អត្ថបទដោយលោក ម៉ែន ណាត នៃក្រុមប្រឹក្សាឃ្លាំមើលកម្ពុជា
20-11-2024
បណ្ឌិត ហង់ ជួនណារ៉ុន សព្វថ្ងៃជារដ្ឋមន្ត្រីក្រសួងអប់រំ យុវជន និងគីឡាកម្ពុជា។ កាលពីឆ្នាំ២០១៣ លោកបានសរសេរសារណាបញ្ចប់ថ្នាក់អនុបណ្ឌិត នៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច ក្នុងប្រធានបទ «ទស្សនទានស្តីពីវិវាទព្រំដែនសមុទ្រ រវាងកម្ពុជា និងថៃទ្បង់ដ៍ ក្នុងបរិបទនៃយុត្តិការអន្តរជាតិ» បានបញ្ជាក់យ៉ាងច្បាស់ថា កោះគុត ដែលមានផែនទីភ្ជាប់ផង គឺជារបស់កម្ពុជា។ (សូមអាន ឬទាញយកត្រង់នេះ ឯកសារភ្ជាប់ “Read or download here”)។
សារណានេះ ជាប្រភេទឯកសារស្រាវជ្រាវផ្លូវការ ផ្អែកលើមូលដ្ឋានឯកសារ «សន្ធិសញ្ញាបារាំង-សៀម ឆ្នាំ១៩០៤ និងឆ្នាំ១៩០៧»។ ក្នុងសន្ធិសញ្ញាបារាំង-សៀម ឆ្នាំ១៩០៧ មានភ្ជាប់ពិធីសារជាឧបសម្ពន្ធ័ ផែនទី គណៈកម្មការព្រំដែន ដែលបានកំណត់ព្រំដែនសមុទ្រ រវាងសៀម និងឥណ្ឌូចិនបារាំង (កម្ពុជា)។ សារណាដដែលនេះ បានសង្កត់ធ្ងន់ថា «ខ្សែបន្ទាត់មួយភ្ជាប់កំពូលខ្ពស់ជាងគេរបស់ កោះគុត ទៅនឹងចំណុចមួយនៃតំបន់ឆ្នេរ ដែលស្ថិតនៅទល់មុខកោះគុត»។ កំពូលខ្ពស់ជាងគេនៃកោះគុត គឺភាគីកម្ពុជា ទទួលបានយ៉ាងហោចណាស់ពាក់កណ្តាលនៃ កោះគុត។
សូមអានឯកសារសារណាលោក ហង់ ជួនណារ៉ុន ដែលសរសេរពាក់ព័ន្ធរឿងវ៉ាវ ដែនសមុទ្រកម្ពុជា-ថៃ ចាប់ពីទំព័រ ៤២ តទៅ៖
- អំពីព្រំដែនកម្ពុជា-ថៃ ចាប់ពីវាក្យខណ្ឌទី៤ នៃទំព៍រ ៤៥
- ពាក់ព័ន្ធរឿងរ៉ាវ កោះគុត ពីទំព័រ ៥០ ដល់ទំព័រ ៥៩
- ផែនទីភ្ជាប់សន្ធិសញ្ញា ចាប់ពីទំព័រ ១៨៥ ដល់ទំព័រ ១៩៤។
ឯកសារនេះ គឺជាផ្នែកមួយនៃសក្ខីកម្មសម្រាប់អ្នកសិក្សាស្រាវជ្រាវ និងក្រុមមេដឹកនាំ ឲ្យគិតគូរជាចំបងនូវស្មារតីជាតិ ការពារផលប្រយោជន៍ជាតិ និងពលរដ្ឋរបស់ខ្លួន។
សូមបញ្ជាក់ថា រឿងរ៉ាវកោះគុត និងតំបន់សមុទ្រត្រួតស៊ីគ្នា រវាងកម្ពុជា និងថៃ គឺជាប្រធានបទក្តៅគគុក បន្ទាប់ពីអ្នកនយោបាយថៃ អ្នកស្រាជ្រាវថៃ និងអ្នកជាតិនិយមថៃ ដាក់សម្ពាធទៅរដ្ឋាភិបាលរបស់ខ្លួនឲ្យការពារសម្បត្តិធនធានធម្មជាតិថៃ នៅលើឈូងសមុទ្រថៃ។
