The Cambodia Daily
11th-7-2024
អ្នកឃ្លាំមើលស្ថានការណ៍ លើកឡើងថា ការស្នើពីមេដឹកនាំវៀតណាម មកមេដឹកនាំខ្មែរឱ្យជួយសម្របសម្រួលដល់ការតាំងទីលំនៅ និងធ្វើសមាហរណកម្មពលរដ្ឋវៀតណាម ចូលក្នុងសង្គមជាតិខ្មែរ គឺបង្ហាញឱ្យឃើញថា វៀតណាម នៅតែមានឥទ្ធិពលលើមេដឹកនាំប្រទេសកម្ពុជា។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily ថា តាមការកត់សម្គាល់របស់លោក ជារឿយៗមេដឹកនាំវៀតណាម តែងតែស្នើ និងរឭកទៅកាន់មេដឹកនាំកំពូលៗនៅប្រទេសកម្ពុជា ឱ្យយកចិត្តទុកដាក់ និងផ្ដល់សិទ្ធិស្របច្បាប់ដល់ប្រជាជនរបស់ខ្លួន ហើយសំណើរបស់វៀតណាម នេះ មេដឹកនាំខ្មែរក៏មិនដែលហ៊ានបដិសេធឡើយ។
ប្រភពដដែលអះអាងថា ពលរដ្ឋវៀតណាម ដែលរស់នៅខុសច្បាប់ រាជរដ្ឋាភិបាលត្រូវបញ្ជូនពួកគេតាមច្បាប់អន្តោប្រវេសន៍ទៅប្រទេសកំណើតវិញ ប៉ុន្តែរដ្ឋាភិបាល ក្រោមការដឹកនាំរបស់លោក ហ៊ុន សែន និងលោក ហ៊ុន ម៉ាណែត បែរជានាំគ្នាជួយសម្រួលឱ្យប្រជាពលរដ្ឋវៀតណាម ដែលរស់នៅខុសច្បាប់ ឱ្យរស់នៅស្របច្បាប់ទៅវិញ។
លោក ម៉ែន ណាត ចាត់ទុកការស្នើរបស់មេដឹកនាំវៀតណាម ទៅកាន់ឧបនាយករដ្ឋមន្ត្រី លោក ហ៊ុន ម៉ានី កាលពីថ្ងៃទី០៥ ខែកក្កដា កន្លងទៅ គឺបង្ហាញឱ្យឃើញថា វៀតណាមនៅតែជាបងធំរបស់កម្ពុជា។
អ្នកវិភាគខ្លះទៀត មើលឃើញថា អ្នកដឹកនាំក្នុងគណបក្សប្រជាជនកម្ពុជា ជាពិសេសក្នុងត្រកូល ហ៊ុន ដែលបន្តកាន់អំណាចដោយឯកឯងយូរលង់មកទល់ពេលនេះ គឺពឹងផ្អែកមួយភាគធំលើជនជាតិយៀកណាម ដែលរដ្ឋអំណាចឯកបក្ស ធ្វើឲ្យស្របច្បាប់ មានបណ្ណរស់នៅតាមច្បាប់ មានសិទ្ធិបោះឆ្នោតដើម្បីតបស្នងសងគុណដល់ត្រកូលហ៊ុនវិញ ខណៈជនជាតិខ្មែររាប់លាន ធ្វើចំណាកស្រុកទៅធ្វើការនៅក្រៅប្រទេស។
ការលើកឡើងពីនាយករដ្ឋមន្ត្រីវៀតណាម លោក Pham Minh Chinh នៅអំឡុងពេលដែលឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី បានទៅបំពេញទស្សនកិច្ចនៅវៀតណាម ចាប់ពីថ្ងៃទី០៤ ដល់ថ្ងៃទី០៧ កក្កដា។
សេចក្តីរាយការណ៍ពីអគ្គនាយកនៃអគ្គនាយកដ្ឋានអន្តោប្រវេសន៍ បានឱ្យដឹងថា ជនបរទេសអន្តោប្រវេសន៍ ដែលបានដាក់ពាក្យសុំប្រកាសទទួលស្គាល់ និងបណ្ណស្នាក់នៅអចិន្ត្រៃយ៍ គិតត្រឹមថ្ងៃបិទឱសានវាទទី៣០ ខែមិថុនា ឆ្នាំ២០១៩ នៃយុទ្ធនាការជំរឿនស្ថិតិនោះ សមត្ថកិច្ចបានដកហូតឯកសាររដ្ឋបាលមិនប្រក្រតីមានចំនួនជិត ៣ ម៉ឺនគ្រួសារ (២៨៩៤៥គ្រួសារ) ស្មើនឹងចំនួនជិត ១ សែននាក់ (៨៩៧៨៦នាក់)។
ជនបរទេសអន្តោប្រវេសន៍ទាំងនោះ ក្រសួងមហាផ្ទៃ បានផ្ដល់បណ្ណស្នាក់នៅអចិន្ត្រៃយ៍ជូនអ្នកដែលមានអាយុ ១៨ ឆ្នាំឡើងចំនួនជាង ៦ ម៉ឺននាក់ (៦៥១៦៨នាក់)។ ជាមួយគ្នានោះ ក្រសួងបានផ្ដល់បណ្ណបន្តសុពលភាព ដែលមានរយៈពេល ២ ឆ្នាំម្ដង សរុបជិត ២ ម៉ឺនបណ្ណ (១៩៥៦១បណ្ណ)។
គួររំឭកអំពីប្រវត្តិសាស្ត្រខ្មែរថា រដ្ឋធម្មនុញ្ញនៃព្រះរាជាណាចក្រកម្ពុជា នាឆ្នាំ១៩៤៧ សម័យប្រទេសកម្ពុជា ជាសមាគតរដ្ឋ ឬប្រែថា រដ្ឋនៅជាមួយ état associé ក្រោមអាណាព្យាបាលក្នុងសហភាពបារាំងសែស បានផ្តល់និយមន័យនៃពាក្យថា៖ “ពលរដ្ឋ (citoyen ជាបារាំង citizen ជាអង់គ្លេស) គឺជនដែលមានសិទ្ធិពេញ។ ក្នុងប្រទេសខ្មែរ ជនជាតិខ្មែរ ឬហៅថា ខេមរជន និងជនដែលរាប់ជាខ្មែរ ដូចជា ចាម គួយ ព្នង ជាដើម និងជនដែលចូលជាតិជាខ្មែរ ជាពលរដ្ឋខ្មែរ។ ឯជនជាតិក្រៅដែលនៅក្នុងព្រះរាជអាណាចក្រ ដូចជា ចិន យួន មិនមែនជាពលរដ្ឋខ្មែរទេ។ ជនទាំងនេះគ្មានសិទ្ធិដូចខ្មែរ គ្មានសិទ្ធិបោះឆ្នោតជ្រើសតាំងអ្នកតំណាងរាស្ត្រ ជាដើម។”
ជនទាំងនេះ ពុំមានអត្តសញ្ញាណប័ណ្ណ ឬកាតខ្មៅកាន់ជាប់នឹងខ្លួនទេ។ សម័យប្រទេសកម្ពុជាបានឯករាជ្យ ជនជាតិចិន និងជនជាតិយួន រដ្ឋកំណត់ហៅថា អាណិកជន៕
