Tag Archives: Cambodia

របបថ្មី ហ៊ុន សែន នៅ​តែ​ជា​របប​ក្បាល​ធំ​ជាងខ្លួន ​ធ្វើ​ឲ្យ​ខាត​ថវិកា​ជាតិ​​កាន់​តែ​ច្រើន

41299987_1811527972276631_1525099018013638656_n

(RFA Khmer / ដោយ ទីន ហ្សាការីយ៉ា / 07-9-2018)
រដ្ឋសភា​ឯក​បក្ស ​បោះ​ឆ្នោត​ជា​កញ្ចប់​ ជ្រើស​ក្បាល​ម៉ាស៊ីន​រដ្ឋាភិបាល ​អាណត្តិ​ទី៦ ដែល​គេ​មើល​ឃើញ​ថា ក្បាល​ម៉ាស៊ីន​ដឹកនាំរបស់ លោក ហ៊ុន សែន នេះ ហាក់​គ្មាន​ការ​ផ្លាស់ប្ដូរ​អ្វី​ទេ លើស​ពី​នេះ​របប​នេះ បាន​បន្ថែម​តួនាទី​ឲ្យ​គណបក្ស​មិន​ជាប់​ឆ្នោត ​កាន់​តែ​ច្រើន​ថែម​ទៀត ដែល​ជា​ការ​ចំណាយ​ថវិកា​ជាតិ​ កាន់​តែ​ច្រើន។

នៅទន្ទឹមនឹងនេះ គណបក្ស​សង្រ្គោះ​ជាតិ បាន​ចេញ​សេចក្ដី​ថ្លែងការណ៍ ​មិន​ទទួល​ស្គាល់​របប​ឯកបក្ស​នេះ​ភ្លាមៗ ហើយ​ថា​របប​នេះ នឹង​រង​ទណ្ឌកម្ម​សេដ្ឋកិច្ច​ពី​សហគមន៍​អន្តរជាតិ​ កាន់​តែ​ខ្លាំង​ថែម​ទៀត ​នៅពេលខាងមុខ។

អ្នកអ្នកវិភាគ​នយោបាយ​លើក​ឡើង​ថា ការ​បង្កើត​របប​ថ្មី​របស់​លោក ហ៊ុន សែន កាល​ពី​ថ្ងៃ​ទី៦ កញ្ញា​នោះ គ្មានអ្វីផ្លាស់ប្ដូរឡើយ ហើយ​ក្បាល​ម៉ាស៊ីន​ដឹក​នាំ​រដ្ឋាភិបាល ​បាន​បង្កើន​សមាជិក​កាន់​តែ​ច្រើន ឬ​ហៅ​ថា រដ្ឋាភិបាល​ក្បាល​ធំ។

អ្នក​វិភាគ​នយោបាយ លោក បណ្ឌិត ឡៅ ម៉ុងហៃ មាន​ប្រសាសន៍​ថា របប​ថ្មី​អាណត្តិ​ទី៦ នេះ ពុំ​មាន​ការ​ផ្លាស់ប្ដូរ​អ្វី​ទេ គឺ​រដ្ឋមន្រ្តី​ឲ្យ​ដឹក​នាំ​តាម​ស្ថាប័ន​ក្រសួង​នីមួយៗ គឺ​នៅ​ដដែល៖ «របប​ហ្នឹង​ទៅ​ជា​របប​ផ្ដាច់ការ​ហើយ អត់​មាន​អី​ថា​ប្រជាធិបតេយ្យ និង​គោរព​សិទ្ធិ​មនុស្ស​ទៅ​កើត​ទេ»

សភា ​បាន​រៀបចំ​បោះ​ឆ្នោត​ជា​កញ្ចប់​ រៀបចំ​ប្រធាន អនុប្រធាន គណៈកម្មការ​ទាំង​នៃ​រដ្ឋសភា និង បោះ​ឆ្នោត​ជ្រើសរើស​ក្បាលម៉ាស៊ីនរដ្ឋាភិបាល ហាក់​ពុំ​មាន​ផ្លាស់ប្ដូរ​អ្វី​ពី​អាណត្តិទី៥ ឡើយ នេះ​បើ​យោង​តាម​លិខិត​បង្កើតរដ្ឋាភិបាលថ្មីនេះ គ្រាន់​តែ មាន​បញ្ជីថ្មី មនុស្ស​ចាស់​ដដែល ពោល​គឺ រដ្ឋមន្រ្តី​ដឹក​នាំ​តាម​ស្ថាប័ន​ក្រសួង​នីមួយៗ ជា​មនុស្ស​ចាស់​ដដែល។ លើស​ពី​នេះ​ទៀត រដ្ឋាភិបាល ​នៅ​តែ​ជា​រដ្ឋាភិបាល​ក្បាល​ធំ​ដែល​មាន​ថ្នាក់​ដឹក​នាំ​ជាង ៧៤០ នាក់ ក្នុង​នោះ មាន​ឧបនាយករដ្ឋមន្រ្តី ១០ រូប ទេសរដ្ឋ​មន្រ្តី ១៧ រូប រដ្ឋមន្រ្តី ២៩ នាក់ រដ្ឋលេខាធិការ​ចំនួន ២៤១ នាក់ អនុរដ្ឋលេខាធិការ ៣៩១ នាក់ និង​ប្រធាន អនុប្រធាន​គណបក្ស​ដែល​មិន​ជាប់​ឆ្នោត​ចំនួន ១៥ គណបក្ស​ ស្មើ​ចំនួន ៣០ នាក់​មាន​ឋានៈ​ស្មើ​ទេសរដ្ឋមន្រ្តី និង​រដ្ឋមន្រ្តី​ផ្សេង​ទៀត។ បញ្ហា​នេះ អ្នក​វិភាគ​លើក​ឡើង​ថា របប​ថ្មី​នេះ​ នឹង​ពុំ​មាន​អ្វីកែ​ប្រែ​ទៅ​លើ​របៀប​ដឹក​នាំ​ឡើយ។

អ្នកជំនាញខាងវិទ្យាសាស្រ្តនយោបាយ លោក ឯម សុវណ្ណរា មានប្រសាសន៍ថា ការ​តំឡើង​តួនាទី ប្រធាន អនុប្រធាន​គណបក្ស​ជា​ទីប្រឹក្សា ដែល​មាន​ឋានៈ​ស្មើ​ទេស​រដ្ឋមន្រ្តី រដ្ឋមន្រ្តីនេះ គឺ​កាន់​តែ​ធ្វើ​ឲ្យ​របប​លោក ហ៊ុន សែន មាន​ក្បាល​កាន់​តែ​ធំ ហើយ​ចំណាយ​ថវិកា​ជាតិ​កាន់​តែ​ច្រើន ទៅ​លើ​ការ​ផ្ដល់​តួនាទី​ដែល​មិន​ចាំបាច់​ទាំង​នេះ ទៅ​ឲ្យ​គណបក្ស​ដែល​មិន​ជាប់​ឆ្នោត​នោះ។ លោក​បន្ថែម​ថា អ្វី​ដែល​ជា​បំណង​សំខាន់ ដែល​លោក ហ៊ុន សែន សម្រេច​ធ្វើ​ដូច្នេះ គឺ​ដើម្បី​ទាញ​ការ​ចាប់​អារម្មណ៍ និង​គាំទ្រ​ពី​សហគមន៍​អន្តរជាតិ​ថា របប​ដឹក​នាំ​ដឹក​ថ្មី​មាន​ពហុ​សំឡេង និង​ដើម្បី​បិទ​មាត់​មេ​បក្ស​ទាំង​នោះ​កុំ​ឲ្យ​រិះគន់​ប្រព័ន្ធ​ដឹក​នាំ​របស់​លោក។ តែទោះជាយ៉ាងនេះក្ដី សហគមន៍​អន្តរជាតិ​នៅ​តែ​ដឹង​ថា របប​ថ្មី​នេះ ជា​របប​ដឹកនាំដោយឯកបក្សដដែល៖ «បូកនឹងរដ្ឋលេខាធិការ អនុរដ្ឋលេខាធិការទៀត វា​កាន់​តែ​ច្រើន បូក​នឹង​ប្រធាន អនុប្រធាន៣២នាក់ទៀត កាន់តែច្រើនទៀត ខណៈរដ្ឋមន្រ្តី ទេសរដ្ឋមន្រ្តី​ប្រាក់ខែ​គួរសម ហើយ​ទេសរដ្ឋមន្រ្តី រដ្ឋមន្រ្តី​ក៏​ប្រាក់ខែ​គួរសម​ដែរ ហើយ​នៅ​តែ​គ្មាន​តម្លៃ​ដែរ​ព្រោះ​អន្តរជាតិ​គេ​មិន​ទទួល​ស្គាល់​គណបក្ស​ទាំង១៦​នេះ​ទេ គឺ​នៅ​តែ​ទទួល​ស្គាល់​បក្ស​ប្រឆាំង ដូចជា​ជំហរ​របស់​ប្រទេស​ជប៉ុន​ក៏​គិត​ដូច​គ្នា​នេះ​ដែរ»

