ធ្វើបច្ចុប្បន្នភាព៖ មកដល់ល្ងាចថ្ងៃទី០៧ ខែកញ្ញា ឆ្នាំ២០២០ ក្រុមសកម្មជនពលរដ្ឋសកម្មដើម្បីយុត្តិធម៌ ៣ រូបបន្ថែមទៀត ត្រូវបានអាជ្ញាធររដ្ឋាភិបាលកម្ពុជា ចាប់ខ្លួន រួមមានលោក ថា ឡាវី កញ្ញា សូ មេត្តា (អេង ម៉ាឡៃ) និងកញ្ញា សាន ស្រីនិច។ ការចាប់ខ្លួននេះ កើតឡើងនៅពេលម៉ោងខុសៗគ្នា៖ លោក ថា ឡាវី ត្រូវបានចាប់ខ្លួននៅពេលលោក ធ្វើទៅចូលរួមធ្វើបាតុកម្មអហិង្សា នៅទីលានប្រជាធិបតេយ្យ ហើយកញ្ញា សូ មេត្តា និងកញ្ញា សាន ស្រីនិច ត្រូវបានចាប់ខ្លួននៅពេលបញ្ចប់បាតុកម្ម។
សេចក្តីថ្លែងការណ៍របស់ក្រុមប្រឹក្សាឃ្លាំមើលកម្ពុជា បានចេញផ្សាយមុនពេលអាជ្ញាធរភ្នំពេញ ចាប់ខ្លួនសកម្មជន ៣ រូបខាងលើនេះ។ ប៉ុន្តែទោះបីជាយ៉ាងណាក៏ដោយ ក្រុមប្រឹក្សានេះ បានអំពាវនាវឲ្យដោះលែងក្រុមសកម្មជនទាំងអស់ ឲ្យមានសេរីភាពឡើងវិញ ដោយគ្មានលក្ខខណ្ឌ។ (អត្ថបទបន្ថែមដោយ CWCI Cambodia)
សូមទាញយកសេចក្តីថ្លែងការណ៍ (Download)។
សេចក្តីថ្លែងការណ៍
រដ្ឋាភិបាលកម្ពុជា ត្រូវដោះលែងសកម្មជនពលរដ្ឋសកម្មជាបន្ទាន់
ក្រុមប្រឹក្សាឃ្លាំមើលកម្ពុជា សូមថ្កោលទោសយ៉ាងដាច់អហង្កា ចំពោះអាជ្ញាធររដ្ឋាភិបាលកម្ពុជា ដែលស្លៀកពាក់ស៊ីវិល ជាមួយក្រុមព្រះសង្ឃផង បានសម្រុកចូលចាប់ឃាត់ខ្លួនព្រះភិក្ខុ កើត សារ៉ាយ និងលោក មាន ព្រហ្មមុនី ជាមេដឹកនាំពលរដ្ឋសកម្មដើម្បីយុត្តិធម៌ នៅទីស្នាក់ការសមាគមសម្ព័ន្ធនិស្សិតបញ្ញវន្តខ្មែរ នាថ្ងៃទី០៦ ខែកញ្ញា ឆ្នាំ២០២០ ម៉ោង ១:៣០នាទីរសៀល គឺមុនពេល ១ថ្ងៃដែលអ្នកទាំងពីរ ត្រូវចេញដឹកនាំបាតុកម្មដោយសន្តិវិធី ដែលគ្រោងធ្វើនៅទីលានប្រជាធិបតេយ្យ ថ្ងៃទី០៧ ខែកញ្ញា។ ចំណែកកាលពីថ្ងៃទី០៣ ខែកញ្ញា អាជ្ញាធរក្រុងភ្នំពេញ បានចាប់ឃុំខ្លួនសកម្មជនបរិស្ថាន លោក ថុន រដ្ឋា កញ្ញា ភួន កែវរស្មី និងកញ្ញា ឡុង គន្ធា យ៉ាងអយុត្តិធម៌ ក្នុងយុទ្ធនាការទាមទារឲ្យរដ្ឋាភិបាល បញ្ឈបការចាក់លុបបឹងកប់ស្រូវ ឬបឹងតាមោក។
