VOD (News) / ដោយ ខាន់ លក្ខិណា
18-01-2023
សាលាដំបូងរាជធានីភ្នំពេញ ផ្ដន្ទាទោសអ្នកវិភាគនយោបាយ លោក គឹម សុខ ឱ្យជាប់ពន្ធនាគារ ១៨ខែ ក្រោមបទចោទប្រកាន់«ញុះញង់ និងបរិហារកេរ្តិ៍» និងសងសំណងជំងឺចិត្តទៅដើមបណ្ដឹងចំនួន ៥០លានរៀល ខណៈសំណុំរឿងលោក គឹម សុខ និងមនុស្ស ២នាក់ទៀត ត្រូវបានចៅក្រមបង្វិលឱ្យស៊ើបអង្កេតឡើងវិញ។
ការសម្រេចនៅថ្ងៃពុធ ទី១៨ ខែមករា នេះ បន្ទាប់ពីចៅក្រមសាលាដំបូងរាជធានីភ្នំពេញ លោក សេង សុជាតិ បានបើកសវនាការលើសំណុំរឿងនេះ កាលពីថ្ងៃទី៥ ខែធ្នូ ឆ្នាំ២០២២ ដែលមានលោក គី តិច មេធាវីតំណាងដោយអាណត្តិឱ្យលោកនាយករដ្ឋមន្ត្រី ហ៊ុន សែន ប្តឹងទៅលោក គឹម សុខ។ ក្នុងពាក្យបណ្ដឹងនោះ មេធាវីដើមបណ្ដឹង ដោយប្ដឹងទៅតុលាការឱ្យផ្ដន្ទាទោស លោក គឹម សុខ និងទារសំណងជំងឺចិត្តចំនួន ១០០លានរៀល ឬស្មើប្រមាណ ២៥ ០០០ដុល្លារ។
ចៅក្រមសាលាដំបូងរាជធានីភ្នំពេញ លោក សេង សុជាតិ នៅថ្ងៃពុធ ទី១៨ ខែមករា បានប្រកាសសាលក្រមកំបាំងមុខ ដោយផ្ដន្ទាទោសអ្នកវិភាគនយោបាយ លោក គឹម សុខ ដាក់ពន្ធនាគារ ១៨ខែ ឬមួយឆ្នាំកន្លះ និងពិន័យប្រាក់ចំនួន ៨លានរៀលចូលថវិការដ្ឋ ពីបទ «ញុះញង់បង្កឱ្យមានភាពវឹកវរធ្ងន់ធ្ងរសន្តិសុខសង្គម និងបរិហារកេរ្តិ៍»។
លោក សេង សុជាតិ ក៏បានបង្គាប់ឱ្យសងជំងឺចិត្ត ៥០លានរៀល ឬស្មើប្រមាណ ១២ ៥០០ដុល្លារសហរដ្ឋអាមេរិក ទៅរដ្ឋាភិបាលដែលដឹកនាំដោយគណបក្សប្រជាជនកម្ពុជា និងបានចេញដីកាបង្គាប់ឱ្យសមត្ថកិច្ច ចាប់និងឃុំខ្លួនលោក គឹម សុខ ផងដែរ។
កាលពីថ្ងៃទី៥ ខែធ្នូ ឆ្នាំ២០២២ ក្រឡាបញ្ជីបានអានចម្លើយរបស់លោក គឹម សុខ ដែលបានផ្តល់នៅដំណាក់កាលអយ្យការ នៅថ្ងៃទី៧ ខែមេសា ឆ្នាំ២០១៧ បន្ទាប់ពីការឃុំខ្លួនរូបលោក។
នៅក្នុងចម្លើយ ឆ្នាំ២០១៧ លោក គឹម សុខ បាននិយាយថា លោកមិនមានចេតនាញុះញង់នរណាម្នាក់ឡើយ ខណៈលោកនៅតែបន្តការជជែកវែកញែកអំពីឃាតកម្មបង្កប់ហេតុផលនយោបាយ។
លោកបានរៀបរាប់អំពីករណីមួយចំនួន ដូចជា លោក ធន់ ប៊ុនលី ចាងហ្វាងកាសែត និងជាអ្នករិះគន់រដ្ឋាភិបាល ត្រូវបានបាញ់សម្លាប់នៅថ្ងៃទី១៨ ខែឧសភា ឆ្នាំ១៩៩៦, អ្នកស្រី ពិសិដ្ឋ ពិល្លិកា ជាតារាសម្តែងដ៏មានប្រជាប្រិយភាពមួយរូប ត្រូវបានសម្លាប់នៅក្នុងខែកក្កដា ឆ្នាំ១៩៩៩ ចំពេលមានការអះអាងពីទំនាក់ទំនងជាមួយនឹងគ្រួសារលោកនាយករដ្ឋមន្ត្រី ហ៊ុន សែន។