នៅ​ទន្ទឹម​នឹង​ការ​បង្កើត​រដ្ឋាភិបាល​ថ្មី​នេះ លោក ហ៊ុន សែន បាន​បញ្ចេញ​កាយវិការ​ខឹង​សម្បារ មិន​ពេញ​ចិត្ត​ជាង​ធ្វើតុវេទិកា​កិត្តិយស​សម្រាប់​នាយករដ្ឋមន្រ្តី ដែល​លោក​បាន​ឈរ​ថ្លែង​សុន្ទរកថា ជា​លើក​ដំបូង​នៅ​ក្នុង​រដ្ឋសភា ក្រោយ​ពី​អង្គ​សភា​បោះ​ឆ្នោត​ទុក​ចិត្ត​លើ​ការ​បង្កើត​ក្បាល​ម៉ាស៊ីន​ដឹកនាំ​រដ្ឋាភិបាល​ថ្មី កាលថ្ងៃទី៦កញ្ញានេះ។

ក្រោយពីបានថ្លែងសន្ទរកថា បានប្រមាណពី ៤ ទៅ ៥ នាទី លោក ហ៊ុន សែន មិន​ទុក​មុខ​ឲ្យ​ថ្នាក់​ដឹក​នាំ​សភា​ ដែល​ជា​ស្ថាប័ន​នីតិបញ្ញត្តិ​កំពូល​ លោក ហេង សំរិន ដែល​មានវ័យចំណាស់ជាងលោក​ឡើយ។ លោក ហ៊ុន សែន បានប្រើសម្ដីមិន​សមរម្យ​ភ្លាមៗ សម្ដែង​ការ​មិន​ពេញ​ចិត្ត​ថា តុ​នេះ​ទាប​ពេក​លោក​ពិបាក​អាន​សុន្ទរកថា ហើយ​ស្ដី​បន្ទោស​ជាង​ធ្វើ​តុ​វេទិកា​កិត្តិយ​នេះ ទោះ​ជា​នៅ​ក្នុង​ពិធី​ផ្លូវ​ការ​នៃ​ថ្ងៃ​បង្កើត​របប​ថ្មី ដែល​សមាជិក​បក្ស និង​សមាជិក​សភា​របស់​លោក ​កំពុង​តែ​អង្គុយ​ត្រងត្រាប់​ស្ដាប់ និងអបរអរសាទរនោះក្តី។ លោក ហ៊ុន សែន បានផ្លាស់ប្ដូរតុវេទិកាកិត្តយសនេះភ្លាមៗ ដើម្បី​អានសុន្ទរកថា បន្តហើយស្ដីឲ្យជាងធ្វើតុនេះថា ជាមនុស្សអត់កំណើតជា​ដើម៖ «ខ្ញុំ​មុន​នឹង​បន្ត​គ្រាន់​តែ​ជំរាប​ជួន​ថា កាលពីអាណត្តិមុនគ្រាន់បើបន្ដិច ខ្ញុំ​គ្រាន់​បើបន្តិច តែបើបងងួងញិលមកវិញគឺឈរមិនកើតទេ គាត់ខ្ពស់ ខ្ញុំចង់និយាយជាធ្វើតុនេះ ធ្វើយូរៗកាន់តែឡប់ ធ្វើយូរបទពិសោធន៍យូរកាន់តែបើមិនកើត អាជាងនោះ​វា​អត់​កំណើត ខ្ញុំ​ដូរ​ទៅ​អា​នោះ​វិញ​បាន​អត់

លោក ហ៊ុន សែន នេះ​មិនមែន​ជា​លើក​ទី១ ទេ កន្លង​មក​លោក​តែងតែ​ព្រមាន និង​ជេរ​ស្ដី​ឲ្យ​ក្រុម​អ្នក​រិះគន់​លោក​ជា​ហូរហែ​មក ដូចជា ពាក្យ​អា​ល្ងង់​ទូ ឆ្កូត​លីលា និង​អាគុក​ជា​ដើម។

អគ្គលេខាធិការរដ្ឋសភា លោក ឡេង ប៉េងឡុង ឲ្យ​ដឹង​ថា ជាង​ធ្វើ​តុ​វេទិកា​កិត្តិយស​នេះ​ខុស​បច្ចេកទេស​ដោយ​មិន​បាន​វាស់វែង​កំពស់​លោក ហ៊ុន សែន ជា​មុន ដែល​ធ្វើ​ឲ្យ​តុ​វេទិកា​កិត្តិយស​នេះ ទាប​ជាង​កំពស់​លោក ហ៊ុន សែន ដែល​ពិបាក​ឈរ​អាន​សុន្ទករថា។ លោក​បញ្ជាក់​ថា អគ្គលេខាធិការដ្ឋាន​រដ្ឋសភា​នឹង​ផ្លាស់​ប្ដូរ​តុ​នេះ​ថ្មី​វិញ ក៏​ប៉ុន្តែ​លោក ឡេង ប៉េងឡុង មិនបាន​បញ្ជាក់​អំពី​តម្លៃ​ធ្វើ​តុ​នេះ ចំណាយ​ថវិកា​អស់​ប៉ុន្មាន​នោះ​ឡើយ៖ «អូ​ខ្ញុំ​មិន​ដឹង​ថា​អស់​ប៉ុន្មាន​ទេ ​គឺ​ខាង​ហិរញ្ញវត្ថុ​ជា​អ្នក​ធ្វើ ហើយ​យើង​នឹង​សហការ​ជាមួយ​ជាង​ខាង​ទីស្ដីការ​ដែល​ធ្វើ​ញឹកញាប់ និង​ធ្វើ​ថ្មី​វិញ តុ​នេះ​ទាប​ពេក​សម្ដេច​លោក​ឈរ​មិន​កើត​ទាប​ពេក»

អគ្គលេខាធិការដ្ឋាន​សភា ត្រូវ​បាន​បក្ស​ប្រឆាំង​ចោទ​កន្លង​មក​ថា មាន​បក្ស​និយម និង​ជា​ទីកន្លែង​ប្រព្រឹត្តិ​អំពើ​ពុក​រលួយ​ធ្ងន់ធ្ងរ​ទៅ​លើ​ការ​ចំណាយ​ទិញ​សម្ភារៈ​ប្រើប្រាស់​នៅ​ក្នុង​សភា​នោះ។ គេ​នៅ​ចាំ​បាន​ថា អគ្គលេខាធិការដ្ឋាន​សភា បាន​ចំណាយ​លុយ​របស់​រដ្ឋភា​ចំនួន​ជាង ៣ម៉ឺន​ដុល្លារ លើ​ការ​សាងសង់​ដង​ទង់ជាតិ​ នៅ​ខាង​មុខ​អគារ​រដ្ឋសភា។

ចំពោះ​ការ​បញ្ចេញ​កាយវិការ លោក ហ៊ុន សែន ខឹង​សម្បារ​ជាង​ធ្វើ​តុ​កិត្តិយស​នាយករដ្ឋមន្រ្តី​នោះ អ្នក​វិភាគ​នយោបាយ បណ្ឌិត ឡៅ ម៉ុងហៃ មាន​ប្រសាសន៍​ថា លោក ហ៊ុន សែន កំពុងតែបង្ហាញ​ឥទ្ធិពល​របស់​លោក កាន់​តែ​ខ្លាំង​ថែម​ទៀត ក្នុង​ឋានៈ​លោក​ជា​នាយករដ្ឋមន្រ្តី​ដឹក​នាំ​អាណត្តិ​ថ្មី ដូចជា ករណី​លោក​ឈរ​អាន​សន្ទរកថា ក្នុង​រយៈ​ពេល​ខ្លី​នៅ​ក្នុង​ការ​បើក​សម័យ​ប្រជុំ​សភា​បង្កើត​រដ្ឋាភិបាល​ថ្មី ដែល​ជា​ពិធី​ផ្លូវការ​នោះ គឺ​លោក​មិន​អាច​អត់ធ្មត់​ជា​ដើម៖ «គាត់​មាន​ប្រតិកម្ម​ខ្លាំង​ហ្នឹង មាន​ដល់​ប្រើ​ពាក្យ​អសុរស​មុខ​គេ​មុខ​ឯង ហើយ​ជា​កម្មវិធី​ផ្លូវការ​ណា គាត់​កាន់​តែ​ប្រើ​អំណាច​ផ្ដាច់ការ​ហើយ»

នៅ​ទន្ទឹម​នឹង​នេះ គណបក្ស សង្រ្គោះ​ជាតិ បាន​ចេញ​សេចក្ដី​ថ្លែងការណ៍​មិន​ទទួល​ស្គាល់​សភា និង​រដ្ឋាភិបាល ដែល​បាន​កើត​ចេញ​ពី​ការ​បោះ​ឆ្នោត​ក្លែងក្លាយ ដែលបានបង្កើតឡើងកាលពីថ្ងៃទី៥ និង​ថ្ងៃ​ទី៦ កញ្ញា​ទេ ព្រោះ​ថា សភា​ឯកបក្ស មិន​ឆ្លុះ​បញ្ចាំង​ពី​ឆន្ទៈ​របស់​ពលរដ្ឋ​ខ្មែរ​ឡើយ ហើយ​ក៏​ពុំ​អាច​ធ្វើ​ជា​តំណាង​ឲ្យ​ពលរដ្ឋ​ខ្មែរ​ទាំង​មូល​បាន​ដែរ ព្រោះ​ឆន្ទៈ​ខ្មែរ​ប្រមាណ​ពាក់​កណ្ដាល​ប្រទេស ត្រូវ​បាន​បិទ​មាត់ និង​មិន​អាច​បង្ហាញ​នៅ​ក្នុង​ការ​បោះ​ឆ្នោត​ជ្រើស​តាំង​តំណាង​រាស្រ្ត​កាល​ពី​ថ្ងៃ​ទី២៩ កក្កដា ឆ្នំា២០១៨។

