RFA Khmer /ដោយ សុជីវី
27-2-2024
មន្ត្រីគណបក្សប្រឆាំង និងអ្នកឃ្លាំមើលកម្ពុជា លើកឡើងដូចៗគ្នាថា ការយាងទៅពិនិត្យសុខភាពរបស់អង្គព្រះមហាក្សត្រ នៅប្រទេសចិន បញ្ជាក់ថា វិស័យសុខាភិបាលកម្ពុជាទន់ខ្សោយ។ ការលើកឡើងដូច្នេះ ក្រោយពីព្រះមហាក្សត្រ ព្រះបាទ នរោត្តម សីហមុនី នៅតែយាងទៅពិនិត្យព្រះរាជសុខភាពនៅប្រទេសចិន បើទោះបីជារដ្ឋាភិបាលលោក ហ៊ុន ម៉ាណែត បានបង្កើតក្រុមគ្រូពេទ្យ ពិនិត្យតាមដានសុខភាពអង្គព្រះមហាក្សត្រក៏ដោយ។
មន្ត្រីគណបក្សប្រឆាំង និងអ្នកឃ្លាំមើលកម្ពុជាឡើងដូចៗគ្នាថា ដរាបណាប្រមុខដឹកនាំប្រទេស នៅតែមិនប្រើប្រាស់សេវាថែទាំសុខភាពនៅក្នុងស្រុកនោះទេ នោះវិស័យសុខាភិបាលកម្ពុជា នឹងមិនអាចរីកចម្រើនបាននោះឡើយ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន លើកឡើងថា ការយាងទៅពិនិត្យសុខភាពនៅប្រទេសចិន របស់ព្រះបាទបរមនាថ នរោត្តម សីហមុនី និងព្រះមហាក្សត្រី នរោត្តម មុនីនាថ ឆ្លុះបញ្ចាំងថា អង្គព្រះមហាក្សត្រ មិនទុកចិត្តទៅលើក្រុមគ្រូពេទ្យ ដែលលោក ហ៊ុន ម៉ាណែត បង្កើតឡើង ដើម្បីមើលថែព្រះរាជសុខភាពព្រះអង្គនោះឡើយ។ លោកបន្តថា ការចាកចេញពីប្រទេសរបស់អង្គព្រះមហាក្សត្រ នៅពេលទើបបញ្ចប់ការបោះឆ្នោតព្រឹទ្ធសភា ត្រឹមតែមួយថ្ងៃបែបនេះ ក៏អាចបង្ហាញការមិនពេញចិត្ត ចំពោះការបោះឆ្នោតជ្រើសតាំងព្រឹទ្ធសភា ដែលពោរពេញទៅដោយរឿងចម្រូងចម្រាសផងដែរ។
លោក អ៊ុំ សំអាន ៖ «ហើយយើងដឹងហើយ លោក ហ៊ុន សែន នឹងក្លាយទៅជាប្រធានព្រឹទ្ធសភា ក្នុងពេលឆាប់ៗនេះ ហើយនៅពេលព្រះមហាក្សត្រយាងទៅក្រៅប្រទេស លោក ហ៊ុន សែន នឹងក្លាយជាប្រមុខរដ្ឋស្ដីទី ហើយបើអ៊ីចឹងកាន់អំណាចពេញដៃហើយ ឪជាប្រមុខរដ្ឋស្ដីទី កូនជានាយករដ្ឋមន្ត្រី អ៊ីចឹងចង់ស៊ីញេអីក៏បានដែរ ចង់ស៊ីញេកាត់ដីឱ្យយួន ឱ្យចង់ស៊ីញេកាត់ដីឱ្យថៃ ឬក៏ស៊ីញេលក់ភ្នំ លក់ព្រឹក្សា លក់អីក៏បានដែរ ព្រោះឪកូន អាចស៊ុមគ្រលុំគ្នាបាន»។
ប្រតិកម្មរបស់មន្ត្រីជាន់ខ្ពស់គណបក្សប្រឆាំងរូបនេះ ក្រោយពីអង្គព្រះមហាក្សត្រ និងព្រះមហាក្សត្រី នៅតែបន្តយាងទៅពិនិត្យព្រះរាជសុខភាពនៅប្រទេសចិន នៅថ្ងៃទី២៦ ខែកុម្ភៈ។ ក្នុងពិធីជូនព្រះរាជដំណើរអង្គព្រះមហាក្សត្រ គេក៏ឃើញមានវត្តមានលោក ហ៊ុន ម៉ាណែត លោក ហ៊ុន សែន និងមន្ត្រីជាន់ខ្ពស់គណបក្សប្រជាជនកម្ពុជាចាស់វស្សាមួយចំនួនទៀត ដូចជា លោក ស ខេង លោក ទៀ បាញ់ និងអ្នកស្រី ម៉ែន សំអន ជាដើម។
