The Cambodia Daily
20-10-2022
ក្រុមអ្នកឃ្លាំមើលសង្គម ជំរុញឲ្យពលរដ្ឋដែលស្រឡាញ់សង្គមជាតិពិតប្រាកដ ត្រូវចេញមុខជួយគ្នាតតាំង ជាមួយក្រុមជនទុច្ចរិត ដែលកេងប្រវ័ញ្ចញើសឈាមរបស់ពលរដ្ឋ ដើម្បីជួយលុបបំបាត់បញ្ហាសង្គម បើមិនដូច្នេះទេ ជនទុច្ចរិតនឹងមានឱកាសបំផ្លាញសង្គមជាតិទាំងមូល ទៅថ្ងៃមុខកាន់តែខ្លាំង។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានសរសេរលើគណនីហ្វេសប៊ុករបស់លោក នៅថ្ងៃទី១៩ តុលា នេះថា អ្នកមានគំនិតទុច្ចរិត បំផ្លាញផលប្រយោជន៍របស់សង្គម ច្រើនតែចូលចិត្តប្រើវិធីសាស្ត្រហិង្សាជាមធ្យោបាយ ដើម្បីសម្រេចគោលដៅទុច្ចរិតរបស់ខ្លួន និងក្រុមខ្លួនជាទីបំផុត ដើម្បីបង្ខំឱ្យអ្នកដទៃ អនុវត្តតាមចេតនាអាក្រក់របស់ពួកគេ។ លើសពីនេះ ពួកគេនឹងប្រើទណ្ឌកម្ម ឬវិធីសាស្ត្រឃោរឃៅផ្សេងៗ ប្រសិនបើអ្នកទាំងឡាយណា អនុវត្តផ្ទុយពីការចង់បានរបស់ខ្លួនថែមទៀត។
លោក សេក សុជាតិ លើកឡើងថា ដើម្បីលុបបំបាត់នូវទង្វើរបស់ជនអគតិទាំងនោះ កិច្ចការជួយសង្គមលុបបំបាត់អំពើទុច្ចរិតទាំងនោះ គឺមានតែអ្នកដែលស្រឡាញ់សង្គមជាតិពិតប្រាកដ ត្រូវចេញមុខជួយគ្នាប៉ុណ្ណោះ ទើបជនដែលមានបំណងអាក្រក់ កេងប្រវ័ញ្ចញើសឈាមរបស់ពលរដ្ឋស្លូតត្រង់ មិនហ៊ានប្រើអំណាចលើសដែនកំណត់ ដែលមានចែងក្នុងច្បាប់។
លោកបន្តថា ការងារបែបនេះ នឹងត្រូវប្រឈមមុខ ជាមួយជនអគតិទាំងនោះយ៉ាងខ្លាំង ដែលអាចនឹងរងនូវការគំរាមកំហែងផងដែរ ប៉ុន្តែប្រសិនបើពលរដ្ឋម្នាក់ៗ មិនជួយលុបបំបាត់បញ្ហាសង្គមទាំងអស់នេះទេ ជនទុច្ចរិតទាំងនោះ នឹងមានឱកាសបំផ្លាញសង្គមជាតិទាំងមូល ទៅថ្ងៃមុខកាន់តែខ្លាំងឡើងៗជាមិនខាន។
ស្ថាបនិកអង្គការអភិវឌ្ឍន៍ផ្នត់គំនិតរូបនេះ បញ្ជាក់ថា កិច្ចការជួយការពារសង្គម គឺជាការងារមួយដែលពលរដ្ឋគ្រប់គ្នា ត្រូវតែចូលរួមទាំងអស់គ្នា ព្រោះថា ពួកគេមិនមែនជាមនុស្សដែលរស់នៅក្រៅសង្គមនោះឡើយ ហើយបញ្ហាដែលកើតមានក្នុងសង្គម គឺជាបញ្ហារបស់ពលរដ្ឋគ្រប់ៗគ្នាទាំងអស់ ប៉ុន្តែបើពួកគេបណ្ដោយឲ្យសង្គមជាតិ កាន់តែទទួលនូវភាពអយុត្តិធម៌កាន់តែខ្លាំងឡើងៗ ទីបំផុតពួកគេ ក៏នឹងក្លាយជាអ្នកទោស ចូលរួមបំផ្លាញសង្គមដូចជនទុច្ចរិតទាំងនោះដែរ។
លោក សេក សុជាតិ បន្តថា ការចូលរួមជួយសង្គម អាចធ្វើឡើងតាមគ្រប់រូបភាព ប៉ុន្តែពលរដ្ឋគ្រប់រូប មិនត្រូវជ្រើសរើសយកការជួយសង្គម តាមអំពើហិង្សាណាមួយនោះទេ គឺត្រូវធ្វើសកម្មភាពស្របទៅតាមរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ដែលមានចែង មកធ្វើជាមូលដ្ឋានគ្រឹះ ក្នុងកិច្ចការរបស់ខ្លួន នោះទើបសង្គមជាតិទាំងមូលរបស់ពួកគេទទួលបានការការពារដោយពេញលេញពិតប្រាកដពីពលរដ្ឋនៃសង្គមនោះ។
