ពលរដ្ឋខ្មែរជាង១ម៉ឺននាក់នៅកូរ៉េ និងជប៉ុន ចេញបាតុកម្មប្រឆាំងគម្រោង CLV
RFA Khmer /ដោយ ច័ន្ទ ដារ៉ូ
12th-8-2024
ប្រជាពលរដ្ឋខ្មែរនៅប្រទេសកូរ៉េខាងត្បូង និងជប៉ុន ជាងមួយម៉ឺននាក់ បានប្រមូលផ្តុំគ្នា ធ្វើមហាបាតុកម្មទាមទារឱ្យរដ្ឋាភិបាលក្រុងភ្នំពេញ ដកខ្លួនចេញពីតំបន់ត្រីកោណអភិវឌ្ឍន៍ ជាមួយវៀតណាម និងឡាវ (CLV = Cambodia – Laos – Vietnam)។ បាតុកម្មនៅតាមបណ្តាប្រទេសទាំងនេះ បន្ទាប់ពីពួកគាត់ព្រួយបារម្ភថា តំបន់អភិវឌ្ឍន៍ត្រីកោណពិសេស (CLV) នឹងអាចនាំឲ្យកម្ពុជា បាត់បង់ធនធានធម្មជាតិ និងទឹកដីកម្ពុជា ទៅឲ្យប្រទេសវៀតណាម ដូចសម័យអតីតកាល។
ពលរដ្ឋខ្មែរជាង ១ម៉ឺននាក់ ភាគច្រើនជាយុវជនធ្វើការ និងរស់នៅប្រទេសកូរ៉េខាងត្បូង (South Korea) និងជប៉ុន(Japan) មកពីតំបន់ជិតឆ្ងាយ បានប្រមូលផ្តុំគ្នាធ្វើមហាបាតុកម្ម នៅថ្ងៃអាទិត្យ ទី១១ ខែសីហា។
បាតុកម្មរបស់ពលរដ្ឋខ្មែរនៅប្រទេសទាំងនេះ ទាមទារឱ្យរដ្ឋាភិបាល លោក ហ៊ុន ម៉ាណែត បញ្ឈប់ដាក់ខេត្តខ្មែរចំនួន ៤ នៅក្នុងកិច្ចសហប្រតិបត្តិការ តំបន់អភិវឌ្ឍន៍ត្រីកោណពិសេស (CLV) ជាមួយប្រទេសវៀតណាម (Vietnam) និងឡាវ (Lao)។ ក្រៅពីនេះ ក្រុមបាតុករទាមទារឱ្យរដ្ឋាភិបាលកម្ពុជា ស្តារប្រជាធិបតេយ្យ ដោះលែងសកម្មជននយោបាយ យុវជនបរិស្ថាន និងសង្គម ដែលកំពុងជាប់ពន្ធនាគារដោយអយុត្តិធម៌ ឱ្យមានសេរីភាពឡើងវិញផងដែរ។
ទិដ្ឋភាពនៃមហាបាតុកម្មទ្រង់ទ្រាយធំ នៅប្រទេសកូរ៉េខាងត្បូង ប្រព្រឹត្តទៅយ៉ាងផុសផុល ដោយមនុស្សម្នាបានធ្វើដំណើរពីតំបន់ និងទីក្រុងនីមួយៗ ស្លៀកពាក់ចម្រុះពណ៌ នាំគ្នាសម្តែងមតិ និងលើកបដាអមដោយសំឡេងស្គរ ស្រែកព្រមៗគ្នា លាន់ឮពេញទីលានបាតុកម្ម នៅក្នុងទីក្រុងសេអ៊ូល (Seoul)។
សម្រែកក្រុមបាតុករ ៖ «យើងមកនេះ ដើម្បីបង្ហាញឱ្យរបបទីក្រុងភ្នំពេញ ឃើញថា យុវជននៅកូរ៉េ មិនគាំទ្រគម្រោង CLV ជាដាច់ខាត ដកថយ ដកថយ»។
