ខាងក្រោមនេះគឺជាអត្ថបទព័ត៌មាន ជុំវិញព្រឹត្តិការណ៍លោក ហ៊ុន សែន ថ្លែងការពារតំបន់អភិវឌ្ឍន៍ត្រីកោណ CLV រួចមកលោក ក៏បញ្ជាឲ្យចាប់ខ្លួនពលរដ្ឋខ្មែរ ដែលទិតៀនរឿងនេះ។ ការទិតៀននានា លើកឡើងពីក្តីបារម្ភចំពោះហានិភ័យជាតិរបស់កម្ពុជា ទៅថ្ងៃក្រោយ។ – Updated 27-7-2024
លោក ហ៊ុន សែន ព្យាយាមលើកអំពីសមិទ្ធផលអភិវឌ្ឍតំបន់ត្រីកោណ (CLV) ឥណ្ឌូចិន តែពលរដ្ឋបារម្ភអំពីហានិភ័យជាតិ
RFA Khmer /ដោយ សេក បណ្ឌិត
23-7-2024
ប្រធានព្រឹទ្ធសភា លោក ហ៊ុន សែន បង្ហាញក្ដីសង្ឃឹមដ៏មុតមាំរបស់ខ្លួន ក្នុងការបង្កើតតំបន់ត្រីកោណអភិវឌ្ឍន៍សេដ្ឋកិច្ចពិសេស រួមគ្នាជាមួយប្រទេសវៀតណាម និង ឡាវ នោះថា នាំមកនូវភាពចម្រើនរុងរឿង ដល់ជីវភាពរស់នៅរបស់ពលរដ្ឋ ក្នុងតំបន់ភូមិភាគឦសានរបស់ខ្លួន។ ក៏ប៉ុន្តែពលរដ្ឋកំពុងប្រតិកម្មខ្លាំងៗ ជុំវិញរឿងនេះ ដោយចាត់ទុកថា ជាគ្រោះថ្នាក់របស់ជាតិ នាពេលអនាគត។
បើទោះជាពលរដ្ឋមិនពេញចិត្ត និងប្រតិកម្មខ្លាំងៗ ជុំវិញរឿងនេះក្ដី ក៏ប៉ុន្តែប្រធានព្រឹទ្ធសភា លោក ហ៊ុន សែន នៅតែព្យាយាមពន្យល់ម្ដងហើយម្ដងទៀត អំពីសមិទ្ធផលអភិវឌ្ឍតំបន់ត្រីកោណ (CLV-Cambodia, Lao and Vietnam) ដែលលោកអះអាងថា នឹងផ្ដល់ប្រយោជន៍ច្រើនដល់សេដ្ឋកិច្ចកម្ពុជា សន្តិសុខជាតិ និងជីវភាពប្រជាជនក្នុងតំបន់។
លោក ហ៊ុន សែន អះអាងថា ការអភិវឌ្ឍតំបន់ត្រីកោណ (CLV) នេះ ពុំមានការកំណត់ដាក់ដែនដីប្រទេសទាំងបីរួមគ្នានោះឡើយ។ តែផ្ទុយទៅវិញ នឹងផ្ដល់ប្រយោជន៍ដល់ភាគី កម្ពុជា ឡាវ និងវៀតណាម ផ្នែកសេដ្ឋកិច្ច សង្គម និងសន្តិសុខជាតិ។
លោកអះអាងថា ការដាក់ខេត្តរបស់កម្ពុជា ឡាវ និងវៀតណាម ពុំមែនជាការដាក់ ដើម្បីបង្កើតប្រទេសមួយនៃសហព័ន្ធឥណ្ឌូចិន ដូចការចោទប្រកាន់នោះឡើយ ៖
