VOD Khmer /លោក ប៉ុល សម្បត្តិ
22-4-2025
ចំពេលវត្តមាននាយករដ្ឋមន្ត្រីថៃ មកកម្ពុជា រយៈពេល ២ថ្ងៃក្នុងសប្តាហ៍នេះ ក្រុមអ្នកឃ្លាំមើលព្រំដែនពីគណបក្សប្រឆាំង ជំរុញឱ្យលោក ហ៊ុន ម៉ាណែត ប្រាប់មេដឹកនាំថៃ ដកទ័ពចេញពីតំបន់ឈ្លានពាន ដូចជានៅតំបន់ប្រាសាទ និងគោះគុត ជាដើម ដើម្បីបង្ហាញឆន្ទៈការពារបូរណភាពទឹកដីបុព្វបុរសខ្មែរ។
បើតាមព័ត៌មានថៃ TNN ចុះផ្សាយកាលពីថ្ងៃទី២១ ខែមេសានេះថា នាយករដ្ឋមន្រ្តីថៃ អ្នកស្រី ផែថងថាន ស៊ីណាវ៉ាត់ នឹងបំពេញទស្សនកិច្ចទៅកម្ពុជា រយៈពេល ២ថ្ងៃ គឺចាប់ថ្ងៃទី២៣ ដល់ថ្ងៃទី២៤ ខែមេសា ឆ្នាំ២០២៥។
ប្រភពបន្តថា ក្នុងដំណើរបំពេញទស្សនកិច្ចនោះ អ្នកស្រី ផែថងថាន នឹងជួបពិភាក្សាជាមួយនាយករដ្ឋមន្រ្តីកម្ពុជា លោក ហ៊ុន ម៉ាណែត បន្ទាប់មកនឹងជួបពិភាក្សាជាមួយប្រធានព្រឹទ្ធសភា លោក ហ៊ុន សែន។
បន្ថែមពីនេះ នាយករដ្ឋមន្រ្តីថៃ អ្នកស្រី ផែថងថាន នឹងចូលគាល់ព្រះកុរណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាផងដែរ។
ជុំវិញបញ្ហានេះ តំណាងរាស្រ្តបក្សសង្គ្រោះជាតិ លោក អ៊ុំ សំអាន បង្ហោះសារកាលពីថ្ងៃទី២១ ខែមេសានេះដោយនិយាយថា មេដឹកនាំកម្ពុជា ត្រូវប្រាប់មេដឹកនាំថៃ ឱ្យដកទាហានថៃ ចេញពីប្រាសាទតាមាន់ធំ ប្រាសាទតាមាន់តូច និងប្រាសាទតាក្របី រួមទាំងចំណែកខ្លះនៃកោះគុត ដែលកំពុងគ្រប់គ្រង។
លើសពីនេះ លោកថា បើថៃមិនព្រមដកទាហានចេញពីតំបន់ដែលបានឈ្លានពានទេ កម្ពុជាត្រូវប្រើជម្រើសប្តឹងករណីនេះ ទៅតុលាការអន្តរជាតិភ្លាម ដើម្បីមហិច្ឆតាបរទេសឈ្លានពាន។
លោក អ៊ុំ សំអាន បានឱ្យ VOD ដឹងបន្ថែមនៅថ្ងៃទី២២ ខែមេសានេះថា វត្តមានអ្នកស្រី ផែថងថាន ជាឱកាសដែលមេដឹកនាំកម្ពុជា បង្ហាញពីភាពច្បាស់លាស់របស់កម្ពុជា។
តែផ្ទុយទៅវិញ លោកថា បើលោក ហ៊ុន ម៉ាណែត មិនលើកបញ្ហាកោះគុត បញ្ហាប្រាសាទបុរាណខ្មែរដែលថៃរំលោភបំពានយកនេះទេ វាឆ្លុះបញ្ចាំងថា មេដឹកនាំគ្រួសារហ៊ុនគ្មានឆន្ទៈ ការពារទឹកដីដូនតាខ្មែរនោះទេ។
