The Cambodia Daily
30-7-2024
ក្រុមអ្នកឃ្លាំមើលស្ថានការណ៍កម្ពុជា ចាត់ទុកការផ្ដល់ដីសម្បទានសេដ្ឋកិច្ច ពីសំណាក់រដ្ឋាភិបាលកម្ពុជា ទៅឱ្យក្រុមហ៊ុនវៀតណាម ក្នុងខេត្តទាំង ៤ ដែលស្ថិតក្នុងតំបន់ត្រីកោណអភិវឌ្ឍន៍ (CLV) គឺជាការឈ្លានពានទឹកដីខ្មែរបែបថ្មី ក្រោមឈ្មោះអភិវឌ្ឍន៍។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី ២៩ កក្កដា នេះថា ការផ្តល់ដីសម្បទានសេដ្ឋកិច្ចក្នុងខេត្តទាំង ៤ របស់ខ្មែរនៅតំបន់ត្រីកោណអភិវឌ្ឍន៍ រយៈពេល ៩៩ឆ្នាំ គឺស្មើនឹងប្រគល់ដីខ្មែរឱ្យវៀតណាម គ្រប់គ្រងមួយជំនាន់ ឬមួយជីវិតដូច្នោះដែរ ដែលកិច្ចសន្យានេះបង្ហាញឱ្យឃើញយ៉ាងច្បាស់ថា ពលរដ្ឋខ្មែរក្នុងជំនាន់នេះនឹងមិនបានដឹងថា តើដីសម្បទានទាំងនោះនឹងមានវាសនាដូចដីកម្ពុជាក្រោមដែរឬក៏អត់ទេ។
លោក ម៉ែន ណាត រំលឹកថា ស្តេចជ័យជេដ្ឋាទី២ ធ្លាប់ប្រគល់ឱ្យដីខ្មែរឲ្យវៀតណាម ខ្ចីតែ ៥ ឆ្នាំប៉ុណ្ណោះ តែត្រូវវៀតណាម ឈ្លានពានរំលោភយកដីខ្មែរអស់ ២១ ខេត្ត ដែលស្ថិតក្នុងទឹកដីកម្ពុជាក្រោម សព្វថ្ងៃនេះ។
ប្រធានក្រុមប្រឹក្សាឃ្លាំមើលកម្ពុជា រូបនេះ អំពាវនាវឱ្យពលរដ្ឋខ្មែរទាំងក្នុងស្រុក និងក្រៅស្រុក ងើបឡើងទាមទារឱ្យលោក ហ៊ុន សែន ដកខេត្តទាំង ៤ របស់ខ្មែរ ចេញពីតំបន់ត្រីកោណអភិវឌ្ឍន៍ជាបន្ទាន់ ព្រោះទង្វើរបស់លោក ហ៊ុន សែន នៅពេលនេះ កំពុងបង្ហាញពីចេតនាប្រគល់ទឹកដីខ្មែរ ឱ្យបរទេសឈ្លានពានយ៉ាងពិតប្រាកដ។
ការអះអាងនេះ ធ្វើឡើងស្របពេលដែលរដ្ឋាភិបាលកម្ពុជា បានសម្បទានដីខ្មែររាប់ម៉ឺនហិកតា ដល់ក្រុមហ៊ុនវៀតណាម ក្រោមកិច្ចសន្យាអភិវឌ្ឍន៍រយៈពេល ៩៩ ឆ្នាំ។
របាយការណ៍អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) បានចេញផ្សាយកាលពីចុងឆ្នាំ២០២៣ ជុំវិញដីសម្បទានក្នុងខេត្តទាំង ៤ ក្នុងតំបន់ត្រីកោណអភិវឌ្ឍន៍ថា ក្រុមហ៊ុនវៀតណាម ទទួលបានដីសម្បទានសេដ្ឋកិច្ចពីរដ្ឋាភិបាលកម្ពុជា ជាង ២០ ម៉ឺនហិកតា (២៤៥.៣០៤ ហិកតា) នៅតំបន់អភិវឌ្ឍន៍ត្រីកោណ កម្ពុជា វៀតណាម និងឡាវ ក្រោមកិច្ចសន្យារយៈពេល ៩៩ ឆ្នាំ។
របាយការណ៍ដដែល បង្ហាញថា ដីសម្បទានសេដ្ឋកិច្ច ១ ហិកតា ជាមធ្យមត្រូវការកម្មករ ៣ នាក់ ដូច្នេះគេរកឃើញថា ដីសម្បទានសេដ្ឋកិច្ចរបស់ក្រុមហ៊ុនវៀតណាម ជាង ២០ ម៉ឺនហិកតា នៅតំបន់អភិវឌ្ឍន៍ត្រីកោណនេះ គឺត្រូវការកម្មករជាង ៧០ ម៉ឺននាក់ (៧៣៥.៩១២ នាក់)។
អង្គការលីកាដូ បញ្ជាក់ថា នៅទូទាំងប្រទេសកម្ពុជា ក្រុមហ៊ុនវៀតណាម ទទួលបានដីសម្បទានសេដ្ឋកិច្ចចំនួន ៥៥ កន្លែង ដែលមានផ្ទៃដីសរុបជាង ៣៦ ម៉ឺនហិកតា (៣៦២.៥១៥ ហិកតា)។
គេរកឃើញថា ដីសម្បទានសេដ្ឋកិច្ចរបស់ក្រុមហ៊ុនវៀតណាម ជាង ៣៦ ម៉ឺនហិកតានេះ ត្រូវការកម្មករជាង ១ លាននាក់ (១.០៨៧.៥៤៥ នាក់) ខណៈកម្មករទាំងនោះ ត្រូវគេរកឃើញថាជាង ៩០% គឺសុទ្ធតែជាជនជាតិវៀតណាម។
របាយការណ៍របស់រដ្ឋាភិបាល បង្ហាញថា ខេត្តទាំង ៤ របស់កម្ពុជា គឺខេត្តក្រចេះ ស្ទឹងត្រែង មណ្ឌលគិរី និងខេត្តរតនគិរី ដែលស្ថិតក្នុងតំបន់ត្រីកោណអភិវឌ្ឍន៍ សព្វថ្ងៃនេះ មានផ្ទៃដីសរុបជិត ៥ ម៉ឺនគីឡូម៉ែត្រការ៉េ (៤៧.២៥៦ គីឡូម៉ែត្រការ៉េ) ដែលមានប្រជាជនសរុបជាង ៦០ ម៉ឺននាក់ (៦៧៥.០៦៨ នាក់)។ ចំណែកខេត្តទាំង ៤ របស់ឡាវ ក្នុងតំបន់ត្រីកោណមានប្រជាជនសរុបជាង ៨ សែននាក់ ស្របពេលដែលខេត្តទាំង ៥ របស់វៀតណាម មានចំនួនប្រជាជនសរុបរហូតដល់ជាង ៨ លាននាក់ឯណោះ ក្នុងពេលបច្ចុប្បន្ននេះ៕