ការអះអាងនេះ ធ្វើឡើងស្របពេលដែលច្បាប់កំពូលរបស់កម្ពុជា គឺរដ្ឋធម្មនុញ្ញ និងកិច្ចសន្យាអន្តរជាតិ គឺកិច្ចព្រមព្រៀងសន្តិភាពទីក្រុងប៉ារីស សព្វថ្ងៃនេះត្រូវគេមើលឃើញថា បានរងនូវការរំលោភបំពានយ៉ាងធ្ងន់ធ្ងរ ពីសំណាក់អ្នកមានអំណាច ក្នុងជួររដ្ឋាភិបាលឯកបក្ស ដែលដឹកនាំដោយគណបក្សប្រជាជនកម្ពុជា នៅពេលនេះ។
កម្ពុជា ដែលក្រោមការដឹកនាំរបស់បុរសខ្លាំងកម្ពុជា លោក ហ៊ុន សែន ចាប់តាំងពីឡើងកាន់តំណែងជានាយករដ្ឋមន្ត្រីឆ្នាំ១៩៨៥ មក ត្រូវគេមើលឃើញថា បុរសខ្លាំងដែលត្រូវកងទ័ពវៀតណាម លើកបន្តុបក្រាញអំណាចតត្រកូលរូបនេះ បានប្រើអំណាចហួសដែនកំណត់ រំលោភលើសិទ្ធិមូលដ្ឋានរបស់ពលរដ្ឋ បំពានរដ្ឋធម្មនុញ្ញ រំលោភព្រះរាជតួនាទីព្រះមហាក្សត្រ និងរំលោភលើច្បាប់អន្តរជាតិនានា ដូចជាកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ជាដើម។
ជាក់ស្តែង រដ្ឋធម្មនុញ្ញកម្ពុជា ត្រូវបានបក្សកាន់អំណាចរបស់លោក ហ៊ុន សែន រំលោភបំពានជាញឹកញាប់ តាំងពីឆ្នាំ១៩៩៤ មក ក្នុងនោះ ឆ្នាំ២០០៥ លោក ហ៊ុន សែន បានរំលោភរដ្ឋធម្មនុញ្ញយ៉ាងធ្ងន់ធ្ងរ ដោយការកែប្រែមាត្រា២ ដែលបានចែងពីការប្រើប្រាស់ផែនទីបោន ខ្នាត ១/១០០០០០ {១លើ ១០០ពាន់} ទៅជាផែនទីខុសច្បាប់ថ្មីខ្នាត ១/២៥០០០ (១លើ ២៥ពាន់) តាមការចង់បានរបស់វៀតណាម។
បន្ថែមពីនេះ មាត្រា៥៥ នៃរដ្ឋធម្មនុញ្ញ ដែលបានចែងពីការលុបកិច្ចព្រមព្រៀងខុសច្បាប់នានា ជាមួយបរទេសជិតខាង ក៏ត្រូវលោក ហ៊ុន សែន រំលោភបំពានថែមទៀត ដោយការបង្កើតសន្ធិសញ្ញាបំពេញបន្ថែមឆ្នាំ២០០៥ ដើម្បីធានាសុពលភាពកិច្ចព្រមព្រៀងខុសច្បាប់នានា ដែលបានចុះហត្ថលេខាកាត់ទឹកដី ឱ្យប្រទេសវៀតណាមតាំងពីអំឡុងទសវត្សរ៍ឆ្នាំ៨០ មក។
ដោយឡែកកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ក៏ត្រូវលោក ហ៊ុន សែន បដិសេធចោលទាំងស្រុង ក្រោមហេតុផលថា កិច្ចព្រមព្រៀងនេះអស់សុពលភាព ក្រោយអ៊ុនតាក់ (UNTAC) ដកចេញពីកម្ពុជាកាលពី ៣០ឆ្នាំមុនមកម្ល៉េះ។
យ៉ាងណាក៏ដោយ កាលពីថ្ងៃទី២៩ ខែធ្នូ ឆ្នាំ២០២១ លោក ហ៊ុន សែន គំរាមថា ក្រុមណាក៏ដោយ ដែលប៉ះពាល់ដល់រដ្ឋធម្មនុញ្ញ ដែលជាច្បាប់កំពូលរបស់ជាតិ កងកម្លាំងប្រដាប់អាវុធ មានតួនាទីជាចាំបាច់ ត្រូវតែកម្ទេចក្រុមនោះចោលជាបន្ទាន់ ដោយគ្មានករណីលើកលែងដាច់ខាត៕
.