ចំណែកតារាចម្រៀង កញ្ញា ទូច ស៊ុននិច និងអ្នកកាសែតប្រឆាំង លោក ជួ ជេដ្ឋារិទ្ធ ត្រូវបានបាញ់សម្លាប់ក្នុងសប្ដាហ៍តែមួយ ក្នុងខែតុលា ឆ្នាំ២០០៣, មេដឹកនាំសហជីព លោក ជា វិជ្ជា ត្រូវបានបាញ់សម្លាប់នៅខាងក្រៅវត្តលង្កា ក្នុងរាជធានីភ្នំពេញ ឆ្នាំ២០០៤, និងលោក ឈុត វុទ្ធី អ្នកការពារបរិស្ថាន ត្រូវបានបាញ់សម្លាប់កាលពីឆ្នាំ២០១២។
លោក គឹម សុខ ធ្លាប់ជាប់ពន្ធនាគាររយៈពេល ១៨ខែ ពាក់ព័ន្ធនឹងបទសម្ភាសជាមួយវិទ្យុអាស៊ីសេរី កាលពីថ្ងៃទី១១ ខែកុម្ភៈ ឆ្នាំ២០១៧ ខណៈនៅថ្ងៃទី១៨ ខែមករា ឆ្នាំ២០២៣ តុលាការបានផ្តន្ទាទោសឱ្យលោក ជាប់ពន្ធនាគារ ១៨ ខែទៀត និងសងជំងឺចិត្តដើមបណ្តឹងជាង ១ម៉ឺនដុល្លារ ពាក់ព័ន្ធនឹងបទសម្ភាស កាលពីថ្ងៃទី១៣ ខែកុម្ភៈ ឆ្នាំ២០១៧ ជាមួយវិទ្យុអាស៊ីសេរី ដដែលនេះ។
សំណុំរឿងទាំងពីរ នោះ ដើមបណ្តឹងសំអាងថា លោក គឹម សុខ ដែលបានចោទប្រកាន់គណបក្សប្រជាជនកម្ពុជា និង រដ្ឋាភិបាល ថាជាអ្នកនៅពីក្រោយឃាតកម្មលើលោក កែម ឡី ដែលជាអ្នកវិភាគនយោបាយ។
អ្នកវិភាគនយោបាយ លោក គឹម សុខ ប្រាប់វីអូឌី នៅថ្ងៃពុធ ថា រដ្ឋាភិបាលកំពុងប្រើប្រាស់ប្រព័ន្ធតុលាការជាឧបករណ៍ក្នុងការផ្ដន្ទាទោស និងទាមទារសំណង លើអ្នកវិភាគ និងអ្នកធ្វើការងារសង្គម ព្រមទាំងសកម្មជន រហូតដល់ថ្នាក់ដឹកនាំនយោបាយ ដែលមានស្មារតីទាមទារយុត្តិធម៌សង្គម និងរិះគន់ ចំពោះការដឹកនាំមិនត្រឹមត្រូវ របស់គណបក្សប្រជាជនកម្ពុជា។
លោកថា៖ «ការសម្រេចក្ដីឱ្យខ្ញុំចាញ់ទាំងអយុត្តិធម៌នេះ គឺជាឧទាហរណ៍មួយនៃការគំរាមកំហែង ២យ៉ាង មិនមែនចំពោះតែរូបខ្ញុំម្នាក់ទេ ក៏ប៉ុន្តែចំពោះប្រជាពលរដ្ឋខ្មែរទូទៅ ដែលហ៊ានធ្វើសកម្មភាពទាមទារយុត្តិធម៌សង្គម។ ទី១ គំរាមអសន្តិសុខផ្ទាល់ខ្លួន ដែលប្រើប្រាស់ប្រព័ន្ធតុលាការ ចាត់ការឱ្យជាប់គុក និងទី២ គំរាមលើសេរីភាព ដោយចាត់ការឱ្យបង់ជំងឺចិត្តទៅពួកគាត់អ្នកកាន់អំណាច ឬក៏គណបក្សប្រជាជនកម្ពុជា ច្រើនម៉ឺនដុល្លារ អ្នកខ្លះដល់លានដុល្លារ ឱ្យជាប់ចំណងហិរញ្ញវត្ថុ និងរើមិនរួចតែម្ដង។ នេះគេហៅថា ការប្រើប្រាស់ប្រព័ន្ធតុលាការជាឧបករណ៍នេះ ដើម្បីសម្រេចគោលដៅអំណាចរបស់ពួកអ្នកកាន់អំណាច»។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ចាត់ទុកការសម្រេចរបស់តុលាការ ធ្វើឡើងហាក់បានប្រាសចាកចំពោះប្រទេសផ្សេងៗទៀត ដែលប្រកាន់នីតិរដ្ឋ តាមបែបលទ្ធិប្រជាធិបតេយ្យ។
លោកបន្តថា អ្នកវិភាគ ជាអ្នករិះគន់នូវចំណុចអវិជ្ជមាន ដែលកំពុងកើតឡើងនៅក្នុងសង្គមបច្ចុប្បន្ន ហើយគោលដៅនៃការរិះគន់នេះ ក្នុងការស្ថាបនា និងកែលម្អចំណុចខ្វះខាត ដើម្បីបំពេញឱ្យបានពេញលេញនូវប្រទេសមួយ ដែលមានលទ្ធិប្រជាធិបតេយ្យ និងនីតិរដ្ឋ ដែលត្រូវតែគោរព។
លោក សេក សុជាតិ បន្តថា នៅពេលដែលរដ្ឋាភិបាល និងតុលាការប្ដឹងផ្ដល់ និងកាត់ទោសអ្នកវិភាគ ដែលជាអ្នកទាមទាររឿងអយុត្តិធម៌សង្គមនោះ លោកថា កម្ពុជាកំពុងដើរប្រាសចាកពីនីតិរដ្ឋ ហើយក៏ឆ្លុះបញ្ចាំងឱ្យឃើញថា កម្ពុជាមិនទាន់មានភាពចាស់ទុំ ក្នុងនាមជាប្រទេសកាន់លទ្ធិប្រជាធិបតេយ្យ។
លោកថា៖ «បរិបទ ឬការវិបត្តិនយោបាយនៅកម្ពុជា កំពុងដើរប្រាសចាកអំពីរដ្ឋធម្មនុញ្ញ ដែលដើរចេញពីគោលការណ៍លទ្ធិប្រជាធិបតេយ្យ ងាយទៅប្រើប្រាស់ឥទ្ធិពលអំណាចផ្ដាច់មុខ ដើម្បីគ្រប់គ្រង និងធ្វើយ៉ាងណា ដើម្បីរក្សាឱ្យបាននូវអំណាចរបស់ខ្លួន ដោយមិនខ្វល់អំពីរដ្ឋធម្មនុញ្ញ និងកិច្ចព្រមព្រៀងទីក្រុងប៉ារីស»។
ចំណែកសំណុំរឿង «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលមានជនជាប់ចោទ ៣នាក់នោះ ហើយត្រូវប្រកាសសាលក្រម នាថ្ងៃពុធ នេះដែរ លោក សេង សុជាតិ ចៅក្រមជំនុំជម្រះ សម្រេចបង្វិលឱ្យស៊ើបអង្កេតឡើងវិញ។
សំណុំរឿងព្រហ្មទណ្ឌមួយទៀត ដែលមានជនជាប់ចោទ លោក គឹម សុខ អ្នកវិភាគសង្គម និងនយោបាយ, កញ្ញា មាស លក្ខិណា អតីតអ្នកគាំទ្រនយោបាយរបស់គណបក្សប្រឆាំង និងលោក ហ៊ុយ សុខគ្រៀល ដែលកំពុងរស់នៅសហរដ្ឋអាមេរិក ត្រូវបាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ ប្តឹងដោយចោទប្រកាន់ពីបទ «អំពើញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» កាលពីដើមខែកញ្ញា ឆ្នាំ២០២០៕
.