អត្ថបទដោយចលនានិស្សិត (SMD)
ចលនានិស្សិតខ្មែរ «ចលនានិស្សិតដើម្បីលទ្ធិប្រជាធិបតេយ្យ “Student Movement for Democracy – SMD”» ដែលមានមូលដ្ឋាននៅសហរដ្ឋអាមេរិក បានចេញសេចក្តីបំភ្លឺមួយ ចុះហត្ថលេខាដោយអនុប្រធានប្រតិបត្តិ លោក អ៊ាប សេង នៅថ្ងៃទី០៦ ខែសីហា ឆ្នាំ២០២០ បានច្រានចោលសេចក្តីថ្លែងការណ៍របស់ គណៈកម្មាធិការចម្រុះកិច្ចការព្រំដែន នៃរដ្ឋាភិបាលកម្ពុជា ដឹកនាំដោយលោក វ៉ា គឹមហុង ដែលបានចោទប្រកាន់មិនចំពោះ ទៅលើក្រុមបញ្ញវន្ត សកម្មជន និងក្រុមអ្នកជំនាញព្រំដែនខ្មែរថា «ឧទ្ទាម និងបក្ខពួក» និងការបកស្រាយរបស់ខ្លួន ចងភ្ជាប់ភាពមន្ទិលសង្ស័យជាច្រើន។ សូមទាញយកអត្ថបទ «សេចក្តីបំភ្លឺរបស់ចនានិស្សិត /Download» និងសូមទាញយក «សេចក្តីថ្លែងការណ៍គណៈកម្មាធិការព្រំដែន លោក វ៉ា គឹមហុង /Download»។ ចំណែកខាងក្រោមនេះ ជាសេចក្តីបំភ្លឺរបស់ចលនានិស្សិត៖
សេចក្តីបំភ្លឺ
ជូនគណៈកម្មាធិការចម្រុះកិច្ចការព្រំដែនកម្ពុជានៃរដ្ឋាភិបាលកម្ពុជា
ចលនានិស្សិតដើម្បីលទ្ធិប្រជាធិបតេយ្យ សូមបដិសេធទាំងស្រុង ចំពោះសេចក្តីថ្លែងការណ៍នៃ គណ:កម្មាធិការចម្រុះកិច្ចការព្រំដែនកម្ពុជា លេខពិសេស៥ ចុះថ្ងៃទី៤ ខែសីហា ឆ្នាំ២០២០ ដែលធ្វើការចោទប្រកាន់មិនចំពោះ, គ្មានមូលដ្ឋាន និងមានចរិតគំរាមកំហែង មកលើក្រុមបញ្ញវន្ត សកម្មជនព្រំដែន និងក្រុមអ្នកជំនាញព្រំដែន ដែលជាអ្នកតស៊ូមតិដើម្បីការពារអធិបតេយ្យ និងបូរណភាពទឹកដី ស្របតាមរដ្ឋធម្មនុញ្ញកម្ពុជា និងតាមគោលការណ៍ច្បាប់ជាតិ-អន្តរជាតិជាមូលដ្ឋាន។
ដើម្បីជៀសវាងការភាន់ច្រឡំពីមតិសាធារណៈ លើការខ្វែងគំនិតគ្នា ក្នុងការការពារអធិបតេយ្យ បូរណភាពទឹកដី និងដើម្បីលើកកំពស់ស្មារតីឯកភាពជាតិខ្មែរ ចលនានិស្សិតដើម្បីលទ្ធិប្រជាធិបតេយ្យ សូមធ្វើការបំភ្លឺជូន គណៈកម្មាធិការចម្រុះកិច្ចការព្រំដែនកម្ពុជា ដូចតទៅ៖
១- ចលនានិស្សិតដើម្បីលទ្ធិប្រជាធិបតេយ្យ មិនមែនជា «ក្រុមឧទ្ទាម និងគូកន» ដូចការចោទប្រកាន់នៅក្នុងសេចក្តីថ្លែងការណ៍ររស់គណៈកម្មាធិការចម្រុះកិច្ចការព្រំដែនកម្ពុជា នោះទេ។