លោក ហ៊ុន សែន ៖ «អ្វីដែលដាក់ខេត្ត មិនមែនដាក់សម្រាប់បង្កើតប្រទេសមួយ ឬដាក់ខេត្តទាំងនេះ ទៅជាសហព័ន្ធដូចការចោទប្រកាន់ប៉ុន្មានថ្ងៃនេះ ខ្ញុំសូមប្រកាសថា ខ្ញុំបានចាប់ខ្លួនមនុស្ស ៣ នាក់រួចទៅហើយ គ្រូសន្តិសិទ្ធិទីក្រុងប៉ារីស ក្នុង tik tok និយាយដល់អាក្រក់ ទៅតថ្លៃគ្នានៅតុលាការ»។
ឆ្លើយតបការលើកឡើងនេះ ពលរដ្ឋ និងក្រុមយុវជន ប្រតិកម្មចំពោះការអភិវឌ្ឍន៍នេះ ដោយចាត់ទុកថា ជាមហិច្ឆតាឈ្លានពានរបស់វៀតណាម រយៈពេលវែង បង្កប់ឥទ្ធិពលនយោបាយ ស្របពេលដែលកម្ពុជាកំពុងមានវិបត្តិនយោបាយ និងការដឹកនាំឯកបក្ខ គ្មានប្រជាធិបតេយ្យ។
ពលរដ្ឋរស់នៅខេត្តមណ្ឌលគិរី ថ្លែងសុំមិនបញ្ចេញឈ្មោះ ព្រោះបារម្ភពីសុវត្ថិភាព ឱ្យដឹងថា លោកស្រី មិនគាំទ្រចំពោះគម្រោងអភិវឌ្ឍន៍តំបន់ត្រីកោណនេះទេ ដោយចាត់ទុកថា ជនជាតិដើមភាគតិច នឹងជួបការលំបាកមួយកម្រិតទៀត ពីការរឹតត្បិតសិទ្ធិសេរីភាព ការរំលោភសិទ្ធិមនុស្ស និងការបាត់បង់ធនធានធម្មជាតិជាប្រព័ន្ធ។
លោកស្រី អំពាវនាវឱ្យរដ្ឋាភិបាលលុបគម្រោងនេះ ហើយត្រូវដោះស្រាយបញ្ហាជាតិធំៗ ជំនួសវិញ រួមមាន ការបំផ្លាញធនធានធម្មជាតិ និង ការរំលោភដីធ្លីរបស់ជនជាតិដើមភាគតិចជាដើម ៖
ពលរដ្ឋសុំលាក់ឈ្មោះ ៖ «គ្រាន់តែឥឡូវ យើងពិបាកប៉ុណ្ណឹងហើយ ដោយការអភិវឌ្ឍត្រីកោណហ្នឹងទៀត យើងនឹងរងផលប៉ះពាល់ ឬក៏វាយប្រហារជាខ្លាំងទៅលើការអភិវឌ្ឍទាំងអស់នេះ អ៊ីចឹងមិនសង្ឃឹមថា យើងរស់មិនស្រួលទេ រដ្ឋាភិបាលគួរតែពិចារណាឡើងវិញ»។
តំបន់អភិវឌ្ឍន៍ត្រីកោណនៃប្រទេសទាំង ៣ បានរួមបញ្ចូលគ្នាខេត្តចំនួន ១៣ ខេត្ត ដោយក្នុងនោះប្រទេសវៀតណាម មានចំនួន ៥ ខេត្ត (ខេត្តកន្ទូម (Kon Tum) ខេត្តយ៉ាឡាយ (Gia Lai) ខេត្តដាក់ឡាក់ (Dak Lak) ខេត្តដាក់ណុង (Dak Nong) និងខេត្តប៊ីងភឿក (Binh Phuoc)។ រីឯប្រទេសឡាវ មានចំនួន ៤ ខេត្ត (ខេត្តអាត់តាក់ពឺ (Attapeu) ខេត្តសាឡាវ៉ាន់ (Salavan) ខេត្តសេកុង (Sekong) និងខេត្តចំប៉ាសាក់ (Champassak) និង ប្រទេសកម្ពុជា មានចំនួន ៤ ខេត្ត រួមមាន ខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង។
