អត្ថបទ CWCI Cambodia
02nd-7-2024
ក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅប្រទេសន័រវែស ចេញសេចក្តីថ្លែងការណ៍ ជំរុញឲ្យតុលាការទីក្រុងភ្នំពេញ និងរដ្ឋាភិបាលកម្ពុជា ទម្លាក់បទចោទ និងដោះលែងក្រុមសកម្មជនបរិស្ថាន នៃអង្គការមាតាធម្មជាតិ ដោយគ្មានលក្ខខណ្ឌ។ សេចក្តីថ្លែងការណ៍នេះ ចុះហត្ថលេខាដោយលោក ម៉ែន ណាត ប្រធានក្រុមប្រឹក្សាកម្ពុជា ចុះផ្សាយនៅថ្ងៃទី០២ ខែកក្កដា ឆ្នាំ២០២៤។ សូមទាញយក «សេចក្តីថ្លែងការណ៍ (Download)» ឬអានអត្ថបទខាងក្រោម។
សេចក្តីថ្លែងការណ៍
ដោះលែង និងម្លាក់បទចោទទៅលើសកម្មជនបរិស្ថាន ដោយគ្មានលក្ខខណ្ឌ
ក្រុមប្រឹក្សាឃ្លាំមើលកម្ពុជា សូមអំពាវនាវដល់តុលាការទីក្រុងភ្នំពេញ និងរដ្ឋាភិបាលកម្ពុជា ទម្លាក់ចោលបទចោទ និងដោះលែងសកម្មជនបរិស្ថាន នៃអង្គការមាតាធម្មជាតិ (Mother Nature Cambodia) រួមមាន លោក ថុន រដ្ឋា កញ្ញា ឡុង គន្ធា កញ្ញា ភួន កែវរស្មី លោក លី ចាន់ដារ៉ាវុត និងលោក យឹម លាងហ៊ី ដែលត្រូវបាន អជ្ញាធរសមត្ថកិច្ចចាប់ខ្លួន នៅថ្ងៃទី០២ ខែកក្កដា ឆ្នាំ២០២៤ ខណៈពួកគាត់ទៅស្តាប់សាលក្រមនៅតុលាការ ដែលចោទប្រកាន់ ពួកគាត់យ៉ាងអយុត្តិធម៌ ពីបទ«ប្រមាថព្រះមហាក្សត្រ និងរួមគំនិតក្បត់ ដើម្បីផ្តួលរំលំរដ្ឋាភិបាល កាលពីឆ្នាំ២០២១» មានស្ថាន ទម្ងន់ទោសជាប់ពន្ធនាគារពី ៦ឆ្នាំដល់ ១០ឆ្នាំ និងតម្រូវឲ្យបង់ពិន័យ ១០លានរៀល។
ក្រុមប្រឹក្សាឃ្លាំមើលកម្ពុជា ពិនិត្យឃើញថា សកម្មជនបរិស្ថាននៃអង្គការមាតាធម្មជាតិ ដែលមានឈ្មោះខាង លើ និងសហការី ៥ រូបទៀត ដែលតុលាការចោទប្រកាន់នោះ គ្មានកំហុសអ្វីទាំងអស់ មិនដូចការចោទប្រកាន់របស់តុលាការ ទីក្រុងភ្នំពេញទេ។ ដូច្នេះ ការចោទប្រកាន់ និងចាប់ខ្លួនពួកគាត់ ជាអំពើអយុត្តិធម៌ និងជាការរំលោភរដ្ឋធម្មនុញ្ញយ៉ាងធ្ងន់ធ្ងរ។
សកម្មជនបរិស្ថាន លោក ថុន រដ្ឋា កញ្ញា ឡុង គន្ធា កញ្ញា ភួន កែវរស្មី លោក លី ចាន់ដារ៉ាវុត និង លោក យឹម លាងហ៊ី ក៏ដូចជាពលរដ្ឋខ្មែរទូទៅដែរ មានសិទ្ធិបញ្ចេញមតិពេញលេញ ស្របតាមស្មាតីរដ្ឋធម្មនុញ្ញ និង លិខិតូបករណ៍អន្តរជាតិនានា ដែលកម្ពុជាបានអនុម័តទទួលស្គាល់។
សកម្មជនអង្គការមាតាធម្មជាតិ តែងតែធ្វើការងារការពារបរិស្ថាន នៅប្រទេសកម្ពុជា ដោយប្រឆាំងជំទាស់រាល់ការកាប់ បំផ្លាញព្រៃឈើ ការលុបបឹងបួរ ការលុបសមុទ្រ ការបូមខ្សាច់ខុសច្បាប់ និងការធ្វើអាជីវកម្មរ៉ែធម្មជាតិខុសច្បាប់ ជាដើម។
សកម្មភាពការងាររបស់ក្រុមសកម្មជនបរិស្ថានទាំងនេះ ត្រូវបានគោរព និងកោតសរសើរពីអ្នកស្រឡាញ់បរិស្ថាន នៅជុំវិញពិភពលោក។ ទង្វើរបស់ពួកគាត់ ពិតជាផ្តល់ផលប្រយោជន៍យ៉ាងធំធេង សម្រាប់ជាតិ សម្រាប់ពលរដ្ឋខ្មែរ និងជាផ្នែកមួយជួយ ការពារទប់ស្កាត់បម្រែបម្រួលអាកាសធាតុពិភពលោកផងដែរ។
ក្រុងគ្រីស្ទានសាន់ (ន័រវែស) ថ្ងៃទី២ ខែកក្កដា ឆ្នាំ២០២៤
ម៉ែន ណាត
ប្រធានក្រុមប្រឹក្សាឃ្លាំមើលកម្ពុជា
