សារព័ត៌មាន The Cambodia Daily
11th-12-2024
ក្រុមអ្នកឃ្លាំមើលលើកឡើងថា ដំណើរទស្សនកិច្ចរបស់លោក ហ៊ុន សែន ទៅកាន់ប្រទេសក្នុងតំបន់មជ្ឈិមបូព៌ា គឺចង់គេចពីទណ្ឌកម្មសហគមន៍អឺរ៉ុប ដែលបង្ហាញថា លោក ហ៊ុន សែន នៅតែមានចេតនាប៉ុនប៉ងបំផ្លាញសិទ្ធិមនុស្ស និងលទ្ធិប្រជាធិបតេយ្យនៅប្រទេសកម្ពុជា កាន់តែខ្លាំង។
ប្រធានក្រុមប្រឹក្សាឃ្លាំមើលកម្ពុជា ប្រាប់សារព័ត៌មាន The Cambodia Daily នៅថ្ងៃទី១០ ធ្នូ នេះថា ដំណើរទស្សនកិច្ចរបស់លោក ហ៊ុន សែន ទៅកាន់ប្រទេសនៅមជ្ឈិមបូព៌ា គឺលោក ហ៊ុន សែន កំពុងភ័យព្រួយចំពោះការបាត់បង់ប្រព័ន្ធអនុគ្រោះ EBA ពីសហភាពអឺរ៉ុប និងការដាក់ទណ្ឌកម្មលើមន្ត្រីរដ្ឋាភិបាលកម្ពុជា ដូច្នេះហើយបានជាគាត់ប្រឹងស្វះស្វែងរកដំណោះស្រាយ មុនពេលដែលប្រព័ន្ធអនុគ្រោះពន្ធ ត្រូវបាត់បង់ និងទណ្ឌកម្មពីសហភាពអឺរ៉ុប ត្រូវធ្លាក់ទៅលើមន្ត្រីរដ្ឋាភិបាលលោក ហ៊ុន ម៉ាណែត នាពេលខាងមុខនោះ។
លោក ម៉ែន ណាត លើកឡើងថា រដ្ឋាភិបាលកូនប្រុសរបស់គាត់ ដែលកំពុងជួបបញ្ហាសេដ្ឋកិច្ចនាពេលនេះ ក៏ជាភស្តុតាងមួយបញ្ជាក់ថា ក្នុងតំណែងជានាយករដ្ឋមន្ត្រីរបស់លោក ហ៊ុន ម៉ាណែត ជាង ១ឆ្នាំមកនេះ មិនអាចដោះស្រាយបញ្ហាសេដ្ឋកិច្ចសម្រាប់ពលរដ្ឋខ្មែរបានទាល់តែសោះ កុំថាឡើយដល់ទៅបញ្ហានយោបាយនោះ។
ប្រធានក្រុមប្រឹក្សាឃ្លាំមើលកម្ពុជា រូបនេះបញ្ជាក់ថា លោកមើលមិនឃើញពីភាពវិជ្ជមាន ក្នុងដំណើរទស្សនកិច្ចទៅកាន់ប្រទេសទាំង ៤ នៅមជ្ឈិមបូព៌ានាពេលនេះទេ បើទោះបីជាប្រទេសទាំងនោះមិនសូវខ្វល់ពីបញ្ហាសិទ្ធិមនុស្ស និងលទ្ធិប្រជាធិបតេយ្យ ដូចសហរដ្ឋអាមេរិក និងសហភាពអឺរ៉ុបក៏ដោយ។
លោកគូសបញ្ជាក់ថា ការដែលលោក ហ៊ុន ម៉ាណែត ត្រូវបានគេចាត់ចូលទៅក្នុងចំណោមមេដឹកនាំកខ្វក់ទាំង ១២ នៅលើពិភពលោក កាលពីដើមឆ្នាំ២០២៤ កន្លងទៅ ក៏ជាឥទ្ធិពលអាក្រក់ដ៏ធំមួយ សម្រាប់ទំនុកចិត្តរបស់មេដឹកនាំនៃបណ្តាប្រទេសផ្សេងៗ ដែលចង់រកស៊ីជាមួយនឹងប្រទេសកម្ពុជាដែរ។
ទោះជាមានការប្រឹងប្រែងដើរតួលើឆាកអន្តរជាតិជួយជ្រោមជ្រែងកូន ពីឪពុកយ៉ាងណាក៏ដោយ រាជរដ្ឋាភិបាលដែលដឹកនាំដោយលោក ហ៊ុន សែន និងដោយលោក ហ៊ុន ម៉ាណែត មិនទាន់លុបលាងមុខមាត់អំពីរឿងឧក្រិដ្ឋកម្មអាស្រូវដែលពិភពលោកគេដឹងឮរាប់ឆ្នាំមកហើយនោះនៅឡើយទេ។
មានការសួរគ្នាក្នុងមជ្ឈដ្ឋានខ្មែរ និងបរទេសនៅក្រៅប្រទេសថា តើមានក្រុមហ៊ុនពីប្រទេសគោរពច្បាប់ទម្លាប់ណាខ្លះ ហ៊ានចូលមកដាក់ទុនរកស៊ី ក្នុងរាជាណាចក្រកម្ពុជា ថ្វីបើនៅមជ្ឈិមបូព៌ា មានរាជាណាចក្រមានស្តេចដូចខ្មែរក្តី។
កាលពីថ្ងៃទី៧ ខែធ្នូ ឆ្នាំ២០២៤ អគ្គលេខាធិការដ្ឋានព្រឹទ្ធសភា បានចេញសេចក្ដីប្រកាសព័ត៌មានថា ប្រធានព្រឹទ្ធសភា លោក ហ៊ុន សែន រួមទាំងថ្នាក់ដឹកនាំព្រឹទ្ធសភា រដ្ឋសភា រដ្ឋាភិបាល និងសភាពាណិជ្ជកម្មកម្ពុជា នឹងធ្វើដំណើរទស្សនកិច្ចផ្លូវការ រយៈពេលមួយសប្ដាហ៍នៅបណ្តាប្រទេសក្នុងមជ្ឈិមបូព៌ា។
អគ្គលេខាធិការដ្ឋានព្រឹទ្ធសភា បញ្ជាក់ថា ដំណើរទស្សនកិច្ចនេះ ជាការពង្រឹងទំនាក់ទំនងការទូតផង ដើម្បីពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសក្នុងតំបន់ និងពិភពលោកផងដែរ។
ក្រោយសេចក្តីជូនដំណឹងពីអគ្គលេខាធិការដ្ឋានព្រឹទ្ធសភាបាន ១ថ្ងៃ លោក ហ៊ុន សែន បានចេញដំណើរទៅកាន់ប្រទេសចំនួន ៣ ក្នុងតំបន់មជ្ឈិមបូព៌ា ចាប់ពីថ្ងៃទី៨ ដល់ថ្ងៃទី១៤ ខែធ្នូ នេះ មានរាជាណាចក្រអារ៉ាប៊ីសាអ៊ូឌីត (Saudi Arabia) ប្រទេសកាតា (Qatar) អារ៉ាប់រួមអេមីរ៉ាត (United Arab Emirate) និងសាធារណរដ្ឋតួកគីយ៉េ (Turkeye) ផងដែរ៕