លោក ហ៊ុន សែន អះអាងថា តំបន់ត្រីកោណអភិវឌ្ឍន៍ CLV បានបង្កើតឡើង នៅឆ្នាំ១៩៩៩ ដែលលោកជាអ្នកផ្ដួចផ្ដើមដើម្បីប្រែក្លាយ ជាតំបន់ព្រំដែនអភិវឌ្ឍន៍ និងសុខដុមនីយកម្ម តភ្ជាប់ប្រជាជនប្រទេសទាំងបី លើដងវិថីសន្តិភាព និងវិបុលភាពរួមគ្នា។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ចាត់ទុកគម្រោងអភិវឌ្ឍន៍នេះ ជាគ្រោះថ្នាក់របស់ជាតិ និងបង្កហានិភ័យខ្ពស់ ដល់អធិបតេយ្យជាតិ ក្រោមឥទ្ធិពលនយោបាយរបស់វៀតណាម ដូចគ្នានឹងកម្ពុជាក្រោម។
លោកថា ប្រជាជនវៀតណាមចំនួន ៥ ខេត្ត មានចំនួនជិត ១០ លាននាក់ ក៏ប៉ុន្តែប្រជាជនខ្មែរទាំង ៤ ខេត្តមានតែជាង ៥០ ម៉ឺននាក់ប៉ុណ្ណោះ នឹងបណ្ដាលឱ្យមានកំណើនជនអន្តោប្រវេសន៍កាន់តែច្រើន ពិបាកនឹងគ្រប់គ្រង។
លោក ម៉ែន ណាត ៖ «បើគេចង់បង្កើតរដ្ឋ តើមានស្អីទៅទប់ទល់ជាមួយនឹងវៀតណាម វាជាហានិភ័យសម្រាប់កម្ពុជា ការឈ្លានពានគេកាន់តែបានសម្រេច ហើយបើគេចង់ចល័តទ័ពវៀតណាមក្នុងតំបន់ត្រីកោណហ្នឹង ក៏បាន»។
រីឯអតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បារម្ភថា ការបង្កើតតំបន់អភិវឌ្ឍន៍នេះ នឹងប្រែក្លាយតំបន់សហព័ន្ធឥណ្ឌូចិន តាមមហិច្ឆតារបស់ ហូ ជីមិញ ដែលវៀតណាម មានផែនការឈ្លានពានទឹកដីកម្ពុជា និងឡាវ។
លោក អ៊ុំ សំអាន ៖ «តំបន់អភិវឌ្ឍន៍ត្រីកោណ (CLV) នេះ ពលរដ្ឋនៃប្រទេសទាំងបីហ្នឹង ចេញចូលទៅវិញទៅមក ដោយមិនបាច់ប្រើលិខិតឆ្លងដែន ឬវីសានោះទេ។ អ៊ីចឹង វានឹងធ្វើឲ្យពលរដ្ឋវៀតណាមហ្នឹង ចូលមកខេត្តទាំងបួននៅប្រទេសកម្ពុជាដោយសេរី ចូលមកកាប់បំផ្លាញធនធានធម្មជាតិ ដូចជាព្រៃឈើ និងរ៉ែអីជាដើម»។
លោក ហ៊ុន សែន បន្ថែមថា តំបន់អភិវឌ្ឍន៍ត្រីកោណនៃប្រទេសទាំង ៣ ជាកន្លែងប្រកបដោយសក្ដានុពល មានធនធានធម្មជាតិ និងជីវៈចម្រុះជាច្រើនវិស័យ។
