TFA Khmer /ដោយ សេក បណ្ឌិត
20-11-2025
មន្ត្រីកម្ពុជា និងថៃ បានចាប់ផ្ដើមបោះបង្គោលព្រំដែនបណ្ដោះអាសន្ន នៅចន្លោះខណ្ឌសីមា លេខ៤២ ដល់ ៤៧ ក្នុងភូមិសាស្ត្រតំបន់ភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ អ្នកឃ្លាំមើលលើកឡើងថា ការឯកភាពបោះបង្គោលព្រំដែនបណ្ដោះអាសន្ននេះ ហាក់មានភាពតក់ក្រហល់ ដែលអាចធ្វើឱ្យកម្ពុជា ខាតបង់ទឹកដីទៅឱ្យប្រទេសថៃ។
កម្ពុជា និងថៃ បានចាប់ផ្ដើមបោះបង្គោលព្រំដែនបណ្ដោះអាសន្នហើយ នៅថ្ងៃទី១៩ ខែវិច្ឆិកា នេះ ដោយមានការបង្ហោះដ្រូន តាមបណ្ដោយខ្សែបន្ទាត់ នៃបង្គោលព្រំដែន លេខ៤២ ដល់លេខ៤៧ ក្នុងតំបន់ភូមិជោគជ័យ និងភូមិព្រៃចាន់ ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាប់ព្រំប្រទល់ភូមិណងចាន់ (Nong Chan) និងភូមិណងយ៉ាកែវ (Nong Ya Kaew) ស្ថិតក្នុងឃុំគោកសូង (Khok Sung) ខេត្តស្រះកែវ (Sa Kaeo) របស់ថៃ ដែលជាតំបន់កំពុងមានភាពចម្រូងចម្រាស ដោយសារយោធាថៃ បានចូលរាយបន្លាលួសព័ទ្ធយកផ្ទះ និងដីចម្ការពលរដ្ឋខ្មែរ។
ទោះជាយ៉ាងណា ការបោះបង្គោលព្រំដែនបណ្ដោះអាសន្ននេះ ធ្វើឡើងក្រោយជំនួបចរចារវាងមន្ត្រីកម្ពុជា និងថៃ នៅក្នុងប្រទេសថៃ កាលពីថ្ងៃទី១៨ ខែវិច្ឆិកា ដើម្បីដោះស្រាយបញ្ហាចំនួនពីរគឺ ការប្រៀបធៀប និងផ្ទៀងផ្ទាត់ទិន្នន័យបច្ចេកទេស មុនពេលធ្វើការស្ទង់មតិរួមគ្នា និងការបោះបង្គោលព្រំដែនបណ្ដោះអាសន្ន ដែលគេអះអាងថា ជាតម្រុយបង្គោលចាស់ ដែលបន្សល់ទុកពីសម័យអាណានិគមបារាំង។
ទោះជាយ៉ាងនេះក្ដី រដ្ឋមន្ត្រីក្រសួងការពារជាតិថៃ លោក ណាត់តាផន ណាក់ផានិច (Nattapon Nakpanich) បានប្រកាសនៅថ្ងៃទី១៩ ខែវិច្ឆិកា ថា នៅពេលដែលការបោះបង្គោលព្រំដែននៅតំបន់ភូមិណងចាន់ ត្រូវបានបញ្ចប់ ពលរដ្ឋខ្មែរជាង ២០០គ្រួសារ ដែលរស់នៅក្រោមខ្សែបន្ទាត់ក្រហម នឹងត្រូវតែចាកចេញពីតំបន់នោះ ដើម្បីការពារអធិបតេយ្យភាព រវាងប្រទេសទាំងពីរ។
