Monthly Archives: September 2017

អាជ្ញាធរខ្មែរ-យួន ​បោះ​បង្គោល​តម្រុយ​ព្រំដែន ​ចូល​ដីខ្មែរ ដីស្រែ​ពលរដ្ឋ ជា​ច្រើន​ហិកតារ នៅឃុំ/ស្រុកចន្ទ្រា ខេត្តស្វាយរៀង​

1917632_10153812839868210_7957888005163071509_n

(ដោយ វិទ្យុអាស៊ីសេរី, 2017-09-2)៖ ពលរដ្ឋ​រស់នៅ​ឃុំ​ចន្ទ្រា ស្រុក​ចន្ទ្រា ខែត្រ​ស្វាយរៀង ​ចាត់​ទុក​ការ​បោះ​តម្រុយ​ព្រំដែន​ លេខ ១៩៨ និង ១៩៩ កាល​ពី​ពេល​ថ្មីៗ​នេះ​ថា ចូល​ដី​ខ្មែរ​រាប់រយ​ហិកតារ ដែល​ភាគច្រើន​ជា​ដីស្រែ​ពលរដ្ឋ ​នៅ​តំបន់​នោះ។ អ្នកភូមិ​មួយ​ចំនួន​ ដែល​បាត់បង់​ដីស្រែ ហាក់​ខ្លាចរអា​ ក្នុង​ការ​ប្ដឹង​ករណី​នេះ​ ទៅ​អាជ្ញាធរ​រដ្ឋាភិបាល ​ឲ្យ​ជួយ​ដោះស្រាយ ព្រោះ​បារម្ភ​ខ្លាច​អាជ្ញាធរ​ចោទ​ថា ជា​មនុស្ស​របស់​គណបក្ស​ប្រឆាំង។

តម្រុយ​ព្រំដែន​លេខ ១៩៨ និង​១៩៩ ​ថ្មី ដែល​ទើប​បោះ​កាលពី​សប្ដាហ៍​មុន ឋិត​នៅ​ភូមិ​គោក​តែក ឃុំ​ចន្ទ្រា ស្រុក​ចន្ទ្រា ខែត្រ​ស្វាយរៀង​ បាន​ក្លាយ​ជា​បញ្ហា​ក្ដៅ​គគុក របស់​ពលរដ្ឋ​ច្រើន​គ្រួសារ ​រស់នៅ​តំបន់​នោះ ដែល​ពួកគាត់​ចាត់ទុកថា តម្រុយ​ព្រំដែន​នោះ រំកិល​ចូល​ដី​ខ្មែរ​រាប់រយ​ហិកតារ តាម​បណ្ដោយ​ព្រំដែន​ច្រើន​គីឡូម៉ែត្រ ត្បិត​បង្គោល​ព្រំដែន​ចាស់​ គឺ​ឋិត​នៅ​ឆ្ងាយ​ពី​បង្គោល​ព្រំដែន​បច្ចុប្បន្ន

ពលរដ្ឋ​រស់នៅ​ឃុំ​ចន្ទ្រា​ ថ្លែង​មិន​បញ្ចេញ​ឈ្មោះ ឲ្យ​ដឹង​នៅ​ថ្ងៃទី២៨ កញ្ញា ឆ្នាំ២០១៧ នេះថា ការ​បោះ​តម្រុយ​ព្រំដែន​កាលពី​ថ្ងៃ​ទី២៣ កញ្ញា​កន្លងទៅ​ថ្មីៗ​នេះ គឺ​មិន​មាន​តម្លាភាព​នោះ​ទេ ពោល​បាន​ខិតចូល​ដីស្រែ​ចម្ការ​ពលរដ្ឋ​ច្រើន​គ្រួសារ។ លោក​ថា ក្រៅពី​អាជ្ញាធរ​ប្រទេស​ទាំងពីរ បោះ​បង្គោល​ចូល​ដី​ខ្មែរ​ក្ដី អាជ្ញាធរ​វៀតណាម បាន​ហាមឃាត់​មិន​ឲ្យ​ពលរដ្ឋ​ខ្មែរ​ ធ្វើ​សកម្មភាព​ជីក​កាយ​ដី នៅ​តំបន់​ជាប់​ខ្សែបន្ទាត់​ព្រំដែន​នោះ​ទេ ដោយ​អះអាង​ថា ជា​តំបន់​ហាមឃាត់ ឬ​តំបន់​ស។ លោក​ អះអាង​ថា ដីស្រែ​របស់​អ្នកភូមិ​ខ្លះ​មាន​ទំហំ ២​ ហិកតារ រហូតដល់ ៥ ​ហិកតារ បាន​កាន់កាប់ និង​អាស្រ័យ​ផល​ជា​បន្តបន្ទាប់ តាំងពី​ឆ្នាំ​១៩៧៩ ​មក៖ «បើ​និយាយ​បោះ​ចូល​គឺ​មិន​តិច​គ្រួសារ​ទេ​ច្រើន​ណាស់ ប៉ះពាល់​ដី​ពលរដ្ឋ​ នៅ​តាម​បណ្ដោយ​ព្រំដែន​ច្រើន​ដែរ។ អា​ហ្នឹង​វា​ចូល​រាប់រយ​ហិកតារ ខ្សែ​ក្រវាត់​ព្រំដែន​ គិត​ជា​គីឡូម៉ែត្រ ប្រហែល​ចូល​ ១០ ​គីឡូ​ដី​ជាង»

បុរស​ដដែល​បន្ត​ថា នៅ​ឃុំ​ចន្ទ្រា នៅ​ចំណុច​ចំពុះ​ទារ អាជ្ញាធរ​វៀតណាម ធ្លាប់​បាន​ស្ថាបនា​ផ្លូវ​ក្រវាត់​ព្រំដែន​ពុះ​យក​ដី​ខ្មែរ​ជាង ៥០០​ហិកតារ កាលពី​ឆ្នាំ២០១៥ ដែល​ឋិត​នៅ​ចន្លោះ​បង្គោល​ព្រំដែន​លេខ ១៩៦ និង ១៩៧។ លោក​ថា ដី​ខ្មែរ​របូត​ចូល​ទៅ​វៀតណាម​នេះ អាជ្ញាធរ​កម្ពុជា​ហាក់​ធ្វើ​មិន​ដឹង​មិន​ឮ បើ​ទោះ​បី​ជា​ពលរដ្ឋ​ខ្មែរ​ប្ដឹង​ផ្ដល់​រឿង​ក្ដី​៖ «ខ្ញុំ​យល់​ឃើញ​ថា មិន​មាន​តម្លាភាព​រវាង​ខ្សែបន្ទាត់​ព្រំដែន​រវាង ប្រទេស​ហ្នឹង​ប្រទេស​ដែល​នៅ​ជាប់​ខាង​គ្នា បើ​និយាយ​ពី​ការ​សោកស្ដាយ​វា​ហួស​នឹង​និយាយ»។

ជំទប់​ទី ២ ឃុំ​ចន្ទ្រា​មកពី​គណបក្ស​សង្គ្រោះ​ជាតិ លោក ឃុត ថៃហេង ទទួល​ស្គាល់​ថា ការ​បោះ​តម្រុយ​ព្រំដែន​នៅ​តំបន់​នោះ​អាច​មាន​ភាព​មិន​ប្រក្រតី ខណៈ​អាជ្ញាធរ​នៃ​ប្រទេស​ទាំង​ពីរ​ ហាក់​ប្រញាប់ប្រញាល់​បោះ​យ៉ាង​លឿន ស្រប​ពេល​ដែល​កម្ពុជា ​កំពុង​ចម្រូងចម្រាស​រឿង​វិបត្តិ​នយោបាយ​។ លោក​ថា អាជ្ញាធរ​កម្ពុជា និង​នគរបាល​ការពារ​ព្រំដែន បាន​លាក់បាំង​ព័ត៌មាន​ ស្ដីពី​ការ​បោះ​តម្រុយ​ព្រំដែន ​នៅ​តំបន់​នោះ ព្រោះ​អាជ្ញាធរ​បាន​រារាំង​លោក និង​ពលរដ្ឋ​មួយ​ចំនួន​ មិន​ឲ្យ​ចុះទៅ​តំបន់​នោះ ក្រោម​ហេតុផល​ការពារ​សុវត្ថិភាព៖ «ពលរដ្ឋ​ក៏​មិន​សុខចិត្ត​ដែរ​ចំណុច​អស់ហ្នឹង ខាង​ខ្ញុំ​ក៏​មិន​សុខចិត្ត​ដែរ តែ​រឿង​កិច្ចការ​អស់ហ្នឹង ខ្ញុំ​និយាយ​ថ្នាក់​ឃុំ និង​ថ្នាក់​ស្រុក​ដែរ​គេ​ថា គេ​មាន​គណៈកម្មការ ​គេ​ដោះស្រាយ​ហើយ មិនបាច់​លោក​ឯង​លូក​ដៃ​រញ៉េរញ៉ៃ»។

