ដោយប្រើប្រាស់គេហទំព័រ CWCI Cambodia លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា សូមបញ្ជាក់ជាថ្មីថា «ដើម្បីធានានូវយុត្តិធម៌ខាងផ្លូវច្បាប់ រដ្ឋាភិបាលកម្ពុជា លោក ហ៊ុន សែន ត្រូវតែមានសេចក្តីក្លាហានហ៊ានប្រកាសលុបចោល «ដាក់មោក្ខភាព» នូវរាល់សន្ធិសញ្ញា កិច្ចព្រមព្រៀង និងឯកសារព្រំដែនទាំងអស់ ដែលបានធ្វើឡើងជាមួយប្រទេសវៀតណាម តាមរយៈការចាប់បង្ខំ ដាក់សម្ពាធ និងការសងគុណ ដែល «ជាសន្ធិសញ្ញា និងឯកសារមិនស្មើភាពគ្នា» រួចហើយ ត្រូវហ៊ានប្តឹងប្រទេសវៀតណាម តាមយន្តការអន្តរជាតិជាមូលដ្ឋាន»។
លោក ម៉ែន ណាត ប្រតិកម្មតបទៅកាន់លោក វ៉ា គឹមហុង ទេសរដ្ឋមន្រ្តី និងជាប្រធានគណៈកម្មាធិការចម្រុះព្រំដែនកម្ពុជា ដែលតំណាងឲ្យមុខមាត់នៃ រដ្ឋាភិបាលលោក ហ៊ុន សែន ថ្លែងក្នុងកិច្ចសម្ភាសន៍ពិសេសជាមួយវិទ្យុបារាំង RFI នៅល្ងាចថ្ងៃទី ២៤ ឧសភា ២០២០ ម្សិលមិញថា «លោក វ៉ា គឹមហុង បានបង្ហាញភាពកំសាក មិនហ៊ានជំរុញឲ្យរដ្ឋាភិបាល ប្តឹងវៀតណាម និងមិនទទួលខុសត្រូវចំពោះប្រទេសជាតិ បើទោះបីជាវៀតណាម គគ្លើនរំលោភឈ្លានពានបូរណភាពទឹកដីកម្ពុជា ម្តងហើយម្តងទៀត តាមរយៈការអនុវត្តនូវ សន្ធិសញ្ញាព្រំដែនបំពេញបន្ថែមថ្មីៗ និងឯកសារមួយចំនួនទៀត ដែលផ្ទុយពីកិច្ចព្រមព្រៀងទីក្រុងប៉ារីស ឆ្នាំ១៩៩១ និងផ្ទុយពីខ្លឹមសាររដ្ឋធម្មនុញ្ញ ឆ្នាំ១៩៩៣ មាត្រា២ និងមាត្រា៥៥»។
លោក វ៉ា គឹមហុង បាននិយាយថា កម្ពុជា ស្នើសុំភាគីវៀតណាម ឲ្យរុះរើតង់ទាំង ៣១ កន្លែង ចេញពីតំបន់ «ព្រំដែនដែលមិនទាន់ឯកភាពគ្នា» ស្របតាមសេចក្តីប្រកាសរួម រវាងកម្ពុជា-វៀតណាម ថ្ងៃទី ១៧ មករា ១៩៩៥ និងគោរពសន្ធិសញ្ញាបំពេញបន្ថែម ឆ្នាំ២០០៥»។ លោក បញ្ជាក់ថា «តំបន់ទាំងនោះ ជាតំបន់ស្មុគស្មាញ និងមានការលំបាកក្នុងដោះស្រាយ ទាំងខាងបច្ចេកទេស និងផ្លូវច្បាប់»។ លោកបន្តថា «យើងស្នើទៅប្រទេសបារាំង ជួយបម្លែងខ្នាតផែនទីបោន (Bonne) ១/១០០.