ក្រុមប្រឹក្សាសិទ្ធិមនុស្សនៃអង្គការសហប្រជាជាតិ (UNHRC) និងឧត្តមស្នងការសិទ្ធិមនុស្សនៃអង្គការសហប្រជាជាតិ (UNHCR) នៅទីក្រុងហ្សឺណែវ កាលពីថ្ងៃទី ០៩ ខែមេសា ឆ្នាំ២០២០ បានបើកកិច្ចប្រជុំសន្ទនាតាមវីដេអូខល (Video Conference) សម្តែងការព្រួយបារម្ភ ចំពោះប្រទេសមួយចំនួន នៅជុំវិញពិភពេលោក ដែលយកវិធានការដាក់ប្រទេសក្នុងភាពអាសន្ន នៅក្នុងស្ថានភាពរីករាលដាលមេរោគកូរ៉ណា ឬកូវីដ-១៩ ដើម្បីគ្រប់គ្រងអំណាចត្រួតត្រា គ្មានពេលកំណត់។
សេចក្តីព្រួយបារម្ភនេះ បញ្ជាក់ពីការឆ្លើយតបចំពោះវិបត្តិជំងឺកូវីដ-១៩ ដែលធ្វើឲ្យប្រទេសជាច្រើន ភ្លេចគិតពីតួនាទី និងកាតព្វកិច្ចរបស់ខ្លួន ក្នុងការគោរពសិទ្ធិមនុស្ស។ (In English: Read more)
លោកស្រី មីស្សែល បាស្សេឡេត (Michelle Bachelet) នាយកឧត្តមស្នងការសិទ្ធិមនុស្ស UNHCR ថ្លែងថា «ជំងឺរាតត្បាតកូវីដ-១៩ កំពុងបង្កការឈឺចាប់ដល់មនុស្សជាតិ និង យាយីនៅតាមតំបន់នីមួយៗ»។ លោកស្រី បន្ថែមថា «ជំងឺនេះ ធ្វើឲ្យមានផលប៉ះពាល់ដល់ ប្រទេសនីមួយៗ រដ្ឋនីមួយៗ ឃ្លាតឆ្ងាយពីការគោរពសិទ្ធិមនុស្ស»។
ចំណែកប្រធានក្រុមប្រឹក្សាសិទ្ធិមនុស្ស UNHRC លោកស្រី Elisabeth Tichy-Fisslberger ថ្លែងតាមវីដេអូខល ពីប្រទេសអូទ្រីស បានអំពាវនាវថា «ប្រទេសនីមួយៗ មិនត្រូវភ្លេចកាតព្វកិច្ចរបស់ខ្លួន គឺការគោរពសិទ្ធិមនុស្ស នៅក្នុងការដោះស្រាយវិបត្តិជំងឺកូវីដ១៩ ហើយត្រូវគោរពសេរីភាពបញ្ចេញមតិ និងសេរីភាពក្នុងការជួបប្រជុំ តាមទម្រង់ដែលអាចធ្វើបាន ថែរក្សាសុខភាពបាន»។ (In English: Read more)
នៅកម្ពុជា ឯនេះវិញ ប្រឹងប្រែងពន្លឿនអនុម័តសេចក្តីព្រាងច្បាប់ ស្តីពីការគ្រប់គ្រងប្រទេសស្ថិតក្នុងភាពអាសន្ន ក្រោមមូលហេតុនៃការរីករាលដាលជំងឺកូរ៉ូណា ដែលក្រុមអ្នកឃ្លាំមើលជាតិ និងអន្តរជាតិ បានហៅថា «ជាលេសរបស់លោក ហ៊ុន សែន នាយករដ្ឋមន្រ្តី នៃរដ្ឋាភិបាលទីក្រុងភ្នំពេញ ក្នុងផែនការផ្ទេរអំណាចឲ្យកូនប្រុសរបស់លោក គឺលោក ហ៊ុន ម៉ាណែត»។
លោក Phil Robertson នាយករងអង្គការសិទ្ធិមនុស្សអន្តរជាតិ Human Right Watch ប្រចាំអាស៊ី ត្រូវបានវិទ្យុវីអូឌី ដកស្រង់ចុះផ្សាយថា «ប្រព័ន្ធផ្សព្វផ្សាយឯករាជ្យ មានសារៈសំខាន់ ក្នុងការដោះស្រាយវិបត្តិសុខភាពសាធារណៈ ពីព្រោះពលរដ្ឋ ត្រូវការព័ត៌មាន ដើម្បីការពារខ្លួន និងវាយតម្លៃការឆ្លើយតប របស់រដ្ឋាភិបាល។ ម្ចាស់ជំនួយបរទេស គួរតែជំរុញរដ្ឋាភិបាលកម្ពុជា ឲ្យបញ្ឈប់ការយាយី និង ការចោទប្រកាន់អ្នកសារព័តមាន ព្រមទាំងប្រព័ន្ធផ្សព្វផ្សាយ ដែលគ្រាន់តែបំពេញ [ការងារ]របស់ខ្លួន ក្នុងការរាយការណ៍ អំពីអ្វីដែលរដ្ឋាភិបាល កំពុងនិយាយ និងធ្វើ ក្នុងពេលមានវិបត្តិកូវីដ-១៩»។
វិទ្យុវីអូឌីដដែល បានដកស្រង់សម្តីលោក កត្តា អ៊ន អ្នកនាំពាក្យនៃ គណៈកម្មាធិការសិទ្ធិមនុស្ស របស់រដ្ឋាភិបាលថា «ការផ្ទុះឡើងនៃជំងឺកូវីដ១៩ ក្នុងប្រទេស ស្ថានភាពសិទ្ធិមនុស្សនៅកម្ពុជា គឺពុំមានការប៉ះពាល់នោះទេ។ ផ្ទុយទៅវិញ គឺមានការជ្រោមជ្រែងឡើងនៃសិទ្ធិមនុស្ស ទៅវិញទេ»។
អង្គការសិទ្ធិមនុស្សអន្តរជាតិ Human Right Watch បានឲ្យដឹងថា រដ្ឋាភិបាលលោក ហ៊ុន សែន បានចាប់ឃុំខ្លួនអ្នករិះគន់ ចំនួន ២៣ នាក់ហើយ មកដល់ពេលនេះ ជុំវិញស្ថានភាពរីករាលដាលជំងឺកូរ៉ូណា ឬកូវីដ-១៩។
នៅឆ្នាំ ២០១៩ មានរបាយការណ៍ស្តីពីសេរីភាពសារព័ត៌មានពិភពលោក ដែលបង្ហាញដោយអង្គការអ្នកកាសែតគ្មានព្រំដែន ឲ្យដឹងថា «បានចាត់ចំណាត់ថ្នាក់សេរីភាពសារព័ត៌មាន នៅកម្ពុជា ស្ថិតក្នុងលេខរៀង ១៤៣ ក្នុងចំណោមប្រទេស ១៨០ ដែលជាចំណាត់ថ្នាក់ដ៏អាក្រក់ ខាងការរឹតត្បិតសេរីភាពព័ត៌មាន៕
អត្ថបទដោយលោក ម៉ែន ណាត នៃក្រុមប្រឹក្សាឃ្លាំមើលកម្ពុជា / ១៥ មេសា ២០២០
.
CWCI Cambodia 