អត្ថបទ The Cambodia Daily
07th-02-2026
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បង្ហាញឯកភាពនឹងនាយករដ្ឋមន្ត្រី ហ៊ុន ម៉ាណែត ដែលស្នើសុំកិច្ចសហប្រតិបត្តិការ និងជំនួយបច្ចេកទេសពីរដ្ឋាភិបាលបារាំង ព្រោះសំណើនេះគឺជាវិធានការដ៏ត្រឹមត្រូវ និងត្រូវចំគោលដៅពិតប្រាកដក្នុងការដោះស្រាយបញ្ហាព្រំដែនជាមួយប្រទេសថៃ ដែលប្រទេសកម្ពុជា ចោទថាកំពុងឈ្លានពានទឹកដីខ្មែរដោយខុសច្បាប់ក្នុងពេលនេះ។
លោក ម៉ែន ណាត សរសេរលើគណនីហ្វេសប៊ុករបស់ខ្លួន នៅថ្ងៃទី៥ ខែកុម្ភៈ នេះថា សំណើសុំកិច្ចសហការនេះ គឺជារឿងដែលប្រទេសកម្ពុជា ត្រូវតែធ្វើចាំបាច់បំផុត ព្រោះប្រទេសបារាំង ធ្លាប់ធ្វើជាអ្នកអាណាព្យាបាលផង ជាអាណានិគមផងលើប្រទេសកម្ពុជា ដែលធ្លាប់បានធ្វើកិច្ចព្រមព្រៀង និងសន្ធិសញ្ញាជាច្រើន ជាមួយប្រទេសជិតខាងជាប់ប្រទេសកម្ពុជា ក្នុងអតីតកាល។
គួរកត់សម្គាល់ថា បារាំងត្រួតខ្មែរជិតមួយសតវត្សរ៍ ពីឆ្នាំ១៨៦៣ ក្រោយពីព្រះបាទ នរោត្តម ដែលទទួលការសិក្សាអប់រំនៅរាជាណាចក្រសៀម ឡើងគ្រងរាជ្យ ហើយស្នើសុំឲ្យបារាំង ជួយការពារជាអ្នកអាណាព្យាបាល ហៅថា Protectorat ពីព្រោះខ្លាចអ្នកជិតខាង លេបត្របាក់យកដីខ្មែរ ទាំងខាងកើត ទាំងខាងលិច។ ក្នុងរយៈកាលនោះ បារាំងក៏ចរចាសម្រេចដោះដូរទឹកដីខេត្តខ្មែរ ជាមួយស្តេចក្រុងសៀម ជំនួសស្តេចខ្មែរដែរ ដែលទាក់ទងនឹងខេត្តបាត់ដំបង ស៊ីសូផុន សៀមរាប ព្រះវិហារ កោះកុង និងខេត្តត្រាត។
លោក ម៉ែន ណាត លើកឡើងថា លោក ហ៊ុន ម៉ាណែត គួរស្នើអ្នកជំនាញបច្ចេកទេសបារាំង ឲ្យជួយផ្ទៀងផ្ទាត់ផែនទីខ្នាត ១/២០០.០០០ ជាមួយខ្សែបន្ទាត់ព្រំដែនកម្ពុជា-ថៃ ដែលមានបង្គោលស្រាប់ចំនួន ៧៣ បង្គោល ឱ្យបានលម្អិតបំផុត រួមទាំងឯកសារសេចក្តីរាយការណ៍ និងកំណត់ហេតុ «និយាមការ» ដែលភាគីទាំងពីរ បានឯកភាពគ្នារហូតមកនោះ។
អ្នកឃ្លាំមើលស្ថានការណ៍កម្ពុជារូបនេះ ផ្តល់យោបល់ឱ្យលោក ហ៊ុន ម៉ាណែត ពឹងពាក់បារាំង ឲ្យជួយធ្វើជាសក្ខីកម្មតាមផ្លូវច្បាប់ នៅពេលដែលប្រទេសកម្ពុជា ប្តឹងប្រទេសថៃ ទៅកាន់តុលាការយុត្តិធម៌អន្តរជាតិ (ICJ) និងតុលាការឧក្រិដ្ឋកម្មអន្តរជាតិ (ICC)។
លោក ម៉ែន ណាត បញ្ជាក់ថា ដើម្បីឲ្យកាន់តែមានទម្ងន់បន្ថែម នាយករដ្ឋមន្ត្រីខ្មែរ ក៏គួរតែស្នើជួបពិភាក្សាការងារ ជាមួយប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ដើម្បីដាក់សម្ពាធឲ្យថៃ ត្រូវតែដកកងទ័ពរបស់ខ្លួន ចេញពីដែនអធិបតេយ្យប្រទេសកម្ពុជា។
ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មាន នៅថ្ងៃទី៥ កុម្ភៈ នេះថា នាយករដ្ឋមន្ត្រីកម្ពុជា លោក ហ៊ុន ម៉ាណែត បានផ្ញើលិខិតមួយច្បាប់ ជូនប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) ដើម្បីឆ្លើយតបទៅនឹងការបង្ហាញឆន្ទៈពីប្រទេសបារាំង ក្នុងការត្រៀមខ្លួនផ្តល់នូវឯកសារប្រវត្តិសាស្ត្រ និងបច្ចេកទេសពាក់ព័ន្ធនឹងព្រំដែនអន្តរជាតិរវាងប្រទេសកម្ពុជា និងប្រទេសថៃ ក្នុងករណីមានសំណើពីប្រទេសកម្ពុជា នោះ។