តំបន់នេះបានដើរតួនាទីយុទ្ធសាស្ត្រ ជំរុញឱ្យមានការផ្លាស់ប្ដូរតភ្ជាប់មជ្ឈមណ្ឌលសេដ្ឋកិច្ចរស់រវើក ទាក់ទាញអ្នកវិនិយោគ និងខ្សែច្រវាក់ផ្គត់ផ្គង់មហាអនុតំបន់។
ក៏ប៉ុន្តែពលរដ្ឋបារម្ភថា គម្រោងអភិវឌ្ឍន៍នេះ វៀតណាម គ្មានភាពស្មោះត្រង់ជាមួយកម្ពុជានោះទេ នឹងបង្កហានិភ័យខ្ពស់ ដល់មរណភាពទឹកដី នាពេលអនាគត៕
តុលាការឃុំខ្លួនសកម្មជនកិច្ចព្រមព្រៀង ២៣តុលា ៣នាក់ និងបុរសម្នាក់ ពីបទញុះញង់
RFA Khmer /ដោយ សុជីវី
25-7-2024
សាលាដំបូងរាជធានីភ្នំពេញ សម្រេចឃុំខ្លួនសកម្មជនកិច្ចព្រមព្រៀងសន្តិភាពទីក្រុងប៉ារីស ៣ នាក់ និងបុរសម្នាក់ទៀត ដែលលោក ហ៊ុន សែន បញ្ជាឱ្យចាប់ខ្លួន បន្ទាប់ពីបានសាកសួរពេញមួយថ្ងៃនៅថ្ងៃទី២៤ ខែកក្កដា។
អ្នកឃ្លាំមើលសិទ្ធិមនុស្ស ហៅការចាប់ និងឃុំខ្លួនសកម្មជនសង្គម តាមការបញ្ជារបស់អតីតនាយករដ្ឋមន្ត្រី និងជាប្រធានព្រឹទ្ធសភានេះ បង្ហាញយ៉ាងច្បាស់ថា លោក ហ៊ុន សែន នៅតែប្រើអំណាចរំលោភអំណាចតុលាការ ដែលជាស្ថាប័នត្រូវស្ថិតនៅឯករាជ្យ។
សាលាដំបូងរាជធានីភ្នំពេញ និងអយ្យការអមតុលាការនេះ បានសម្រេចចេញដីកាឃុំខ្លួនបណ្ដោះអាសន្នមនុស្សបួននាក់ ដាក់ពន្ធនាគារ ដែលក្នុងនោះរួមមាន សកម្មជនកិច្ចព្រមព្រៀងសន្តិភាពទីក្រុងប៉ារីស ចំនួន ៣ នាក់ និងបុរសម្នាក់អំពីបទញុះញង់ ឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា ៤៩៤ និង៤៩៥ នៃក្រមព្រហ្មទណ្ឌ។
សេចក្ដីប្រកាសព័ត៌មាន របស់សាលាដំបូងរាជធានីភ្នំពេញបញ្ជាក់ថា អ្នកទាំង ៤ នាក់នេះ រួមមាន ៖ លោក ស្រ៊ុន ស្រ៊ន កញ្ញា ភឹង សោភា លោក សាន សិទ្ធិ និងបុរសម្នាក់ទៀត លោក ចក់ ប៊ានមុន្នី។ ប្រភពដដែលបញ្ជាក់ថា បទចោទប្រកាន់នេះទាក់ទងនឹងសកម្មភាព ដែលបានប្រព្រឹត្តនៅក្នុង ខែកក្កដា និងពេលបន្តបន្ទាប់។ ក្នុងនោះតុលាការបានចោទទៀតថា អ្នកទាំង ៤ នាក់ និងបក្សពួកបានផ្សាយផ្ទាល់ តាមបណ្ដាញសង្គមហ្វេសប៊ុក ឈ្មោះ Srun Srorn