សេចក្តី​ថ្លែងការណ៍​បន្ត​ថា រដ្ឋ​ឯកបក្ស ដែល​លោក ហ៊ុន សែន និង​គណបក្ស​ ប្រជាជន​កម្ពុជា បង្កើត​ឡើង​នៅ​ថ្ងៃ​ទី៥ កញ្ញា នឹង​នាំ​ឲ្យ​កម្ពុជា​ទទួល​រង​ទណ្ឌកកម្ម​ផ្សេងៗ ពី​សហគមន៍​អន្តរជាតិ ហើយ​ការ​បន្ត​ដឹក​នាំ​របៀប​នេះ​តទៅ​ទៀត នាំ​តែ​ការ​ឈឺ​ចាប់​ដល់​ប្រជា​ពលរដ្ឋ​ខ្មែរ​តែ​ប៉ុណ្ណោះ។ គណបក្ស សង្រ្គោះ​ជាតិ អំពាវនាវ​ឲ្យ​មាន​ការ​លើក​យក​មាត្រា៥ នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស ឆ្នាំ១៩៩១ ដែល​សហប្រធាន​នៃ​សន្និសីទ​ទីក្រុង​ប៉ារីស​ស្ដីពី​កម្ពុជា ត្រូវ​ការ​ពិភាក្សា​ជា​បន្ទាន់ ក្នុង​គោលបំណង​អនុម័ត​នូវ​វិធានការ​សមស្រប​ទាំង​ឡាយ ដើម្បី​ធានា​នូវ​ការ​គោរព ការ​ប្ដេជ្ញា​ចិត្ត​របស់​សហគមន៍​អន្តរជាតិ និង​ដើម្បី​នាំ​កម្ពុជា​មក​កាន់​គន្លង​ប្រជាធិបតេយ្យ​សេរី ពហុបក្ស​ឡើង​វិញ។

នៅ​ក្នុង​កិច្ច​ប្រជុំ​សភា​កាល​ពី​ថ្ងៃ​ទី៥ កញ្ញា តំណាង​អង្គទូត​ប្រទេស​មហាអំណាច​ចំនួន ៩ប្រទេស ដែល​និយម​ប្រជាធិបតេយ្យ មិន​បាន​ចូលរួម​ឡើយ ដែល​អ្នក​វិភាគ​លើក​ឡើង​ថា ជា​ការ​បង្ហាញ​ការ​មិន​គាំទ្រ​របប​ថ្មី​លោក ហ៊ុន សែន ហើយ​បញ្ហា​ចំពោះ​​មុខ គឺ​របប​ឯកបក្ស​ថ្មី​នេះ អាច​នឹង​រង​ការ​ដាក់​ទណ្ឌកម្ម​សេដ្ឋកិច្ច​ពី​សហរដ្ឋ​អាមេរិក សហភាព​អឺរ៉ុប និង​ពី​ប្រទេស​ប្រកាន់​ប្រជាធិបតេយ្យ​ផ្សេង​ទៀត៕

Capture.PNG

Advertisements

អង្គការសិទ្ធិមនុស្សអន្តរជាតិថា របប ហ៊ុន សែន ផ្តាច់ការពេញទំហឹង គួបផ្សំបញ្ជីខ្មៅរបស់មន្រ្តីយោធាខ្មែរ ចំពេលការបោះឆ្នោតជាតិ ជិតមកដល់

 

36371656_1583429585118915_5856120966735724544_n

កាសែតអង់គ្លេសដ៏មានឥទ្ធិពលមួយ The Guardian កាលពីថ្ងៃទី២៩ ខែមិថុនា ឆ្នាំ២០១៨ បានដកស្រង់របាយការណ័៍របស់ អង្គការសិទ្ធិមនុស្សអាស៊ី Human Rights Watch ថា «មេដឹកនាំកម្ពុជា លោក ហ៊ុន សែន បានប្រែក្លាយរបបដឹកនាំរបស់ខ្លួន ទៅជារបបយោធាផ្តាច់ការ»។ ហើយរបបនេះ គ្រប់គ្រងយ៉ាងហ្មត់ចត់ ទៅលើកងកម្លាំងសមត្ថកិច្ចប៉ូលីស និងយោធា។

អង្គការសិទ្ធិមនុស្ស Human Rights Watch បានសរសេរក្នុងរបាយការណ៍របស់ខ្លួនថា មន្រ្តីឧត្តមសេនីយ៍ ១២ រូប ដែលមានកេរ្តិ៍ឈ្មោះអាក្រក់ ជាមន្រ្តីជិតស្និទ្ធបំផុតរបស់លោក ហ៊ុន សែន គឺជាមន្រ្តីកាចសាហាវឃោរឃៅ កាងអំណាចផ្តាច់មុខឲ្យលោក ហ៊ុន សែន។ ក្រុមមន្រ្តីទាំងនេះ ជាប់ឈ្មោះក្នុងបញ្ជីទណ្ឌកម្មរបស់សហរដ្ឋអាមេរិក បន្ទាប់ពី ឧត្តមសេនីយ៍ ហ៊ីង ប៊ុងហៀង មេកងអង្គរក្សផ្ទាល់របស់លោក ហ៊ុន សែន ដែអាមេរិក បង្កកទ្រព្យសម្បត្តិជាផ្លូវការ ហើយហាមប្រាមក្រុមគ្រួសាររបស់លោក មិនឲ្យចេញចូលសហរដ្ឋអាមេរិក។

មន្រ្តី​ឧត្ដមសេនីយ៍​ទាំង ១២ រូបរបស់​លោក ហ៊ុន សែន ដែលល្បី​នៅ​លើ​ឆាក​អន្តរជាតិ​ ថាមាន​បាត​ដៃ​ប្រឡាក់ឈាម​ទាំង​នោះ រួម​មាន៖
១). នាយ​ឧត្ដមសេនីយ៍​ផ្កាយ​មាស ៤ លោក ប៉ុល សារឿន អគ្គមេបញ្ជាការ នៃ​កង​យោធពល​ខេមរភូមិន្ទ
២). នាយ​ឧត្ដមសេនីយ៍​ផ្កាយ​មាស ៤ លោក គន់ គីម អគ្គមេបញ្ជាការរង នៃ​កង​យោធពលខេមរភូមិន្ទ និង​ជា​នាយ​សេនាធិការ​ចម្រុះ
៣). នាយ​ឧត្ដមសេនីយ៍​ផ្កាយ​មាស ៤ លោក សៅ សុខា អគ្គមេបញ្ជាការរង នៃ​កង​យោធពលខេមរភូមិន្ទ និង​ជា​មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស
៤). នាយ​ឧត្ដមសេនីយ៍​ផ្កាយ​មាស ៤ លោក នេត សាវឿន អគ្គស្នងការ​នគរបាល​ជាតិ និងជាក្មួយប្រសាររបស់លោក ហ៊ុន សែន
៥). ឧត្ដមសេនីយ៍​ឯក​ផ្កាយ​មាស ៣ លោក ជា ម៉ន មេបញ្ជាការរង​កងទ័ព​ជើង​គោក និង​ជាមេបញ្ជាការយោធភូមិភាគ​ទី ៤
៦). ឧត្ដមសេនីយ៍​ឯក​ផ្កាយ​មាស ៣ លោក ប៊ុន សេង មេបញ្ជាការរង​កងទ័ព​ជើងគោក និង​ជា​មេបញ្ជាការ​កងយោធភូមិភាគ​ទី ៥
៧). ឧត្ដមសេនីយ៍​ឯក​ផ្កាយ​មាស ៣ លោក ជឿន សុវណ្ណថា មេបញ្ជាការរង​កងទ័ព​ជើង​គោក និង​ជា​មេបញ្ជាការ​យោធភូមិភាគ​ទី ២
៨). ឧត្ដមសេនីយ៍​ឯក​ផ្កាយ​មាស ៣ លោក ចាប ភក្តី នាយរង​សេនាធិការ​ចម្រុះ​ នៃ​កងយោធពល​ខេមរភូមិន្ទ និង​ជា​មេបញ្ជាការ​កងពលតូច​ទ័ព​ពិសេស ​ឆត្រយោង លេខ ​៩១១
៩). ឧត្ដមសេនីយ៍​ឯក​ផ្កាយ​មាស ៣ លោក រ័ត្ន ស្រ៊ាង មេបញ្ជាការរង​កងរាជអាវុធហត្ថ​លើ​ផ្ទៃ​ប្រទេស និង​ជាមេបញ្ជាការ​កងរាជអាវុធហត្ថ​រាជធានី​ភ្នំពេញ
១០). នាយ​ឧត្ដមសេនីយ៍​ផ្កាយ​មាស ៤ លោក សុខ ផល អគ្គស្នងការ​រង​នគរបាល​ជាតិ និង​ជាអគ្គ​នាយក​អន្តោប្រវេសន៍
១១). នាយ​ឧត្ដមសេនីយ៍​ផ្កាយ​មាស ៤ លោក ម៉ក់ ជីតូ អគ្គស្នងការរង​នគរបាល​ជាតិ និង​ជា​អគ្គលេខាធិការ​រង នៃ​អាជ្ញាធរ​ជាតិ​ប្រយុទ្ធ​ប្រឆាំង គ្រឿង​ញៀន
១២). នាយ​ឧត្ដមសេនីយ៍​ផ្កាយ​មាស ៤ លោក ជួន សុវណ្ណ អគ្គស្នងការ​រង​នគរបាល​ជាតិ និង​ជា​ស្នងការ​នគរបាល​រាជធានី​ភ្នំពេញ។