ចំណែកពលរដ្ឋខ្មែរ អ្នកសិក្សាស្រាវជ្រាវឯករាជ្យ អ្នកប្រជាធិបតេយ្យ និងអ្នកជាតិនិយមខ្មែរ ក៏នាំគ្នាជំរុញឲ្យរដ្ឋាភិបាលកម្ពុជា ត្រូវប្តឹងប្រទេសថៃ លើសំណុំរឿងកោះគុត និងការកំណត់ខ្សែបន្ទាត់ព្រំដែនសមុទ្រជាមួយថៃ ទៅកាន់តុលាការមជ្ឈត្តការអន្តរជាតិ (Permanent Court of Arbitration “PCA”) មុនពេលការចុះកិច្ចព្រមព្រៀងណាមួយរវាងប្រទេសទាំងពីរ ស្តីពីតំបន់រុករករ៉ែរួមគ្នា។
កោះគុត មានផ្ទៃក្រឡាប្រមាណ ១០៥ គីឡូម៉ែត្រក្រឡា មានបណ្តោយប្រមាណ ២៥ គីឡូម៉ែត្រ និងទទឹងប្រមាណ ៩ គីឡូម៉ែត្រ។
មានឯកសារផ្លូវការជាច្រើនបញ្ជាក់ថា កោះគុត ត្រូវបានភាគីថៃដណ្តើមគ្រប់គ្រងទាំងស្រុង នៅឆ្នាំ២០១០ បន្ទាប់ពីប្រទេសថៃ និងវៀតណាម បានគប់គិតគ្នាធ្វើកិច្ចព្រមព្រៀងទ្វេភាគីស្ងាត់ៗ នៅខែសីហា ឆ្នាំ១៩៩៧ ដោយគ្មានវត្តមានភាគីកម្ពុជា ហើយបានកាត់ឆ្វៀលយកផ្ទៃសមុទ្រកម្ពុជា ទៅចែកគ្នាប្រមាណ ៣ ម៉ឺន គីឡូម៉ែត្រក្រឡាក្នុងភាគីនីមួយៗ។ គូរបញ្ជាក់ថា ផ្ទៃមុទ្រកម្ពុជាសរុបមាន ៩៥ ម៉ឺនគីឡូំម៉ែត្រក្រឡា។ ថៃ និងវៀតណាម លួចធ្វើកិច្ចព្រមព្រៀងស្ងាត់ៗនាពេលនោះ គឺផ្អែកតាមមូលដ្ឋានកិច្ចព្រមព្រៀងទ្វេភាគីខុសច្បាប់ នៅខែកក្កដា ឆ្នាំ១៩៨២ ស្តីពីដែនទឹកប្រវត្តិសាស្ត្រ ដែលចុះហត្ថលេខាដោយរដ្ឋមន្ត្រីការបរទេស នៃរដ្ឋាភិបាលទីក្រុងភ្នំពេញ គឺលោក ហ៊ុន សែន ជាមួយរដ្ឋាភិបាលវៀតណាម ត្រួត្រាកម្ពុជាខុសច្បាប់នាពេលនោះ។
នៅឆ្នាំ២០០១ រដ្ឋាភិបាលកម្ពុជា របស់លោក ហ៊ុន សែន និងរដ្ឋាភិបាលថៃ បានចុះអនុស្សារណៈយោគយល់គ្នា (MOU) ស្តីពីការរុករករ៉ែរួមគ្នា នៅលើតំបន់ត្រួតស៊ីគ្នា ដែលមានទំហំ ២៦០០០ គីឡូម៉ែត្រក្រឡា ក្នុងចំណោមទំហំផ្ទៃក្រឡា ដែលបានកាត់ឆ្វៀលដែនសមុទ្រខ្មែរ ៣ ម៉ឺន គីឡូម៉ែត្រក្រឡានោះ។ អ្នកជំនាញ និងអ្នកស្រាវជ្រាវឯករាជ្យខ្មែរ បានស្តីបន្ទោសថា កម្ពុជា មិនត្រូវធ្វើកិច្ចព្រមព្រៀងពាណិជ្ជកម្មណាមួយ ដោយគ្មានការកំណត់ព្រំដែន នៅលើដែនសមុទ្រនេះឡើយ។