កាលពីថ្ងៃទី២៣ ខែកក្កដា ព្រមទាំងបានបង្ហោះក្នុងហ្វេសប៊ុកផ្ទាល់ខ្លួន ពាក់ព័ន្ធនឹង «គម្រោងអភិវឌ្ឍតំបន់ត្រីកោណ រវាងរដ្ឋាភិបាល កម្ពុជា ឡាវ វៀតណាម (CLV-DTA) និងបានធ្វើការអត្ថាធិប្បាយ ដែលមានចរិតលក្ខណៈមួលបង្កាច់ ប្រឌិតព័ត៌មានមិនពិត ដែលធ្វើឡើងក្នុងចេតនាទុច្ចរិត ញុះញង់ បញ្ឆេះកំហឹងប្រជាពលរដ្ឋឱ្យប្រឆាំងនឹងការដឹកនាំរបស់រដ្ឋាភិបាល ដែលសកម្មភាពនេះតុលាការចាត់ទុកថា បានធ្វើឱ្យប៉ះពាល់ធ្ងន់ធ្ងរដល់សន្តិសុខជាតិ។
សេចក្ដីសម្រេចរបស់តុលាការក្រុងភ្នំពេញ ដែលចេញកាលពីយប់ថ្ងៃទី២៤ ខែកក្កដា នេះ ធ្វើឡើងបន្ទាប់ពីតុលាការបានចំណាយពេលពេញមួយថ្ងៃ សាកសួរនាក់ទាំង ៤ ក្រោយទទួលបានសំណុំរឿងពីអគ្គស្នងការនគរបាលជាតិ និងក្រោយពីអាជ្ញាធរខេត្តសៀមរាប ចាប់ខ្លួន និងបញ្ជូនអ្នកទាំង ៤ មកភ្នំពេញ កាលពីថ្ងៃទី២៣ ខែកក្កដា។
ទាក់ទងនឹងរឿងនេះ ប្រពន្ធសកម្មជនកិច្ចព្រមព្រៀងសន្តិភាពទីក្រុងប៉ារីស លោក ជគឺលោកស្រី ស្វាយ ពៅ លោកស្រី លើកឡើងថា នេះជាការចោទប្រកាន់ដោយគ្មានមូលដ្ឋាន ទាំងដែលប្ដីលោកស្រី មិនបានប្រព្រឹត្តកំហុសដូចការចោទប្រកាន់ឡើយ។ លោកស្រីថា អំពើអយុត្តិធម៌បែបនេះមិនគួរកើតមានលើទឹកដីដែលមេដឹកនាំតែងនាំគ្នាប្រើពាក្យអរគុណសន្តិភាពនេះទេ។
លោកស្រី ស្វាយ ពៅ ៖ «ច្បាប់ក៏ត្រូវមានការនិយាយគ្នា ត្រូវជជែកវែកញែកអីដែរ ព្រោះអីសង្គមខ្មែរយើងហាមាត់ឡើងប្រជាធិបតេយ្យ បិទមាត់ឡើងអរគុណសន្តិភាព មិនគួរមានពាក្យអ៊ីចឹងមកនិយាយ ដល់ពេលទង្វើវាអត់ធ្វើដូចមាត់និយាយកុំ កុំបង្កើតពាក្យអ៊ីចឹងយកមកកុហកប្រជាពលរដ្ឋអីល្អជាង ព្រោះអីទង្វើបែបនេះវាមើលទៅដូចអាក្រក់ភ្នែកមែនទែន»។
លោកស្រី ស្វាយ ពៅ ថាលោកស្រីដឹងច្បាប់ថាប្ដីលោកស្រី ត្រូវចាប់ឃុំខ្លួនទៅតាមបញ្ជារបស់អតីតនាយករដ្ឋមន្ត្រី ហ៊ុន សែន ដែលទំនងមិនផ្អែកលើអង្គហេតុអង្គច្បាប់អ្វីឡើយ។