កញ្ញា ឆូ ដាវីន ស្ថិតក្នុងចំណោមបាតុករជាងម៉ឺននាក់ ដែលចូលរួមមហាបាតុកម្មនៅពេលនេះ ប្រាប់វិទ្យុអាស៊ីសេរី ថា កញ្ញា និងពលរដ្ឋខ្មែររស់នៅប្រទេសកូរ៉េផ្សេងទៀត ធ្វើដំណើរតាមឡានក្រុង រយៈពេល ៤ ម៉ោង ដើម្បីចូលរួមមហាបាតុកម្ម សម្តែងមតិក្នុងក្រុងសេអ៊ូល ពីព្រោះកញ្ញា ឈឺចាប់នឹងរដ្ឋាភិបាលកម្ពុជា ធ្វើបាបពលរដ្ឋខ្មែរនៅក្នុងប្រទេស ឱ្យរងទុក្ខវេទនាឥតឈប់ឈរ ជាពិសេសក្តីបារម្ភខ្លាចបាត់បង់ទឹកដី ដោយសារគម្រោងអភិវឌ្ឍន៍ត្រីកោណ CLV របស់រដ្ឋាភិបាល។
កញ្ញា ឆូ ដាវី «អ្នកណាក៏ដោយ ឱ្យតែប្រឆាំងនឹងគំនិតរបស់គាត់ (លោក ហ៊ុន សែន និងលោក ហ៊ុន ម៉ាណែត) គឺគាត់ចាត់ទុកថា ក្បត់ជាតិ អ៊ីចឹងហើយ បងប្អូនយើងមិនសុខចិត្តទេ ពីព្រោះទឹកដីខ្មែរទាំងអស់នេះ មិនមែនជាកម្មសិទ្ធិរដ្ឋាភិបាល ក្រុមគ្រួសារត្រកូល ហ៊ុន តែមួយក្តាប់នោះទេ គឺជាទឹកដីរបស់បងប្អូនទាំងអស់គ្នា អ៊ីចឹងហើយបងប្អូនដែលចូលរួមនេះ មិនសុខចិត្តជាដាច់ខាត»។
តំណាងគណៈកម្មាការរៀបចំបាតុកម្ម នៅប្រទេសកូរ៉េខាងត្បូង លោក មាស វិសាល ប្រាប់ថា បាតុកម្មនេះមានសន្ទុះខ្លាំងជាងលើកណាៗទាំងអស់។ លោកបន្តថា អ្នកចូលរួមបាតុកម្ម មានស្មារតីសាមគ្គីភាពជាតិនិយមខ្ពស់ ដោយមិនខ្លាចការគំរាមរបស់មេដឹកនាំក្រុងភ្នំពេញនោះទេ។ ម្យ៉ាងទៀតពលរដ្ឋខ្មែរនៅទីនោះ បើទោះបីរស់នៅក្រៅប្រទេសសុខស្រួលយ៉ាងណាក្តី ក៏ពួកគាត់ មិនភ្លេចមាតុភូមិកំណើតឡើយ។
លោក មាស វិសាល ៖ « ប្រជាពលរដ្ឋខ្មែរនៅប្រទេសកូរ៉េ មានតែប៉ុន្មានម៉ឺននាក់ តែយើងឃើញថា ពួកគាត់មិនងាយសុំច្បាប់គេ (ថៅកែ) មកចូលរួមបាតុកម្ម ឈប់មួយថ្ងៃៗមិនងាយទេ ការលះបង់ ការបង្ហាញចំនួនអ្នកចូលរួមនៅថ្ងៃនេះ គឺជាការដាក់សម្ពាធ និងបង្ហាញទៅរដ្ឋាភិបាល ឱ្យទទួលស្គាល់ថា ប្រជាពលរដ្ឋមិនគាំទ្រការសម្រេចនោះ អ៊ីចឹងសូមស្តាប់ប្រជាពលរដ្ឋ បើមិនចង់ឱ្យពលរដ្ឋ ងើបប្រឆាំងដូចប្រទេសដទៃ »។