លោក ណាត់តាផន បានបញ្ជាក់ថា ការដោះស្រាយបញ្ហាព្រំដែនថៃ-កម្ពុជា កំពុងស្ថិតក្នុងដំណាក់កាលនៃការផ្អាកការអនុវត្តកិច្ចព្រមព្រៀង និងសេចក្ដីប្រកាស ពាក់ព័ន្ធនឹងបញ្ហាសំខាន់ចំនួនពីរ ដែលស្ថិតក្នុងកិច្ចការយោធា រួមមាន ការដោះមីនតាមបណ្ដោយព្រំដែន ដែលលោកអះអាងថា ស្ថិតក្នុងដែនអធិបតេយ្យភាពថៃ និងការគ្រប់គ្រងតំបន់ព្រំដែន ជាពិសេសនៅតំបន់ភូមិណងចាន់ ខណៈទាហានខ្មែរទាំង១៨រូប ដែលយោធាថៃប្រើឧបាយចាប់ខ្លួននោះ ភាគីថៃ មិនទាន់អាចដោះលែងបាននោះឡើយ ដោយសារតែកម្ពុជា មិនទាន់បានបញ្ចប់អរិភាពជាមួយថៃ។
ពាក់ព័ន្ធរឿងនេះ ប្រធាននៃស្ថាប័នអធិបតេយ្យភាពជាតិ ព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន សង្កេតឃើញថា ការបោះបង្គោលព្រំដែនបណ្ដោះអាសន្ន រវាងកម្ពុជា-ថៃ ហាក់ធ្វើឡើងដោយតក់ក្រហល់ ខណៈរដ្ឋាភិបាលកម្ពុជា បានចាញ់ប្រៀបក្រុមយោធាថៃ ក្នុងការការពារបូរណភាពទឹកដីកម្ពុជា។ ក្នុងនោះលោក អ៊ុំ សំអាន មើលឃើញថា បង្គោលព្រំដែនលេខ៥៤ ដែលកម្ពុជា ថៃ គ្រោងនឹងបោះនោះ គឺជាបង្គោលថ្មី ដែលថៃបានបង្កើតឡើង ហើយកត្តានេះ អាចនឹងធ្វើឱ្យកម្ពុជា បាត់បង់ទឹកដីមួយផ្នែក។
លោក អ៊ុំ សំអាន ៖ «ហើយនៅពេលដែលបង្គោល មិនបោះនៅទីតាំងចាស់ នៅពេលបោះបង្គោលរណបហ្នឹង ប្រាកដជាបាត់ដីខ្មែរហើយ នេះជាការព្រួយបារម្ភរបស់យើង។ ដូច្នេះ សូមឱ្យមានការចូលរួមសង្កេតពីគណបក្សប្រឆាំង និងសង្គមស៊ីវិល ដើម្បីឱ្យដឹងថា តំបន់ហ្នឹង បោះបង្គោលបានត្រឹមត្រូវឬក៏អត់។ យើងអាចសាកសួរប្រជាពលរដ្ឋ និងផ្ទៀងផ្ទាត់ជាមួយផែនទី ថាវាបាត់ដីខ្មែរឬក៏អត់»។
ទូរទស្សន៍អាស៊ីសេរី មិនអាចទាក់ទង រដ្ឋមន្ត្រីទទួលបន្ទុក រដ្ឋលេខាធិការដ្ឋានកិច្ចការព្រំដែន លោក ឡាំ ជា ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១៩ ខែវិច្ឆិកា។
ពាក់ព័ន្ធនឹងការបោះបង្គោលព្រំដែននេះដែរ គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ បានចាប់ផ្ដើមចុះបោះបង្គោលបណ្ដោះអាសន្ន នៅកំណាត់ខ្សែព្រំដែន ចន្លោះបង្គោលលេខ៥២ និងលេខ៥៩ នៅក្នុងភូមិសាស្ត្រស្រុកកំរៀង ខេត្តបាត់ដំបង ខាងកម្ពុជា ជាប់នឹងខេត្តចន្ទបុរី (Chanburi) ប្រទេសថៃ បានជាង ៥០ភាគរយហើយ ចាប់តាំងពីថ្ងៃទី៨ រហូតដល់ថ្ងៃទី១៧ ខែវិច្ឆិកា ដោយសម្រេចបានប្រមាណ ៩៤ បង្គោល លើផែនការសរុបចំនួន ១៦៦ បង្គោល៕