លោកថា៖ «បើសិនជាត្រកូលហ៊ុនមិនលើកយកបញ្ហាកោះគុត តំបន់ត្រួតស៊ីគ្នា និងប្រាសាទទាំងបីមកពិភាក្សាជាមួយនឹងមេដឹកនាំថៃទេ បញ្ជាក់ថា ត្រកូលហ៊ុនគឺមិនមែនជាត្រកូលស្នេហាជាតិទេ ជាត្រកូលក្បត់ជាតិ អាចប្រជាពលរដ្ឋឯងនិងប្រវត្តិសាស្ត្រ និងចារ្យថាត្រកូលហ៊ុន គឺជាត្រកូលក្បត់ជាតិដែលលោកឪពុកកាត់កោះត្រល់ និងកោះក្រចកសេះ ទៅឲ្យយួន និងដែនសមុទ្រឲ្យយួន ឯកូនអាចនឹងកាត់កោះគុតឲ្យថៃ អ៊ីចឹងត្រកូលនឹងអាចក្លាយទៅជាត្រកូលក្បត់ជាតិតជំនាន់ ដោយត្រកូលអភិជនប៉ែនចឹង»។
លើសពីនេះ តំណាងរាស្រ្តបក្សសង្រ្គោះជាតិម្នាក់ទៀតគឺ លោក សួន សូរីដា ជំរុញឱ្យ លោក ហ៊ុន ម៉ាណែត ត្រូវប្រាប់មេដឹកនាំថៃថា កម្ពុជាក៏មានចំណែកនៃកោះគុត ហើយប្រាសាទតាមាន់តូច តាមាន់ធំ និងប្រាសាទតាក្របី ជាកម្មសិទ្ធិរបស់កម្ពុជា។
មួយវិញទៀត លោកថា ជំនួបនេះ ក៏ជាឱកាសល្អសម្រាប់មេដឹកនាំកម្ពុជា ប្រាប់មហាជនខ្មែរថា កម្ពុជានៅតែរក្សាជំហរទាមទារ និងការពារដែនកោះ ដែនសមុទ្រ និងប្រាសាទបុរាណខ្មែរ ទោះពេលនេះកន្លែងខ្លះថៃបានគ្រប់គ្រងក៏ដោយ ។
លោកថា៖ «ប្រសិនបើក្នុងពេលបច្ចុប្បន្ន វាកំពុងតែមានការផ្ទុះឡើងនូវបញ្ហារឿងព្រំដែន ទាក់ទងរវាងប្រទេសទាំងពីរ ព្រំដែនរវាងប្រទេសទាំងពីរកម្ពុជាថៃនៅតំបន់ប្រាសាទតាមាន់ធំ និងប្រាសាទតាក្របី ហើយនិងកោះគុត ហើយបែរជារដ្ឋាភិបាលកម្ពុជាព្រងើយកន្តើយមិនយកបញ្ហានេះ នឹងដាក់ជារបៀបវារៈនៅក្នុងការជជែកទេ ខ្ញុំគិតថា រដ្ឋាភិបាលកម្ពុជាមិនយកចិត្តទុកដាក់នៅក្នុងការការពារបូរណភាពទឹកដីរបស់ខ្លួនទេ»។
VOD មិនអាចទាន់ទងអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការបំភ្លឺជុំវិញរឿងនេះបាននៅឡើយទេ គិតត្រឹមម៉ោងផ្សាយនេះ។
យ៉ាងណា អ្នកនាំពាក្យបក្សប្រជាជនកម្ពុជា លោក សុខ ឥសាន ថ្លែងក្នុងភាពប្រយ័ត្នប្រយែង ជុំវិញរឿងកម្តៅព្រំដែននេះ។
លោកថា៖ «គាត់ម៉េចដឹងថារាជរដ្ឋាភិបាលប្រទេសទាំងពីរ មិនជជែករឿងព្រំដែន អានឹងចេះតែទាយទុកមុនចឹងណា! ឥឡូវចំស្តាប់មើលទៅស្អែកនេះ ថាតើប្រមុខរាជរដ្ឋាភិបាលប្រទេសទាំងពីរ លោកជជែកគ្នារឿងអីខ្លះ! ខ្ញុំយល់ថា គេចមិនរួចអំពីការជជែកអំពីផលប្រយោជន៍រួមនៃប្រទេសទាំងពីរទេ អ៊ីចឹងគាត់ដែលនៅក្រៅសង្វៀន និងកុំឲ្យចេះជាងគេអ្នកក្នុងសង្វៀន»។