ចំណែកប្រជាពលរដ្ឋខ្មែរនៅប្រទេសប៉ុនរាប់រយនាក់ {ជាង ៧០០នាក់} នៅថ្ងៃទី១១ ខែសីហា ក៏បានចេញធ្វើបាតុកម្មនៅកណ្តាលទីក្រុងតូក្យូ (Tokyo) ដើម្បីប្រឆាំងនឹងគម្រោងតំបន់ត្រីកោណ CLV នេះដែរ។ ក្រុមបាតុករ បានជួបជុំសម្តែងមតិ និងដើរដង្ហែក្បួនបាតុកម្ម ចេញពីសួនច្បារស៊ីនយូហ្គឹ ជូអូ (Shinjuku Chuo) ឆ្ពោះទៅសាលាក្រុងស៊ីនយូហ្គឹ (Shinjuku City Hall)។
តំណាងបាតុករនៅប្រទេសជប៉ុន លោកស្រី មាស ភារ៉ា ប្រាប់វិទ្យុអាស៊ីសេរី ថាបាតុកម្មរៀបចំឡើងព្រមៗគ្នា នេះបញ្ជាក់ឱ្យឃើញកាន់តែច្បាស់ថា ពលរដខ្មែរ ខ្វល់ខ្វាយពីជោគវាសនារបស់ប្រទេសជាតិ ដោយភ័យខ្លាចជាប់ផុងខ្លួន ដូចទឹកដីកម្ពុជាក្រោម កាលពីសម័យអតីតកាល។ លោកស្រីមើលឃើញថា រដ្ឋាភិបាលកម្ពុជា បកស្រាយពីគម្រោងត្រីកោណអភិវឌ្ឍន៍កន្លងមក មិនមានសុច្ចរិតភាព និងគ្មានតម្លាភាព ដែលមិនអាចធ្វើឱ្យពលរដ្ឋខ្មែរ ជឿជាក់រឿងទឹកដី ជាមួយប្រទេសវៀតណាម បានឡើយ។
លោកស្រី មាស ភារ៉ា ៖ «យើងមិនចូលរួមការដាក់គម្រោងនោះ ចូលរួមអភិវឌ្ឍន៍ គាត់ចេញមកគំរាមថា អ្នកនិយាយពាក់ព័ន្ធរឿងហ្នឹង ចាប់ដាក់គុក ខ្ញុំថារបបគាត់ជិតអស់ថ្ងៃបញ្ចាប់ហើយ គាត់អត់ចេញធ្វើអ្វីក្រៅពីគំរាម ចា៎ មេដឹកនាំល្អ គេត្រូវដោះស្រាយ គេអត់មានយកការគំរាម បំភ័យពលរដ្ឋទេ»។
គណៈកម្មការរៀបចំបាតុកម្ម នឹងយកញត្តិដែលជាសំណើ និងក្តីកង្វល់របស់បាតុករ ទៅដាក់នៅស្ថានទូតកម្ពុជា និងបណ្តាប្រទេសម្ចាស់ហត្ថលេខីនៃ កិច្ចព្រមព្រៀងសន្តិភាពទីក្រុងបារីស ប្រចាំប្រទេសកូរ៉េខាងត្បូង និងជប៉ុន ឆាប់ៗនេះ។
រដ្ឋាភិបាលប្រទេសកម្ពុជា វៀតណាម និង ឡាវ បានព្រមព្រៀងគ្នាបង្កើតតំបន់ ត្រីកោណអភិវឌ្ឍន៍ (CLV) កាលពីឆ្នាំ ១៩៩៩។ គម្រោងនេះ មានខេត្តចំនួន ១៣ ជាចំណុះ ដោយប្រទេសកម្ពុជាមាន ៤ ខេត្ត នៅភាគឦសាន ដែលមានពលរដ្ឋ សរុបតែជាង ៥០ ម៉ឺននាក់។ ប្រទេសឡាវមាន ៤ ខេត្ត ដែលមានប្រជាជនសរុបជាង ៧០ ម៉ឺននាក់។ រីឯប្រទេសវៀតណាម មាន ៥ ខេត្ត ដែលមានប្រជាជន រហូតដល់ជាង ៧ លាននាក់។