នាយករដ្ឋមន្ត្រីខ្មែររូបនេះ បញ្ជាក់ថា ប្រទេសកម្ពុជាផ្តល់សារសំខាន់ ចំពោះមុខនាទីបារាំង មិនត្រឹមតែក្នុងនាមជាសមាជិកអចិន្ត្រៃយ៍ នៃក្រុមប្រឹក្សាសន្តិសុខអង្គការសហប្រជាជាតិប៉ុណ្ណោះទេ ប៉ុន្តែថែមទាំងជាអ្នកដឹកនាំគាំទ្រឈានមុខមួយ ចំពោះអភិបាលកិច្ចសកល ច្បាប់អន្តរជាតិ និងពហុភាគីនិយម និងក្នុងនាមជាដៃគូយូរអង្វែង ដែលមានការផ្សារភ្ជាប់ទំនាក់ទំនង តាមរយៈការគោរពគ្នាទៅវិញទៅមក ប្រវត្តិសាស្ត្ររួម និងតម្លៃរួមផងដែរ។
ពាក់ព័ន្ធនឹងបញ្ហានេះ ឯកអគ្គរដ្ឋទូតបារាំងប្រចាំប្រទេសកម្ពុជា លោក Jacques Pellet បានបញ្ជាក់ទៅកាន់ប្រធានព្រឹទ្ធសភាកម្ពុជា លោក ហ៊ុន សែន ក្នុងជំនួបកាលពីថ្ងៃទី១០ ខែកក្កដា ឆ្នាំ២០២៥ ថា បារាំងប្រកាសគាំទ្រជំហរប្រទេសកម្ពុជា ក្នុងការនាំយកបញ្ហាព្រំដែនដ៏រសើប ទៅដោះស្រាយដោយសន្តិវិធី ផ្អែកលើច្បាប់អន្តរជាតិ តាមរយៈយន្តការតុលាការយុត្តិធម៌អន្តរជាតិ។ រដ្ឋាភិបាលបារាំង បានសន្យាផ្ដល់ឯកសារនានា ដល់កម្ពុជា ក្នុងការដាក់ពាក្យបណ្ដឹង នៅតុលាការអន្តរជាតិអន្តរជាតិ ជុំវិញជម្លោះព្រំដែនរវាងកម្ពុជា និងថៃ ផងដែរ៕
អត្ថបទដើមរបស់លោក ម៉ែន ណាត (ថ្ងៃទី០៥ ខែកុម្ភៈ ឆ្នាំ២០២៦) ដូចតទៅ ៖
ក្រសួងការបរទេសកម្ពុជា នៅថ្ងៃទី០៤ កុម្ភៈ ២០២៦ បានឲ្យដឹងថា នាយករដ្ឋមន្ត្រីកម្ពុជា លោក ហ៊ុន ម៉ាណែត ផ្ញើលិខិតទៅប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ដើម្បីសុំកិច្ចសហប្រតិបត្តិការពីបារាំង លើឯកសារព្រំដែនកម្ពុជា-ថៃ និងជំនួយបច្ចេកទេស ខណៈដែលថៃ កំពុងបន្តឈ្លានពានកម្ពុជា។
សូមបញ្ជាក់ថា ប្រទេសបារាំង ធ្លាប់ជាម្ចាស់អាណានិគមរបស់កម្ពុជា ដែលធ្លាប់បានធ្វើកិច្ចព្រមព្រៀង និងសន្ធិសញ្ញាជាច្រើន ជាមួយប្រទេសជិតខាងកម្ពុជា។
យោបល់ ៖ លោក ហ៊ុន ម៉ាណែត សុំកិច្ចសហប្រតិបត្តិការ និងជំនួយបច្ចេកទេសពីបារាំងនេះ ពិតជាត្រឹមត្រូវហើយ គឺត្រូវគោលដៅយ៉ាងពិតប្រាកដ។
ក្នុងកច្ចសហប្រតិបត្តិការជាមួយបារាំងនេះ លោក ហ៊ុន ម៉ាណែត គួរស្នើអ្នកជំនាញបច្ចេកទេសបារាំង ឲ្យជួយផ្ទៀងផ្ទាត់ផែនទី ខ្នាត ១/២០០.០០០ ជាមួយខ្សែបន្ទាត់ព្រំដែនកម្ពុជា-ថៃ ដែលមានបង្គោលរួចហើយ ចំនួន ៧៣ បង្គោល រួមទាំងឯកសាររបាយការណ៍ និង កំណត់ហេតុ «និយាមការ» លំអិតផង។
ជាមួយគ្នានេះ កម្ពុជាគួរពឹងពាក់បារាំង ឲ្យជួយធ្វើជាសក្ខីកម្មក្នុងតុលាការ នៅពេលកម្ពុជា ប្តឹងប្រទេសថៃ ទៅកាន់តុលាការយុត្តិធម៌អន្តរជាតិ ICJ និងតុលាការឧក្រិដ្ឋកម្មអន្តរជាតិ ICC។
ដើម្បីឲ្យមានទម្ងន់បន្ថែម លោក ហ៊ុន ម៉ាណែត គួរតែស្នើជួបពិភាក្សាការងារជាមួយប្រធានាធិបតីបារាំងជាថ្មី ជាពិសេសស្នើអន្តរាគមន៍ពីបារាំង ដើម្បីដាក់សម្ពាធឲ្យថៃ ត្រូវតែដកកងទ័ពរបស់ខ្លួន ចេញពីដែនអធិបតេយ្យរបស់កម្ពុជា។
អត្ថបទដោយ ម៉ែន ណាត
ភ្ជាប់លិខិតរបស់ក្រសួងការបរទេសកម្ពុជា ត្រង់នេះ ៖ ជាភាសាខ្មែរ និង អង់គ្លេស (With full letter in Khmer and English).