វិទ្យុអាស៊ីសេរី RFA Khmer បានដកស្រង់ និងប្រែសម្រួលរបាយការណ៍​ដ​ដែល​នេះថា «ភាគ​ច្រើន​នៃ​នាយ​ឧត្ដមសេនីយ៍​របស់​ លោក ហ៊ុន សែន សុទ្ធ​តែ​បាន​ជាប់​ពាក់​ព័ន្ធ ​ការ​ប្រើ​ប្រាស់​កម្លាំងជ្រុល​ហួស​ហេតុ ដែល​ពេល​ខ្លះ ​បណ្ដាល​ឲ្យ​ស្លាប់​ក្រុម​អ្នក​តវ៉ា អំពី​ការ​បោះ​ឆ្នោត​ ដែល​មិន​សេរី មិន​ត្រឹម​ត្រូវ និង​មិន​យុត្តិធម៌, អំពី​ការ​រឹបអូស​ដីធ្លី ការ​រំលោភ​សិទ្ធិ​ការ​ងារ, អំពី​ការ​តវ៉ា​ទាមទារ​ដំ​ឡើង​ប្រាក់​ឈ្នួល ជា​ដើម»។ ក្រៅ​ពី​នេះ បុគ្គល​ទាំង​នេះ ភាគ​ច្រើន ក៏​ពាក់​ព័ន្ធ​​នឹង​ការ​រំលោភ​បំពាន​ដែល​មិន​មែន​ជា​រឿង​នយោបាយ ប្រឆាំង​នឹង​ពលរដ្ឋ​ធម្មតា ដូចជា​ការ​រឹប​អូស​ដីធ្លី​ដោយ​រំលោភ​បំពាន ការ​សម្លាប់ ការ​ធ្វើ​ទារុណកម្ម និង​ការ​ឃុំឃាំង​តាម​អំពើ​ចិត្ត ដែលប្រព្រឹត្តិ​តាំង​ពី​សម័យ​ខ្មែរ​ក្រហម, សម័យ​សាធារណរដ្ឋ​ប្រជា​មានិត​កម្ពុជា, សម័យ​រដ្ឋ​កម្ពុជា, សម័យ​អ៊ុនតាក់ (UNTAC), សម័យ​រដ្ឋាភិបាល​អន្តរកាល និង សម័យ​ព្រះ​រាជា​ណា​ចក្រ​កម្ពុជា​ទី២ រួច​បន្ត​រហូត​មកទល់​បច្ចុប្បន្ន។

លោក ប៊្រែដ អាដាម (Brad Adams) នាយក​ប្រតិបត្តិ​ទទួល​បន្ទុក​តំបន់​អាស៊ី​នៃ​ អង្គការ​ឃ្លាំ​មើល​សិទ្ធិ​មនុស្ស (Human Rights Watch) ប្រាប់​អាស៊ីសេរី​ ថា «លោក ហ៊ុន សែន នឹង​ទទួល​រង​នូវ​ភាព​អាម៉ាស់​ជាទី​បំផុត​ ដោយសារ​តែ​របាយការណ៍​នេះ។ ខ្ញុំ​រំពឹង​ថា នឹង​ទទួល​បាន​នូវ​ប្រតិកម្ម​ជា​អវិជ្ជមាន​ខ្លាំង​ក្លា ដូច​ដែល​លោក ហ៊ុន សែន ធ្លាប់​បាន​ធ្វើ​កាលពី​ពេល​អតីត​កាល»។ លោក​បន្ត​ថា «លោក ហ៊ុន សែន ត្រូវ​តែ​ហ៊ាន​ប្រឈម​នឹង​ការ​ពិត ពី​ព្រោះ​ថា អ្នក​ដែល​ដឹង​ការ​ពិត​ទាំង​អស់​នេះ គឺ​ប្រជា​ពលរដ្ឋ​​ខ្មែរ​ខ្លួន​ឯង។ ពលរដ្ឋ​ខ្មែរ​ទាំង​អស់​ ដឹង​ច្បាស់​ណាស់​ថា បុគ្គល​ទាំង​អស់​នេះ​ជា​នរណា បើ​ទោះ​បី​ជា​ពួក​គេ​ មិន​ដឹង​លម្អិត​អំពី​អ្នក​ទាំង​អស់​នោះ​ក៏​ដោយ។ ក៏​ប៉ុន្តែ ពួក​គេ​ប្រាកដ​ជា​ដឹង​ច្បាស់​ណាស់​ថា អ្នក​ណា​ជា​អ្នក​ដឹក​នាំ​ប្រទេស​ឆ្ពោះ​ទៅ​រក​ ប្រព័ន្ធ​​​ផ្ដាច់ការ ។ ពួកគេ​ដឹង​ច្បាស់​ណាស់​ថា អ្នក​ណា​ជា​អ្នក​ភ្ជង់​កាំភ្លើង​ តម្រង់​មក​រក​ពួក​គេ។ ពួកគេ​ដឹង​ច្បាស់​ណាស់​ថា អ្នក​ណា​ជា​អ្នក​លួច​លុយ​ជាតិ​ របស់​ពួក​គេ»

ប្រតិកម្មបានកើតឡើងចម្រុះគ្នាពីរបប ហ៊ុន សែន ដោយរួមទាំងលោក ហ៊ុន សែន ផ្ទាល់ផង តបតទៅនឹងរបាយការណ៍អង្គការ Human Rights Watch នៅរយៈពេលប៉ុន្មានថ្ងៃនេះ ខណៈពេលការបោះឆ្នោតជាតិ នៅចុងខែកក្កដា ឆ្នាំ២០១៨ ជិតចូលមកដល់ ដែលសហគមន៍អន្តរជាតិ និងបក្សប្រឆាំងរបស់លោក កឹម សុខា ថ្កោលទោសជាបន្តបន្ទាប់។ បក្សប្រឆាំងដដែលនេះ ធ្វើយុទ្ធនាការ ឲ្យពលរដ្ឋខ្មែរ កុំទៅចូលរួមបោះឆ្នោត ថ្ងៃទី២៩ ខែកក្កដា ឆ្នាំ២០១៨។

បក្សប្រឆាំងរបស់លោក កឹម សុខា គឺគណបក្សសង្គ្រោះជាតិ ត្រូវបានរបប ហ៊ុន សែន ប្រើប្រាស់ប្រព័ន្ធតុលាការ រំលាយចោលកាលពី ថ្ងៃទី១៦ ខែវិច្ឆិកា ឆ្នាំ២០១៧ កន្លងទៅ។ តំណាងរាស្រ្តរបស់គណបក្សនេះ ៥៥ រូបនៅរដ្ឋសភា ត្រូវបានគេដកហូតយកអាសនៈ ហើយសមាជិកក្រុមប្រឹក្សាឃុំសង្កាត់ជាង ៥០០០ នាក់ ដែលកើតចេញពីការបោះឆ្នោត ក៏ត្រូវបានរបប ហ៊ុន សែន ដកហូតអាសនៈ ទាំងរំលោភរដ្ឋធម្មនុញ្ញា និងច្បាប់បទដ្ឋាននានា ទៅតាមការចង់បានរបស់លោក ហ៊ុន សែន៕ (អត្ថបទដោយ ម៉ែន ណាត)

c460c5c8-51a1-47ef-b85b-4474018e9010Capture n

 

ក្រុមប្រឹក្សាឃ្លាំមើលកម្ពុជា ប្រឆាំងជំទាស់ ចំពោះ ហ៊ុន សែន ដែលថាយល់ព្រម​ផ្ដល់​ភាព​ស្រប​ច្បាប់​ ដល់យួនខុសច្បាប់​ នៅកម្ពុជា