លោក ហ៊ុន សែន តែងតែព្រមានពីការប្រើប្រាស់គុកច្រវ៉ាក់ ចំពោះពលរដ្ឋដែលហ៊ានបញ្ចេញមតិ រឿងទឹកដីនេះ ប៉ុន្តែពលរដ្ឋខ្មែរនៅតែមិនចុះញ៉ម ចំពោះការគំរាមនេះឡើយ។
វិទ្យុអាស៊ីសេរី មិនអាចសុំការឆ្លើយតបពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេ នៅថ្ងៃទី១១ ខែសីហា។ ប៉ុន្តែលោកប្រាប់សារព័ត៌មានក្នុងស្រុក ដោយចោទថា បាតុកម្មរបស់ពលរដ្ឋខ្មែរនៅក្រៅប្រទេស រៀបចំដោយក្រុមប្រឆាំងរដ្ឋាភិបាល។
ទោះជាយ៉ាងណា ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត គាំទ្រពលរដ្ឋខ្មែរធ្វើបាតុកម្ម ពីព្រោះបញ្ហាទឹកដីជាបញ្ហារបស់ខ្មែរទាំងអស់ ត្រូវឈឺឆ្អាល និងចូលរួមឱ្យបានច្រើន។ លោកសង្កេតឃើញថា បាតុកម្មរបស់ពលរដ្ឋនៅតាមបណ្តាប្រទេស ដូចជានៅប្រទេសកូរ៉េខាងត្បូង ជប៉ុន និង អូស្រ្តាលី ជាដើម បង្ហាញឱ្យឃើញកាន់តែច្បាស់ថា ពលរដ្ឋខ្មែរ លែងខ្លាចសារគំរាមរបស់លោក ហ៊ុន សែន និងលោក ហ៊ុន ម៉ាណែត ទៀតហើយ។
លោក ម៉ែន ណាត ៖ «រឿងត្រីកោណអភិវឌ្ឍន៍នេះ ជារឿងរបស់ជាតិ ដែលពលរដ្ឋខ្មែរ ភ័យបារម្ភថា ថ្ងៃក្រោយទៅ យើងបាត់គ្រប់គ្រងទឹកដីជាតិយើង ម៉្លេះហើយ គាត់មានមនសិការដោយខ្លួនឯង ចេញមកតវ៉ាដោយទឹកចិត្តខ្លួនឯង គាត់ភ័យបារម្ភពីជាតិលិចលង់ ពីព្រោះប្រវត្តិសាស្រ្តខ្មែរ មានរឿងច្រើនហើយ ពាក់ព័ន្ធមហិច្ឆតារបស់វៀតណាម »។
ប្រជាពលរដ្ឋខ្មែរស្ទើរគ្រប់និន្នាការនយោបាយ ទាំងក្នុងប្រទេស និងក្រៅប្រទេស បានរួមកម្លាំងសាមគ្គីគ្នា ចេញសម្តែងមតិ និងធ្វើបាតុកម្មទាមទារឱ្យរដ្ឋាភិបាល លោក ហ៊ុន ម៉ាណែត ងាកមកស្តាប់មតិរបស់ប្រជាពលរដ្ឋ ដោយបញ្ឈប់ដាក់ខេត្តខ្មែរ ចំនួន ៤ នៅក្នុងកិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស (CLV)។ ក្រុមបាតុករព្រមានថា ពួកគាត់នឹងបន្តចេញធ្វើបាតុកម្មកាន់តែធំថែមទៀត បើសិនរដ្ឋាភិបាល មិនព្រមដកខ្លួនចេញគម្រោងនេះនោះទេ៕