យើងខ្ញុំជាក្រុមបញ្ញវន្តខ្មែរ ដែលតែងតែយកចិត្តទុកដាក់អំពីបញ្ហាព្រំដែនជាតិខ្មែរ និងធ្វើពលិកម្មដើម្បីរួមចំណែកការពារទឹកដីខ្មែរ ក្នុងកាតព្វកិច្ចជាពលរដ្ឋល្អ របស់ជាតិកម្ពុជា។ យើងខ្ញុំធ្វើការងារព្រំដែន តាមគោលការណ៍ច្បាប់យ៉ាងខ្ជាប់ខ្ជួន ដោយជម្រុញឲ្យភាគីពាក់ព័ន្ធ ទាំងអាជ្ញាធររដ្ឋាភិបាលកម្ពុជា និងទាំងប្រទេសជិតខាង ឲ្យគោរពច្បាប់អន្តរជាតិ ក្នុងការដោះស្រាយ បញ្ហាព្រំដែន ដូចជាអនុសញ្ញាអង្គការសហប្រជាជាតិ ស្ដីពីច្បាប់សមុទ្រ ឆ្នាំ១៩៨២ (UNCLOS1982), កិច្ចព្រមព្រៀងសន្តិភាពទីក្រុងប៉ារីស៍ ថ្ងៃទី២៣ ខែតុលា ឆ្នាំ១៩៩១, និងផែនទីរបស់កម្ពុជា ដែលតម្កល់នៅអង្គការសហប្រជាជាតិ ជាដើម។ ទាំងនេះគឺជាកិច្ចការស្របតាមគោលការណ៍ច្បាប់ជាតិ-អន្តរជាតិ មិនមែនជាសកម្មភាពបែបឧទ្ទាម ទេ។
២- ការបម្លែងមាត្រដ្ឋានផែនទី ខ្នាត ១/២៥.០០០ ធ្វើឡើងស្ងាត់ៗ ជាមួយវៀតណាម ដោយគ្រាន់តែប្រើពាក្យថា «ដូចមាននៅលើផែនទីបោន (Bonne) ខ្នាត ១/១០០.០០០» គឺនាំមកនូវភាពមន្ទិលសង្ស័យ អំពីសុក្រឹតភាពនៃការបម្លែងមាត្រដ្ឋានផែនទី និងសមភាពរបស់កម្ពុជានៅក្រោមឥទ្ធិពលវៀតណាម។ បើសិនរដ្ឋាភិបាលកម្ពុជា ពិតជាធ្វើកិច្ចការបម្លែងផែនទីនេះ បានត្រឹមត្រូវមែននោះ រដ្ឋាភិបាលពុំមានហេតុផលអ្វី ត្រូវលាក់បាំងឡើយ។ ដោយសារការបម្លែងខ្នាតផែនទី ធ្វើឡើងដោយស្ងាត់ៗបែបនេះ នាំឲ្យយើងខ្ញុំ និងសារណៈមតិ មានចម្ងល់ថា៖
ផែនទី ខ្នាត ១/២៥.០០០ ថ្មីទាំងនោះ បម្លែងពីមាត្រដ្ឋានផែនទីបោន ១/១០០.០០០ តើធ្វើបានប៉ុន្មានផ្ទាំង? តើផែនទី បោន ខ្នាត ១/១០០.០០០ គំរូដើមទាំងនោះ ជាផែនទីពិត បោះពុម្ពដោយក្រុមភូមិសាស្ត្រឥណ្ធូចិនមែនឬទេ? ហើយជាផែនទី ដែលមានតម្កល់ទុកនៅអង្គការសហប្រជាជាតិឬយ៉ាងណា?
ជាក់ស្តែង ការបម្លែងផែនទី បានធ្វើឡើងដោយស្ងាត់ៗ ហើយ«គោលការណ៍ដោះដូរដី មួយស្មើមួយ» ក៏ធ្វើឡើងដោយស្ងាត់ៗដែរ។ រាល់ពេលដែលរដ្ឋាភិបាលកម្ពុជា និយាយអំពីការដោះដូរដីភូមិជាមួយវៀតណាម ប្រជាពលរដ្ឋខ្មែរនៅតាមព្រំដែន ស្រែកយំជាហូរហែរពីការបាត់ដីស្រែចំការរបស់ពួកគាត់ ដោយសារតែការទន្ទ្រានឈ្លានពានយក ពីសំណាក់ប្រទេសវៀតណាម។ អ្វីដែលគួរឲ្យកត់សម្គាល់នោះ រដ្ឋាភិបាលកម្ពុជា ក៏មិនបានធ្វើរបាយការណ៍ត្រឹមត្រូវ ប្រាប់ទៅប្រជាពលរដ្ឋខ្មែរជាសាធារណៈ អំពីការដោះដូរភូមិ និងដីស្រែចំការ ដែលទទួលបាន និងបាត់បង់ ពី«គោលការណ៍ដោះដូរ មួយស្មើមួយ» ទ្បើយ។ ដូច្នេះ រដ្ឋាភិបាល កម្ពុជា ត្រូវធ្វើរបាយការណ៍ឲ្យបានលម្អិត ពីចំនួនភូមិខ្មែរ និងភូមិវៀតណាម ដែលប្រទេសទាំងពីរ បានដោះដូរគ្នាកន្លងមក។