ដោយឡែក ប្រធានក្រុមឃ្លាំមើលកម្ពុជា លោក ម៉ែន ណាត យល់ថា បើមេដឹកនាំគ្រួសារ ហ៊ុន នៅតែព្រងើយកន្តើយបញ្ហាជាតិមាតុភូមិឆ្លុះបញ្ចាំងថា មេដឹកនាំគ្រួសារ ហ៊ុន កំពុងក្បត់ឆន្ទៈរាស្រ្ត គប់គិតជាមួយបរទេសឈ្លានពានទឹកដីបុព្វបុរសខ្មែរ។
លោកបន្តថា ការបណ្តែតបណ្តោយឱ្យបរទេសគឃ្លើន ហ៊ានរំលោភយកដែនកោះ និងប្រាសាទបុរាណខ្មែរនាសម័យទំនើបនេះ គឺឆ្លុះបញ្ចាំងថា មេដឹកនាំអសមត្ថភាពដឹកនាំប្រទេស ឬគ្មានឆន្ទៈការពារនគរ។
លោកថា៖ «បើលោក ហ៊ុន ម៉ាណែត ហ្នឹងមានការភ្ញាក់រឭកជាងឪពុករបស់លោក លោកគួរតែយកបញ្ញាស្មារតីដែលបានរៀនសូត្រនៅក្រៅប្រទេសយកមកដឹកនាំប្រទេសតាមផ្លូវត្រូវទៅ កុំទៅបន្ដលង់និងអំណាចហួងហែងកុំនិងបន្តធ្វើបាបប្រជាពលរដ្ឋបង្កជម្លោះ បង្កការបាក់បែកស្នាដៃជាតិតទៅទៀត ការបាក់បែកស្មារតីជាតិធ្វើឲ្យប្រទេសជិតខាងហ្នឹងលេបត្របាក់ទឹកដីយើងបន្តិចម្តងៗ ហើយកុំបន្ទោសគេ ដូច្នេះត្រូវមានស្មារតីសាមគ្គីជាតិហើយត្រូវប្តឹងប្រទេសថៃ ប្រទេសវៀតណាម ជាពិសេសក្នុងដំណើរទស្សនកិច្ចរបស់មេដឹកនាំថៃមកកាន់កម្ពុជា ត្រូវតែប្រាប់មេដឹកនាំថៃថាឲ្យប្រគល់បូរណភាពទឹកដីដែលខ្លួនឯងបានយកទៅហ្នឹង»។
ការណ៍នេះ លោក ម៉ែន ណាត យល់ថា ដើម្បីផ្តល់ទំនុកចិត្តដល់ពលរដ្ឋខ្មែរ មេដឹកនាំគ្រួសារ ហ៊ុន ត្រូវបង្ហាញឆន្ទៈប្រាប់មេដឹកនាំថៃថា កម្ពុជានឹងប្តឹងទៅអន្តរជាតិ បើមិនដកទ័ពចេញពីប្រាសាទតាមាន់តូច តាមាន់ធំ និងប្រាសាទតាក្របីទេនោះ។
បញ្ហាព្រំដែននាសម័យទំនើបនេះ វាបានកក្រើកឡើងវិញអំឡុងឆ្នាំ២០០៥ ដែលពេលនោះ លោក ហ៊ុន សែន បានគំរាមរំលាយរបបរាជានិយមអាស្រ័យធម្មនុញ្ញចោល បើព្រះអង្គមិនព្រមឡាយព្រះហស្តលេខាលើសន្ធិសញ្ញាបំពេញបន្ថែម ដែលរងការរិះគន់ថា ធ្វើតាមការចង់បានរបស់មេដឹកនាំវៀតណាម។