ពលរដ្ឋខ្មែរនៅបរទេស ធ្វើបាតុកម្មប្រឆាំងនឹងផែនការរាជរដ្ឋាភិបាល ដាក់ទឹកដីរកស៊ីចូលគ្នាក្នុងគម្រោង CLV
The Cambodia Daily
13-8-2024
ក្រុមបាតុករខ្មែររាប់ម៉ឺននាក់ ក្នុងប្រទេសកូរ៉េខាងត្បូង ជប៉ុន និង អូស្ត្រាលី ព្រមានរដ្ឋាភិបាល លោក ហ៊ុន ម៉ាណែត ថាបើមិនព្រមដកខ្លួនចេញពីគម្រោងអភិវឌ្ឍន៍ត្រីកោណរួមគ្នា ជាមួយឡាវ និង វៀតណាម (CLV) ទេ មានតែប្រជាពលរដ្ឋ ប្រើសិទ្ធិទម្លាក់រដ្ឋាភិបាលស៊ូពូជថ្មីនេះវិញតែប៉ុណ្ណោះ ដើម្បីការពារទឹកដីខ្មែរ។
គណៈកម្មការបាតុកម្មប្រចាំសាធារណរដ្ឋកូរ៉េ លោក យ៉ង់ ស៊ីណេត ប្រាប់សារព័ត៌មាន The Cambodia Daily នៅថ្ងៃទី១២ សីហា នេះថា បើរដ្ឋាភិបាលកម្ពុជា មិនព្រមដកខ្លួនចេញពីតំបន់អភិវឌ្ឍន៍រួមគ្នា ជាមួយវៀតណាម ទេ ពលរដ្ឋខ្មែរក្នុងប្រទេសកូរ៉េខាងត្បូង ក៏មិនបញ្ឈប់ការធ្វើបាតុកម្មដែរ ព្រោះនេះគឺសិទ្ធិរបស់ពលរដ្ឋ ដែលមានចែងក្នុងរដ្ឋធម្មនុញ្ញ។
លោកថា ប្រជាពលរដ្ឋខ្មែរគ្រប់រូប មានសិទ្ធិចូលរួមកិច្ចការប្រទេសជាតិ និងសិទ្ធិធ្វើបាតុកម្មនៅគ្រប់ទីកន្លែង ដើម្បីទាមទារឱ្យរដ្ឋាភិបាល គិតគូរពីប្រយោជន៍ជាតិ និងប្រយោជន៍របស់ប្រជាពលរដ្ឋ។
លោក យ៉ង់ ស៊ីណេត អះអាងថា ពលរដ្ឋខ្មែរមានសិទ្ធិពេញលេញ ក្នុងនាមជាម្ចាស់វាសនាលើទឹកដីរបស់ខ្លួន ក្នុងការចូលរួមការពារតាមរយៈនៃការសម្ដែងមតិ តវ៉ាទាមទារនូវការដឹកនាំមិនត្រឹមត្រូវរបស់រដ្ឋាភិបាល ដូច្នេះបើរាជរដ្ឋាភិបាល នៅតែបន្តរំលោភបំពានឆន្ទៈរបស់ប្រជាពលរដ្ឋទៀតនោះ កំហឹងពលរដ្ឋខ្មែរនៅទូទាំងពិភពលោក និងកំហឹងពលរដ្ឋខ្មែរនៅក្នុងប្រទេស ច្បាស់ជាផ្ទុះការតវ៉ាកាន់តែខ្លាំងជាងនេះ។