ប្រធាន​ប្រតិបត្តិ​គណបក្ស​សង្គ្រោះ​ជាតិ ខែត្រ​ស្វាយរៀង លោក ម៉ៅ វិបុល ឲ្យ​ដឹង​ថា ការ​បោះ​តម្រុយ​ព្រំដែន​គួរ​តែ​មាន​ការ​ចូលរួម​គ្រប់​ភាគី ទាំង​ពលរដ្ឋ រដ្ឋាភិបាល សង្គម​ស៊ីវិល និង​គណបក្សប្រឆាំង​ដើម្បី​បញ្ជាក់​ពី​ភាព​ត្រឹមត្រូវ ក៏​ប៉ុន្តែ​បែរជា​អាជ្ញាធរ​រារាំង និង​ហាមឃាត់​អាជ្ញាធរ​ឃុំ​ មកពី​គណបក្ស​ប្រឆាំង ​មិន​ឲ្យ​ចុះទៅ​តំបន់​នោះ​ទៅវិញ៖ «បើ​យើង​នៅតែ​បិទបាំង​មានន័យថា បញ្ហា​នៅតែ​មន្ទិល​សង្ស័យ​រហូត។ ក្នុង​នាម​ខ្ញុំ​ពលរដ្ឋ ក៏​ដូចជា​គណបក្សប្រឆាំង​ សំណូមពរ​ថា រដ្ឋាភិបាល​ មានការ​សហការ​ទាំងអស់​គ្នា​ទៅ ដើម្បី​បំបាត់​មន្ទិល​ទាំងអស់​គ្នា កុំ​ឲ្យ​ដោល​អ្នកនេះ​អ្នកនោះ»។

កិច្ចប្រជុំ​លើក​ទី​៩ ស្ដីពី​កិច្ច​សហប្រតិបត្តិការ និង​ការ​អភិវឌ្ឍ​រវាង​បណ្ដា​ខែត្រ​ជាប់​ព្រំដែន​កម្ពុជា​-​វៀតណាម កាលពី​ថ្ងៃ​ទី​១៥ ខែ​មីនា បាន​វាយ​តម្លៃ​ថា ការកំណត់​ខណ្ឌសីមា និង​បោះ​បង្គោល​ព្រំដែន​គោក​រវាង​ប្រទេស​ទាំងពីរ​រហូតមកដល់​បច្ចុប្បន្ន​នេះ សម្រេច​បាន​ប្រមាណ ៨៤ភាគរយ។ ភាគី​ទាំងពីរ​ក៏​ប្រកាស​ថា នឹង​ខិតខំ​គ្រប់គ្រង​ព្រំដែន​ត្រឹមត្រូវ​តាម​សន្ធិសញ្ញា និង​ការព្រមព្រៀង​ស្ដីពី​ព្រំដែន​ដែល​ប្រទេស​ទាំង​ពីរ​បាន​ចុះហត្ថលេខា។ ក្នុង​ករណី​មាន​ហេតុការណ៍ និង​បាតុភាព​អ្វីមួយ​កើតឡើង​នៅ​តំបន់​ព្រំដែន បណ្ដា​ខែត្រ​ជាប់​ព្រំដែន​ត្រូវ​ពិភាក្សា​គ្នា និង​សហការ​ដោះស្រាយ​ភ្លាម ដោយ​មិន​ទុក​ឲ្យ​បញ្ហា​រីក​រាលដាល​បង្ក​ផល​ប៉ះពាល់​ដល់​ទំនាក់ទំនង ប្រពៃណី​ល្អ​រវាង​ប្រទេស​ទាំងពីរ និង​បង្ក​ការ​រាំងស្ទះ​ដល់​ការងារ​ខណ្ឌសីមា និង​បោះ​បង្គោល​ព្រំដែន​ឡើយ ដោយ​ឈរ​លើ​ស្មារតី​យោគយល់​គ្នា​ទៅ​វិញ​ទៅ​មក និង​សន្តិវិធី។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុ​ជា លោក សន ជ័យ ផ្ដល់​ទស្សនៈ​ថា អាជ្ញាធរ​រដ្ឋាភិបាល គួរ​ដោះស្រាយ​បញ្ហា​ជូន​ពលរដ្ឋ​រស់នៅ​តាម​ព្រំដែន​ជា​មុន​សិន មុន​នឹង​បន្ត​បោះ​បង្គោល និង​បោះតម្រុយ ព្រំដែន​ជៀសវាង​មានការ​ប្ដឹង​ផ្ដល់​រឿង​នេះ​កាន់តែ​វែងឆ្ងាយ​។ លោក​ថា បើ​ការ​បោះ​តម្រុយ​ព្រំដែន​មាន​ភាព​ចម្រូង​ចម្រាស់​ជាមួយ​ពលរដ្ឋ និង​បិទបាំង​ព័ត៌មាន​មិន​ឲ្យ​សាធារណជន​ដឹង​ឮ លោក​ចាត់ទុកថា ករណី​នេះ​នឹង​ក្លាយ​ជា​ជំងឺ​រ៉ាំរ៉ៃ​រវាង​ពលរដ្ឋ និង​រដ្ឋាភិបាល​។ លោក​ថា ការ​បោះ​តម្រុយ​ព្រំដែន អាជ្ញាធរ​មិន​គួរ​ប្រញាប់​ពេក​ទេ បើ​ការ​បោះ​នោះ​នាំ​ឲ្យ​ខាត​ប្រយោជន៍​ពលរដ្ឋ​ខ្មែរ៖ «សម្រាប់​ខ្ញុំ​យល់ថា នៅ​ពេល​ដែល​មាន​ព័ត៌មាន លេចឮ​ពី​ការ​មិន​ពេញចិត្ត​របស់​ពលរដ្ឋ​ទៅលើ​សកម្មភាព​ការងារ​អាជ្ញាធរ​មូលដ្ឋាន ក៏ដូចជា​រដ្ឋាភិបាល រដ្ឋាភិបាល​គួរតែ​ស្ទុះស្ទា ទៅ​ពិនិត្យ​មើល និង​ឆ្លើយតប»។

យ៉ាងណា ពលរដ្ឋ មន្ត្រី​សង្គម​ស៊ីវិល និង​មន្ត្រី​បក្ស​ប្រឆាំង យល់​ថា ការ​បោះ​បង្គោល​ព្រំដែន និង​តម្រុយ​ព្រំដែន​កម្ពុជា កំពុង​នៅ​មាន​ភាព​ចម្រូងចម្រាស​ច្រើន ដោយសារ​ពុំ​ទាន់​មាន​ឯកភាព​ជាតិ​ផ្ទៃក្នុង ដែល​ធ្វើ​ឲ្យ​រដ្ឋាភិបាល​បន្ត​ទទួលរង​នូវ​ការរិះគន់ និង​មាន​ការ​តវ៉ា​ពី​ប្រជាពលរដ្ឋ ដោយសារ​មិន​មាន​តម្លាភាព និង​ចោទ​ថា បាត់បង់​ដី ដោយ​បង្គោល​ខិត​ចូល​មក​ក្នុង​ដី​ខ្មែរ​ជាដើម៕

 

.

Advertisements

Brad Adams ថា សុខ ឥសាន ជាអ្នកនាំពាក្យបក្សកាន់អំណាច ល្ងិតល្ងង់ ខ្វះចំណេះដឹងទូទៅ

f0bad31ទាំងលោក សុខ ឥសាន អ្នកតំណាងរាស្រ្ត ជាអ្នកនាំពាក្យបក្សកាន់អំណាច និងអ្នកគាំទ្រ លោក ហ៊ុន សែន នាយករដ្ឋមន្រ្តីទំនើង តែងតែនាំគ្នាបន្ទរ នូវអ្វីដែលលោក ហ៊ុន សែន និយាយ និងចំណាត់ការការងារ ទោះបីស្របច្បាប់ ឬខុសច្បាប់ក្តី។ ថ្មីៗនេះលោក សុខ ឥសាន និយាយចំអកឡកលើយ ឲ្យលោក Brad Adams នៃអង្គការសិទ្ធិមនុស្ស Human Rights Watch និងវិទ្យុរបស់អាមេរិក (ភាសាខ្មែរ) រឿងការចាប់ឃាត់ខ្លួន តំណាងរាស្រ្តអាមេរិក រយៈពេលខ្លី កាលពីប៉ុន្មានថ្ងៃមុននេះ។ ប៉ុន្តែ លោក Brad Adams ឆ្លើយតបវិញថា សុខ ឥសាន ជាអ្នកនាំពាក្យល្ងិតល្ងង់ ខ្វះចំណេះដឹងទូទៅ។ (អត្ថបទបន្ថែមដោយ ម៉ែន ណាត) /២៨ កញ្ញា ២០១៧