ក្រុមប្រឹក្សាឃ្លាំមើលកម្ពុជា សូមថ្កោលទោស ចំពោះកិច្ចព្រមព្រៀង និងការធានាណាមួយ ដែលធ្វើឡើងដោយរបប ហ៊ុន សែន ជាមួយ វៀតណាម ដើម្បីទទួលស្គាល់ភាពស្របច្បាប់ ដល់ជនអន្តោប្រវេសន៍យួខុសច្បាប់ នៅកម្ពុជា។ ក្នុងរូបភាណាក៏ដោយ យើង នៅតែចាត់ទុកថា និគមនជន​វៀតណាម ឬយួន នៅកម្ពុជា នៅតែខុសច្បាប់ដដែល បើទោះជាពួកគេ បានបង្កើតកូនចៅរបស់ខ្លួន នៅក្នុងទឹកដីកម្ពុជា ហើយឃុបឃឹតជាមួយអាជ្ញាធរខ្មែរ ធ្វើឯកសារស្របច្បាប់ណាមួយក្តី «ជាឯកសារក្លែងបន្លំ»។ កូនចៅរបស់ពួកគេ ក៏ជាជនអន្តោប្រវេសន៍ខុសច្បាប់ ដូចឪពុកម្តាយរបស់ពួកគេដែរ។

ជនបរទេសស្របច្បាប់ មានន័យថា ជាជនបរទេសដែលកាន់ឯកសារស្របច្បាប់ ចូលមកធ្វើទេសចរ ឬចូលចូលស្នាក់អាស្រ័យប្រទេសមួយទៀត ក្នុងរយៈពេលកំណត់តាមច្បាប់ ស្របតាម ច្បាប់អន្តោប្រវេសន៍ ឆ្នាំ១៩៩៤។ ជនបរទេសទាំងនោះ អាចចូលសញ្ជាតិកម្ពុជាបាន ដរាបណាជនបរទេសនោះ បានបំពេញលក្ខខណ្ឌ ស្របតាម ច្បាប់ស្តីពីសញ្ជាតិខ្មែរ ឆ្នាំ១៩៩៦ ព្រមទាំងត្រូវមាន ព្រះរាជក្រឹត្យ ពីព្រះមហាក្សត្រ និងធ្វើសច្ចាប្រណិធានពី តុលាការកំពូល ផង។ ករណីជនអន្តោប្រវេសន៍បរទេស ដែលកាន់អត្តសញ្ញាណប័ណ្ណសញ្ជាត់ិខ្មែរ ដោយគ្មានឯកសារព្រះរាជក្រឹត្យ និងឯកសារពីតុលាការកំពូល មកធ្វើការបញ្ជាក់ទេ នោះជនបរទេសទាំងនោះ គឺថានៅតែខុសច្បាប់ ដោយចាត់ទុកថា «ក្លែងឯកសារ»។ 

ចំពោះករណីជនអន្តោប្រវេស៍យួន នៅកម្ពុជា គឺពួកគេ ចូលមករស់នៅតាំងពីឆ្នាំ១៩៧៩ និងឆ្នាំបន្តបន្ទាប់​​រហូតសព្វថ្ងៃ ដោយពួកគេ សំអាងលើ សន្ធិសញ្ញាមិត្តភាព និងសហប្រតិបត្តិការ រវាងកម្ពុជា និង​វៀតណាម ថ្ងៃទី១៨ កុម្ភៈ ឆ្នាំ១៩៧៩ ដែលចុះហត្ថលេខាដោយលោក ហេង សំរិន និង សារាចរណ៍ណែនាំ ហ៊ុន សែន ១៩៨៦ (ថ្ងៃទី២៦ កុម្ភៈ ឆ្នាំ១៩៨៦)។ ឯកសារទាំងនេះ គឺជាការលើកទឹកចិត្តឲ្យ យួន បន្តចូលមករស់នៅកម្ពុជា ដោយគ្មានចាំបាច់មានឯកសារស្របច្បាប់ទេ។ ដូច្នេះ ពួកគេ រស់នៅខុសច្បាប់ នៅកម្ពុជាសព្វថ្ងៃនេះ។

ករណីគ្មានឯកសារស្របច្បាប់ បានន័យថា យួន/វៀតណាម រស់នៅកម្ពុជា គឺខុសច្បាប់។ ហេតុនេះរបប ហ៊ុន សែន មិនត្រូវទទួលយកលក្ខខណ្ឌណាៗទាំងអស់ ពីរដ្ឋាភិបាលវៀតណាម ក្នុងការទទួលស្គាល់ភាពស្របច្បាប់ នូវជនអន្តោប្រវេសន៍យួនខុសច្បាប់ឡើយ។ របប ហ៊ុន សែន ត្រូវតែចាត់វិធានការបញ្ជូន យួន ខុសច្បាប់ ទៅប្រទេសវៀតណាមវិញ ដូចមានកំណត់ច្បាប់ ស្តីពីអន្តោប្រវេសន៍ និងច្បាបសញ្ជាតិ របស់កម្ពុជា។ 

ដោយ ម៉ែន ណាត
នៃក្រុមប្រឹក្សាឃ្លាំមើលកម្ពុជា / ក្រុងគ្រីស្ទានសាន់ (ប្រទេសន័រវេស៍) / ១១ មករា ២០១៨

10670187_918366958259408_8520807832688678037_n


youn-002

កាសែត​វៀតណាម​ ថាលោក ហ៊ុន សែន យល់ព្រម​ផ្ដល់​ភាព​ស្រប​ច្បាប់​ ដល់​ជន​ជាតិ​វៀតណាម

(VOD News / ដោយលោក ពេជ្រ ចំរុង /​​ថ្ងៃទី ១១ ខែមករា ឆ្នាំ២០១៨)
សារព័ត៌មាន​វៀតណាម បាន​ចុះ​ផ្សាយ​ថា លោក​នាយករដ្ឋ​មន្ត្រី ហ៊ុន សែន បានយល់ព្រមតាមសំណើរបស់​​សម​ភាគី​វៀតណាម ដែលស្នើ​សុំ​រដ្ឋាភិបាល​កម្ពុជា​ ឲ្យ​ផ្ដល់​ភាព​ស្រប​ច្បាប់​ ដល់​ជន​អន្តោ​ប្រវេសន៍​វៀតណាម ​កំពុង​រស់​នៅ​ក្នុង​ប្រទេស​កម្ពុជា។

ព្រឹត្តិប័ត្រ​ព័ត៌មាន​អនឡាញ​ របស់​រដ្ឋាភិបាល​វៀតណាម VGP News បាន​ចុះ​ផ្សាយ​ថាលោក ហ៊ុន សែន បាន​សម្រេច​តាម​សំណើ​ វៀតណាម​ បែប​នេះ នៅ​ក្នុង​ជំនួប​ទ្វេភាគី​ រវាង​លោក ហ៊ុន សែន និង​នាយក​រដ្ឋ​មន្ត្រី​វៀតណាម លោក ង្វៀន សួនហ្វុក នៅ​ក្រៅ​ជំនួប​នៃ​វេទិកា​ថ្នាក់​តំបន់​ «មេគង្គ-ឡានឆាង» នៅ​រាជ​ធានី​ភ្នំពេញ កាល​ពី​ថ្ងៃ​ម្សិល​មិញ​នេះ។

ព្រឹត្តិប័ត្រ​ព័ត៌មានវៀតណាម​មួយ​នេះ ចុះផ្សាយថា៖ «ប្រមុខរដ្ឋាភិបាលវៀតណាម និងនាយករដ្ឋមន្ដ្រីកម្ពុជា លោក ហ៊ុន សែន បាន​ព្រមព្រៀងគ្នា ជំរុញភាពស្របច្បាប់​ ដល់ពលរដ្ឋកម្ពុជា​ដើមកំណើត​វៀតណាម ដោយផ្អែកតាមច្បាប់​កម្ពុជា និងទំនាក់ទំនងប្រទេសជិតខាងល្អ ​រវាងប្រទេសទាំងពីរ»។ Read more

ពលរដ្ឋខ្មែរនៅអឺរ៉ុប និងអាមេរិក ប្រកាសធ្វើបាតុកម្ម ប្រឆាំងថ្ងៃ ៧ មករា ជាថ្ងៃដែល យួន ឈ្លានពានកម្ពុជា តាមរយៈរបប ហ៊ុន សែន ​និង CPP

26113905_10214669829956383_5102050775065236596_n

ពលរដ្ឋខ្មែរនៅអឺរ៉ុប គ្រោងធ្វើមហាបាតុកម្ម នៅទីក្រុងប៉ារីស ប្រទេសបារាំង ដើម្បីប្រឆាំងថ្ងៃ ០៧ មករា របស់របប ហ៊ុន សែន ដែលនៅតែអះអាងថា ជាថ្ងៃកំណើតទី២ ដែលប្រទេសវៀតណាម ជួយរំដោះពលរដ្ឋខ្មែរ ពីរបបខ្មែរក្រហម កាលពីឆ្នាំ១៩៧៩។ ប៉ុន្តែអ្នកច្បាប់ ក្រុមបញ្ញវន្តខ្មែរ និងអ្នកជាតិនិយម បានហៅថ្ងៃ ០៧ មករា ១៩៧៩ ជាថ្ងៃដែលកងទ័ពវៀតណាម ចូលឈ្លានពានប្រទេសកម្ពុជា ហើយពួកគេ បន្តនយោបាយឈ្លានពានខ្មែរ រហូតមកទល់សព្វថ្ងៃ តាមរយៈរបប ហ៊ុន សែន និងបក្សប្រជាជនកម្ពុជា (CPP)។

ដំណឹងមហាបាតុកម្មរបស់ពលរដ្ឋខ្មែរ នៅអឺរ៉ុបនេះ បានឲ្យដឹងថា ពួកគេ នឹងជួបជុំគ្នា នៅទីលានសេរីភាព ក្នុងទីក្រុងប៉ារីស ថ្ងៃទី ០៧ មករា ២០១៨ ម៉ោង ២ៈ៣០ នាទីរសៀល។ គោលបំណងបាតុកម្ម មាន ៣ ចំណុច៖

១. ថ្កោលទោសនយោបាយវាទីនិយមរបស់ប្រទេសវៀតណាម នៅប្រទេសកម្ពុជា ចាប់តាំងពីការលុយផ្នែកយោធា នៅឆ្នាំ១៩៧៩ មក។
២. សូមឲ្យប្រទេសបារាំង ជាសហប្រធាន ធ្វើអន្តរាគមន៍ ដើម្បីទាមទារឲ្យអនុវត្តកិច្ចព្រមព្រៀងសន្តិភាពទីក្រុងប៉ារីស ថ្ងៃទី ២៣ តុលា ១៩៩១។
៣. ទាមទារឲ្យដោះលែងអ្នកទោសមនសិការទាំងអស់ ជាបន្ទាន់ និងដោយគ្មានលក្ខខណ្ឌ ព្រមទាំងត្រូវដោះលែងលោក កឹម សុខា ដែលជាជនរងគ្រោះដោយសាររបបផ្តាច់ការ ហ៊ុន សែន។

ដោយឡែកពលរដ្ឋខ្មែរ នៅសហរដ្ឋអាមេរិក ក៏ប្រកាសធ្វើបាតុកម្ម និងវេទិកាសាធារណៈ ដើម្បីប្រឆាំងថ្ងៃ ០៧ មករាផងដែរ ដែលមានធ្វើនៅទីក្រុងឡុងប៊ិច រដ្ឋកាលីហ្វនញ៉ា និងទីក្រុងហូស្តុន រដ្ឋតិចសាស។

លោក ចាន់ វាសនា ប្រធានគណបក្ស​សង្គ្រោះ​ជាតិ ប្រចាំ​ទីក្រុង​ឡុងប៊ិច រដ្ឋ​កាលីហ្វ័រញ៉ា សហរដ្ឋអាមេរិក បានដឹងឲ្យថា «មហា​បាតុកម្ម​អហិង្សា​ គឺ​មិន​ទទួល​ស្គាល់​ថ្ងៃ ៧ មករា វាជា​ថ្ងៃ​ដែល​បរទេស​ឈ្លានពាន ​មក​លើ​ទឹកដី​កម្ពុជា»។ មហា​បាតុកម្ម​អហិង្សា​នោះ គ្រោង​ធ្វើនៅ​ អគារ​អាណាហែម (1321 E Anaheim) នៅ​ថ្ងៃ​សៅរ៍ ទី​ ០៦ ខែ​មករា ឆ្នាំ​២០១៨។

ចំពោះគណបក្សសង្គ្រោះជាតិ នៅទីក្រុងហូស្តុន (Houston( រដ្ឋតិចសាស (Texas) គ្រោងរៀបចំវេទិកាសាធារណៈ ដើម្បីជួបជាមួយ មេដឹកនាំគណបក្សសង្គ្រោះជាតិ ដែលមានវាគ្មិនលោក សម រង្ស៊ី លោកស្រី មួរ សុខហួរ និងលោក អេង ឆាយអ៊ាង។ ពិធីនេះ នឹងធ្វើនៅថ្ងៃទី ១៤ មករា ២០១៨ ម៉ោង ៦ ល្ងាច ដល់ ៩ យប់។ / អត្ថបទដោយ ម៉ែន ណាត, ០៣ មករា ២០១៨

25660325_10214669830356393_7128800695125032252_n26113846_10214669829996384_7456669055993224566_n26165219_2262891843937342_8275173667692097277_n

ក្រុមប្រឹក្សា​ឃ្លាំមើល​កម្ពុជា ​ថ្កោលទោស​រដ្ឋាភិបាល ​ដែល​បង្ខំ​បោះ​បង្គោល​ព្រំដែន ​កម្ពុជា-​វៀតណាម

image

(ដោយ អាស៊ីសេរី RFA / 14-11-2017)
ក្រុមប្រឹក្សា​ឃ្លាំមើល​កម្ពុជា ថ្កោលទោស​រដ្ឋាភិបាល លោក ហ៊ុន សែន ដែល​បង្ខំ​បោះ​បង្គោល​ព្រំដែន​កម្ពុជា-​វៀតណាម នៅ​ក្នុង​កាលៈទេសៈ​ប្រទេស​កម្ពុជា គ្មាន​ឯកភាព​ជាតិ និង​កំពុង​មាន​វិបត្តិ​នយោបាយ​ធ្ងន់ធ្ងរ។ អង្គការ​ដដែល​បាន​បង្ហាញ​ទៀត​ថា សកម្មភាព​បែប​នេះ ជា​ការ​អនុវត្ត​ផ្ទុយ​ពី​ច្បាប់​ជាតិ និង​អន្តរជាតិ។

ក្រុមប្រឹក្សា​ឃ្លាំមើល​កម្ពុជា ចាត់​ទុក​សកម្មភាព​របស់​លោក​នាយករដ្ឋមន្ត្រី ហ៊ុន សែន ដែល​បាន​បង្ខំ​បោះ​បង្គោល​ព្រំដែន​កម្ពុជា-​វៀតណាម ថា បាន​អនុវត្ត​ផ្ទុយ​ពី​ឆន្ទៈ​ប្រជាពលរដ្ឋ​ខ្មែរ និង​ផ្ទុយ​ពី​កិច្ច​ព្រមព្រៀង​ទីក្រុង​ប៉ារីស ឆ្នាំ​១៩៩១។

​ប្រធាន​ក្រុមប្រឹក្សា​ឃ្លាំមើល​កម្ពុជា លោក ម៉ែន ណាត បញ្ជាក់​ក្នុង​សេចក្ដី​ថ្លែងការណ៍​របស់​ខ្លួន​នៅ​ថ្ងៃ​ទី​១៣ ខែ​វិច្ឆិកា បាន​ចាត់​ទុក​ការ​ប្ដេជ្ញា​របស់​នាយករដ្ឋមន្ត្រី ហ៊ុន សែន និង​នាយករដ្ឋមន្ត្រី​វៀតណាម ង្វៀន ស៊ុងហ៊្វុក (Nguyen Xuan Phuc) ថា​នឹង​បញ្ចប់​ការ​បោះ​បង្គោល​ព្រំដែន​ឲ្យ​រួចរាល់​នៅ​ឆ្នាំ​២០១៨ ខាង​មុខ​នោះ គឺ​ជា​ការ​នាំ​ឲ្យ​កម្ពុជា ខាត​បង់​យ៉ាង​ធ្ងន់ធ្ងរ។

​ការ​ប្ដេជ្ញា​នេះ ធ្វើ​ឡើង​នៅ​ក្នុង​ជំនួប​មេដឹកនាំ​ទាំង​ពីរ​ក្នុង​អំឡុងពេល​ប្រជុំ​កំពូល អេប៉ិច (APEC) កាល​ពី​ថ្ងៃ​ទី​១១ ខែ​វិច្ឆិកា ឆ្នាំ​២០១៧ នៅ​ខេត្ត​ដាណាង ប្រទេស​វៀតណាម។

​លោក ម៉ែន ណាត ថ្លែង​ថា លោក​មិន​ឯកភាព​ចំពោះ​ការ​បង្ខំ​បោះ​បង្គោល​ព្រំដែន រវាង​មេដឹកនាំ​កម្ពុជា និង​វៀតណាម ក្នុង​ពេល​ប្រទេស​កម្ពុជា មិន​ទាន់​មាន​ឯកភាព​ជាតិ​នេះ​ទេ៖ «បើ​យើង​បង្ខំ​បោះ​បង្គោល​ព្រំដែន​ទាំង​តក់ក្រហល់​បែប​នេះ មាន​ន័យ​ថា យើង​កំពុង​បម្រើ​តាម​ការ​ចង់​បាន​របស់​វៀតណាម។ បញ្ហា​នេះ យើង​ត្រូវតែ​រង់ចាំ​ឲ្យ​កម្ពុជា មាន​ឯកភាព​ផ្ទៃក្នុង​ជាតិ​ជា​មុន​សិន គឺ​គ្រប់​ភាគី​នយោបាយ មិន​ថា​អ្នក​ជំនាញការ​ព្រំដែន និង​ក្រុម​អង្គការ​សង្គម​ស៊ីវិល​ទេ ត្រូវ​តែ​មាន​ឱកាស​ជួប​ជជែក​គ្នា​ដើម្បី​រក​ដំណោះស្រាយ​ត្រឹមត្រូវ​រវាង​បញ្ហា​ព្រំដែន​នេះ ពីព្រោះ​រឿង​នេះ​ធ្ងន់ធ្ងរ​ណាស់ និង​ជា​ហានិភ័យ​ធ្ងន់ធ្ងរ​ណាស់​សម្រាប់​ជាតិ​យើង។ ឥឡូវ​នេះ​យើង​ឃើញ​ស្រាប់​ហើយ ប្រទេស​ទាំង​ពីរ​បាន​បង្ខំ​បោះ​បង្គោល​ព្រំដែន​ថ្មីៗ ហ្នឹង​នៅ​ខេត្ត​ព្រៃវែង បង្គោល​ធំ និង​នៅ​ខេត្ត​ក្រចេះ បង្គោល​ធំ​ហ្នឹង​គឺ​បាន​បោះ​រួច​ហើយៗ នៅ​បោះ​បង្គោល​រណប​មួយ​ចំនួន​ទៀត​ហ្នឹង គឺ​វា​មិន​ជា​ល្អ​ទេ»

