The Cambodia Daily
24-3-2022
មេដឹកនាំបក្សកាន់អំណាច លោក ហ៊ុន សែន បានបញ្ជាឱ្យមន្ត្រីទូត និងមន្ត្រីតំណាងកម្ពុជាទាំងអស់នាំគ្នាបោះឆ្នោតប្រឆាំងនឹងការឈ្លានពានរបស់ប្រទេសរុស្ស៊ី លើប្រទេសអ៊ុយក្រែន ដោយលោកចាត់ទុកថាជាការរំលោភបំពានពីសំណាក់ប្រទេសខ្លាំងទៅលើប្រទេសទន់ខ្សោយ ដែលធ្វើឱ្យមានទម្លាប់មិនល្អនៅលើពិភពលោក។
មេដឹកនាំខ្មែរដែលប្ដេជ្ញាកាន់អំណាចមួយជីវិត លោក ហ៊ុន សែន បានលើកឡើងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ២១ នៅថ្ងៃពុធ ទី២៣ ខែមីនា ឆ្នាំ២០២២ ថា កម្ពុជានឹងប្រកាន់ជំហរប្រឆាំងដាច់ខាត ចំពោះការឈ្លានពានពីប្រទេសមួយ ទៅប្រទេសមួយទៀត។
លោក ហ៊ុន សែន អះអាងថា កម្ពុជាតែងអនុវត្តនូវគោលការណ៍ច្បាស់លាស់របស់ខ្លួន ចំពោះការឈ្លានពានមិនមែនបោះឆ្នោតអនុប្បវាទទេ គឺបោះឆ្នោតប្រឆាំងតែម្តង។ លោក ហ៊ុន សែន ថាសំឡេងបោះឆ្នោតតំណាងកម្ពុជា ១១ សំឡេង ត្រូវតែនាំគ្នាបោះឆ្នោតប្រឆាំងនឹងការឈ្លានពាន របស់ប្រទេសរុស្ស៊ីជាដាច់ខាត។
ការអះអាងនេះ ធ្វើឡើងក្នុងគោលបំណងបញ្ជាក់ជំហររបស់កម្ពុជា ដែលត្រូវចូលរួមការបោះឆ្នោតជុំវិញការឈ្លានពានរបស់រុស្ស៊ី ទៅលើប្រទេសអ៊ុយក្រែន ដែលកំពុងតែផ្ទុះឡើងនៅពេលនេះ។
កាលពីថ្ងៃទី០២ ខែមីនា ឆ្នាំ២០២២ កម្ពុជាបានបោះឆ្នោតនៅ អង្គការសហប្រជាជាតិ ដោយចូលរួមជាមួយប្រទេសសហស្ថាបនិកនៃ កិច្ចប្រជុំពិសេសបន្ទាន់ របស់មហាសន្និបាតអង្គការសហប្រជាជាតិ ស្ដីពីស្ថានការណ៍នៅប្រទេសអ៊ុយក្រែន។ ក្នុងនោះ កម្ពុជាស្ថិតនៅក្នុងចំណោមប្រទេសទី១៤១ ដែលបានបោះឆ្នោតថ្កោលទោស និងទាមទារឱ្យរុស្ស៊ី ដកកងទ័ពចេញពីអ៊ុយក្រែន។
ប្រធានក្រុមប្រឹក្សាភិបាលនៃ ចលនាពលរដ្ឋដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៣ មីនា ថា លោកយល់ស្របនឹងជំហរនយោបាយការបរទេស របស់មេដឹកនាំបក្សកាន់អំណាចលោក ហ៊ុន សែន ចំពោះការប្រឆាំងការឈ្លានពានរបស់រុស្ស៊ី លើអ៊ុយក្រែន។
លោក ម៉ែន ណាត លើកឡើងថា ការប្រកាសជំហររបស់មេដឹកនាំខ្មែរបែបនេះ គឺជារឿងត្រឹមត្រូវ ព្រោះថាការប្រកាន់គោលការណ៍ប្រឆាំងនឹងការឈ្លានពានរបស់រុស្ស៊ី លើអ៊ុយក្រែនបែបនេះ ក៏ជាសញ្ញានៃការគាំទ្រកិច្ចព្រមព្រៀងសន្តិភាពទីក្រុងប៉ារីស ដែលបញ្ចៀសពីការឈ្លានពាន របស់បរទេសជិតខាង លើកម្ពុជាផងដែរ។
ប្រធានក្រុមប្រឹក្សាភិបាលនៃចលនាពលរដ្ឋរូបនេះបញ្ជាក់ថា បើទោះបីជាមេដឹកនាំបក្សកាន់អំណាច មិនទាន់អាចលុបចោលនូវកិច្ចព្រមព្រៀងឈ្លានពានខុសច្បាប់ របស់វៀតណាម លើកម្ពុជាភ្លាមៗក៏ដោយ ប៉ុន្តែលោក ហ៊ុន សែន អាចចាប់ផ្តើមប្រើលិខិតុបករណ៍អន្តរជាតិនានា និងកិច្ចព្រមព្រៀងសន្តិភាពទីក្រុងប៉ារីស ដើម្បីទប់ស្កាត់ការឈ្លានពានរបស់បរទេស មកលើកម្ពុជាបន្តទៀត។
ទាក់ទិននឹងបញ្ហានេះ អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់បានលើកឡើងកាលពីពេលថ្មីៗនេះថា ការចូលលុកលុយឈ្លានពានរបស់ប្រទេសរុស្ស៊ី ទៅលើប្រទេសអ៊ុយក្រែន ជាការរំឭកមេដឹកនាំខ្មែរ ឲ្យចេះរក្សា ការពារ ទ្រទ្រង់ និងលើកស្ទួយកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ជាពិសេសកិច្ចព្រមព្រៀងទាក់ទិនទៅនឹងអធិបតេយ្យភាព ឯករាជភាពរបស់កម្ពុជា។
មាត្រា២ នៃធម្មនុញ្ញអង្គការសហប្រជាជាតិ បានចែងថា ក្នុងកិច្ចប្រាស្រ័យទាក់ទងអន្តរជាតិ សមាជិកនៃអង្គការសហប្រជាជាតិ ត្រូវចៀសវាងការពឹងផ្អែកលើការគំរាមកំហែងតាមរបៀបណាមួយលើសមាជិកដទៃ ដែលមិនស្របនឹងវត្ថុបំណងនៃអង្គការសហប្រជាជាតិ។
កាលពីថ្ងៃទី២០ ខែមីនា ឆ្នាំ២០២២ នាយករដ្ឋមន្ត្រីជប៉ុន លោក គីស៊ីដា ហ្វឺមីអូ បានធ្វើដំណើរទស្សនកិច្ចមកកាន់ប្រទេសកម្ពុជា។ មេដឹកនាំនៃប្រទេសទាំងពីរ បានចេញសេចក្តីថ្លែងការណ៍រួមមួយថា ការគំរាមកំហែង ឬការប្រើប្រាស់អាវុធមហាប្រល័យគ្រប់ប្រភេទរបស់រុស្ស៊ី គឺមិនអាចទទួលយកបាននោះទេ ទោះក្នុងកាលៈទេសៈណាក៏ដោយ៕
CWCI Cambodia 