មន្ត្រី​នៅ​ក្បែរ​លោក ហ៊ុន សែន ចូល​ចិត្ត​និយាយ​សម្ដី​អត់​បាន​ការ

(ដោយ អាស៊ីសេរី, 2017-09-27)
មន្ត្រី​ជាន់ខ្ពស់​គណបក្ស​ប្រជាជន​កម្ពុជា ចំអក​ដាក់​មន្ត្រី​ជាន់ខ្ពស់​នៃ​អង្គការ​សិទ្ធិ​មនុស្ស អ្នក​វិភាគ​ រួម​ទាំង​បណ្ដាញ​ផ្សាយ​ព័ត៌មាន​ផង​ថា នៅ​ស្ងៀម​ស្ងាត់ ពេល​មាន​ការ​ចាប់​ខ្លួន​តំណាងរាស្ត្រ​អាមេរិក កាលពី​ពេល​ថ្មីៗនេះ​។ ប៉ុន្តែ មន្ត្រី​ជាន់ខ្ពស់​នៃ​អង្គការ​សិទ្ធិ​មនុស្ស​អន្តរជាតិ ថា​ការ​ចំអក​បែប​នេះ បង្ហាញ​ថា មន្ត្រី​នៅ​ក្បែរ​លោក​នាយករដ្ឋមន្ត្រី​ ហ៊ុន សែន មាន​ចំណេះដឹង​ទូទៅ​នៅ មាន​កម្រិត​នៅឡើយ។

នាយក​ប្រតិបត្តិ​ទទួល​បន្ទុក​កិច្ចការ​តំបន់​អាស៊ី របស់​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) ស្នើ​ឲ្យ​មន្ត្រី​នាំ​ពាក្យ​គណបក្ស​កាន់​អំណាច លោក សុខ ឥសាន សិក្សា​ឲ្យ​បាន​លម្អិត និង កុំ​ហា​ស្ដី​អ្វី​ ឲ្យ​រួច​តែមាត់ ព្រោះ​ការ​និយាយ​ខ្វះ​ការ​ត្រិះរិះ​ពិចារណា​ល្អិតល្អន់​បែបនេះ វា​នាំ​ឲ្យ​ឃើញ​ពី​ភាព​ខ្វះ​ព័ត៌មាន​គ្រប់​ជ្រុង​ជ្រោយ​របស់​មន្ត្រី​ទាំងនោះ តែប៉ុណ្ណោះ៖ «មន្ត្រី​រូប​នេះ ជា​គំរូ​នៃ​មន្ត្រី​ក្នុង​ជួរ​ថ្នាក់​ដឹកនាំ របស់​​គណបក្ស​ប្រជាជន​កម្ពុជា ដែល​នៅ​ហែហម​លោក​ ហ៊ុន​ សែន គឺ​ពូកែ​ខាង​និយាយ​សម្ដី​ឥត​បាន​ការ ខំ​ប្រឹង​ប្រៀបធៀប​អ្វី​ដែល​កើតឡើង​នៅ​សហរដ្ឋអាមេរិក ទៅ​នឹង​ស្រុក​ខ្មែរ។ បើ​គាត់​មិន​ចង់​ក្លាយ​ជា​មនុស្ស​ខ្វះ​ការ​យល់​ដឹង​ជាង​នេះ​ទៀត​ទេ គាត់​គួរ​បើក​មើល​គេហទំព័រ​ របស់​អង្គការ​ឃ្លាំមើល​សិទ្ធិមនុស្ស​អន្តរជាតិ​ផង ថា​តើ​អង្គការ​នេះ និយាយ​អ្វី​ខ្លះ​ អំពី​បញ្ហា​សិទ្ធិ​មនុស្ស​នៅ​សហរដ្ឋអាមេរិក។ យើង​មិន​ដែល​នៅ​ស្ងៀម​ទេ ពេល​សហរដ្ឋអាមេរិក រំលោភ​បទដ្ឋាន​សិទ្ធិមនុស្ស​អន្តរជាតិ»។

កាល​ពី​ថ្ងៃ​ទី​១៩ ខែ​កញ្ញា កន្លង​ទៅ​នេះ តំណាងរាស្រ្ត​អាមេរិក​បី​រូប និង​អ្នកនាំពាក្យ​របស់​ក្រុមប្រឹក្សា​ក្រុង​ញូវយ៉ក (New York) ផង ត្រូវ​បាន​ចាប់​ខ្លួន​ភ្លាមៗ បន្ទាប់​ពី​ពួកគាត់​តវ៉ា​ដោយ​អហិង្សា មិនព្រម​ចាក​ចេញ​ពី​ផ្លូវ​លេខ​៥ នៅមុខ​អគារ​របស់​លោក ដូណាល់ ត្រាំ (Donald Trump) នៅ​ទីក្រុង​ញូវយ៉ក។ ពួកគាត់​តវ៉ា​ ជំទាស់​នឹង​សេចក្ដី​សម្រេច​របស់​លោក​ប្រធានាធិបតី ដូណាល់ ត្រាំ ដែល​បញ្ជា​ឲ្យ​បញ្ជូន​កូនៗ​របស់​​ជន​អន្តោប្រវេសន៍ ត្រឡប់​ទៅ​ស្រុក​កំណើត​ខ្លួន​វិញ។

ប្រតិកម្ម​របស់​នាយក​ប្រតិបត្តិ​ទទួល​បន្ទុក​កិច្ចការ​តំបន់​អាស៊ី​ នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ​នេះ ធ្វើ​ឡើង​ក្រោយពី​លោក សុខ ឥសាន កាលពី​ថ្ងៃ​ទី ២១ ខែ កញ្ញា ថ្លែង​តាម​ប្រព័ន្ធ​តេឡេក្រាម​របស់​គាត់ ដោយ​ចំអក​ដាក់​លោក ប្រ៊ែដ អាដាម ដោយ​ហៅ​លោក ថា​ជា៖ «មេ​ក្លោង​សិទ្ធិមនុស្ស ទៅ​ណា​បាត់​អស់​ហើយ​ មាន​បាន​បើក ភ្នែក​មើល​សិទ្ធិមនុស្ស​នៅ សហរដ្ឋអាមេរិក ដែរ​ប្ញទេ

លោក សុខ ឥសាន សរសេរ​បន្ត​ ថា​តំណាងរាស្ត្រ​បីរូប ដែល​ត្រូវ​បាន​ចាប់​ខ្លួន​នោះ គឺ​ជា​តំណាងរាស្ត្រ​ពី​គណបក្ស​សាធារណៈ​រដ្ឋ​ របស់​លោក ដូណាល់ ត្រាំ និង​ត្រូវ​បាន​ចាប់​ខ្លួន​ ទាំង​មាន​អភ័យឯកសិទ្ធិសភា​ទៀត​ផង។ ដោយ​អត់​ទ្រាំ​នឹង​ការ​ឆ្លើយ​តប​មិន​ទាន់​ពេល លោក សុខ ឥសាន បាន​ថ្លែង​ប្រាប់​កាសែត​ក្នុង​ស្រុក ដែល​ស្និទ្ធ​នឹង​រដ្ឋាភិបាល​លោក ហ៊ុន សែន នៅ​ថ្ងៃទី២៤ ខែ​កញ្ញា​ ថែម​ទៀត ដោយ​ម្ដង​ណេះ វាយប្រហារ​រហូត​ដល់​វិទ្យុ​អាស៊ីសេរី ដែល​មិន​បាន​ផ្សាយ​រឿង​ចាប់​តំណាងរាស្រ្ត​នៅ​អាមេរិក​នេះ។ លោក សុខ ឥសាន ត្រូវ​បាន​សារព័ត៌មាន​នោះ​ ដកស្រង់​សម្ដី​ថា៖ «នៅ​ពេល​ចាប់​តំណាងរាស្ត្រ​នៅ​កម្ពុជា វិទ្យុ​អាស៊ីសេរី ក៏​ដូច​វិទ្យុ​នានា​ផ្សាយ​ឥត​ឈប់ ដោយ​សង្កត់ធ្ងន់​ថា រំលោភ​អភ័យឯកសិទ្ធិ​សភា និង​រដ្ឋធម្មនុញ្ញ។ ឥឡូវ​ដល់​មាន​ការ​ចាប់​តំណាងរាស្ត្រ​អាមេរិក អត់​មាន​ឮ​ការ​ផ្សាយ​ពី​វិទ្យុ​អាស៊ីសេរី និង​វិទ្យុ​នានា​ទេ។ នេះ​បាន​ហៅ​ថា​វិទ្យុ​ឯករាជ្យ និង​មាន​វិជ្ជាជីវៈ​មែន។ តើ​អស់​លោក​បណ្ឌិត និង​អ្នក​វិភាគ​នយោបាយ មាន​បាន​មើល​ឃើញ និង​ដឹង​ពី ព័ត៌មាន​ចាប់​ខ្លួន​តំណាងរាស្ត្រ នៅ​សហរដ្ឋអាមេរិក​ដែរ​ឬទេ បាន​ជា​ស្ងាត់ឈឹង​ ដូច​ចោរ​លួច​សេះ​អ៊ីចឹង