លោក ហ៊ុន សែន កាលពីថ្ងៃទី២៣ ខែកក្កដា អះអាងថា លោកជាអ្នកបញ្ជាឱ្យចាប់ខ្លួនសកម្មជនកិច្ចព្រមព្រៀងសន្តិភាពទីក្រុងប៉ារីសអ្នកទាំងនេះ និងព្រមានថា ត្រូវតែចាប់ខ្លួនថែមទៀត និង មិនលើកលែងឱ្យអ្នករិះគន់រឿងកិច្ចព្រមព្រៀងតំបន់ត្រីកោណពិសេស CLV នេះ រួមទាំងស្រាវជ្រាវរកក្រុមគ្រួសាររបស់ពួកគេផង ប្រសិនបើអ្នករិះគន់នោះ នៅឯក្រៅប្រទេស។
ជាមួយគ្នានេះ លោកថែមទាំងបញ្ជាទៅតុលាការ ឱ្យដាក់ទោសអតិបរមាអ្នកដែលរិះគន់ទាំងនោះថែមទៀត។
បើទោះបីជាមិនបានបញ្ជាក់ឱ្យបានច្បាស់ ក៏តុលាការក្រុងភ្នំពេញ ទំនងទទួលយកបញ្ជានេះ ដោយបានសរសេរនៅក្នុងឃ្លាចុងក្រោយ នៅក្នុងសេចក្ដីថ្លែងការណ៍របស់ខ្លួន នៅយប់ថ្ងៃទី២៤ ខែកក្កដា ថា សាលាដំបូង និងអយ្យការអមសាលាដំបូងភ្នំពេញ នឹងបន្តអនុវត្តន៍ច្បាប់ដោយម៉ឺងម៉ាត់ ចំពោះសកម្មភាពដែលស្ថាប័ននេះ ចាត់ទុកថាមានចរិតលក្ខណៈមួលបង្កាច់ ប្រឌិតព័ត៌មានមិនពិត ដែលធ្វើឡើងក្នុងចេតនាទុច្ចរិត ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម។
ទាក់ទងនឹងរឿងនេះ អ្នកការពារសិទ្ធិមនុស្ស លោក ស៊ឹង សែនករុណា ហៅការចាប់ និងឃុំខ្លួនសកម្មជនសង្គមតាមការបញ្ជារបស់អតីតនាយករដ្ឋមន្ត្រី និងជាប្រធានព្រឹទ្ធសភានេះ បង្ហាញយ៉ាងច្បាស់ថា លោក ហ៊ុន សែន នៅតែប្រើអំណាចរំលោភអំណាចតុលាការដែលជាស្ថាប័នត្រូវស្ថិតនៅឯករាជ្យ។
លោក ស៊ឹង សែនករុណា ៖ «អ្នកដែលមានឥទ្ធិពល ដែលមានអំណាច ដែលរំលោភទៅលើគោលការណ៍ច្បាប់កំពូលទាំងអស់នេះក៏ដោយ ក៏យើងឃើញថា មិនមានវិធានការណាមួយទប់ទល់ ឬទប់ស្កាត់អំពីការប្រើប្រាស់រំលោភអំណាចទាំងអស់នោះដែរ។ ព្រួយបារម្ភចំពោះប្រជាពលរដ្ឋ ដែលរស់នៅក្នុងសង្គមប្រជាធិបតេយ្យ ដែលពួកគាត់មិនពេញចិត្តក្នុងការដឹកនាំ មានការប្រតិកម្មទៅលើរដ្ឋាភិបាល ឬក៏ស្ថាប័ននានា គឺពិបាកក្នុងការលើកឡើងអំពីចំណុចអវិជ្ជមាន ឬក៏ផលប៉ះពាល់ទាំងឡាយមកលើសិទ្ធិសេរីភាពរបស់ពួកគាត់»។
