The Cambodia Daily
05th-2-2021
មន្ត្រីខ្ពស់គណបក្សប្រជាធិបេតយ្យមូលដ្ឋាន (GDP) ប្រតិកម្មថា ហានិភ័យធំសម្រាប់កម្ពុជា គឺការអាចបាត់បង់អធិបតេយ្យភាពជាតិ ដែលត្រូវស្ថិតនៅក្រោមការគ្រប់គ្រងរបស់វៀតណាម ឬក្លាយជាប្រទេស អាយ៉ងរបស់ចិន។ ប៉ុន្តែការប្រកួតប្រជែងគ្នារវាងវៀតណាម និងចិន បង្កឲ្យមានទាំងហានិភ័យ និងឱកាសសម្រាប់កម្ពុជា។
គណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត សាម អ៊ីន បានសរសេរលើទំព័រហ្វេសប៊ុករបស់លោកថា «ប្រទេសវៀតណាម មានមហិច្ឆិតាចង់គ្រប់គ្រង ហើយបើអាច គឺលេបត្របាក់កម្ពុជាតែម្តង»។ ដោយឡែក ប្រទេសចិន មាននយោបាយច្បាស់លាស់ចំពោះកម្ពុជា គឺទប់ទល់កុំឲ្យវៀតណាម យកកម្ពុជាបាន ពីព្រោះ កម្ពុជាមានផលប្រយោជន៍សម្រាប់ភូមិសាស្រ្តនយោបាយរបស់ពួកគេ»។
លោក អះអាងថា ការប្រកួតប្រជែងរវាងចិន និងវៀតណាម ក៏ផ្តល់ឱកាសឲ្យកម្ពុជាផងដែរ ក្នុងការកាច់ចង្កូតប្រទេសទៅកសាងអធិបតេយ្យភាពរបស់ខ្លួនជាមួយភាពរុងរឿងសម្បូរសប្បាយ ដោយអាចចងសម្ព័ន្ធភាពជាមួយចិន ជាមិត្តល្អ ដែលចិន គោរពស្រឡាញ់ និងឲ្យតម្លៃ ហើយពុំមាននយោបាយចងអាឃាតជាមួយកម្ពុជា។
បណ្ឌិត សាម អ៊ីន បញ្ជាក់ថា «កម្ពុជាអាចរក្សាអធិបតេយ្យខ្លួនបាន លុះត្រាតែកម្ពុជាមានគោលនយោបាយបង្រួបបង្រួមផ្ទៃក្នុងជាតិ តាមគោលការណ៍ប្រជាធិបតេយ្យសេរីពហុបក្ស ដោយមានការចូលរួមគាំទ្រ ពីមហាអំណាចលោកសេរី និងអនុវត្តនយោបាយការបរទេស ទាំងមហាអំណាចក្នុងតំបន់ និងមហាអំណាចពិភពលោក អាចទទួលយកបាន»។
ការអះអាងនេះ ធ្វើឡើងស្របពេលប្រមុខរដ្ឋាភិបាលកម្ពុជា បានផ្ញើលិខិតអបអរសាទរអគ្គលេខាធិការមជ្ឈឹមបក្ស នៃគណៈកម្មាធិការមជ្ឈឹមបក្សកុម្មុយនិស្តវៀតណាម លោក ង្វៀន ហ្វូចុង (Nguyen Phu Trong) ដែលបានជាប់ឆ្នោតសាជាថ្មី ជាអគ្គលេខាធិការមជ្ឈឹមបក្ស នៃបក្សកុម្មុយនិស្តវៀតណាម សម្រាប់អាណត្តិទី១៣ នេះ។
កាលពីថ្ងៃទី០១ ខែកុម្ភៈ ឆ្នាំ២០២១ ប្រមុខរដ្ឋាភិបាលកម្ពុជា លោក ហ៊ុន សែន បានផ្ញើលិខិតលោក ង្វៀន ហ្វូចុង ដែលត្រូវបានជ្រើសតាំងសាជាថ្មី ឲ្យដឹកនាំបក្សកុម្មុយនិស្តវៀតណាម។ ក្នុងសារលិខិតនោះ លោក ហ៊ុន សែន បានអះអាងថា «ចំណងមិត្តភាពរវាងគណបក្សប្រជាជនកម្ពុជា និងបក្សកុម្មុយនិស្តវៀតណាម នឹងត្រូវបានបន្តពង្រឹងឲ្យបានកាន់តែស៊ីជម្រៅបន្ថែមទៀត ដើម្បីផលប្រយោជន៍ប្រជាជន និងប្រទេសជាតិទាំងពីរ»។