លោក ប្រ៊ែដ អាដាម បញ្ជាក់​ថា​អង្គការ​របស់​លោក មិន​បាន​និយាយ​អ្វី អំពី​ការ​ចាប់​តំណាងរាស្ត្រ​របស់​សហរដ្ឋ​អាមេរិក​នោះ​ទេ ព្រោះ​ករណី​ចាប់​ខ្លួន​អ្នក​ទាំងនេះ វា​គ្រាន់​តែ​ជា​បទ​ល្មើស​ធម្មតា នៃ​ការ​ធ្វើ​ឲ្យ​កក​ស្ទះ​ចរាចរ​លើ​ផ្លូវ​សាធារណៈ​ប៉ុណ្ណោះ៖ “ការ​ចាប់​ខ្លួន​តំណាងរាស្ត្រ​ទាំងនេះ មិន​មែន​ជា​រឿង​រំលោភ​បទដ្ឋាន​សិទ្ធិ​មនុស្ស​អន្តរជាតិ​នោះ​ទេ​។ ប៉ុន្តែ ក្រោម​ការដឹកនាំ​របស់​លោក​ប្រធានាធិបតី ដូណាល់ ត្រាំ បាន​រំលោភ​បទដ្ឋាន​សិទ្ធិ​មនុស្ស​អន្តរជាតិ ជា​ហូរហែ ដូចជា​ពាក់ព័ន្ធ​នឹង​ជនអន្តោប្រវេសន៍ និង ជនភៀសខ្លួន​ជាដើម។ ក្នុង​ករណី​ទាំងនេះ អង្គការ​របស់​យើង​ មិន​ដែល​នៅ​ស្ងៀម​នោះ​ទេ។ គ្មាន​នរណា​ម្នាក់​នៅ​ក្នុង​ជួរ​រដ្ឋាភិបាល​អាមេរិក ថា​អង្គការ​យើង​នៅ​ស្ងៀម មិន​តវ៉ា​រឿង​នេះ​នោះ​ទេ» Read more

តារួមរិត អតីតអ្នកសរសេរទស្សនាវដ្តី BMD ស្តេចតា សីហនុ ចង់ឃើញ DNA របស់ ហ៊ុន ម៉ាណែត ថាជាកូនរបស់ ហ៊ុន សែន ឬ ឡេ ឌឹកថូ

22007906_1582137328512666_5224376261417917886_n
(25-9-2017 ដោយ នគរ)
អត្ថបទមួយរបស់លោកតា ងិន ឈន ហៅក្រៅថា «រួមរិត» ដែលគេស្គាល់ថា ជាអតីតអ្នកសរសេរអត្ថបទទស្សនាវដ្តី BMD របស់សម្តេចតា នរោត្តម សីហនុ កាលនៅមានព្រះជន្មនោះ លោកតា បានសរសេរអត្ថបទជាច្រើនដោយដៃ ហើយពេលនេះ យើងសូមលើកយកអត្ថបទមួយ ស្តីពី ហ៊ុន ម៉ាណែត ដែលដើរកំសាន្តនៅអឺរ៉ុប ក្នុងខែកញ្ញា ឆ្នាំ២០១៧ នេះ ចំណាយថវិកាជាតិ ដោយមានស្ថានទូតខ្មែរ ជ្រោមជ្រែងផង ក្នុងបំណងស្វែងរកការគាំទ្រ គណបក្សប្រជាជន CPP របស់ឪពុកខ្លួន ពីខ្មែរក្រៅប្រទេស។ បើតាមច្បាប់ ការប្រើប្រាស់ថវិកាជាតិ ដើម្បីរកប្រយោជន៍ឲ្យ គណបក្សនយោបាយ គឺជាទង្វើខុសច្បាប់

តទៅនេះ សូមចុះផ្សាយអត្ថបទទាំងស្រុងរបស់លោកតា រួមរិត៖
ហ៊ុន ម៉ាណែត មានឪក្បាលព្រែក «យួន»ឡេ ឌឹកថូ និង ហ៊ុន សែន «អាយ៉ងយៀកណាម» ធ្វើដំណើរដល់ទីក្រុងប៉ារីស {ប្រទេសបារាំង} នៅព្រឹកថ្ងៃសុក្រ ទី២២ កញ្ញា {ឆ្នាំ២០១៧}។ តាមពាក្យចចាមអារាម ថ្ងៃបុណ្យភ្ជុំធំ នៅវត្តបាញើស៍ (Bagneuse) ថា បុរសឪពុកក្បាលព្រែក មានគំរោងចែកលុយ ដល់អ្នកមិនទាន់ជាសមាជិក បក្សប្រជាជន ខ្មោចហូ ជីមិញ បង្កើតឲ្យពីឆ្នាំ១៩៥១ ដែលចង់ទៅចូលរួមស្តាប់ កិច្ចប្រជុំ នៅថ្ងៃខាងមុខ ម្នាក់ៗ ៣០០ អឺរ៉ូ តែចាំបាច់ ត្រូវកត់ឈ្មោះនៅស្ថានទទូត

ចំពោះរូបខ្ញុំ ងិន ឈន, រួមរិត សម្តេច សីហនុ ចង់ឮ ចង់ឃើញ ចង់ដឹងឲ្យច្បាស់ តាមវិទ្យាសាស្រ្ត ADN  (ហៅតាមភាសាបារាំង) ឬ DNA (អង់គ្លេស) ពេទ្យថា ឈាម ហ៊ុន សែន និង ហ៊ុន ម៉ាណែត ដូចគ្នា ឬខុសគ្នា ដើម្បីឲ្យអស់រឿងដែល KI-Media ផ្សាយកន្លងទៅថា «ជាកូនយួន ឡេ ឌឹកថូ» រហូតដល់ខ្មែរនៅអាមេរិក ឈ្មោះ Brady Young ត្រូវបក្សសង្គ្រោះជាតិ {CNRP} បណ្តេញចេញ…។

សូមលោកផ្កាយពាសស្មា {ហ៊ុន សែន} បញ្ជាក់ឲ្យច្បាស់ផង។ {ធ្វើនៅ} ថ្ងៃទី២៣ ខែកញ្ញា ឆ្នាំ២០១៧, រួមរិត

21762134_1582475185145547_1526176525344242652_n

កងទ័ព​រដ្ឋាភិបាល ហ៊ុន សែន បង្កើនការគំរាមប្រឆាំងនឹង សហរដ្ឋអាមេរិក

8AA408E8-B3CB-426B-B879-6C21D3EB4AC4_w1023_r1_s

ខណៈ​មេដឹកនាំ​បក្ស​ប្រឆាំង​ត្រូវ​ចាប់​ខ្លួន ពាក់ព័ន្ធ​នឹង​ការ​ចោទ​ប្រកាន់​ថា ​«ក្បត់ជាតិ»​ ​កងទ័ព​ និង​យោធា​កម្ពុជា​ បាន​ចេញ​សេចក្តី​ថ្លែង​ការណ៍​គាំទ្រ​ ប្រសាសន៍​លោក​នាយករដ្ឋមន្រ្តី ​ដោយ​​បង្កើន​ការ​គំរាម​ប្រឆាំង​នឹង ​អាមេរិក។

(VOA, 22-9-2017, ដោយ ស៊ុន ណារិន)
ភ្នំពេញ — កម្តៅ​នយោបាយ​ក្នុង​ប្រទេស​កម្ពុជា​ មាន​ការ​កើន​ឡើង​ ខណៈ​មេដឹកនាំ​បក្ស​ប្រឆាំង​ត្រូវ​ចាប់​ខ្លួន ពាក់ព័ន្ធ​នឹង​ការ​ចោទ​ប្រកាន់​ថា ​«ក្បត់ជាតិ»។ ​ចុង​ក្រោយ​នេះ​ លោក​នាយក​រដ្ឋមន្រ្តី ​ហ៊ុន សែន ​បាន​ចោទ​ថា ​អាមេរិក ​នៅ​ពី​ក្រោយ​គណបក្ស​ប្រឆាំង​ ​និង​មាន​គម្រោង​ផ្តួល​រំលំ​ រដ្ឋាភិបាល​កម្ពុជា​ ​ក៏ប៉ុន្តែ​ការ​លើក​ឡើង​នេះ ​ត្រូវ​បាន​លោក​ ​William Heidt​ ឯក​អគ្គរដ្ឋទូត​អាមេរិក​ប្រចាំ​នៅ​កម្ពុជា​ ​ច្រាន​ចោល។​

កាល​ពី​ពេល​ថ្មីៗ​នេះ ​កងទ័ព​ និង​យោធា​កម្ពុជា​បាន​ចេញ​សេចក្តី​ថ្លែង​ការណ៍​គាំទ្រ​ប្រសាសន៍​លោក​នាយក​រដ្ឋមន្រ្តី ​ដោយបង្កើន​ការ​គំរាម​ប្រឆាំង​នឹង​ អាមេរិក។​

បន្ទាប់​ពី​បិទ​សារព័ត៌មាន​ឯករាជ្យ​ និង​ការ​ចាប់​ខ្លួន​មេ​ដឹកនាំ​គណបក្ស​ប្រឆាំង ​នៅ​កម្ពុជា មន្រ្តី​ជាន់​ខ្ពស់​ ខាង​ទាហាន​ បាន​ចាប់​ផ្តើម​ប្រើប្រាស់​ពាក្យ​សម្តី​ ប្រឆាំង​នឹង​ សហរដ្ឋ​អាមេរិក ​ដែល​នាំឲ្យ​មាន​ការ​ព្រួយ​បារម្ភ​បន្ថែម​ទៀត​ សម្រាប់​អ្នក​រិះគន់​រដ្ឋាភិបាល ​និង​អ្នក​ធ្វើ​ការ​ លើ​ប្រព័ន្ធ​ផ្សព្វផ្សាយ។​