ជាក់ស្តែងនៅឆ្នាំ២០០៥ លោក ហ៊ុន សែន ធ្លាប់គំរាមរំលាយស្ថាប័នព្រះមហាក្សត្រ ដើម្បីសម្រេចមហិច្ឆតាវៀតណាមលេបទឹកដី បើព្រះអង្គមិនឡាយព្រះហស្តលេខា លើសន្ធិសញ្ញាព្រំដែនខុសច្បាប់ដែលគូរវាសដោយវៀតណាម ឆ្នាំ១៩៨២, ៨៣ និង ៨៥ ឱ្យរស់ឡើងវិញទេនោះ។
បន្ថែមពីនេះ លោក ហ៊ុន សែន តែងតែចោទមេដឹកនាំគណបក្សប្រឆាំងថា ជាជនក្បត់ជាតិ ខណៈពួកគេជាញឹកញាប់បានប្រើយន្តការសភា និយាយលាតត្រដាងពីមហិច្ឆតាវៀតណាម លេបទឹកដីខ្មែរនេះ។
លើសពីនេះ គណបក្សសង្គ្រោះជាតិ ជាបក្សប្រឆាំងធំជាងគេ ត្រូវបាន លោក ហ៊ុន សែន ប្រើតុលាការរំលាយចេញពីឆាកនយោបាយនៅចុងឆ្នាំ២០១៧ និងបន្តសម្លាប់ជីវិតនយោបាយមេដឹកនាំ រហូតបច្ចុប្បន្ន ក្នុងនោះរួមទាំង លោក កឹម សុខា ផងដែរ។
យ៉ាងណា មន្រ្តីគណបក្សប្រឆាំង និងអ្នកឃ្លាំមើលព្រំដែន អះអាងថា វៀតណាមបានរំលោភយកដីខ្មែរ តាមបន្ទាត់ព្រំដែនច្រើនកន្លែង រួមទាំងប្រជុំកោះក្រចកសេះ និងកោះត្រល់ជាដើម ដោយគ្មានការជំទាស់ពីលោក ហ៊ុន សែន ក្រោយលើកបន្តុបលោក ហ៊ុន សែន ឱ្យកាន់អំណាចអំឡុងឆ្នាំ១៩៧៩មក។
កម្តៅព្រំដែននេះ ត្រូវបានគេមើលឃើញថា ជាដើមចមធ្វើឱ្យ លោក ហ៊ុន សែន ជាប់អន្ទាក់ប្រទេសជិតខាង ហើយបន្តប្រើគ្រប់មធ្យោបាយ ដើម្បីកម្ចាត់ខ្មែរគ្នាឯង ដែលហ៊ានលាតត្រដាងមហិច្ឆតាវៀតណាមឈ្លានពានទឹកដីខ្មែរ ។
វិធាននេះក្រោយ លោក ហ៊ុន សែន ធ្វើឱ្យសន្ធិសញ្ញាព្រំដែនខុសច្បាប់ រស់នៅឡើងវិញ នៅឆ្នាំ២០០៥ ការចង់បានរបស់វៀតណាម ដែលក្រុមប្រឆាំងអះអាងថា ធ្វើឱ្យកម្ពុជា បាត់បង់ដែនដីគោកមួយផ្នែកទៀត រួមប្រជុំកោះនិងដែនសមុទ្រ។
ទង្វើនេះ ត្រូវបានគេមើលឃើញថា មេដឹកនាំគ្រួសារ ហ៊ុន បានដើរផ្ទុយទៅនឹងមាត្រា៥២ និងមាត្រា៥៥ នៃរដ្ឋធម្មនុញ្ញ ដែលបានចែងថា សន្ធិសញ្ញា និងកិច្ចព្រមព្រៀងទាំងឡាយណា ដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹតភាព និងឯកភាពជាតិរបស់កម្ពុជា ត្រូវលុបចោល។
រាជរដ្ឋាភិបាលកម្ពុជា ប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការពារឯកភាពជាតិ។
ដោយឡែក ក្រមព្រហ្មទណ្ឌមាត្រា ៤៤០ ចែងថា «អំពើប្រគល់ឱ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត»៕