នាយករដ្ឋមន្ត្រី ហ៊ុន ម៉ាណែត បានបង្កើតក្រុមគ្រូពេទ្យមួយ ដើម្បីពិគ្រោះយោបល់ និងពិនិត្យមើលស្ថានភាពព្រះរាជសុខភាពអង្គព្រះមហាក្សត្រ កាលពីថ្ងៃទី៨ ខែវិច្ឆិកា ឆ្នាំ២០២៣។ ក្រុមគ្រូពេទ្យនេះមានសមាជិកចំនួន៨នាក់ ដោយមានរដ្ឋមន្ត្រីក្រសួងសុខាភិបាល លោក ឈាង រ៉ា ជាប្រធាន និងមានអនុប្រធានពីរនាក់ រួមទាំងសមាជិកជាវេជ្ជបណ្ឌិតប្រចាំការចំនួន ៥នាក់។ លោក ហ៊ុន ម៉ាណែត បានបញ្ជាក់ថា ការបង្កើតក្រុមគ្រូពេទ្យនេះ គឺដើម្បីថែទាំព្រះរាជសុខភាពព្រះមហាក្សត្រ និងអញ្ជើញអ្នកជំនាញវេជ្ជសាស្ត្រករណីចាំបាច់។
វិទ្យុអាស៊ីសេរី មិនអាចទាក់ទង ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការបកស្រាយជុំវិញរឿងនេះបានឡើយ នៅថ្ងៃទី២៦ ខែកុម្ភៈ។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា នៅប្រទេសន័រវែស (Norway) លោក ម៉ែន ណាត មានប្រសាសន៍ថា ការបន្តយាងទៅពិនិត្យព្រះរាជសុខភាព របស់អង្គព្រះមហាក្សត្រនៅប្រទេសចិន អាចបញ្ជាក់ថា គុណភាពវិស័យសុខាភិបាល ដែលរដ្ឋាភិបាលលោក ហ៊ុន ម៉ាណែត តែងតែអះអាងថា មានគុណភាពមិនចាញ់ប្រទេសជិតខាង មិនមែនជាការពិតនោះឡើយ។ លោកបន្តថា ដើម្បីបណ្ដុះធនធានមនុស្ស និងគុណភាពវិស័យសុខាភិបាលបាន ប្រមុខដឹកនាំរដ្ឋាភិបាល គួរធ្វើជាបុគ្គលគំរូ ប្រើប្រាស់សេវាថែទាំ និងព្យាបាលជំងឺនៅក្នុងប្រទេស ជាជាងទៅក្រៅប្រទេស។
លោក ម៉ែន ណាត ៖ «ដោយសារតែអំពើពុករលួយពេកទៅ វាគុណភាពព្យាបាលហ្នឹងក៏ធ្លាក់ចុះ ប្រៀបនឹងប្រទេសជិតខាង ស្រុកសៀម ស្រុកយួនហ្នឹង យើងក៏អត់ទាន់មានតម្លៃស្មើគេដែរ អ៊ីចឹងបានថា បើឱ្យក្រុមគ្រូពេទ្យស្រុកខ្មែររឹងមាំបាន វាទាល់តែពួកអ្នកធំអស់ហ្នឹង ត្រូវតែកែទម្រង់ប្រព័ន្ធសុខាភិបាលហ្នឹង»។
ដោយសារតែការផ្ដល់សេវាថែទាំសុខភាព និងព្យាបាលជំងឺនៅកម្ពុជាមិនសូវមានប្រសិទ្ធភាព ប្រជាពលរដ្ឋខ្មែរបានលើកឡើងជាពាក្យស្លោកថា អ្នកមានទៅមើលជំងឺនៅសាំងហ្គាពួរ អ្នកបង្គួរទៅមើលជំងឺនៅថៃ ឬវៀតណាម ឯអ្នកជំងឺក្ររហាមត្រូវដេកស្លាប់នៅផ្ទះ។
មន្ត្រីគណបក្សប្រឆាំង និងអ្នកតាមដានឃ្លាំមើលកម្ពុជា លើកឡើងថា ប្រសិនបើអង្គព្រះមហាក្សត្រ នៅតែបន្តយាងទៅពិនិត្យ ព្រះរាជសុខភាពនៅប្រទេសចិន ដូច្នេះ នោះត្រកូល ហ៊ុន នឹងអាចធ្វើអ្វីបានតាមអំពើចិត្ត នៅពេលលោក ហ៊ុន សែន ឡើងធ្វើជាប្រធានព្រឹទ្ធសភា ដែលមានតួនាទីជាប្រមុខរដ្ឋស្ដីទី ជំនួសអង្គព្រះមហាក្សត្រ៕