ដើម្បីជម្រះមន្ទិលសង្ស័យនានា រដ្ឋាភិបាលកម្ពុជា ត្រូវបង្ហាញនូវផែនទី ខ្នាត ១/២៥.០០០ ដែលបម្លែងថ្មីទាំងអស់ និង ផែនទីបោន ខ្នាត ១/១០០.០០០ ដែលជាគំរូដើម ជាសាធារណៈ។ ជាមួយគ្នានេះ ត្រូវអញ្ជើញអ្នកជំនាញផែនទី របស់អង្គការសហប្រជាជាតិ និងភាគីពាក់ព័ន្ធ រួមទាំងប្រទេសបារាំង ដែលជាម្ចាស់គំនូសផែនទីដើម របស់ប្រទេសកម្ពុជា ដើម្បីបញ្ជាក់អំពី សុក្រឹតភាពនៃការបម្លែងមាត្រដ្ឋានផែនទី។
៣- គណៈកម្មាធិការចម្រុះកិច្ចការព្រំដែនកម្ពុជា បានប្រើពាក្យ «ដេញថ្លៃជាអន្តរជាតិ» ក្នុងការបោះពុម្ពផែនទី។ ការអះអាង របស់គណៈកម្មាធិការនេះ មានកំហុស ២យ៉ាង ក្នុងបំណងបំភាន់ពលរដ្ឋខ្មែរ៖ ទី១. រដ្ឋាភិបាល គ្រាន់តែនិយាយអំពីការ«ដេញថ្លៃ ជាអន្តរជាតិ» ប៉ុន្តែពលរដ្ឋខ្មែរ មិនបានដឹង ហើយមិនឃើញមានបណ្ដាញសារពត៌មានក្នុងស្រុក និងអន្តរជាតិណាមួយ ចុះផ្សាយអំពីការដេញថ្លៃនេះទេ។ ទី២. ទោះបីក្រុមហ៊ុនដែលដេញថ្លៃទទួលបានអាជ្ញាប័ណ្ណបោះពុម្ពផែនទី គឺមានសិទ្ធិត្រឹមតែបោះពុម្ព តាមការណែនាំរបស់ភាគីវៀតណាម និងកម្ពុជាប៉ុណ្ណោះ ដោយពុំមានសិទ្ធិវែកញែកផ្ទៀងផ្ទាត់ ថាតើផែនទីបោះពុម្ពថ្មីនោះ ត្រឹមត្រូវតាមគំរូដើមនៃផែនទី ខ្នាតបោន ឬខ្នាត យូធីអឹម (UTM) ឡើយ។
៤- រដ្ឋាភិបាលកម្ពុជា បានអះអាងថា «ផែនទីឋានលេខាព្រំដែន ខ្នាត ១/២៥.០០០ ជាផែនទីបង្ហាញពីលទ្ធផលប្រមាណជា ៨៤% ដែលកម្ពុជា និងវៀតណាម សម្រេចបានលើការងារព្រំដែន»។ ការអះអាងនេះ ជាក់ស្តែងណាស់ថា រដ្ឋាភិបាលកម្ពុជាបច្ចុប្បន្ន បន្តគប់គិតជាមួយវៀតណាម គូសផែនទីថ្មី ខ្នាត ១/២៥.០០០ ដើម្បីតម្រូវទៅតាមការបោះបង្គោលព្រំដែន បានចំនួន ៨៤% រួចហើយ។ ដោយសារការគប់គិតនេះហើយ បានធ្វើឲ្យប្រជាពលរដ្ឋខ្មែរនៅតាមព្រំដែនគ្រប់តំបន់ រងការឈឺចាប់ពីការបាត់បង់ដីស្រែចំការរបស់ពួកគាត់ ទៅក្រោមការគ្រប់គ្រងរបស់វៀតណាម។
ទង្វើរបស់រដ្ឋាភិបាលកម្ពុជាខាងលើនេះ គឺជាការធ្វើសម្បទានម្តងហើយម្តងទៀត ឲ្យទៅវៀតណាម ដែលមិនអាចប្រកែកបានទ្បើយ ជាពិសេសការចុះហត្ថលេខាទទួលស្គាល់ផែនទីថ្មី ខ្នាត ១/២៥.០០០ កាលពីថ្ងៃទី០១ ខែសីហា ឆ្នាំ២០២០ ឲ្យត្រូវនឹងលទ្ធផលនៃការបោះបង្គោលព្រំដែនរួចហើយ។
រដ្ឋធានីវ៉ាស៊ីនតុន ថ្ងៃទី០៦ ខែសីហា ឆ្នាំ២០២០
ជ.គណៈកម្មាធិការប្រតិបត្តិ
អនុប្រធាន
(ហត្ថលេខា)
អ៊ាប សេង
បណ្តុំឯកសារសំខាន់ៗ ៖