សកម្មជនសង្គមប្រចាំប្រទេសកូរ៉េខាងត្បូង រូបនេះ សម្ដែងមោទនភាពដែលប្រជាពលរដ្ឋខ្មែរ នៅសាធារណរដ្ឋកូរ៉េ ជាង ៣ ម៉ឺននាក់ ចេញធ្វើបាតុកម្មប្រឆាំងនឹងគម្រោងអភិវឌ្ឍន៍ កម្ពុជា ឡាវ និងវៀតណាម ក្នុងតំបន់ត្រីកោណអភិវឌ្ឍន៍ (CLV) ដើម្បីឱ្យរាជរដ្ឋាភិបាលប្រទេសកម្ពុជា ដកខ្លួនចេញពីគម្រោងនេះវិញ។
លោក យ៉ង់ ស៊ីណេត អំពាវនាវឱ្យប្រជាពលរដ្ឋ និងយុវជនខ្មែរនៅគ្រប់ទិសទី ក្រោកឡើងចូលរួមការពារទឹកដីរបស់ខ្លួន ប្រឆាំងនឹងគម្រោងត្រីកោណអភិវឌ្ឍន៍ លុះត្រាតែរដ្ឋាភិបាលលោក ហ៊ុន ម៉ាណែត ដកខ្លួនចេញពីគម្រោងនេះ ដើម្បីការពារទឹកដីខ្មែរ សម្រាប់កូនចៅជំនាន់ក្រោយ។
គណៈកម្មការបាតុកម្មរូបនេះ បញ្ជាក់ថា បើខ្មែរបាត់បង់ទឹកដី ខ្មែរក៏ប្រាកដជានឹងបាត់បង់ពូជសាសន៍ដែរ ដូច្នេះពូជសាសន៍ខ្មែរ ដែលមានកេរ្តិ៍ឈ្មោះដ៏រុងរឿង និងជាពូជសាសន៍កសាងអង្គរដ៏មហិមា មិនមែនជាទំនិញសម្រាប់គ្រួសារអ្នកមានអំណាច វេចខ្ចប់ធ្វើជាកាដូ ប្រគល់ឱ្យបរទេសជិតខាង ដើម្បីដោះដូរនឹងអំណាចនោះទេ។
កាលពីថ្ងៃទី១១ ខែសីហា ឆ្នាំ២០២៤ ប្រជាពលរដ្ឋខ្មែរនៅប្រទេសកូរ៉េខាងត្បូង ប្រមាណជាង ៣ ម៉ឺននាក់ បានប្រមូលផ្តុំគ្នានៅកណ្តាលរដ្ឋធានីសេអ៊ូល ទាមទារឱ្យរាជរដ្ឋាភិបាល ដកខ្លួនចេញពីគម្រោងអភិវឌ្ឍន៍ កម្ពុជា ឡាវ និងវៀតណាម ក្រោមហេតុផលថា គម្រោងអភិវឌ្ឍន៍នេះ គឺជាល្បិចឈ្លានពានទឹកដីខ្មែរ ពីប្រទេសវៀតណាម។
ជុំវិញការធ្វើបាតុកម្មនេះ ប្រជាពលរដ្ឋដែលរស់នៅប្រទេសជប៉ុន និងប្រទេសអូស្ត្រាលី រាប់ពាន់នាក់ ក៏បានចេញធ្វើបាតុកម្មប្រឆាំងតវ៉ា ទាមទារឱ្យរដ្ឋាភិបាលក្រុងភ្នំពេញ ដកខ្លួនចេញពីតំបន់ត្រីកោណអភិវឌ្ឍន៍នេះដែរ កាលពីថ្ងៃអាទិត្យ {១១ ខែសីហា} កន្លងទៅនេះ។
ការធ្វើបាតុកម្មនេះ ក្រុមបាតុករបានកាន់បដារូបសកម្មជនសង្គម ដែលត្រូវរដ្ឋាភិបាលចាប់ខ្លួន ជុំវិញការរិះគន់តំបន់អភិវឌ្ឍន៍ត្រីកោណ ដូចជា លោក ស្រ៊ុន ស្រ៊ន លោក នី ណាក់ លោក កើត សារ៉ាយ និងកញ្ញា ភឹង សោភា ជាដើម ក្នុងបំណងឱ្យរដ្ឋាភិបាល ដោះលែងពួកគេឱ្យមានសេរីភាពពេញលេញឡើងវិញ។