​អាស៊ីសេរី មិន​ទាន់​អាច​ទាក់ទង​លោក វ៉ា គឹមហុង ប្រធាន​គណៈកម្មាធិការ​ព្រំដែន​កម្ពុជា និង​លោក​បណ្ឌិត សុខ ទូច ប្រធាន​វិទ្យាស្ថាន​ទំនាក់ទំនង​អន្តរជាតិ​កម្ពុជា នៃ​រាជបណ្ឌិត្យសភា​កម្ពុជា ដើម្បី​បំភ្លឺ​ជុំវិញ​ការ​ចេញ​សេចក្តី​ថ្លែងការណ៍​របស់​ក្រុមប្រឹក្សា​ឃ្លាំមើល​កម្ពុជា តាម​ទូរស័ព្ទ​បាន​ទេ នៅ​ល្ងាច​ថ្ងៃ​ចន្ទ ទី​១៣ ខែ​វិច្ឆិកា។

អនុប្រធាន​គណៈកម្មាធិការ​ព្រំដែន​កម្ពុជា អ្នកស្រី កុយ ពិសី  បាន​​បញ្ជាក់​ប្រាប់​កាសែត​ក្នុង​ស្រុក​កាល​ពី​សប្ដាហ៍​មុន​ថា កម្ពុជា-​វៀតណាម បាន​បោះ​បង្គោល​ព្រំដែន​ធំ នៅ​ខេត្ត​ព្រៃវែង ជាមួយ​ខេត្ត​ដុងថាប់ និង​ខេត្ត​ក្រចេះ ជាមួយ​ខេត្ត​ប៉ិញភឿក រួចរាល់ ១០០​ភាគរយ​ហើយ ហើយ​ភាគី​ទាំង​ពីរ​ត្រូវ​បន្ត​បោះ​បង្គោល​ព្រំដែន​បន្ថែម​មួយ​ចំនួន​ទៀត​ឲ្យ​ចប់​នៅ​ដំណាច់​ឆ្នាំ​២០១៧។

​ប្រធាន​ក្រុមប្រឹក្សា​ឃ្លាំមើល​កម្ពុជា បាន​អំពាវនាវ​ដល់​រដ្ឋាភិបាល លោក ហ៊ុន សែន ឲ្យ​បញ្ឈប់​ការ​បោះ​បង្គោល​ព្រំដែន​រវាង​កម្ពុជា-​វៀតណាម ជា​បន្ទាប់​ដោយ​រង់ចាំ​រហូត​ដល់​កម្ពុជា មាន​ឯកភាព​ជាតិ និង​មាន​ប្រក្រតី​ភាព​នយោបាយ​ជា​មុន​សិន។ Read more

ក្រុមប្រឹក្សា​ឃ្លាំមើល​កម្ពុជា​ ស្នើ​ឲ្យ​ផ្អាក ​ការ​បោះ​បង្គោល​ព្រំដែន​ កម្ពុជា-វៀតណាម ជាបន្ទាន់

0acacd63-8758-4cb7-8f07-d639b55de33b

ក្រុមប្រឹក្សាឃ្លាំមើលកម្ពុជា សូមបញ្ជាក់ជំហរថា «យើងមិនដែលទទួលស្គាល់ ការបោះបង្គោលព្រំដែន កម្ពុជា-វៀតណាម តាម សន្ធិសញ្ញាព្រំដែនបំពេញបន្ថែមថ្មី ឆ្នាំ២០០៥ ទេ»។ ការបោះបង្គោលព្រំដែនថ្មី តាំងពីឆ្នាំ២០០៦ មកដល់បច្ចុប្បន្ននេះ ធ្វើឲ្យកម្ពុជាបាត់បង់ទឹកដី តាមបណ្តោយព្រំដែនគោក ទៅខាងភាគីវៀតណាម យ៉ាងពិតប្រាកដ។

ពលរដ្ឋខ្មែរ នៅតាមបណ្តោយព្រំដែន គឺជាសាក្សីរស់ ដែលបានបញ្ជាក់ជាហូរហែរថា ដីស្រែចំការរបស់ពួកគាត់ ត្រូវបានរអិតចូលក្នុងទឹកដី វៀតណាម ក្រោយការបោះបង្គោលព្រំដែន ក្នុងនោះសូម្បីតែភូមិកំណើត លោក ហេង សំរិន ប្រធានរដ្ឋសភា គឺភូមិអន្លុងជ្រៃ និង ថ្លុកត្រាច ស្រុកពញាក្រែក ត្បូងឃ្មុំ ក៏ត្រូវបានដោះដូរភូមិខ្មែរចំនួន ២ នៅស្រុកមេមត់ ទៅឲ្យ វៀតណាម។

ក្រុមប្រឹក្សាឃ្លាំមើលកម្ពុជា រក្សាសិទ្ធិក្នុងការទាមទារបូរណភាពទឹកដីកម្ពុជា ដែល​បាត់បង់មកវិញ នៅពេលណា កម្ពុជា មានមេដឹកនាំល្អ និងស្រឡាញ់ជាតិ ពលរដ្ឋពិតប្រាកដ។ (អត្ថបទដោយ៖ ម៉ែន ណាត)


ក្រុមប្រឹក្សា​ឃ្លាំមើល​កម្ពុជា​ ស្នើ​ឲ្យ​ផ្អាក​ការ​បោះ​បង្គោល​ព្រំដែន​ កម្ពុជា-វៀតណាម

(RFA Khmer / ដោយ សេក បណ្ឌិត / 09-11-2017)
ក្រុមប្រឹក្សា​ឃ្លាំមើល​កម្ពុជា ដែល​ធ្វើការ​អង្កេត​ទៅ​លើ​ បញ្ហា​ព្រំដែន​កម្ពុជា ប្រតិកម្ម​ចំពោះ​សកម្មភាព​របស់​រដ្ឋាភិបាល​កម្ពុជា ដែល​កំពុង​សម្រុក​ បោះ​បង្គោល​ព្រំដែន ​ជាមួយ​ប្រទេស ​វៀតណាម ដ៏​ចម្រូង ចម្រាស ខណៈ​កម្ពុជា កំពុង​ជួប​វិបត្តិ​នយោបាយ​ធ្ងន់ធ្ងរ។

​អនុប្រធាន​លេខាធិការដ្ឋាន​អចិន្ត្រៃយ៍​នៃ ​អាជ្ញាធរ​ជាតិ​ទទួលបន្ទុក​កិច្ចការ​ព្រំដែន អ្នកស្រី កុយ ពិសី បាន​ប្រាប់​អ្នក​សារព័ត៌មាន​ក្នុង​ស្រុក​ថា កាល​ពី​ថ្ងៃ​ទី​០៧ ខែ​វិច្ឆិកា ថា កម្ពុជា-​វៀតណាម បាន​បញ្ចប់​ការ​បោះ​បង្គោល​ព្រំដែន​ធំ ​រវាង​ខេត្ត​ក្រចេះ និង​ប៊ិនភឿក ប្រទេស​វៀតណាម រួចរាល់ ១០០% ហើយ​ភាគី​ទាំង​ពីរ​ ក៏​កំពុង​បន្ត​បោះ​បង្គោល​ព្រំដែន​បំពេញ​បន្ថែម ហើយ​នឹង​ឯកភាព​គ្នា ​បញ្ចប់​ការងារ​របស់​ខ្លួន​ នៅ​ដំណាច់​ឆ្នាំ​២០១៧ នេះ