ក្នុង​រយៈ​ពេល​ប៉ុន្មាន​ខែ​ចុងក្រោយ​នេះ ​លោក​នាយក​រដ្ឋមន្រ្តី ​ហ៊ុន សែន ​បាន​បើក​ការ​វាយ​ប្រហារ​លើ​សហរដ្ឋ​អាមេរិក​ជា​បន្ត​បន្ទាប់។ ​ចុងក្រោយ​នេះ​ មាន​ការ​ចោទ​ប្រកាន់​ថា​ អាមេរិក​នៅ​ពី​ក្រោយ​គណបក្ស​សង្រ្គោះជាតិ ​ក្នុង​គម្រោង​ផ្តួល​រំលំ​រដ្ឋាភិបាល​របស់​គណបក្ស​ប្រជាជន​កម្ពុជា។ ​លោក ​ហ៊ុន សែន ​ក៏​បាន​អំពាវនាវ​ឲ្យ​ពលរដ្ឋ​ខ្មែរ ​ក្រោក​ឈរ​ឡើង​ប្រឆាំង​នឹង ​អាមេរិក។​

កាល​ពី​ថ្ងៃ​សុក្រ​ ពួក​មន្រ្តី​ទាហាន​កម្ពុជា ​បាន​សន្យា​«កម្ចាត់​ចោល»​នូវ​បរទេស​ទាំង​ឡាយ​ណា ​ដែល​ពួកគេ​ថា ​មាន​បំណង​ផ្តួល​រំលំ​រដ្ឋាភិបាល ​និង​បង្ក​អសន្តិសុខ​ ក្នុង​ប្រទេស​កម្ពុជា។ ​នេះ​បើ​យោង​តាម​ការ​ចុះ​ផ្សាយ​របស់​សារព័ត៌មាន ​ដែល​ស្និទ្ធ​នឹង​រដ្ឋាភិបាល ​Fresh News។​

ក្នុង​សេចក្តី​ថ្លែង​ការណ៍ ​ដែល​ត្រូវ​បាន​រាយការណ៍​ដោយ​ Fresh News​ កាល​ពី​ថ្ងៃ​សុក្រ​ ​ មេ​បញ្ជា​ការ មេ​បញ្ជា​ការ​រង ​និង​កងទ័ព​រាប់ពាន់​នាក់ ​នៅ​កង​ពលតូច​អន្តរាគមន៍​លេខ១ ​ក្នុង​ខេត្ត​កំពង់ឆ្នាំង ​បាន​ប្រកាស​គាំទ្រ ​និង​អនុវត្ត​ពេញ​ទំហឹង​តាម​ការ​ថ្លែង​របស់​លោក​ ហ៊ុន សែន ​ក្នុង​ការ​កម្ចាត់​បរទេស​ទាំង​ឡាយ​ដែល​ពួកគេ​ថា ​ប៉ុនប៉ង​ឈ្លាន​ពាន​ប្រទេស​កម្ពុជា។​ ក្រុម​កង​ទ័ព​ទាំង​អស់​ ក៏​បាន​ប្តេជ្ញា​«កម្ទេច»​ រាល់​ជន​ទាំង​ឡាយ ​ដែល​ប៉ុនប៉ង​ធ្វើ​ បដិវត្តន៍​ពណ៌ ​ផង​ដែរ។​

សារព័ត៌មាន​ Fresh News ​បាន​ដក​ស្រង់​សម្តី​របស់​លោក​ឧត្តម​សេនីយ៍​ឯក ​ព្រំ ផេង​ មេ​បញ្ជា​ការ​កង​ពលតូច​អន្ដរាគមន៍​លេខ១​ ថា៖​ «យើង​ខ្ញុំ​ទាំង​អស់​គ្នា​ជា​កង​ទ័ព ​ដែល​មាន​កាតព្វកិច្ច​ការពារ​បូរណភាព​ទឹក​ដី ​សូម​គាំទ្រ​ទាំង​ស្រុង​ប្រសាសន៍​របស់​សម្តេច​តេជោ ​ហ៊ុន សែន ​នាយក​រដ្ឋ​មន្រ្តី​នៃ​កម្ពុជា ​និង​ជា​មេដឹកនាំ​ដែល​បាន​ស្រោច​ស្រង់​ប្រទេស​កម្ពុជា​ ចេញ​ពី​ភ្លើង​សង្រ្គាម ​ដោយ​ត្រូវ​រួបរួម​គ្នា​ជា​ធ្លុង​មួយ​ ដើម្បី​កម្ចាត់​ពួក​បរទេស​ឈ្លាន​ពាន»។​

សេចក្តី​ថ្លែង​ការណ៍​របស់​ ពួក​មន្រ្តី​ទាហាន​ទាំង​នោះ​បន្ត​ថា៖​ «ពួក​យើង​ខ្ញុំ​ នឹង​លើក​កម្ពស់​ស្មារតី​ជាតិ​និយម។ ​សូម​ប្តេជ្ញា​ដាច់​ខាត​កម្ទេច​ចោល ​រាល់​ការ​ព្យាយាម​ផ្តួល​រំលំ​កម្ពុជា​ តាម​បដិវត្ដន៍​ពណ៌ ​មិន​អនុញ្ញាត​ឲ្យ​បរទេស​ណា ​រំលោភ​លើ​អធិបតេយ្យ​ភាព​នៃ ​ប្រទេស​កម្ពុជា​បាន​ឡើយ ​ទោះ​ជា​ត្រូវ​លះបង់​ ក្នុង​តម្លៃ​ណា​ក៏​ដោយ»។​

ចំណែក​លោក​ឧត្តម​សេនីយ៍​ឯក ប៊ុន សេង ​មេ​បញ្ជា​ការ​រង​កងទ័ព​ជើង​គោក ​និង​ជា​មេបញ្ជា​ការ​យោធ​ភូមិ​ភាគ​ទី​៥​ក្នុង​ខេត្ត​បាត់ដំបង​ ក៏​ត្រូវ​បាន​រាយ​ការណ៍​ថា​ គាំទ្រ​ការ​ថ្លែង​របស់​លោក​ ហ៊ុន សែន​ ហើយក៏​បាន​ចេញ​សេចក្តី​ថ្លែង​ការណ៍ ​ដូច​លោក​ ព្រំ ផេង ​ផង​ដែរ។​

លោក ​ព្រំ ផេង ​និង​លោក ​ប៊ុន សេង ​ជា​សមាជិក​គណៈកម្មាធិការ​កណ្តាល​របស់​គណបក្ស​ប្រជាជន​កម្ពុជា។ ​នេះ​បើ​យោង​តាម​របាយ​ការណ៍​របស់​អង្គការ​សិទ្ធិ​មនុស្ស​អន្តរជាតិ​ Human Rights Watch ដែល​បាន​ចេញ​ផ្សាយ​កាល​ពី​ឆ្នាំ​២០១៥។​

លោក ​ឈុំ សុជាតិ ​អ្នក​នាំពាក្យ​ក្រសួង​ការពារ​ជាតិ ​បាន​ថ្លែង​ប្រាប់​ VOA​ ថា ​នេះ​ជា​សិទ្ធិ​សេរីភាព​របស់​កង​ទ័ព​ក្នុង​ការ​បញ្ចេញ​មតិ​របស់​ពួក​គេ។ ​លោក​បន្ថែម​ថា ​កម្ពុជា​ប្រឆាំង​ដាច់​ខាត​ និង​មិន​លើក​លែង​ចំពោះ​ជន​បរទេស​ណា ​ដែល​ប្រឆាំង​នឹង​រដ្ឋាភិបាល​របស់​លោក​ ហ៊ុន សែន។ លោក​មាន​ប្រសាសន៍​ថា៖​ «យើង​ស្វាគមន៍​ទាំង​អស់​ជន​បរទេស​ណា ​ដែល​មក​លក្ខណៈ​ទេសចរណ៍​ស្រប​ច្បាប់ ​ដែល​មិន​បង្ក​វិនាស​កម្ម ​និង​អំពី​ខុស​ច្បាប់​នៅ​ស្រុក​ខ្មែរ ​គឺ​យើង​គាំទ្រ​ទាំង​អស់ ​លើក​លែង​តែ​អ្នក​ឯង ​មក​ធ្វើ​អំពើ​ប្រឆាំង​នឹង​រដ្ឋាភិបាល ​ឬ​ប្រឆាំងសន្តិសុខ​ជាតិ ​ឬ​ក៏​ធ្វើ​អំពើ​ល្មើស​ច្បាប់​ផ្សេងៗ។​ អាហ្នឹង​យើង​មិន​គាំទ្រ​ទេ។​ យើង​មាន​ច្បាប់​របស់​យើង»។​ លោក​បាន​បញ្ជាក់​បន្ថែម​ថា ​ស្ថានភាព​សន្តិសុខ​នៅ​កម្ពុជា​បច្ចុប្បន្ន​នេះ​មាន​លក្ខណៈ​ធម្មតា ​ហើយ​រដ្ឋាភិបាល​នឹង​ការពារ​ជន​បរទេស​ទាំង​អស់។​

