អត្ថបទ The Cambodia Daily
28-10-2022
តុលាការកំពូល សម្រេចបដិសេធការស្នើសុំនៅក្រៅឃុំ របស់សកម្មជនគណបក្សភ្លើងទៀនមួយរូប គឺលោក អៀ ចាន់ណា។
ប្រធានក្រុមប្រឹក្សាជំនុំជម្រះនៃតុលាការកំពូល លោក និល ណុន នៅថ្ងៃសុក្រ ទី២៨ ខែតុលា នេះ បានសម្រេចតម្កល់សេចក្ដីសម្រេច របស់តុលាការជាន់ទាប ដែលបានឃុំខ្លួនលោក អៀ ចាន់ណា សកម្មជនបក្សភ្លើងទៀន នៅពន្ធនាគារព្រៃស។
លោក និល ណុន ចាត់ទុកការសម្រេចរបស់ សាលាឧទ្ធរណ៍រាជធានីភ្នំពេញ ដែលមិនអនុញ្ញាតឱ្យលោក អៀ ចាន់ណា នៅក្រៅឃុំបណ្ដោះអាសន្ននោះ ជារឿងត្រឹមត្រូវ។
លោក អៀរ ចាន់ណា ត្រូវបានសមត្ថកិច្ចកម្ពុជា ចាប់ខ្លួនកាលពីថ្ងៃទី៣០ ខែឧសភា ឆ្នាំ២០២២ នៅផ្សារទំនើបអ៊ីអន២ ស្ថិតក្នុងខណ្ឌសែនសុខ រាជធានីភ្នំពេញ បន្ទាប់ពីវិលចូលប្រទេសកម្ពុជា ហើយបានចូលរួមធ្វើយុទ្ធនាការឃោសនាបោះឆ្នោត ជាមួយបក្សភ្លើងទៀន នៅខេត្តតាកែវ កាលពីថ្ងៃទី២៧ ខែឧសភា ឆ្នាំ២០២២។
លោកត្រូវបានសមត្ថកិច្ច បញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស ក្រោមការចោទប្រកាន់ពីបទ «រួមគំនិតក្បត់» ពាក់ព័ន្ធរឿងដំណើរវិលត្រឡប់លើកទីពីរ របស់អ្នកស្រី មូរ សុខហួរ កាលពីដើម ឆ្នាំ២០២១។
នាយកទទួលបន្ទុកកិច្ចការទូទៅនៃ អង្គការការពារសិទ្ធិមនុស្សលីកាដូ លោក អំ សំអាត អះអាងថា បើតាមផ្លូវច្បាប់ គឺមានការអនុញ្ញាតឱ្យនៅក្រៅឃុំបណ្ដោះអាសន្ន ទោះបីជាបទល្មើសឧក្រិដ្ឋ និងបទមជ្ឈិមក៏ដោយ ឱ្យតែមានលក្ខខណ្ឌគ្រប់គ្រាន់ ដែលតុលាការអាចនឹងពិចារណាបាន។ លោកសោកស្ដាយចំពោះលោក អៀ ចាន់ណា ដែលតុលាការមិនអនុញ្ញាតឱ្យលោក បាននៅក្រៅឃុំបណ្ដោះអាសន្ន។
លោក អំ សំអាត កត់សម្គាល់ថា សំណុំរឿងរបស់លោក អៀ ចាន់ណា នេះជារឿងនយោបាយច្រើនជាងការអនុវត្តច្បាប់ ដូច្នេះរឿងពាក់ព័ន្ធនយោបាយ កម្រត្រូវបានតុលាការ អនុញ្ញាតឱ្យនៅក្រៅឃុំបណ្ដោះអាសន្ន បើគ្មានដំណោះស្រាយផ្នែកនយោបាយទេនោះ។
នៅថ្ងៃទី១ ខែមិថុនា ឆ្នាំ២០២២ ប្រធានក្រុមប្រឹក្សាឃ្លាំមើលកម្ពុជា បានចេញថ្លែងការណ៍មួយ ដោយចាត់ទុកការចាប់ឃុំខ្លួនលោក អៀរ ចាន់ណា ថាជាការរំលោភរដ្ឋធម្មនុញ្ញយ៉ាងធ្ងន់ធ្ងរ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ក៏បានអំពាវនាវឱ្យតុលាការ និងរដ្ឋាភិបាលកម្ពុជា ទម្លាក់ចោលបទចោទប្រកាន់នានា ទៅលើសកម្មជននយោបាយ សកម្មជនសង្គម និងបទចោទលើសំណុំរឿងរបស់លោក កឹម សុខា ដើម្បីស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យ នៅកម្ពុជាឡើងវិញ៕
.
CWCI Cambodia 