អត្ថបទដោយ TCD /សម្រួលអត្ថបទដោយ នគរ
បណ្ឌិត កែម ឡី គឺជាអ្នកវិភាគនយោបាយ និងស្រាវជ្រាវការអភិវឌ្ឍសង្គមដ៏ល្បីល្បាញ ដែលត្រូវបានធ្វើឃាត កាលពី ៤ឆ្នាំមុន គឺនៅថ្ងៃទី១០ កក្កដា ២០១៦ ខណៈស្ថានភាពនយោបាយកម្ពុជា ធ្លាក់ក្នុងភាពល្អក់កករ និងជាពេលដែលរដ្ឋាភិបាលលោក ហ៊ុន សែន ត្រូវបានអង្គការបរិស្ថានពិភពលោក Global Witness បង្ហាញអំពីត្រកូល ហ៊ុន {ហ៊ុន សែន} ក្តោបក្តាប់អំណាច និងសេដ្ឋកិច្ចទាំងអស់នៅកម្ពុជា។ បណ្ទិត កែម ឡី បានវិភាគរឿងនេះ រយៈពេល ២ ថ្ងៃ មុនការបាញ់សម្លាប់រូបលោក នៅស្តាម៉ាត ស្ថានីយ៍ប្រេងឥន្ធនៈបូកគោ (Star Mart, Caltex) ក្រុងភ្នំពេញ។ លោកបណ្ឌិតត្រូវបានពលរដ្ឋខ្មែរ ប្រសិទ្ធិនាមថា «ជាអ្នករួតវាំងននសង្គម ជាអ្នកឧត្តមគតិនិយម»។
លោក សួង នាគព័ន្ធ អតីតអនុប្រធានសមាគសម្ព័ន្ធនិស្សិតបញ្ញវន្តខ្មែរ អះអាងថាធ្លាប់បានសំណេះសំណាលជាមួយឈ្មោះ អឿត អាង ឬហៅ ជួប សម្លាប់ នៅក្នុងព័ន្ធនាគារព្រៃស ខណៈពេលលោក ត្រូវបានអាជ្ញាធរចាប់ដាក់ពន្ធនាគារ ក្នុងពេលប្រារព្ធពិធីបុណ្យខួប ៣ ឆ្នាំជូនបណ្ឌិត កែម ឡី កាលពីឆ្នាំ២០១៩ បាននិយាយថា «អឿត អាង មិនមែនជាឃាតក ទេ ប៉ុន្តែឃាតកពិត គឺជាឈ្មោះ កង ប៊ុនទូ ជាជំនិតរបស់លោក ហ៊ុន ម៉ាណែត {កូនប្រុសច្បងរបស់លោក ហ៊ុន សែន} ដែលបានទទួលបញ្ជាពីក្រុមគ្រួសារត្រកូល ហ៊ុន» ដើម្បីរៀបផែនការបាញ់សម្លាប់បណ្ឌិត កែម ឡី។ ការអះអាងនេះ ធ្វើឡើងក្នុងកម្មវិធី Idea Talk នៃសារព័ត៌ ឌឹខេមបូឌា ឌែលី The Cambodia Daily កាលពីរាត្រីថ្ងៃទី ០៧ ខែកក្កដា ឆ្នាំ២០២០ កន្លងទៅ។
គ្មានប្រភពណាផ្សេងទៀត អាចបញ្ជាក់ថា លោក សួង នាគព័ន្ធ បានសំណេះសំណាល ឬមិនបានសំណេះសំណាលជាមួយលោក អឿត អាង ជាក់លាក់នោះទេ។ ប៉ុន្តែប្រភពជាច្រើនដែលគួរឲ្យជឿទុកចិត្តបាន បានបញ្ជាក់ស្រដៀងគ្នាថា «លោក អឿត អាង ដែលត្រូវបានតុលាការកាត់ក្តីឲ្យជាប់ពន្ធនាគារមួយជីវិតនោះ គឺត្រូវបានកងឆ្មាំពន្ធនាគារ ដាក់បម្រាមតឹងតែងបំផុត ក្នុងជួបប្រាស្រ័យទាក់ទងជាមួយអ្នកជាប់ពន្ធនាគារដូចគ្នា ជាពិសេសក្រុមសកម្មជននយោបាយ និងអ្នកទោសមនសិការ»។ ទោះបីយ៉ាងណាក៏ដោយ លោក សួង នាគព័ន្ធ ត្រូវបានដោះលែង កាលពីចុងឆ្នាំ ២០១៩ ហើយបានទទួលសិទ្ធិជ្រកកោននយោបាយ នៅប្រទេសស៊្វីស សព្វថ្ងៃ។
តំណាងព្រះសង្ឃនៃក្រុមខ្មែរថាវរៈ ព្រះភិក្ខុ កើត សារ៉ាយ មានសង្ឃដីកាក្នុងកម្មវិធី Idea Talk នៃសារព័ត៌មាន The Cambodia Daily ដែរថាខួប ៤ ឆ្នាំនៃការបាត់បង់លោកបណ្ឌិត កែម ឡី នៅតែធ្វើឲ្យយុវជនខ្មែរ ចងចាំវីរភាព និងគុណធម៌របស់លោកជានិច្ច ហើយពួកគេត្រូវប្រារព្ធពិធីរំលឹកគុណលោកបណ្ឌិត នៅថ្ងៃទី ១០ កក្កដានេះ ដោយធ្វើធម្មយាត្រាពីទីក្រុងភ្នំពេញ ឆ្ពោះទៅកាន់ភូមិកំណើតរបស់លោកបណ្ឌិត នៅខេត្តតាកែវ។