លោក ​ប៉ុល សារឿន​ អគ្គ​មេ​បញ្ជាការ​កង​យោធពល​ខេមរ​ភូមិន្ទ ​បាន​បដិសេធ​អធិប្បាយ​លើ​សេចក្តី​ថ្លែង​ការណ៍​របស់​មន្រ្តី​ទាហាន​ជាន់​ខ្ពស់​ទាំង​នោះ។​ លោក​បាន​ថ្លែង​ប្រាប់​ VOA​ ថា៖​ «បើ​គេ​គាំទ្រ​ម៉េច ​ឆ្លើយ​តាម​គេ​អីចឹង​ទៅ ​មិន​បាច់​សួរ​ខ្ញុំ​ទេ!»​។

ការ​លើក​ឡើង​របស់​មន្រ្តី​ទាហាន​ទាំង​នោះ ​ធ្វើ​ឡើង​ បន្ទាប់​ពី​លោក​នាយក​រដ្ឋមន្រ្តី​ ហ៊ុន សែន ​បាន​ប្រកាស​ថា ​ជនជាតិ​អាមេរិក​ធ្វើ ​«ចារកម្ម» ​ក្នុង​គម្រោង​ផ្តួល​រំលំ​រដ្ឋាភិបាល ​ហើយ​លោក​បាន​បញ្ជា​ឲ្យ​មាន​ការ​ស៊ើប​អង្កេត​ ជនជាតិ​អាមេរិក​ ដែល​សង្ស័យ​ទាក់ទង​នឹង​អ្វី ដែល​លោក​ថា​ ជាគម្រោង​ឃុបឃិត​ផ្តួល​រំលំ​ រដ្ឋាភិបាល។​ Read more

តើក្រុមចោរ Hacker ដឹកនាំដោយ ហ៊ុន ម៉ាណែត ជាប់ពាក់ព័ន្ធហ្វេសប៊ុកក្លែងក្លាយ ផ្ញើសារអំពីផែនការ​​​ផ្តួលរំលំរដ្ឋាភិបាល និង​សម្លាប់ កឹម សុខា ឬទេ?

267a20d4-d722-4d04-a5d4-fd4c078c563c

ប៉ុន្មានថ្ងៃនេះ មានក្រុមចោរប៉ុនប៉ងលួច (Hackers) គណនីហ្វេសប៊ុក ព្យាយាមច្រើនដង ដែលដឹងបានតាមរយៈសារផ្ញើចូលមក្នុងលេខទូរស័ព្ទ និង អ៊ីម៉េលរបស់យើង។ ក្រុមចោរ Hackers ទាំងនេះ ដឹកនាំដោយ ហ៊ុន ម៉ាណែត ជាកូនរបស់នាយករដ្ឋមន្រ្តី ហ៊ុន សែន ពីបក្សកុម្មុយនីស្ត CPP ដែលធ្លាប់បែកធ្លាយឯកសារសម្ងាត់ កាលពីដើមឆ្នាំ ២០១៧។

ថ្មីៗនេះ ក្រុមមនុស្សដែលធ្វើការឲ្យ ក្រុមខាងលើ បានបង្កើតគណនេយ្យក្លែងក្លាយ ចំនួន ៣ ដែលលួចបន្លំឈ្មោះ និងលួចប្រើរូបដូចគ្នា នឹងរូបថតរបស់ម្ចាស់គណនេយ្យហ្វេសប៊ុកពិត រួមមាន គណនេយ្យ Chham Chhany, ប៉ាង សុខឿន និង គណនេយ្យវិទ្យុអាស៊ីសេរី RFA ។

គណនេយ្យទាំង ៣ នេះ បង្កើតឡើងជាយុទ្ធសាស្រ្ត បោះដៃឲ្យកាសែតគាំទ្ររដ្ឋាភិបាល ហ៊ុន សែន ផ្សព្វផ្សាយ​បង្កាច់បង្ខូច ដល់ក្រុមអ្នកប្រឆាំង ជាពិសេសប្រើលេស ទម្លាក់កំហុសបន្ថែម ទៅលើមេដឹកនាំបក្សប្រឆាំង លោក កឹម សុខា ដែលត្រូវបានចាប់ឃុំខ្លួន ដោយរំលោភរដ្ឋធម្មនុញ្ញ មាត្រា៨០ ទាំងកំរោល កាលយប់រំលងអាធ្រាតចូលថ្ងៃទី ០៣ ខែកញ្ញា ឆ្នាំ២០១៧។

ក្រុមជនខិលខូចរបស់ បក្សកាន់អំណាច CPP ដែលធ្លាប់លេចធ្លាយអត្តសញ្ញាណ អាចកត់សម្គាល់បានតាមឯកសារអ៊ីម៉េល និង តាមប្រព័ន្ធអេឡិចត្រូនិច (IP – PC/Mobile source information)។ អ្នកខ្លះក្នុងចំណោមពួកគេ បានបង្កើតហ្វេសប៊ុកក្លែងក្លាយ សម្រាប់វាយប្រហារបក្សប្រឆាំង អ្នកប្រឆាំង ដែលមានទឡ្ហីករណ៍ហូរហែរមក។ មានសារឆ្លងឆ្លើយគ្នា ទៅវិញទៅមក អំពីផែនការកម្ទេចរដ្ឋាភិបាលកម្ពុជា តាមរយៈការធ្វើបដិវត្តពណ៌ រួមទាំងការសហការគ្នា សម្លាប់ លោក កឹម​សុខា ផង។

ម្ចាស់គណនេយ្យពិត លោក ឆាំ ឆានី Chham Chhany បានបង្ហោះសារ បដិសេធទាំងស្រុង ចំពោះគណនេយ្យ​ទាំង ៣ ដែលបានសរសេរឆ្លងឆ្លើយគ្នា ដើម្បីទំលាក់កំហុស មកលើរូបខ្លួនទាំង ៣ នាក់។ ខាងក្រោមនេះ ជាសារបដិសេធ ដែលលោក Chham Chhany បានបង្ហោះបកស្រាយ ជូនជនរួមជាតិខ្មែរ កុំឲ្យមានការយល់ច្រឡំ ហើយនិងវែកមុខរកការពិត ចំពោះជនដែលលួចក្លែងបន្លំគណនេយ្យរបស់លោកជានរណាឲ្យពិតប្រាកដ។ (អត្ថបទដោយ នគរ) /២២ កញ្ញា ២០១៧

ជូនបងប្អូនជនរួមជាតិជ្រាប!
ខាងក្រោមនេះ ជាអាខោនក្លែងក្លាយ ដែលជនខឹលខូច បង្កើតឡើងដោយប្រើឈ្មោះ និងរូបភាពខ្ញុំ ឆាំ ឆានី លោក ប៉ាង សុខឿន និង RFA ហើយបានឆាតឆ្លើយឆ្លងគ្នា ដោយរៀបរាប់ពីការរៀបចំផែនការ ផ្តួលរំលំរដ្ឋាភិបាល និងសម្លាប់ លោក កឹម សុខា ផងដែរ ។
ខ្ញុំ ឆាំ ឆានី សូមបដិសេធន៍ និងសូមថ្កោសទោស ចំពោះជនកំសាក ដែលបានបង្កើតអាខោនក្លែងក្លាយ ហើយឆាតទម្លាក់កំហុសមកលើខ្ញុំ ឆាំ ឆានី លោក ប៉ាង សុខឿន និង RFA ។ ខ្ញុំ ឆាំ ឆានី ក៏សូមធានាអះអាងផងដែរថា លោក ប៉ាង សុខឿន និង RFA គ្មានផែនការស្មោកគ្រោក ដូចដែលពួកជនកំសាករៀបរាប់តាមឆាតនេះឡើយ ។ ហេតុនេះសូមបងប្អូន មេត្តាជ្រាប៕
ដោយក្តីគោរពដ៏ខ្ពង់ខ្ពស់ ឆាំ ឆានី

photo_2017-09-19_22-48-42

 

21616129_891056574390974_3205063488396371025_n21558907_891056564390975_5827642705761473960_n21559100_891056561057642_1765557850947911426_n267a20d4-d722-4d04-a5d4-fd4c078c563c

សហរដ្ឋអាមេរិក និងអឺរ៉ុប ទិញទំនិញពីកម្ពុជា​ច្រើនជាងគេ ប៉ុន្តែបែរជារដ្ឋាភិបាល ហ៊ុន សែន បង្កអារិភាពជាមួយ​​​អាមេរិក និង​លោកសេរី

PM

អត្ថបទដោយ «ទស្សនៈមន្រ្តីរាជការ» បានដកស្រង់ខ្លឹមសារនៃការស្រាវជ្រាវភាសាអង់គ្លេស ដើម្បីផ្តល់ជាគំនិតយោបល់ ជូនបងប្អូនពលរដ្ឋខ្មែរ នៅលើបណ្តាញសង្គម ក្រោយពេលរដ្ឋាភិបាល ហ៊ុន សែន ចាប់ឃុំខ្លួនលោក កឹម សុខា មេដឹកនាំបក្សប្រឆាំង, បង្ក្រាបប្រព័ន្ធសារព័ត៌មានឯករាជ្យ និងវិទ្យាស្ថានអាមេរិកាំង NDI ថ្មីៗនេះ ហើយនិងក្រោយពេលនាយករដ្ឋមន្រ្តី ហ៊ុន សែន បានប្រកាសបង្កអារិភាព ជាមួយ សហរដ្ឋអាមេរិក។