០០០ មកខ្នាត យូធីអឹម (UTM) ១/៥០.០០០ វិញ ដើម្បីដោះស្រាយជាមួយភាគីវៀតណាម»។ លោក បន្ថែមថា «បើតាមប្រវត្តិការគូសខ្សែព្រំដែន គឺត្រូវគូសចែកព្រំដែន នៅពាក់កណ្តាលទន្លេបាសាក់។ ប៉ុន្តែខ្សែបន្ទាត់ព្រំដែនក្នុងផែនទីហ្នឹង វាខុស គឺខុសពីសេចក្តីសម្រេចរបស់អគ្គទេសាភិបាលបារាំង នៅឆ្នាំ ១៩៣៥។ ប៉ុន្តែនៅពេលសម្តេចព្រះ នរោត្តម សីហនុ យកផែនទី ទៅតម្ក់ល់នៅអង្គការសហប្រជាជាតិ (អ.ស.ប) ក្នុងឆ្នាំ ១៩៦៣ ឆ្នាំ ១៩៦៤ ហ្នឹង បានកែប្រែខ្សែបន្ទាត់ព្រំដែន ទៅតាមសេចក្តីសម្រេចរបស់អគ្គទេសាភិបាលបារាំង ឆ្នាំ ១៩៣៥»។
អភិបាលខេត្តកណ្តាល លោក គង់ សុភ័ណ្ឌ ត្រូវបានវិទ្យុបារាំង RFI ដកស្រង់សំដីនៅថ្ងៃទី ២៤ ខែឧសភា ឆ្នាំ២០២០ ថា «ភាគីវៀតណាម បានរុះរើតង់ ទាំង ៣១ កន្លែង ចេញតំបន់ព្រំដែនខ្មែរ ក្នុងស្រុកកោះធំ និងស្រុកលើកដែក អស់ហើយ មកទល់ថ្ងៃទី ២៤ ខែឧសភានេះ»។
ឯកសារព្រំដែន៖ អនុក្រឹត្យអគ្គទេសាភិបាលបារាំង នៅឥណ្ឌូចិន ចុះថ្ងៃទី ០៦ ធ្នូ ១៩៣៥
ឧបសម័ន្ធ ១១ ស្តីពីអនុក្រឹត្យរបស់អគ្គទេសាភិបាលបារាំង នៅឥណ្ឌូចិន ចុះថ្ងៃទី ០៦ ខែធ្នូ ១៩៣៥ នៅក្នុងឯកសារព្រំដែនរបស់លោក សារិន ឆាត បានឲ្យដឹងថា អនុក្រឹត្យនោះ បានបញ្ជាក់ពីការកំណត់ព្រំដែន ខេត្តកណ្តាល (កម្ពុជា) និងខេត្តចូវដុក ឬខេត្តមាត់ជ្រូក (កូសាំងស៊ីន)។ អនុក្រឹត្យនោះ មាន ៣ មាត្រា បានកំណត់បង្គោលព្រំដែន ចំនួន ៥ បង្គោល (លេខ ៨៤, ៨៥, ៨៦, ៨៧, ៨៨) និងចំណុចតម្រុយបង្គោលព្រំដែន ៤ ទៀត (A, B, C, D)។ (សូមអានលំអិត – Download)។
តើបង្គោលព្រំដែនទាំងនោះ ដែលបន្សល់ពីសម័យបារាំង បានបាត់ទៅណាអស់ហើយ?