គណៈកម្មាធិការកណ្តាលរបស់គណបក្សប្រជាជនកម្ពុជា កាលពីថ្ងៃទី០៣ ខែកុម្ភៈ ឆ្នាំ២០២១ បានចេញសេចក្តីប្រកាសព័ត៌មានស្តីអំពីការឆ្លើយឆ្លងគ្នា រវាងមេដឹកនាំគណបក្សប្រជាជនកម្ពុជា លោក ហ៊ុន សែន និងអគ្គលេខាធិការបក្សកុម្មយនិស្តវៀតណាម លោក ង្វៀន ហ្វូចុង តាមទូរស័ព្ទ ដែលបានប្តេជ្ញាពីការរឹតចំណងមិត្តភាពកាន់តែខ្លាំងក្លា។
ពួកគេ អះអាងថា ការភ្ជាប់ចំណងមិត្តភាពជាប្រវត្តិសាស្ត្រ បានកត់សម្គាល់ឲ្យឃើញនូវការពង្រឹងភាពខ្លាំងក្លា នៃភាពជាដៃគូ និងកិច្ចសហប្រតិបត្តិការយ៉ាងជិតស្និទ្ធ ដែលបានបង្កើតឡើងដោយគណបក្សគ្រប់គ្រងប្រទេសប្រទេសទាំងពីរ ដែលរុញឲ្យមានភាពរីកចម្រើនលើគ្រប់វិស័យ ដែលនាំមកនូវផលប្រយោជន៍ទៅវិញទៅមក។
អនុប្រធានក្រុមប្រឹក្សាភិបាលនៃ ចលនានិស្សិតដើម្បីលទ្ធិប្រជាធិបតេយ្យ និងជាអ្នកវិភាគនយោបាយសង្គម លោក គឹម សុខ បានប្រាប់សារព័រ៌មាន The Cambodia Daily នៅថ្ងៃនេះថា «ការចូលរួមអបរសាទររបស់លោក ហ៊ុន សែន ចំពោះមេដឹកនាំវៀតណាម ក្នុងនាមជាមេដឹកនាំបក្សប្រជាជន អបអរសាទរអគ្គលេខាធិការបក្សកុម្មុយនិស្ដវៀតណាម បង្កប់អត្ថន័យនៃសម្ព័ន្ធភាពបម្រើប្រយោជន៍បក្សប្រជាជន និងបក្សកុម្មុយនិស្ដវៀតណាម ឈរលើគោលការណ៍ផ្ដល់ប្រយោជន៍ និងអំណាចឲ្យគ្នាជាយុទ្ធសាស្ត្រ»។
លោក ព្រមានថា សូមកុំភ្លេចថា បរិបទរបស់វៀតណាម បក្សនិងរដ្ឋ គឺតែមួយ កាលណាលោក ហ៊ុន សែន ជួយបម្រើប្រយោជន៍បក្សកុម្មុយនិស្ដវៀតណាម មានន័យស្មើបម្រើប្រយោជន៍ជាតិសាសន៍វៀតណាម។ ដោយឡែកនៅកម្ពុជា បក្សនិងរដ្ឋ គឺចែកដាច់ពីគ្នា ប៉ុន្តែខ្លឹមសារបក្សប្រជាជនសព្វថ្ងៃទៀត មិនខុសអ្វីពីគោលការណ៍បម្រើគ្រួសារ ហ៊ុន ឡើយ។
លោក គឹម សុខ សង្កត់ធ្កន់ថា «លិខិតអបអរសាទររបស់លោក ហ៊ុន សែន ក៏បង្កប់ន័យជ្រាលជ្រៅថា គ្រួសារ ហ៊ុន ព្រមបន្តបម្រើមហិច្ឆតារបស់វៀតណាម ជាថ្នូរនឹងវៀតណាម ជួយការពារអំណាចគ្រួសារ ហ៊ុន នៃគណបក្សប្រជាជនតទៅទៀត»។
ឯកសារប្រវត្តិសាស្រ្តជាច្រើនបង្ហាញថា លោក ហ៊ុន សែន ទទួលបានតំណែងជានាយករដ្ឋមន្ត្រី តាមរយៈការលើកបន្ទុបដោយរដ្ឋការក្រុងហាណូយ កាលពីឆ្នាំ ១៩៨៥ ក្រោយមានការចាប់ខ្លួន លោក ប៉ែន សុវណ្ណ ក្នុងឆ្នាំ ១៩៨២ ដោយសារលោក មិនយល់ព្រមតាមផែនការសម្លាប់ខ្មែរ ដោយផែនការ«ក៥» និងការអនុញ្ញាតឲ្យជនជាតិវៀតណាម មករស់នៅក្នុងប្រទេសកម្ពុជា និងការស្លាប់ដ៏អាថ៌កំបាំងរបស់លោក{នាយករដ្ឋមន្រ្តី} ចាន់ ស៊ី៕
.