ទន្ទឹមនឹងនេះលោក ហ៊ុន សែន ក៏បានប្រកាសដដែលៗថា «រដ្ឋាភិបាលកម្ពុជា គឺជាដៃមិត្តភាព ជាមួយរដ្ឋាភិបាល ចិន ដែលមិនអាចបំបែកបាន»។ ក្នុងកំឡុងពេលនោះ មេដឹកនាំប្រទេសទាំងពីរ បានផ្លាស់ប្តូរដំណើរទស្សនកិច្ចទៅវិញទៅមក ជាញឹកញាប់។ រដ្ឋាភិបាលកម្មុយនីស្ត ចិន ក៏បានប្រកាសសន្យាហើយសន្យាទៀតថា «ខ្លួននៅតែជាខ្នងបង្អែករឹងមាំរបស់កម្ពុជា»

អត្ថបទទស្សនៈមន្រ្តីរាជការ បានផ្តល់យោបល់ជូនពលរដ្ឋថា «បងប្អូនទាំងអស់ តោះរៀនវិភាគជាមួយគ្នា! ប្រទេសដែលជាទីផ្សារ សម្រាប់នាំទំនិញចេញពីកម្ពុជា មានប្រទេស អាមេរិក 23,1% ប្រទេស​អង់គ្លេស 8,8% ប្រទេស​អាល្លឺម៉ង 8,2% និង​ប្រទេសផ្សេងៗទៀត តិចតួច ក្នុងនោះនាំទំនិញទៅ ចិន មាន 5,1%»។ ទំនិញនាំចេញពីកម្ពុជា ភាគច្រើនចេញពីក្រុមហ៊ុនសម្លៀកបំពាក់ និងស្បែកជើង ដែលគ្រប់គ្រងដោយថៅកែ ចិន ច្រើនជាងគេ។ 

«ក្រុមប្រទេស ដែលនាំទំនិញចូល​ កម្ពុជា ហើយបានកើបលុយ ចេញពីកម្ពុជា រួមមានប្រទេស ថៃ 28,7% ប្រទេស ចិន 22,2% និងប្រទេស យួន 16,4% ហើយក្រៅពីនេះ មានប្រទេសផ្សេងៗទៀត នាំទំនិញចូលកម្ពុជា បន្តិចបន្តួច»។ សំណួរសួរថា តើខ្មែរគេម្បីធ្វើអ្វី? ហេតុអ្វីបានជាយើង ត្រូវគាំទ្រការវាយកម្ទេចឆ្នាំងបាយខ្លួនឯង?

ថ្មីៗនេះពលរដ្ឋខ្មែរក្រៅប្រទេស នៅជុំវិញពិភពលោក បានធ្វើបាតុកម្ម រកការគាំទ្រពីសហរដ្ឋ​អាមេរិក និង សហគមន៍អឺរ៉ុប ដើម្បីជួយអន្តរាគមន៍ដោះស្រាយបញ្ហាវិបត្តិនយោបាយ នៅកម្ពុជា ព្រមទាំងទាមទារឲ្យមានការដោះលែង មេដឹកនាំបក្សប្រឆាំង លោក កឹម សុខា និងអ្នកទោសមនសិការ ដែលជាប់ឃុំឃាំងយ៉ាងអយុត្តិធម៌ផង។ ពលរដ្ឋខ្មែរក្រៅប្រទេស និងអ្នកវិភាគ សំដែងក្តីបារម្ភដូចគ្នាថា រដ្ឋាភិបាល ហ៊ុន សែន កំពុងនាំកម្ពុជា ធ្លាក់ចូលក្នុងគន្លងនៃ របបផ្តាច់ការជាថ្មី ខណៈពេលការបោះ​ឆ្នោតជាតិ ឆ្នាំ២០១៨ កាន់តែខិតជិតមកដល់៕ (ដោយ ម៉ែន ណាត) /២១ កញ្ញា ២០១៧

21616207_1590631324332465_8281138212763825717_n21617509_1590631377665793_3085605655291846703_n

 

.

តំណាង​រាស្ត្រ​សហរដ្ឋ​អាមេរិក​ ៨ ​រូប ​ថ្កោល​ទោស​រដ្ឋាភិបាល​ ហ៊ុន សែន

Capturemmmm

តំណាង​រាស្ត្រ​សហរដ្ឋ​អាមេរិក​មួយ​ចំនួន ​ជំរុញ​ឲ្យ​រដ្ឋបាល​របស់​ លោក​ ប្រធានាធិបតី​ ដូណាល់ត្រាំ (Donald Trump) ​គៀង​គរ​សម្ព័ន្ធ មិត្ត​របស់​ខ្លួន ដើម្បី​ប្រើ​ប្រាស់​គ្រប់​មធ្យោបាយ​ទាំងអស់​ដាក់​គំនាប រដ្ឋាភិបាល​ លោក​ ហ៊ុន សែន​ អនុញ្ញាត​ឲ្យ​កម្ពុជា ​មាន​លទ្ធិប្រជាធិបតេយ្យ​​ពេញលេញ និង​នីតិរដ្ឋ។

(RFA, 20-9-2017, ដោយ តាំង សារ៉ាដា)
តំណាង​រាស្រ្ត​សហរដ្ឋអាមេរិក​ចំនួន ​៨ ​រូប​ពី​ខាង​គណបក្ស​ប្រជាធិបតេយ្យ​ និង​សាធារណរដ្ឋ​និយម រួម​មាន​លោក​ អេដ រ៉យ (Ed Royce) លោក​ អាលែន ឡូវែនថល​ (Alan Lowenthal) ​លោក​ ស្ទីវ ឆាបុត (Steve Chabot)​ អ្នកស្រី​ និគី តុងហ្កាស់​ (Niki Tsongas) និង​តំណាង​រាស្ត្រ​បួន​រូប​ទៀត កាល​ពី​ថ្ងៃ​ច័ន្ទ​ទី​១៨​ម្សិលមិញ​ បាន​សរសេរ​លិខិត​មួយ​ច្បាប់ ទៅ​កាន់​រដ្ឋមន្រ្តី ក្រសួង​ការ​បរទេស​អាមេរិក ​លោក រិក ធីលលើសិន​ (Rex Tillerson) ​សម្តែង​ការ​ព្រួយ​បារម្ភ​អំពី​ដំណើរ​ការ​ប្រជាធិបតេយ្យ​ នៅ​ កម្ពុជា​ ដែល​កំពុង​ជួប​វិបត្តិ​ដ៏​ធ្ងន់ធ្ងរ​ ហើយ​អាច​ប៉ះ​ទង្គិច​ដល់​ការ ​បោះឆ្នោត​ឆ្នាំ​២០១៨ ​ខាង​មុខ។

ក្រុម​តំណាង​រាស្ត្រ​របស់​អាមេរិក​ទាំងនេះ​ ក៏​បាន​ថ្កោល​ទោស​ជា​ខ្លាំង ដល់​ការ​រំលោភ​បំពាន​ទាំង​គ្មាន​ដីកា​ទៅ​លើ​ដំណើរ​ការ​ប្រជាធិបតេយ្យ​ តាមរយៈ​ការ​ចាប់​ខ្លួន​ ប្រធាន​គណបក្ស​សង្គ្រោះជាតិ​លោក កឹម សុខា​ រឹតត្បិត​សេរីភាព​សារព័ត៌មាន និង​ការ​ចោទ​ប្រកាន់​ថា​សហរដ្ឋអាមេរិក ជា​អ្នក​នៅ​ពី​ក្រោយ​បដិវត្តន៍​ពណ៌​ដែល​ធ្វើ​ឲ្យ​អស្ថិរភាព​ដល់​កម្ពុជា។

តំណាង​រាស្ត្រ​របស់​សហរដ្ឋអាមេរិក​ ដ៏​មាន​ឥទ្ធិពល​ទាំង​នេះ​អះអាង​ថា ការ​ចាប់​ខ្លួន​លោក​ កឹម សុខា ពី​បទ​ក្បត់​ជាតិ​ជា​ការ​បង្ក្រាប​ជា​ប្រព័ន្ធ​ ទៅ​លើ​​វិទ្យុអាស៊ីសេរី​ វិទ្យុ​សំឡេង​សហរដ្ឋ អាមេរិក វិទ្យាស្ថាន​ជាតិ​ ប្រជាធិបតេយ្យ​ NDI​ និង​ការ​គំរាម​ធ្វើ​សង្គ្រាម​ជា ​មួយ​ប្រជា​ពលរដ្ឋ ប្រសិន​បើ​បក្ស​កាន់​អំណាច​ចាញ់​ឆ្នោត​នោះ គឺ​ជា​កិច្ច​ខិត​ខំ​ប្រឹង​ប្រែង​របស់​ រដ្ឋាភិបាល​ទីក្រុង​ភ្នំពេញ​ក្នុង​ការ​ធ្វើ​ឲ្យ​លំហ​ប្រជាធិបតេយ្យ​ កាន់​តែ​រួម​ចង្អៀត។ វិទ្យុ​អាស៊ីសេរី​មិន​ទាន់​អាច​សុំ​សេចក្ដី​អត្ថាធិប្បាយ​ពី​ អ្នក​នាំ​ពាក្យ​គណបក្ស​ប្រជាជន​កម្ពុជា​លោក​ សុខ ឥសាន បាន​ទេ​ ដោយ​លោក​អះអាង​ថា កំពុង​ជាប់​រវល់។