ដំណាលពេលគ្នានោះ កាលពីថ្ងៃទី១១ ខែសីហា ឆ្នាំ២០២៤ អគ្គបញ្ជាការដ្ឋានកងយោធពលខេមរភូមិន្ទ បានចេញសេចក្តីថ្លែងការណ៍ ដោយចាត់ទុកប្រជាពលរដ្ឋខ្មែរ ដែលចេញធ្វើបាតុកម្មប្រឆាំងនឹងគម្រោងអភិវឌ្ឍន៍ត្រីកោណនេះ ថាជាក្រុមប្រឆាំងជ្រុលនិយម ក្នុងចេតនាបំផ្លាញប្រទេសកម្ពុជា និងសន្តិភាព។
អគ្គបញ្ជាការដ្ឋានកងយោធពលខេមរភូមិន្ទ បញ្ជាក់ជំហរថា ខ្លួនប្ដេជ្ញាការពាររដ្ឋាភិបាលស៊ូពូជថ្មី ដែលមានលោក ហ៊ុន ម៉ាណែត កំពុងដឹកនាំសព្វថ្ងៃនេះឱ្យបានដាច់ខាត ដោយការតាមបង្ក្រាប កម្ទេច កម្ចាត់ចោលក្រុមដែលបះបោរ ដែលមានបំណងបង្កវិទ្ធង្សនាផ្សេងៗ ទោះជាស្ថិតក្នុងរូបភាពបែបណាក៏ដោយ។
ទាក់ទងនឹងការធ្វើបាតុកម្មនៃពលរដ្ឋខ្មែរនៅក្រៅប្រទេស លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានថ្លែងប្រាប់សារព័ត៌មានក្នុងស្រុកថា នេះជាសិទ្ធិរបស់ពលរដ្ឋខ្មែរ ប៉ុន្តែយុវជនខ្មែរប្រយ័ត្នចាញ់បោកក្រុមជ្រុលនិយម ដែលមានបំណងចង់ដុតបំផ្លាញប្រទេសជាតិ និងរុញប្រទេស ឱ្យធ្លាក់ទៅក្នុងភាពវឹកវរ និងសង្គ្រាមស៊ីវិលឡើងវិញ។
អ្នកនាំពាក្យរដ្ឋាភិបាលរូបនេះថា ក្រុមជ្រុលនិយម នឹងមិនអាចសម្រេចផែនការផ្តួលរំលំរដ្ឋាភិបាលស្របច្បាប់ ដែលកើតចេញពីការបោះឆ្នោតរបស់ពលរដ្ឋបានឡើយ ខណៈរដ្ឋាភិបាលកម្ពុជា បានប្ដេជ្ញាយ៉ាងម៉ឺងម៉ាត់ការពារនូវសន្តិភាព ស្ថិរភាពនយោបាយ និងអធិបតេយ្យជាតិទឹកដី។
ជុំវិញបញ្ហានេះ អតីតមេដឹកនាំបក្សប្រឆាំង លោក សម រង្ស៊ី សរសេរលើទំព័រហ្វេសប៊ុករបស់ខ្លួន នៅថ្ងៃទី១២ សីហា នេះថា ស្មារតីរឹងមាំស្នេហាជាតិ នៅមានពេញខ្លួនយុវជនខ្មែរគ្រប់ទីកន្លែង ព្រោះរបបដឹកនាំរបស់ត្រកូលហ៊ុន បានធ្វើឲ្យប្រទេសកម្ពុជា បាត់បង់ធនធានធម្មជាតិ សម្បត្តិជាតិ និងបាត់បង់ទឹកដីទាំងមូល ទៅប្រទេសជិតខាង។ លោក សម រង្ស៊ី បញ្ជាក់ថា បាតុកម្មនេះ គឺជាបាតុកម្មការពារទឹកដី មិនមែនបាតុកម្មដើម្បីនិន្នាការនយោបាយឡើយ៕