អ្នកឃ្លាំមើលសង្គមលើកឡើងថា ក្រោមការដឹកនាំជាង ៤០ឆ្នាំរបស់លោក ហ៊ុន សែន កន្លងមកនេះ អំពើឃាតកម្មធំៗក្រៅប្រព័ន្ធច្បាប់ជាច្រើន មិនត្រូវបានផ្តល់យុត្តិធម៌ពិតប្រាកដ ជូនជនរងគ្រោះ និងក្រុមគ្រួសារជនរងគ្រោះនោះឡើយ។ អំពើឃាតកម្មធំៗទាំងនោះ រួមមាន ការសម្លាប់តារាសំដែង អ្នកស្រី ពិសិដ្ឋ ពីលីកា នៅខែកក្កដា ឆ្នាំ ១៩៩៩។ ការសម្លាប់អតីតប្រធានសហជីពសេរីកម្មករ លោក ជា វិជ្ជា នៅខែមករា ឆ្នាំ២០០៤ ក្បែរវត្តលង្កា ក្នុងទីក្រុងភ្នំពេញ។ ការធ្វើឃាតព្រះតេជព្រះគុណ សំ ប៊ុនធឿន ក្នុងឆ្នាំ២០០៣ ក្នុងបរិវេណវត្តលង្កា។ ឃាតកម្មលើប្រធានអង្គការការពារធនធម្មជាតិ លោក ឈុត វុទ្ធី នៅខេត្តកោះកុង ក្នុងឆ្នាំ២០១២។
ចលនានិស្សិតដើម្បីលទ្ធិប្រជាធិបតេយ្យ (SMD) បានស្នើឲ្យតុលាការកម្ពុជា បើកការស៊ើបអង្កេតឡើងវិញ លើសំណុំរឿងឃាតកម្ម ២០ ករណី ជាពិសេសឃាតកម្ម ទៅលើអ្នកស្រាវជ្រាវការអភិវឌ្ឍន៍សង្គម លោក កែម ឡី និងតារាសំដែងក្នុងទស្សវត្តទី៩០ អ្នកស្រី ពិសិដ្ឋ ពីលីកា ផងដែរ។ ក្នុងសេចក្តីថ្លែងការណ៍ ខួប ៤ឆ្នាំនៃឃាតកម្មលោកបណ្ឌិត កែម ឡី នៅថ្ងៃទី៧ ខែកក្កដា ចលនានិស្សិតដើម្បីលទ្ធិប្រជាធិបតេយ្យ នេះ លើកឡើងថា ឃាតកម្មទៅលើលោកបណ្ឌិត កែម ឡី មិនទាន់ត្រូវបានវែកមុខ ឬចាប់ខ្លួនឃាតកពិត និងអ្នកពាក់ព័ន្ធ យកទៅផ្តន្ទាទោសទៅតាមផ្លូវច្បាប់នៅឡើយទេ។
ប្រធានប្រតិបត្តិនៃ ចលនានិស្សិតដើម្បីលទ្ធិប្រជាធិបតេយ្យ លោក ទូច វិបុល បានទាមទារឲ្យតុលាការកម្ពុជា បង្ហាញអង្គចងចាំនៃប្រព័ន្ធកាមេរ៉ាសុវត្ថិភាព នៅស្តាម៉ាត ស្តុបបូគោ ក្នុងពេលកើតហេតុ កាលពីថ្ងៃទី ១០ ខែកក្កដា ឆ្នាំ ២០១៦ ចំថ្ងៃឃាតកម្មលោកបណ្ឌិត កែម ឡី។
ចំណែកព្រះភិក្ខុ កើត សារ៉ាយ បញ្ជាក់ថា ក្នុងពេលចាប់ផ្តើមកម្មវិធីគម្រប់ខួបបណ្ឌិត កែម ឡី តម្រូវឲ្យអ្នកចូលរួម ត្រូវអង្គុយស្មឹងស្មាធ ដើម្បីគោរពវិញ្ញាណខក្ខន្ធ និងរំលឹកគុណចំពោះវីរភាពរបស់លោកបណ្ឌិត មុននឹងចាប់ផ្តើមធម្មយាត្រា។
ចំណែកកញ្ញា ឈឿន ដារ៉ាវី បានថ្លែងថា ក្នុងការធ្វើធម្មយាត្រានេះ ក៏មានចែកជូនវត្ថុអនុស្សាវរីយ៍ ដល់អ្នកចូលរួមផងដែរ មានដូចជា អាវយឺតរូបលោកបណ្ឌិត កែម ឡី ចំនួន ២០០ អាវ, សៀភៅដែលលោកបណ្ឌិតបានចងក្រងចំនួនជិត ២០០ ក្បាល និងបន្តោងសោររូបលោកបណ្ឌិតចំនួន ៧៥ បន្តោងផងដែរ។
ព្រះសង្ឃ និងក្រុមយុវជន បានអំពាវនាវដល់រដ្ឋាភិបាល ឲ្យប្រឹងប្រែងក្នុងការវែកមុខឃាតកពិត ជូនជនរងគ្រោះ និងក្រុមគ្រួសារជនរងគ្រោះ ដើម្បីបញ្ចាក់ពីភាពស្អាតស្អំរបស់រដ្ឋាភិបាលខ្លួនឯងផង ក៏ដូចជាការពង្រឹងប្រព័ន្ធច្បាប់ឡើងវិញ ចៀសវៀងកុំឲ្យជនណាម្នាក់ ប្រព្រឹត្តល្មើសក្រៅប្រព័ន្ធច្បាប់បានតទៅទៀត៕
.
.