- – សន្ធិសញ្ញាព្រំដែនបំពេញបន្ថែម ឆ្នាំ ២០១៩ សូមទាញយកខ្លឹមសារទាំងស្រុង (ទាញយក / Download)។ អត្ថបទនេះវិញ គឺព្រះរាជក្រឹត្យព្រះមហាក្សត្រ លើសន្ធិសញ្ញានេះ (Download)។
- – សន្ធិសញ្ញាព្រំដែនបំពេញបន្ថែម ឆ្នាំ ២០០៥ លើសន្ធិសញ្ញាកំណត់ព្រំដែនរដ្ឋ ឆ្នាំ១៩៨៥ (សូមទាញយក Download)
- – សន្ធិសញ្ញាកំណត់ព្រំដែនរដ្ឋ រវាងកម្ពុជា និងវៀតណាម ឆ្នាំ ១៩៨៥ ភ្ជាប់ជាមួយបញ្ជីស្ថិតិ ផែនទីព្រំដែន ឆ្នាំ ១៩៨៥ (ច្បាប់ដើម) Download
- – សន្ធិសញ្ញាកំណត់ព្រំដែនរដ្ឋ រវាងកម្ពុជា និងវៀតណាម ឆ្នាំ ១៩៨៥ (សូមទាញយក Download)
- – កិច្ចព្រមព្រៀង ស្តីពីលក្ខន្តិកៈព្រំដែនគោក ថ្ងៃទី ២០ កក្កដា ១៩៨៣ Download
- – កំណត់ហេតុប្រជុំ ជាឯកសារសម្ងាត់ ឆ្នាំ ២០០៧ ស្តីពីការបោះបង្គោលព្រំដែន កម្ពុជា-វៀតណាម Download
- – សារាចរណែនាំ ថ្ងៃទី ២៦ កុម្ភៈ ឆ្នាំ១៩៨៦ ដោយលោក ហ៊ុន សែន បានផ្តល់សិទ្ធិ និងការពារពលរដ្ឋវៀតណាម នៅកម្ពុជា – សូមទាញយក (Download)
- – លិខិតលោក ប្រេវីយេ (Brévié) អំពីកោះត្រល់ ថ្ងៃ ៣១ មករា ១៩៣៩ (សូមទាញយក ជាអង់គ្លេស – English និង បារាំង – French ហើយនិងបកប្រែក្រៅផ្លូវការជា ភាសាខ្មែរ – Khmer)
- – កិច្ចព្រមព្រៀងតំបន់ទឹកប្រវត្តិសាស្រ្ត ថ្ងៃ ៧ កក្កដា ១៩៨២ រវាងលោក ហ៊ុន សែន និងលោក ង្វៀង កូថាច់ (សូមទាញយក «ច្បាប់ដើម» Download ឬទាញយក «ចម្លង» Download)
- – សន្ធិសញ្ញា មិត្តភាព និងសហប្រតិបត្តិការ កម្ពុជា-វៀតណាម ១៩៧៩ Download
- – កិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ Download
- – ច្បាប់អន្តោប្រវេសន៍ ឆ្នាំ១៩៩៤ Download
- – ច្បាប់ស្តីពីសញ្ជាតិខ្មែរ ឆ្នាំ១៩៩៦ Download
- – ព្រះរាជសារសម្តេច រោត្តម សីហនុ ថ្ងៃទី ១៦ តុលា ២០០៤ អំពី កម្ពុជាក្រោម និង កោះត្រល់។ (សូមទាញយក ព្រះរាជសារ – Download)។
- – ព្រះរាជសារសម្តេច នរោត្តម សីហនុ ថ្ងៃ ១៧ កក្កដា ២០០៣ ថាជនជាតិវៀតណាម រាប់លាននាក់ រស់នៅកម្ពុជា (Download)
- លិខិតលោក ហ៊ុន សែន ទូលថ្វាយព្រះមហាក្សត្រ នរោត្តម សីហនុ ថ្ងៃទី ៣១ កក្កដា ឆ្នាំ ២០០០ (សូមទាញយក Download)
- អនុសញ្ញា UN ស្តីពីច្បាប់សមុទ្រ UNCLOS-1982 (សូមទាញយក «ភាសាអង់គ្លេស» Download ឬទាញយក «ភាសាខ្មែរ» Download)។
.
