថាប័នទាំងអស់ អាចអនុវត្តច្បាប់ដោយតឹងរ៉ឹងបែបនេះ ក៏ជាសញ្ញាល្អសម្រាប់ប្រទេសកម្ពុជា ដែលកំពុងតែញាំញីទៅដោយបទល្មើសឧក្រិដ្ឋនានា ដែលបណ្តាលមកពីឥទ្ធិពលគ្រឿងញៀនមួយចំណែកធំ រហូតជាប់ឈ្មោះក្នុងបញ្ជីតាមដានរបស់សហរដ្ឋអាមេរិក កន្លងមកនោះ។
អនុប្រធានវេទិកាពលរដ្ឋរូបនេះ បញ្ជាក់ថា ជុំវិញការអនុវត្តច្បាប់នេះ ប្រសិនបើអនុវត្តគ្រាន់តែដើម្បីឱ្យល្អមើល ដោយការអនុវត្តទៅលើតែមន្ត្រីតូចតាច ប៉ុន្តែជាប់គាំងក្នុងការអនុវត្ត ទៅលើមន្ត្រីធំៗគ្រាក់ៗក្នុងជួររដ្ឋាភិបាលរបស់ខ្លួននោះ គឺជារឿងអយុត្តិធម៌ ដែលបង្ហាញពីការអនុវត្តច្បាប់ ដែលមានស្តង់ដារពីរប៉ុណ្ណោះ ហើយការអនុវត្តច្បាប់បែបនេះ មិនអាចលុបបំបាត់គ្រឿងញៀនបានទេ។
កាលពីថ្ងៃទី៣០ ខែសីហា ឆ្នាំ២០២៣ រដ្ឋមន្ត្រីក្រសួងមហាផ្ទៃ លោក ស សុខា បានណែនាំអង្គភាពដែលចំណុះឱ្យក្រសួងមហាផ្ទៃ រឹតបន្តឹងចំពោះបញ្ហាគ្រឿងញៀន លើមន្ត្រីរបស់ខ្លួនគ្រប់អង្គភាពថា ចំពោះអ្នកដែលមានតួនាទីភារកិច្ចជាកងកម្លាំងប្រដាប់អាវុធ បើសិនមានការស្រាវជ្រាវរកឃើញ ថាមានការពាក់ព័ន្ធជាមួយការប្រើប្រាស់ និងជួញដូរគ្រឿងញៀន មិនគួររក្សាទុកនៅជាកងកម្លាំង ដើម្បីបំពេញតួនាទីភារកិច្ចទៀតទេ។
ទាក់ទិននឹងបញ្ហានេះ សារព័ត៌មាន The Cambodia Daily ធ្លាប់ទទួលបានឯកសារជាវីដេអូជាច្រើន ពីមន្ត្រីនគរបាលជាន់ខ្ពស់ នៃក្រសួងមហាផ្ទៃ កាលពីពេលថ្មីៗនេះ ដោយបង្ហាញពីការចែកចាយថ្នាំញៀនរាប់ពាន់គ្រាប់ ក្នុងមួយយប់ៗ នៅក្នុងក្លឹបមួយឈ្មោះ True Face ដែលគេស្គាល់ថា ជាក្លឹបរកលុយឱ្យគ្រួសារត្រកូល ហ៊ុន ហើយក្លឹបនេះ គ្មានសមត្ថកិច្ចណាម្នាក់ ឬថ្នាក់ដឹកនាំរដ្ឋាភិបាលណាមួយ ហ៊ានប៉ះពាល់ឡើយ។
មន្ត្រីនគរបាលជាន់ខ្ពស់ នៃក្រសួងមហាផ្ទៃខាងលើ អះអាងថា យុវជន និងមនុស្សវ័យកណ្តាលជាច្រើន បានធ្លាក់ខ្លួនក្លាយទៅជាអ្នកប្រើប្រាស់ និងជួញដូរថ្នាំញៀន ដែលគេមើលឃើញថា គ្រឿងញៀនស្ទើរតែក្លាយទៅជាថ្នាំពេញនិយម សម្រាប់អ្នកមានលុយ និងអ្នកមានអំណាចទៅហើយ ខណៈមន្ត្រីធំៗ និងឧកញ៉ាមួយចំនួន សុទ្ធតែបានប្រើប្រាស់វា ដើម្បីស្វែងរកការសប្បាយបំពេញតណ្ហារបស់ខ្លួន អំឡុងពេលជួញដូរផ្លូវភេទ និងក្លាយជាអ្នកផ្គត់ផ្គង់ថ្នាំទាំងនេះ នៅក្នុងទីផ្សារស្រុកខ្មែរ ដែលពួកគេអាងអ្នកមានអំណាច កាងនៅពីក្រោយ៕
