VOD Khmer /ដោយលោក ញឹម សុខន
28-3-2026
លោក ប្រាក់ សុខុន បានទម្លាយថា កម្ពុជាធ្លាប់ប្រាប់ភាគីថៃ ថា កម្ពុជាត្រៀមលក្ខណៈកាត់ដីឱ្យថៃ បើការវាស់វែងដីជាក់ស្តែង ចូលដីខ្មែរបន្តិចបន្តួច ដើម្បីកសាងផ្ទះពលរដ្ឋខ្មែរ តាមព្រំដែនឡើងវិញ តែថាថៃ មិនព្រម បើទោះបីលោកថា កម្ពុជា-ថៃ មានខ្សែបន្ទាត់ព្រំដែនច្បាស់លាស់ បន្សល់ទុកពីជំនាន់បារាំង ក៏ដោយ។
ពីខេត្តពោធិ៍សាត់ កាលពីថ្ងៃទី ២៧ ខែមីនា ឆ្នាំ២០២៦ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ថ្លែងថា កម្ពុជា មិនប្រើជម្រើសខាងផ្នែកយោធា ដើម្បីដោះស្រាយបញ្ហាព្រំដែននោះទេ តែកម្ពុជា បង្ខំចិត្តការពារទឹកដីតាមច្បាប់ ដែលបន្សល់ទុកតាំងពីជំនាន់អាណានិគមនិយមបារាំង តាមរយៈផែនទី អនុញ្ញាបារាំង-សៀម ដែលបានគូសវាយខ្សែបន្ទាត់ព្រំដែនត្រឹមត្រូវ ទទួលស្គាល់ដោយអន្តរជាតិ។
លោកថា កម្ពុជាបានប្រាប់ទៅភាគីសៀម រួចហើយថា នាំគ្នាវាស់វែងទៅ ព្រោះប្រទេសទាំងពីរ មានយន្តការ មានស្ថាប័ន សម្រាប់ធ្វើការវាស់វែងខ្សែបន្ទាត់ព្រំដែន។ ហើយថា កម្ពុជាត្រៀមទទួលយក តាមការវាស់វែងជាក់ស្តែង ទោះចូលដីកម្ពុជាតិចតួចក្តី កម្ពុជាព្រមប្រគល់ឱ្យថៃ តែថា ថៃមិនព្រម ហើយថៃ ពង្រីកការគ្រប់គ្រង់ដីខ្មែរ។
លោកថា៖ «បើវាស់ទៅខាងណារបស់យើង យើងគ្រាន់តែសុំរបស់យើងមកវិញ ខាងណារបស់គេ យើងឱ្យទៅគេទៅ។ ហើយយើងត្រៀមលក្ខណៈ ប្រសិនបើមានចូលអីបន្តិចបន្តួចចឹងទៅ យើងប្រគល់ឱ្យគេ សុខចិត្តយើងរើ និងកសាងផ្ទះសម្បែងបងប្អូនយើង នៅជាប់ព្រំដែនសារជាថ្មីឡើងវិញ។ ប៉ុន្តែនេះអត់ គេប្រើកម្លាំង ចូលមកកាន់កាប់ យកលួសបន្លាមកព័ទ្ធ យកកុងទីន័រមកឃាំង ដោតទង់ជាតិខ្លួនលើដីខ្មែរ វាជារឿងមួយហួសចិត្តដែរ និយាយទៅ»។
តំណាងរាស្ត្រគណបក្សប្រឆាំង លោក អ៊ុំ សំអាន ដែលមានជំនាញកិច្ចការព្រំដែន ហៅការលើកឡើងរបស់លោក ប្រាក់ សុខុន នេះ បញ្ជាក់យ៉ាងច្បាស់ថា ទាំងលោក ហ៊ុន សែន និងលោក ហ៊ុន ម៉ាណែត មិនខ្វល់ពីការបាត់បង់់ទឹកដីទេ តែធ្វើយ៉ាងណា ឱ្យតែការពារអំណាចបាន។
យ៉ាងណាលោកថា តាមក្រមព្រហ្មទណ្ឌ អ្នកដែលធ្វើឱ្យបាត់បង់ទឹកដី ទៅប្រទេសជិតខាង មានទោសក្បត់ជាតិ ត្រូវផ្តន្ទាទោសដាក់ពន្ធនាគារ អស់មួយជីវិត។