ករណីការចាប់ឃាត់ខ្លួនមេដឹកនាំពលរដ្ឋសកម្មដើម្បីយុត្តិធម៌ និងក្រុមសកម្មជនបរិស្ថានទាំងនេះ ជាការរំលោភយ៉ាងធ្ងន់ធ្ងរទៅលើរដ្ឋធម្មនុញ្ញកម្ពុជា ត្រង់កថាខណ្ឌទី១ នៃមាត្រា៣៥ និងកថាខណ្ឌទី១ នៃមាត្រា៤១ ព្រមទាំងរំលោភទៅលើមាត្រា១៩ នៃសេចក្តីប្រកាសជាសកលស្តីពីសិទ្ធិមនុស្ស។
រដ្ឋាភិបាលលោក ហ៊ុន សែន កំពុងបន្តរុញច្រានស្ថានការប្រទេសកម្ពុជា ឲ្យធ្លាក់ក្នុងវិបត្តិធ្ងន់ធ្ងរនៃការអនុវត្តអំណាចផ្តាច់ការ ដែលដើរផ្ទុយទាំងស្រុងពីខ្លឹមសាររដ្ឋធម្មនុញ្ញកម្ពុជាឆ្នាំ១៩៩៣ និងកិច្ចព្រមព្រៀងទីក្រុងប៉ារីសឆ្នាំ១៩៩១។ ទង្វើរបស់រដ្ឋាភិបាលលោក ហ៊ុន សែន របៀបនេះ គឺជាការរំលោភសិទ្ធិមនុស្ស, គោលការណ៍លទ្ធិប្រជាធិបតេយ្យ និងបំបិទសិទ្ធិបញ្ចេញមតិរបស់ពលរដ្ឋ ដែលធានាដោយច្បាប់បទដ្ឋានជាតិ-អន្តរជាតិ។
ក្រុមប្រឹក្សាឃ្លាំមើលកម្ពុជា សូមអំពាវដល់រដ្ឋាភិបាល និងតុលាការកម្ពុជា ដោះលែងក្រុមសកម្មជនទាំងអស់ដោយគ្មានលក្ខខណ្ឌ រួមមានភិក្ខុ កើត សារ៉ាយ លោក មាន ព្រហ្មមុនី លោក ថុន រដ្ឋា កញ្ញា ភួន កែវរស្មី កញ្ញា ឡុង គន្ធា លោក រ៉ុង ឈុន យុវតី ឈឿន ដារ៉ាវី លោក ហ៊ុន វណ្ណៈ លោក សួង សុភ័ណ្ឌ យុវតី ស កន្និកា និងអ្នកផ្សេងៗទៀត ដើម្បីរួមចំណែកលើកកម្ពស់សិទ្ធិមនុស្ស សិទ្ធិបញ្ចេញមតិ សិទ្ធិជួបប្រជុំជាសាធារណៈរបស់ពលរដ្ឋឡើងវិញ ហើយរួបរួមគ្នាការពារអធិបតេយ្យជាតិ និងបូរណភាពទឹកដីខ្មែរ ស្របតាមខ្លឹមសាររដ្ឋធម្មនុញ្ញកម្ពុជា គោលការណ៍ច្បាប់អន្តរជាតិ និងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
ក្រុងគ្រីស្ទានសាន់ (ន័រវេស៍) ថ្ងៃទី០៧ ខែកញ្ញា ឆ្នាំ២០២០
ម៉ែន ណាត (ហត្ថលេខា និងត្រា)
ប្រធានក្រុមប្រឹក្សាឃ្លាំមើលកម្ពុជា
.
.