វីអូឌី (VOD) ដោយលោក ណាត សុភាព
25-12-2022
តំណាងក្រុមយុវជនមកពីបណ្តារាជធានី-ខេត្តមួយចំនួន បានព្រមានថា បើរដ្ឋាភិបាលគ្មានការឆ្លើយតប ចំពោះសំណើសុំបញ្ឈប់ការចេញបណ្ណស្នាក់នៅអចិន្ដ្រៃយ៍ ដល់ជនអន្តោប្រវេសន៍ខុសច្បាប់ និងលុបចោលគម្រោងបង្កើតដេប៉ាតឺម៉ង់សិក្សាភាសាវៀតណាម នៅសាកលវិទ្យាល័យភូមិន្ទភ្នំពេញទេ នោះពួកគេនឹងដើរហែក្បួនទៅកាន់ស្ថាប័នរដ្ឋ ដើម្បីបន្តការទាមទារនេះបន្ថែមទៀត។
ការព្រមាននេះ ធ្វើឡើងបន្ទាប់ពីក្រុមយុវជនជាច្រើននាក់ បានជួបជុំគ្នានៅទីលានប្រជាធិបតេយ្យ នៅថ្ងៃអាទិត្យ ដែលជាថ្ងៃទីពីរនៃការតវ៉ានេះ។ តំណាងយុវជនដែលដឹកនាំការជួបជុំគ្នា នៅទីលានប្រជាធិបតេយ្យ លោក អ៊ុំ ឈុម បានឱ្យដឹងថា គិតចាប់ពីថ្ងៃទី២៤ និងថ្ងៃទី២៥ ខែធ្នូនេះ ពួកគេប្រមាណ ៤០នាក់ បានជួបជុំគ្នាសម្តែងមតិ ដើម្បីទាមទារទៅរដ្ឋាភិបាល បញ្ឈប់ការចេញបណ្ណស្នាក់នៅអចិន្ដ្រៃយ៍ដល់ជនបរទេស និងលុបចោលគម្រោងបង្កើតដេប៉ាតឺម៉ង់សិក្សាភាសាវៀតណាម នៅសាកលវិទ្យាល័យភូមិន្ទភ្នំពេញ។ ប៉ុន្តែរហូតមកដល់ពេលនេះ លោកថា មិនទាន់ឃើញមានអាជ្ញាធរចេញមកដោះស្រាយ ឬឆ្លើយតបតាមការស្នើសុំរបស់ពួកគេនៅឡើយ។
ករណីនេះ លោកព្រមានថា បើអាជ្ញាធរនៅតែមិនចេញមកដោះស្រាយទេ នោះពួកគាត់ នឹងនាំគ្នាដើរហែក្បួនទៅសាកលវិទ្យាល័យភូមិន្ទភ្នំពេញ ក្រសួងអប់រំ និងក្រសួងមហាផ្ទៃ ដើម្បីទាមទារឱ្យស្ថាប័នរដ្ឋទាំងនោះ ជួយឆ្លើយតប និងដោះស្រាយតាមសំណើរបស់ពួកគេ នាពេលឆាប់ៗខាងមុខនេះ។
លោកលើកឡើងថា៖ «បើសិនជាមិនទាន់មានដំណោះស្រាយទេ ការងារដែលយើងត្រូវធ្វើថ្ងៃក្រោយ គឺយើងចង់ធ្វើបែបជាដង្ហែជាក្បួនសុំដើរទៅផ្លូវណាៗ ឬក៏អាចយើងដង្ហែក្បួនខ្លះ ទៅកាន់ក្រសួងមហាផ្ទៃ ឬក្រសួងអប់រំតែម្តង។ នេះជាការព្រាងទុករបស់យើង គឺយើងអត់ចង់ធ្វើនៅទីលានប្រជាធិបតេយ្យបន្តទៀតទេ គឺយើងចង់ធ្វើការដង្ហែជាក្បួនវិញ តែធ្វើថ្ងៃណា យើងមិនទាន់ច្បាស់ទេ ចាំយើងពិភាក្សាគ្នាសិន»។
វីអូឌី មិនអាចសុំការបំភ្លឺពីអភិបាលរងរាជធានីភ្នំពេញ លោក កើត ឆែ និងអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេ នៅរសៀលថ្ងៃអាទិត្យនេះ។
ចំណែក អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា និងអ្នកនាំពាក្យក្រសួងមហាផ្ទៃ លោក ខៀវ សុភ័គ ក៏មិនអាចទាក់ទងបានដែរ នៅរសៀលថ្ងៃដដែលនេះ។
កាលពីសប្តាហ៍មុន រដ្ឋបាលរាជធានីភ្នំពេញ បានសម្រេចអនុញ្ញាតឱ្យក្រុមយុវជន ធ្វើបាតុកម្មនៅទីលានប្រជាធិបតេយ្យ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាម នៅសាកលវិទ្យាល័យភូមិន្ទភ្នំពេញ នៅថ្ងៃទី២៤ និង ២៥ ខែធ្នូ ឆ្នាំ២០២២ វេលាម៉ោង ៦ព្រឹក រហូតដល់ម៉ោង ៦ល្ងាច ដោយដាក់កំហិតឱ្យអ្នកចូលរួមក្រោម ២០០នាក់ តែប៉ុណ្ណោះ។
ការស្នើសុំធ្វើបាតុកម្មរបស់ក្រុមយុវជនទាំងនេះ ធ្វើឡើងក្រោយពីក្រសួងអប់រំ យុវជន និងកីឡា គ្រោងបង្កើតអាគារសិក្សាភាសាវៀតណាម នៅសាកលវិទ្យាល័យភូមិន្ទភ្នំពេញ ខណៈក្រសួងមហាផ្ទៃ បានក្រើនរំឭកដល់មន្ត្រីក្រោមឱវាទ និងវិស័យឯកជនទទួលស្គាល់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្ត សម្រាប់បម្រើក្នុងជីវភាពប្រចាំថ្ងៃ បន្ទាប់ពីរកឃើញថា មន្ត្រីថ្នាក់ក្រោមជាតិ និងវិស័យឯកជនមួយចំនួន មិនទាន់ទទួលស្គាល់តម្លៃក្នុងការប្រើប្រាស់បណ្ណស្នាក់នៅអចិន្ត្រៃយ៍របស់ជនបរទេសអន្តោប្រវេសន្តទាំងនោះ។
កាលពីថ្ងៃទី ២០ ខែវិច្ឆិកា កន្លងទៅ ប្រធានរដ្ឋសភាវៀតណាម លោក វឿង ឌីញ ហ្វេ បានស្នើឱ្យកម្ពុជាឱ្យបង្កលក្ខណៈងាយស្រួល ទាក់ទងនឹងការផ្តល់ឯកសារស្របច្បាប់ ដល់ប្រជាពលរដ្ឋខ្លួន ដែលតាំងទីលំនៅលើទឹកដីកម្ពុជា ខណៈអ្នកឃ្លាំមើលនិយាយថា ការស្នើដដែលៗនេះ ជារឿងអាក្រក់នៃនយោបាយការទូតរបស់វៀតណាម មកលើកម្ពុជា៕
.
CWCI Cambodia 