អ្នកការពារសិទ្ធិមនុស្ស និងគ្រួសារសកម្មជនសង្គម ទាមទារឱ្យតុលាការទម្លាក់ចោលបទចោទ និងដោះលែងអ្នកទាំង ៤ ឱ្យមានសេរីភាពវិញព្រោះអ្វីដែលពួកគេលើកឡើងជាក្ដីកង្វល់ ជាការឈឺឆ្អាលរឿងប្រទេសជាតិ រឿងទឹកដី និងជាការអនុវត្តសេរីភាពបញ្ចេញមតិ ដែលធានាដោយច្បាប់ មិនមែនជាបទល្មើសឡើយ៕
សមត្ថកិច្ចខេត្តកណ្ដាល ចាប់ខ្លួនលោក ធែល ធីលែន ជាលើកទី២ ក្រោយបញ្ចេញមតិរឿង CLV
RFA Khmer /ដោយ ប្រាជ្ញ ចេវ
25-7-2024
សមត្ថកិច្ចខេត្តកណ្ដាល បានចាប់ខ្លួនអ្នកធ្វើការងារសង្គម លោក ធែល ធីលែន ជាលើកទី២ ក្រោយពេលលោកបង្ហាញកង្វល់ពីវាសនាខេត្តទាំង ៤ របស់ខ្មែរ ដែលគ្រោងដាក់បញ្ចូលទៅក្នុងគម្រោងអភិវឌ្ឍន៍តំបន់ត្រីកោណ CLV។ លោក ធែល ធីលែន ទើបតែត្រូវបានតុលាការកំពូល ដោះលែងឱ្យមានសេរីភាពជាងមួយសប្ដាហ៍ប៉ុណ្ណោះ ក្រោយជាប់ពន្ធនាគារ រឿងរិះគន់រដ្ឋាភិបាល។
មុនពេលឃាត់ខ្លួនលោក ធែល ធីលែន បានបង្ហោះវីដេអូលើគណនីហ្វេសប៊ុក របស់កាលពីថ្ងៃទី២៣ ខែកក្កដា ពាក់ព័ន្ធនឹងរឿងតំបន់អភិវឌ្ឍន៍ត្រីកោណពិសេស (CLV) ដែលកម្ពុជា បានដាក់បញ្ចូលខេត្តចំនួន ៤ ក្នុងទៅក្នុងគម្រោងនោះ។
លោក ធែល ធីលែន៖ «បន្ទាប់ពីខ្ញុំចេញពីពន្ធនាគារបានប៉ុន្មានថ្ងៃ ខ្ញុំក៏សង្កេតឃើញបញ្ហារបស់ដែលកើតឡើងចំពោះប្រទេសជាតិយើង សុទ្ធតែរឿងធំៗ គ្រាន់តែបញ្ហាសេដ្ឋកិច្ចហ្នឹង ប្រជាពលរដ្ឋខ្ញុំពិបាករស់នៅ ហើយនៅពាក់ព័ន្ធបញ្ហាគម្រោងព្រែកជីកហ្វូណន ផង ហើយឥឡូវហ្នឹងលឺព័ត៌មានមិនច្បាស់ ការណ៍ពាក់ព័ន្ធខេត្តទាំង ៤ របស់យើងពាក់ព័ន្ធនឹងវៀតណាម និងឡាវទៀត ហើយបញ្ហាទាំងអស់ហ្នឹង ជាបញ្ហាក្ដៅដែលខ្ញុំពិតជាមិនអាចអង្គុយស្ងៀមដេកលក់ស្រួលទេ»។
នេះការចាប់ខ្លួនលើកទី២ នៃអ្នកធ្វើការងារសង្គមរូបនេះ។ កាលពីថ្ងៃទី៤ ខែតុលា ឆ្នាំ២០២២ លោក ធែល ធីលែន ធ្លាប់ជាប់ពន្ធនាគារម្ដងរួចហើយ បន្ទាប់ពីលោក បានប្រកាសកៀរគរប្រជាពលរដ្ឋ ឱ្យមកជួបជុំសម្ដែងមតិដោយសេរីនៅទីលានប្រជាធិបតេយ្យ ដើម្បីតវ៉ារឿងការបង្កើតដេប៉ាតឺម៉ង់ ភាសាវៀតណាម និង ការផ្ដល់ប័ណ្ណស្នាក់នៅអចិន្ត្រៃយ៍ ឱ្យជនអន្តោប្រវេសន៍ ដែលស្នាក់នៅកម្ពុជា។