​ប្រធាន​ក្រុមប្រឹក្សា​ឃ្លាំមើល​កម្ពុជា លោក ម៉ែន ណាត បាន​ថ្លែង​​ប្រាប់​​ អាស៊ីសេរី កាល​ពី​ថ្ងៃ​ពុធ ទី​០៨ ខែ​វិច្ឆិកា ឆ្នាំ២០១៧ ថាអង្គការ​លោក ​ប្រឆាំង​យ៉ាង​ដាច់អហង្ការ ​ចំពោះ​ការ​បោះ​បង្គោល​ព្រំដែន​ កម្ពុជា-​វៀតណាម ក្នុង​​ពេល​កម្ពុជា កំពុង​ជួប​វិបត្តិ​នយោបាយ​ធ្ងន់ធ្ងរ ជាពិសេស​ខណៈពេល គណបក្ស​អំណាច និង​គណបក្ស​ឆាំង​ ដែល​មាន​អាសនៈ​ក្នុង​រដ្ឋ​សភា ​កំពុង​ប្រេះឆា ហើយ​រដ្ឋសភា​កម្ពុជា ពុំ​អាច​ដំណើរ​ការ​បាន​រលូន​ពេញ​លក្ខណៈ​ផង​នោះ៖ «ទាំង​ច្បាប់​ជាតិ និង​អន្តរជាតិ គឺ​មិន​អាច​ឲ្យ​យើង ​ទទួល​ស្គាល់​លើ​ការ​បោះ​បង្គោល​ព្រំដែន​នេះ​បាន​ជា​ដាច់ខាត»

ក្រុមប្រឹក្សា​ឃ្លាំមើល​កម្ពុជា ស្នើ​ឲ្យ​ផ្អាក​ជា​ផ្លូវការ​ ចំពោះ​សកម្មភាព​បោះ​បង្គោល​ព្រំដែន​ កម្ពុជា-​វៀតណាម  នៅ​ពេល​នេះ​ជា​បន្ទាន់។

​អាជ្ញាធរ​ជាតិ​ទទួល​បន្ទុក​កិច្ចការ​ព្រំដែន​បញ្ជាក់​ថា អំឡុង​ពេល​ប៉ុន្មាន​ខែ​ចុង​ក្រោយ​នេះ គណៈប្រតិភូ​ព្រំដែន​កម្ពុជា បាន​ធ្វើ​សកម្មភាព​ត្រួត​ពិនិត្យ​មើល​ ការ​បោះ​បង្គោល​ព្រំដែន បំពេញ​បន្ថែម​ នៅ​តាម​ព្រំដែន​កម្ពុជា-​វៀតណាម។ រហូត​ដល់​ពេល​នេះ ការ​រៀបចំ​បោះ​បង្គោល​ព្រំដែន​នេះ​ បាន​សម្រេច​ជាង ៨០% ហើយ៕

ប៉ាង សុខឿន៖ ស្អីគេទៅជា NDI រៀបចំផែនការផ្តួលរំលំរដ្ឋាភិបាល ហ៊ុន សែន? CPP ពិតជាមិនថ្លៃថ្នូរសោះ!

21015823_1364334320354377_4914115636251646839_o

រដ្ឋាភិបាល ហ៊ុន​ សែន បញ្ជាបិទវិទ្យាស្ថានប្រជាធិបតេយ្យ (NDI) របស់អាមេរិក នៅថ្ងៃទី២៤ ខែសីហា ឆ្នាំ២០១៧ នេះ បន្ទាប់ពីលោក ហ៊ុន សែន ចោទប្រកាន់ថា វិទ្យាស្ថានេះ ជួយគណបក្សប្រឆាំង CNRP ក្នុងផែនការផ្តួលរំលំរដ្ឋាភិបាល {តាមរយៈការបោះឆ្នោតពេលខាង}។ ស្របពេលជាមួយគ្នានេះ រដ្ឋាភិបាល ហ៊ុន សែន ក៏បានព្រមានបិទកាសែត The Cambodia Daily របស់អាមេរិក ក្នុង​បទចោទ​ប្រកាន់រឿងមិនបង់ពន្ធដារ ១០ឆ្នាំមកនេះ។ ដូចគ្នានេះដែរ រដ្ឋាភិបាល បញ្ជាឲ្យផ្អាក ការផ្សាយបន្ត របស់វិទ្យុ VOA និង RFA តាមវិទ្យុក្នុងស្រុក កាលពីថ្ងៃទី២៣ ខែសីហា ម្សិលមិញ។

ក្រុមអ្នកវិភាគ និងអ្នកសង្កេតការណ៍នយោបាយខ្មែរ មើលឃើញថា បក្សកាន់អំណាច CPP របស់ ហ៊ុន សែន បើកយុទ្ធនាការកំចាត់អង្គការ ស្ថាប័នប្រជាធិបតេយ្យ និង អង្គភាពសារព័ត៌មានខាងលើនេះ ក្នុងបំណងបំបិទសេរីភាព ទទួលព័ត៌មានរបស់ពលរដ្ឋ និង បង្កភាពអាប់អួរស្ថានភាពការបោះឆ្នោតជាតិ ឆ្នាំ២០១៨ {CPP បារម្ភខ្លាចចាញ់ការបោះឆ្នោត ដូច្នេះត្រូវរៀបចំអំពើទុច្ចរិតរបស់ខ្លួន}។ (អត្ថបទដោយ ម៉ែន ណាត /ថ្ងៃទី២៤ សីហា ២០១៧)


អត្ថបទដោយ ប៉ាង សុខឿន (ហេ្វសប៊ុក៖ ខ្មែរ សុវណ្ណភូមិ)៖ ព័ត៌មានបក្សកាន់អំណាច CPP ថាជាបែកធ្លាយព័ត៌មាន ពីខាងក្នុង NDI ធ្វើឲ្យរដ្ឋាភិបាល សម្រេចបិទទ្វារអង្គការនេះ ដោយចោទអង្គការនេះថា មានផែនការរួមគ្នា ជាមួយគណបក្សប្រឆាំង ដើម្បីផ្តួលរំលំរដ្ឋាភិបាលកម្ពុជា។ តាមពិតទៅ វាមិនមែនជាការបែកធ្លាយស្អីទេ តាមពិតវាផែនការនោះ គេហៅថា គំរោងការងារប្រចាំឆមាស ឬប្រចាំឆ្នាំរបស់អង្គការតែប៉ុណ្ណោះ គឺអង្គការណា ក៏ធ្វើបែបនេះដែរ ចំពោះការចោទនោះវិញគឺខុសស្រឡះ ពីព្រោះ ហ៊ុន សែន ឬរដ្ឋាភិបាលអាយ៉ងយួន ផ្តោតលើកម្មវិធីរៀបចំអប់រំបណ្តុះបណ្តាលមន្រ្តី ឬសកម្មជនបក្សប្រឆាំង និងបក្សតូចៗ ៣ ផ្សេងទៀត រួមទាំងបក្សប្រជាជន ចូលរួមផងដែរ ក្នុងវគ្គបណ្តុះបណ្តាល «អំពីភាពជាអ្នកដឹកនាំ ការរៀបចំផែនការដឹកនាំ ផែនការគ្រប់គ្រង ផែនការអភិវឌ្ឍន៍មូលដ្ឋាន» ។ល។ នេះបើតាមបទសម្ភាសន៍វិទ្យុអាស៊ីសេរី ជាមួយ ប្រធានអង្គការ NDI។ ហ៊ុន សែន បែរជាយកលេសនេះថា ជាផែនការក្បត់ ជាផែនការបដិវត្តិន៍ សម្រាប់ផ្តួលរំំរដ្ឋាភិបាលឯណាស្កុយទៅវិញ។

ក្រៅពីគំរោងបណ្តុះបណ្តាលទាំងនេះ វិទ្យាស្ថាន NDI ក៏មានរៀបចំវេទិកាជជែកពិភាក្សារតុមូល រវាងគណបក្សនយោបាយ មុនរាល់ការបោះឆ្នោត និង វេទិការាស្រ្ត និងអ្នកតំណាងរាស្រ្តផងដែរ។ កម្មវិធីបណ្តុះបណ្តាលអ្នកនយោបាយ សកម្មជនបក្សនយោបាយ និងមន្រ្តីរដ្ឋាភិបាល ឬបក្សប្រឆាំងនេះ មានតាំងឆ្នាំ ២០០០ មកម្ល៉េះ ហើយ{ខ្ញុំ} ខ្មែរ សុវណ្ណភូមិ ក៏ធ្លាប់បានចូលរួមដែរ លើវគ្គបណ្តុះបណ្តាល «យុវជន និងភាពជាអ្នកដឹកនាំ ក្នុងកិច្ចការនយោបាយ»។

និយាយរួម ការបិទអង្គការនេះ គឺជាការខាតបង់សេដ្ឋកិច្ចខ្មែរ រាប់លានដុល្លាក្នុង ១ ឆ្នាំ ដែលអង្គការនេះ យកមកចំណាយ នៅលើទឹកដីខ្មែរ និងបង្កើនចំណេះដឹង ដល់ពលរដ្ឋខ្មែរ រួមទាំងការងារផង។ ផ្ទុយទៅវិញ ផែនការរបស់ ហ៊ុន សែន គឺចង់ទាញកម្ពុជា ទៅរកកុម្មុយនីស្ត ដូច យួន ឬកូរ៉េខាងជើងសុទ្ធសាធ ហើយជានយោបាយ មនោគមន៍វិជ្ជា យួន ឲ្យខ្មែរ ស្អប់អាមេរិក និងបន្តដឹងគុណបក្សប្រជាជន និង យួន តទៅទៀតតែប៉ុណ្ណោះ៕

King Father-PM Hun Sen-001

« Older Entries