បញ្ហានេះលោកថា ជោគវាសនាប្រទេសជាតិ និងទឹកដី មានតែពឹងលើប្រជាពលរដ្ឋខ្មែរទេ ទើបអាចទប់ស្កាត់ សត្រូវឈ្លានពានបាន។
លោកថា ៖ «ជាក់ស្តែងហើយឃើញទេ (រដ្ឋាភិបាល) អត់មានការទប់ស្កាត់ ការរារាំង (ថៃ) ការដាក់ទូកុងទីន័រ ការរាយបន្លាលួស ការជីកប្រឡាយ ដែលថៃ រំលោភយកដីខ្មែរយើង អត់មានការរារាំងទេ។ អីចឹងមានន័យថាត្រកូល ហ៊ុន សុខចិត្តយល់ព្រមជាមួយគេ សុខចិត្តកាត់ទឹកដីខ្មែរយើង ទៅឱ្យថៃ ដើម្បីឱ្យថៃ ជួយរក្សាអំណាចឱ្យត្រកូល ហ៊ុន»។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ហៅការទម្លាយរបស់លោក ប្រាក់ សុខុន នេះ ដូចគ្នាទៅនឹងអ្វីដែលលោក ហ៊ុន សែន ធ្លាប់កាត់ទឹកដីព្រំដែនខាងកើត ឱ្យទៅវៀតណាម ដើម្បីដឹងគុណវៀតណាម នាពេលកន្លងទៅ។
ការណ៍នេះ លោកបារម្ភថា ជាហានិភ័យនៃបូរណភាពទឹកដីរបស់កម្ពុជា ក្រោមការដឹកនាំរបស់គ្រួសារលោក ហ៊ុន សែន ដែលថា បានជាប់ចំណងវៀតណាមច្រើនទសវត្សរ៍មកនេះ។
លោកថា ៖ «បើរដ្ឋាភិបាលលោក ហ៊ុន ម៉ាណែត និងលោក ហ៊ុន សែន រក្សាជំហរបែបនេះមែន យើងបាម្ភថា ការការពារបូរណភាពទឹកដីរបស់ខ្មែរហ្នឹង មើលទៅ ជាហានិភ័យខ្ពស់ណាស់ នៅក្រោមអំណាចគ្រួសាររបស់លោក ហ៊ុន សែន។ ម្លោះហើយ សូមប្រជាពលរដ្ឋខ្មែរទាំងអស់ ទាំងក្នុង និងក្រៅស្រុកហ្នឹង នាំគ្នាដាក់សម្ពាធរដ្ឋាភិបាលនេះឱ្យមែនទែន កុំឱ្យទទួលយកលក្ខខណ្ឌណាមួយរបស់ថៃ ក្នុងការដោះដូរទឹកដីព្រំដែន ដើម្បីទទួលយកសន្តិភាពរបស់ក្រុមគ្រួសារ ហ៊ុន ព្រោះធ្វើឱ្យបាត់បង់បូរណភាពជាតិ ហើយបាត់បង់ទឹកដី ជាអំពើក្បត់ជាតិ បាទ»។
បើតាមអ្នកឃ្លាំមើល បច្ចុប្បន្ននេះ ថៃបានរាយលួសបន្លា ដាក់កុងទីន័រ និងជីកប្រឡាយ ពង្រីកព្រំដែនថ្មី តាមផែនទីដែលថៃ គូសដោយឯកតោភាគី រួមទាំងធ្វើហេដ្ឋារចនាសម្ព័ន្ធ រំលោភយកដីខ្មែរជាង ៥០ ទីតាំង ក្រោយមានបទឈប់បាញ់ ថ្ងៃទី២៧ ខែធ្នូ ឆ្នាំ២០២៥ មក ទាំងគ្មានការរំខានពីក្រសួងការពារជាតិកម្ពុជា។
យ៉ាងនេះក្តី មាត្រា៥២ នៃរដ្ឋធម្មនុញ្ញ ចែងថា «រាជរដ្ឋាភិបាលកម្ពុជា ប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីឯកភាពជាតិ»។
ដោយឡែក ក្រមព្រហ្មទណ្ឌ មាត្រា៤៤០ ចែងថា «អំពើប្រគល់ឱ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត»៕