ឪពុកលោក ធែល ធីលែន គឺលោក ផៃ ធែល ប្រាប់វិទ្យុអាស៊ីសេរី នៅថ្ងៃទី ២៤ ខែកក្កដា សមត្ថកិច្ច បានចាប់ខ្លួនកូនប្រុសរបស់លោក នៅក្នុងផ្ទះ ដោយយកលេសថា កូនប្រុសរបស់លោក បានកាប់គេឱ្យរងរបួស។ ប៉ុន្តែលោក ផៃ ធែល បញ្ជាក់ថា កូនរបស់លោក មិនកាប់នរណាម្នាក់ឡើយ ហើយការចោទប្រកាន់កូនប្រុសលោកបែបនេះ គឺជាលេសដើម្បីចាប់កូនលោកតែប៉ុណ្ណោះ។
លោក ផៃ ធែល៖ «វាធ្វើវីដេអូ ដល់គេឃើញវាធ្វើវីដេអូ ឃើញ គេចាប់អ៊ីចឹងទៅ គេចោទប្រកាន់ បើគេចោទប្រកាន់គេកាប់ ហើយយកកាំបិតកាប់ ដាក់តាមឡាន ចាប់តាមឡាន គេថាយើងកាប់គេ។ វាយកលេសអ៊ីចឹងទៅ វាធ្វើភស្តុតាង ដើម្បីចោទប្រកាន់»។
ជុំវិញរឿងនេះ វិទ្យុអាស៊ីសេរី មិនអាចសុំការបកស្រាយពីអភិបាលខេត្តកណ្ដាល លោក គួច ចំរើន និងសមត្ថកិច្ចពាក់ព័ន្ធបានទេនៅថ្ងៃទី២៤ ខែកក្កដា។
ការចាប់ខ្លួនលោក ធែល ធីលែន នេះ ស្របពេលដែលប្រធានព្រឹទ្ធសភា លោក ហ៊ុន សែន បានព្រមានចាត់វិធានការច្បាប់ដោយគ្មានការលើកលែង ចំពោះអ្នកណាដែលរិះគន់ រឿងតំបន់អភិវឌ្ឍន៍ត្រីកោណពិសេស (កម្ពុជា ឡាវ និងវៀតណាម) ។ លោក ហ៊ុន សែន សង្កត់ធ្ងន់ថា សម្រាប់អ្នកហ៊ានរិះគន់ នៅក្នុងស្រុក នឹងត្រូវប្រឈមការចាប់ខ្លួនដាក់គុក ហើយអ្នករិះគន់ពីក្រៅស្រុក នឹងត្រូវបានសមត្ថកិច្ចរបស់លោក ទៅសួរសុខទុក ក្រុមគ្រួសាររបស់ពួកគេ ដល់ផ្ទះ។
រដ្ឋាភិបាលលោក ហ៊ុន ម៉ាណែត ក្រោមការចង្អុលបញ្ជាពីប្រធានព្រឹទ្ធសភា លោក ហ៊ុន សែន កំពុងសម្រុកចាប់ខ្លួនពលរដ្ឋ និងធ្វើការងារសង្គម ដែលរិះគន់តំបន់អភិវឌ្ឍន៍ត្រីកោណពិសេស CLV។
លោក ធែល ធីលែន គឺជាពលរដ្ឋទី៥ ដែលត្រូវសមត្ថកិច្ចចាប់ខ្លួន ពីការបញ្ចេញមតិទាក់ទងគម្រោងអភិវឌ្ឍន៍ត្រីកោណពិសេស CLV៕
