សេចក្តីព្រាងច្បាប់ ស្តីពីការគ្រប់គ្រងប្រទេសជាតិក្នុងភាពអាសន្ន បានឆ្លងផុតពីគណៈរដ្ឋមន្ត្រីហើយ ក្រោមការដឹកនាំកិច្ចប្រជុំបន្ទាន់ ដោយលោក ហ៊ុន សែន កាលពីថ្ងៃទី ៣១ ខែមីនា ឆ្នាំ ២០២០ ហើយឯកសារនៃ សេចក្តីព្រាងច្បាប់នេះ ត្រូវបានផ្សព្វផ្សាយលើបណ្តាញសង្គម និងបណ្តាញសារព័ត៌មាន នៅថ្ងៃទី ០១ ខែមេសា។ សូមចុចត្រង់នេះ ដើម្បីអាន ឬទាញយកនូវ «សេចក្តីព្រាងច្បាប់ទាំងស្រុង – Download»។
ពង្រាងច្បាប់នេះ ត្រូវបញ្ជូនទៅកាន់រដ្ឋសភាជាតិ របស់លោក ហេង សំរិន ជាការប្រញាប់ ដើម្បីពិនិត្យ ពិភាក្សា និងអនុម័ត។ ជាទូទៅ រាល់ការអនុម័តច្បាប់ នាពេលកន្លងទៅ ភាគច្រើន មិនសូវមានការជជែកដេញដោល បន្ថែម ឬបន្ថយខ្លឹមសារ ឬមួយក៏កែពាក្យខុស ឬពាក្យត្រូវអ្វីនោះទេ ពោលគឺ សមាជិកសភា ត្រូវនាំគ្នាលើកដៃ អនុម័តជាឯកឆន្ទតែម្តង ទៅលើខ្លឹមសារដើមទាំងស្រុង។
នៅរសៀលថ្ងៃទី ០១ ខែមេសា ដដែលនេះ លោក ឡេង ប៉េងឡុង អ្នកនាំពាក្យរដ្ឋសភា បានប្រាប់សារព័ត៌មានក្នុងស្រុកថា ពង្រាងច្បាប់ ស្តីពីការគ្រប់គ្រងប្រទេសជាតិ ក្នុងភាពអាសន្ននេះ មិនទាន់មកដល់ដៃ រដ្ឋសភា នៅឡើយទេ ប៉ុន្តែលោករំពឹងថា សេចក្តីព្រាងនេះ នឹងត្រូវបញ្ជូនមករដ្ឋសភា ក្នុងពេលឆាប់ៗខាងមុខ។
បទប្បញ្ញតិ្តនៃសេចក្តីព្រាងច្បាប់ ស្តីពីការគ្រប់គ្រងប្រទេសជាតិក្នុងភាពអាសន្ន មានគោលបំណងកំណត់បែបបទ នីតិវិធី និង លក្ខខណ្ឌ នៃការប្រកាស់ដាក់ និងការគ្រប់គ្រងប្រទេសជាតិក្នុងភាពអាសន្ន នៅពេលប្រជាជាតិ ប្រឈមមុខនឹងគ្រោះថ្នាក់ ដើម្បីការពារសន្តិសុខជាតិ ការពារសណ្តាប់ធ្នាប់សាធារណៈ ការពារអាយុជីវិត និងសុខភាពរបស់ប្រជាពលរដ្ឋ ហើយនិងការពារទ្រព្យសម្បតិ្ត ព្រមទាំងបរិស្ថាន។
មាត្រា ២ និងមាត្រា ៣ (កថាខណ្ឌ ១) នៃសេចក្តីព្រាងច្បាប់នេះ ចែងបញ្ជាក់ឡើងវិញ ទៅលើខ្លឹមសាររដ្នធម្មនុញ្ញ មាត្រា ២២ (ថ្មី) សម្រាប់កាលៈទេសៈប្រទេសជាតិមានភាពអាសន្ន។ មាត្រា ៣ នៃច្បាប់នេះ ចែងថា «នៅពេលប្រជាជាតិប្រឈមមុខគ្រោះថ្នាក់ ព្រះមហាក្សត្រ ទ្រង់ប្រកាសប្រទានដំណឹងជាសាធារណៈ ដាក់ប្រទេសជាតិក្នុងភាពអាសន្ន ក្រោយពីបានមតិឯកភាព ពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា»។
គួរបញ្ជាក់ថា ច្បាប់ស្តីពីការគ្រប់គ្រងប្រទេសជាតិក្នុងភាពអាសន្ននេះ កើតឡើងនៅពេលដែលកម្ពុជា មានការរីករាលដាលមេរោគកូរ៉ូណា ឬកូវីដ១៩ (Covid-19) យ៉ាងគំហុក ខណៈមេរោគនេះ បានឆ្លងកើនឡើង ជាង ៩១ ម៉ឺននាក់ និង សម្លាប់មនុស្ស ជិត ៥ ម៉ឺននាក់ នៅជុំវិញពិភពលោក មកទល់ថ្ងៃទី ០១ ខែមេសា នេះ៕
CWCI Cambodia /អត្ថបទដោយលោក ម៉ែន ណាត / ០១ មេសា ២០២០
.