ទោះ​ជា​យ៉ាង​ណា​ក៏​ដោយ​តំណាង​រាស្រ្ត​របស់​សហរដ្ឋអាមេរិក​ទាំង​ ៨ រូប​នេះ​ ជំរុញ​សហគមន៍​អន្តរជាតិ​ក្រោក​ឈរ​ឡើង​តតាំង​ ជាមួយ​រដ្ឋាភិបាល​ លោក​ ហ៊ុន សែន កំពុង​កាត់​បន្ថយ​សេរីភាព​ របស់​ប្រជាពលរដ្ឋ​ កម្ពុជា​ ដែល​ពួក​គេ​ត្រូវ​មាន​សេរីភាព​ពេញលេញ​ក្នុង​ការ​ចូល​រួមការ បោះឆ្នោត​ដោយ​សេរី​ ត្រឹមត្រូវ និង​យុត្តិធម៌​ស្រប​តាម​រដ្ឋធម្មនុញ្ញ​របស់​ ប្រទេស។ ពួក​គេ​ទាមទារ​ឲ្យ​ក្រសួង​ការ​បទេស​សហរដ្ឋអាមេរិក​ធ្វើការ​ ជាមួយ​ សម្ព័ន្ធ មិត្ត​របស់​ខ្លួន​ក្នុង​ការ​ប្រើ​គ្រប់​យន្តការ​ការទូត​ដែល​ចាំបាច់ ទាំង​អស់​ដើម្បី​បង្ខំ​ឲ្យ ​រដ្ឋាភិបាល​ លោក​ ហ៊ុន សែន​ គោរព​ស្តង់ដារ ប្រជាធិបតេយ្យ​ និង​នី​តិរដ្ឋ។

ក្រុម​តំណាង​រាស្ត្រ​អាមេរិក​ទាំងនេះ​ក៏បាន ទាត់​ចោល​ផង​ដែរ​ចំពោះ ការ​ចោទ​ប្រកាន់​ពី​បទ​ក្បត់ជាតិ​ទៅ​លើ​ គណបក្ស​នយោបាយ​អង្គការ​ សង្គម​ស៊ីវិល សកម្មជន និង​អ្នក​វិភាគ​ នយោបាយ។ ពួក​គេ​ព្រមាន​ថា ការ​បំផ្លាញ​គណបក្ស​ប្រឆាំង​នៅ​កម្ពុជា​គឺ​ជា​ការ​បញ្ជាក់​យ៉ាង​ច្បាស់​ថា ដំណើរ​ការ​បោះឆ្នោត​នៅ​ឆ្នាំ​២០១៨ ខាង​មុខ​ នឹង​ប្រព្រឹត្ត​ទៅ​ដោយ​គ្មាន​ លក្ខណៈ​សេរី ​ត្រឹមត្រូវ និង​យុត្តិធម៌​នោះ​ឡើយ។ ជាង​នេះ​ទៅ​ទៀត​ពួក​គេ​ជំរុញ​ឲ្យ​ឯកអគ្គរដ្ឋទូត​របស់​សហរដ្ឋអាមេរិក​ប្រចាំ​​កម្ពុជា​ លោក វីលៀម ហែកដ៍ ​(William Heidt) ​បន្ត​ជជែក​ជាមួយ​រដ្ឋាភិបាល​លោក ហ៊ុន សែន​ ក្នុង​កម្រិត​មួយ​ខ្ពស់​បំផុត​ដែល​ តំណាង​ឲ្យ​រដ្ឋាភិបាល​សហរដ្ឋអាមេរិក​ដើម្បី​បង្ហាញ​អំពី​ការ​ព្រួយ​បារម្ភ​ទាំងឡាយ​ទៅ​កាន់​លោក​ ហ៊ុន សែន ​ក្នុង​ការ​ដាក់​សំពាធ​ដល់ រដ្ឋាភិបាល​កម្ពុជា​ឲ្យ​គោរព​សិទ្ធិពលរដ្ឋ​របស់​ខ្លួន​តាមរយៈ​ការ​អនុញ្ញាត​ឲ្យ​មាន​សេរីភាព​សារព័ត៌មាន​ និង​ការ​គោរព​ដល់​ដំណើរ​ការ​បោះឆ្នោត នៅ​ពេល​ខាង​មុខ​។

តំណាង​រាស្ត្រ​របស់​អាមេរិក​ទាំង ​៨ ​រូប​នេះ​ លើក​ទឹក​ចិត្ត​ឲ្យ​រដ្ឋាភិបាល​កម្ពុជា​ គោរព​លក្ខខណ្ឌ​ទាំងនេះ ប្រសិន​បើ​កម្ពុជា​ ចង់​មាន​ទំនាក់​ទំនង យុទ្ធសាស្ត្រ​សេដ្ឋកិច្ច​ដ៏​ធំ​ជាមួយ​សហរដ្ឋអាមេរិក។ បើ​ទោះ​បី​ជា​កម្ពុជា​ កំពុង​រង​ការ​ថ្កោល​ទោស​ជា​ខ្លាំងៗ ​ពី​បណ្ដា​ប្រទេស​លោកសេរី។ កម្ពុជា​ ក៏​កំពុង​បោះ​​ជំហាន​​យ៉ាង​ជ្រៅ​ទៅ​រក បណ្ដា​ប្រទេស​កុម្មុយនិស្ត​ដែរ។​ រដ្ឋ​មន្ត្រី​ក្រសួង​ការ​បរទេស​កម្ពុជា​ កាល​ពី​ថ្ងៃ​សុក្រ​សប្ដាហ៍​មុន​បាន​ថ្លែង ចំពោះ​មុខ​និស្សិត​រាប់រាយ​នាក់​ក្នុង​ទី​ក្រុង​ភ្នំពេញ​ថា ទំនាក់​ទំនង​ការ​ទូត របស់​កម្ពុជា​នៅ​ពេល​ខាង​មុខ​នឹង​ពឹង​ផ្អែក​ទៅ​លើ ប្រទេស​ ចិន និង រុស្សី​។ ប៉ុន្តែ​អ្នក​ស្រាវជ្រាវ​ខាង​កិច្ចការ​បរទេស​ លោក ឡុង គឹមឃន ​ធ្លាប់​ ព្រមាន​ថា ប្រសិន​បើ​វិបត្តិ​ទំនាក់ទំនង​រវាង​កម្ពុជា​ និង ​សហរដ្ឋអាមេរិក​ នៅ​បន្ត​កើត​មាន​ទៀត នោះ​កម្ពុជា​នឹង​ជួប​ហានិភ័យ​ខាង​ផ្នែក​ពាណិជ្ជ កម្ម​ របស់​ខ្លួន​ធ្ងន់ធ្ងរ​ដោយសារ​ចិន​មិនមែន​ជា​ទី​ផ្សា​ទិញ​ផលិតផល​ កសិផល និង​ផលិតផល​កាត់ដេរ​ពី​កម្ពុជា​បាន​ទេ ​ខណៈ​ផលិតផល​ របស់​ប្រទេស​នេះ​កំពុង​សល់​ចាល់​ហូរហៀរ​។

ពាក់ព័ន្ធ​នឹង​វិបត្តិ​ប្រជាធិបតេយ្យ​នៅ​កម្ពុជា​នេះ​ អនុ​ប្រធាន​សភា​អឺរ៉ុប​ អ្នកស្រី​ ហ្វែត​ឌឺរីកា មូកហឺរីនី (Federica Mogherini) កាល​ពី​ថ្ងៃ​ច័ន្ទ ថ្លែង​ថា សហភាព​អឺរ៉ុប​គឺ​ជា​ទី​ផ្សារ​នាំ​ចូល​ផលិតផល​ដ៏​ធំ ​បំផុត​របស់​ កម្ពុជា។​ អ្នកស្រី​ជឿ​ថា​វា​នឹង​គ្មាន​និរន្តរភាព​សម្រាប់​ការ​អភិវឌ្ឍន៍​ទៀត​ទេ ប្រសិន​បើ​គ្មាន​ការ​គោរព​សិទ្ធិមនុស្ស និង​គ្មាន​ការ​ធានា​ដល់​ដំណើរ​ ការ​ប្រជាធិបតេយ្យ​នៅ​កម្ពុជា។

អ្នកស្រី​ជំរុញ​ឲ្យ​សភា​អឺរ៉ុប​នឹង​ប្រើ​ប្រាស់​គ្រប់​យន្តការ​ដែល​មាន​ស្រាប់ ក្នុង​ការ​ស្នើ​និង​ធ្វើ​កិច្ចការ​ដើម្បី​ឲ្យ​មាន​ការ​កែ​ប្រែ​បរិបទ​នយោបាយ​ បច្ចុប្បន្ន​នៅ​កម្ពុជា៕

មានវីដេអូរូបភាព៖

US MP-kh-1us-mp-kh-2-e1505839035999.jpgUS MP-1US MP-220160128_PMHS_USA_KH01

.

« Older Entries