សម្តេចព្រះ នរោត្តម សីហនុ ជាប្រធានក្រុមប្រឹក្សាជាតិជាន់ខ្ពស់កម្ពុជា (សម័យអ៊ុនតាក់ – UNTAC) កាលពីថ្ងៃទី ១៩ កក្កដា ១៩៩៣ សរសេរព្រះរាជសារ ពីទីក្រុងប៉េកាំង ទៅសម្តេចក្រុមព្រះ នរោត្តម រណឫទ្ធិ និងលោក ហ៊ុន សែន ឲ្យប្រាប់ទៅមេដឹកនាំវៀតណាម ថាត្រូវយកបង្គោលព្រំដែន សម័យអាណាបារាំង ទាំង ១២៤ បង្គោល ទៅដាក់ត្រង់កន្លែងដើមវិញ។ បង្គោលព្រំដែន ១២៤ បង្គោលនោះ ធ្វើឡើងតាមអនុសញ្ញាព្រំដែន បារាំង កូសាំងស៊ីន និងកម្ពុជា ឆ្នាំ ១៨៧៣។ បង្គោលព្រំដែន និង ផែនទី របស់អាណានិគមបារាំង ត្រូវបានទទួលស្គាល់ដោយសន្និសីទ ទីក្រុងហ្សឺណែវ ឆ្នាំ១៩៥៤ និងបានរំលឹកឡើងវិញដោយ កិច្ចព្រមព្រៀងទីក្រុងប៉ារីស ឆ្នាំ ១៩៩១។ (សូមអានលំអិត ឬទាញយក – Download ឬ ទាញយក ឯកសារដើម ជាភាសាបារាំង)។
គួរបញ្ចាក់ថា បង្គោលព្រំដែន រវាងកម្ពុជា និងវៀតណាម សរុបមាន ១២៤ បង្គោលនោះ ជាបង្គោលព្រំដែនរដ្ឋបាល ក្នុងសម័យអាណានិគមបារាំង ដែលត្រួតត្រាកម្ពុជា វៀតណាម និង ឡាវ ប៉ុន្តែវាបានក្លាយជាបង្គោលព្រំដែន រវាងប្រទេសមួយ និងប្រទេសមួយទៀត នៅពេលសន្និសីទអន្តរជាតិ ទីក្រុងហ្សឺណែវ ឆ្នាំ១៩៥៤ ក្នុងពេលបារាំង ប្រគល់ឯករាជ្យពេញលេញឲ្យកម្ពុជា។ កម្ពុជា ក៏បានប្រកាសឯករាជ្យ នៅថ្ងៃទី ០៩ វច្ឆិកា ១៩៥៤។ លុះដល់ឆ្នាំ ១៩៦៣ ដល់ឆ្នាំ ១៩៦៩ សម័យសង្គមរាស្រ្តនិយមរបស់សម្តេចព្រះ នរោត្តម សីហនុ យកផែនទីខ្មែរ ខ្នាតបោន (Bonne) ១/១០០.០០០ ទៅតម្កល់នៅអង្គការសហប្រជាជាតិ (អ.ស.ប) ដែលត្រូវបានកំណត់ក្នុងរដ្ឋធម្មនុញ្ញ ឆ្នាំ ១៩៩៣ ទៀតផង។
ចំណែកផែនទីអាមេរិកាំង យូធីអឹម (UTM) ខ្នាត ១/៥០.០០០ ដែលធ្វើឡើងក្នុងទសវត្សរ៍ទី៦០ ដោយទាហានអាមេរិក ជាឯកតោភាគី ក្នុងសម័យសង្គ្រាមវៀតណាមនោះ គឺជាប្រភេទផែនទីមិនត្រឹមត្រូវ និងបានគូសចូលមកក្នុងទឹកដីកម្ពុជា ជាច្រើនកន្លែង។
សម្រាប់ការចរចាដោះស្រាយបញ្ហាព្រំដែន តាមសន្ធិសញ្ញាថ្មីៗនោះ (សន្ធិសញ្ញាបំពេញបន្ថែម ២០០៥ និងឆ្នាំ ២០១៩) រដ្ឋាភិបាលលោក ហ៊ុន សែន បានយល់ព្រមតាមភាគីវៀតណាម បោះបង្គោលព្រំដែន ដោយប្រើផែនទី ប្រភេទបោន ចំនួន ២៦ ផ្ទាំង ខ្នាត ១/១០០.០០០ (បោះពុម្ពឡើងវិញ នៅវៀតណាម ចុះហត្ថលេខាទទួលស្គាល់ នៅថ្ងៃទី ២៧ ធ្នូ ១៩៨៥ ក្នុងថ្ងៃជាមួយគ្នា នៃការចុះសន្ធិសញ្ញាកំណត់ព្រំដែនរដ្ឋ ឆ្នាំ១៩៨៥) និង ផែនទីអាមេរិកាំង យូធីអឹម (UTM) ខ្នាត ១/៥០.០០០ ចំនួន ៤០ ផ្ទាំង៕
(ដោយ CWCI Cambodia / ២៥ ឧសភា ២០២០)
.
CWCI Cambodia 