អត្ថបទដោយលោក ម៉ែន ណាត / ក្រុមប្រឹក្សាឃ្លាំមើលកម្ពុជា /២៥ វិច្ឆិកា ២០២០ – Updated
រដ្ឋាភិបាលលោក ហ៊ុន សែន បានបើកការដ្ឋានសាងសង់វិមានមិត្តភាព កម្ពុជា-វៀតណាម ទី២២ នៅខេត្តត្បូងឃ្មុំ កាលពីថ្ងៃទី ២០ ខែវិច្ឆិកា ឆ្នាំ២០២០។ ចំណែកស្ថានទូតវៀតណាម ប្រចាំកម្ពុជា ក៏បានបង្ហោះសារនៅលើហ្វេសប៊ុកផេក របស់ខ្លួនឱ្យដឹងថា វិមានមិត្តភាពកម្ពុជា-វៀតណាម ក្នុងខេត្តត្បូងឃ្មុំ នេះ បានសាងសង់ក្នុងបរិវេណសួនច្បារ ដែលមានទំហំ ៤ ហិកតារ នៅជិតមជ្ឈមណ្ឌលរដ្ឋបាលថ្មីរបស់ខេត្ត។ នេះបើតាមការផ្សាយរបស់វិទ្យុអាស៊ីសេរី (RFA Khmer) នៅថ្ងៃទី២៤ ខែវិច្ឆិកា។
វិទ្យុអាស៊ីសេរីដដែល បានដកស្រង់សំដី លោក អ៊ុំ សំអាន អតីតសមាជិកសភា ពីគណបក្សសង្គ្រោះជាតិ មានប្រតិកម្មថា «យើងសូមអំពាវដល់រដ្ឋាភិបាលលោក ហ៊ុន សែន ហ្នឹង ឈប់សាងសង់ស្ដូបយួន (វៀតណាម) បន្តទៀតទៅ ហើយស្តូបយួន ដែលមានប៉ុន្មាន គួរតែវាយចោល ឬក៏កែច្នៃយ៉ាងម៉េច វាល្អជាង ព្រោះកាលណានៅតែសាងសង់ នៅតែដឹងគុណ គឺខ្មែរនៅតែជំពាក់គុណយួន មិនចេះចប់ ហើយទឹកដីខ្មែរ កាន់តែរួញទៅៗ»។
ចំណែកលោកបណ្ឌិត សេង សារី អ្នកស្រាវជ្រាវការអភិវឌ្ឍន៍សង្គម យល់ថា «ថ្វីដ្បិតភាគីរដ្ឋាភិបាល លើកឡើងពីគុណសម្បត្តិ នៃការសាងសង់ស្តូបនេះ ប៉ុន្តែពលរដ្ឋ មិនតិចជាងកន្លះប្រទេសទេ ដែលបង្ហាញការមិនគាំទ្រ។ ការសាងសង់ស្តូបនេះ នៅតាមបណ្ដាខេត្តមួយចំនួន អាចធ្វើឲ្យបាត់បង់អត្តសញ្ញាណ នៅក្នុងខេត្តរបស់កម្ពុជា»។
ជាការពិត ពលរដ្ឋខ្មែរ មិនដែលបានបង្ហាញការពេញចិត្តពេញថ្លើម ចំពោះវត្តមាននៃស្តូបអនុស្សាវរីយ៍ ឬវិមានឈ្នះ-ឈ្នះ ដែលរដ្ឋាភិបាលលោក ហ៊ុន សែន ខំកសាង និងជួសជុលឡើងវិញ ដើម្បីបំពេញបំណងចង់បានរបស់វៀតណាម ដែលមានប្រវត្តិសាស្រ្តឈ្លានពានកម្ពុជា ជាច្រើនសតវត្សរ៍មកហើយ បើទោះបីពលរដ្ឋនៃប្រទេសទាំងពីរ ចង់បានសន្តិភាព និងវិបុលភាពដូចគ្នា ក្នុងនាមជាមនុស្សជាតិយ៉ាងណាក៏ដោយ។
កន្លងទៅ ក្រសួងការពារជាតិកម្ពុជា បានឲ្យដឹងតាមរយៈអនុគណៈកម្មការកសាងសង់ស្តូបអនុស្សាវរីយ៍ នៃវិមានឈ្នះ-ឈ្នះ នៅខេត្តកោះកុង អំពាវនាវឲ្យសាធារណជន និងពលរដ្ឋខ្មែរ ចូលរួមគាំទ្រដល់គម្រោងសាងសង់របស់ខ្លួន។ អនុគណៈកម្មការនេះ បានឲ្យដឹងថា «ខ្លួនកំពុងមានការខ្វះខាតថវិកា សម្រាប់បន្តសាងសងវិមានឈ្នះ-ឈ្នះ នៅខេត្តកោះកុង»។ នេះបើតាមការចុះផ្សាយរបស់សារព័ត៌មានថ្មីៗ កាលពីថ្ងៃទី២៣ ខែមិថុនា ឆ្នាំ២០២០។
មិនមានការសាទរទៅលើគម្រោងនោះទេ ប៉ុន្តែពលរដ្ឋខ្មែរនៅលើបណ្តាញសង្គមហ្វេសប៊ុក បែរជាបង្ហាញទឹកចិត្តឈឺចាប់ ទៅលើនយោបាយឈ្លានពានរបស់វៀតណាម នៅកម្ពុជា ដែលមេដឹកនាំកម្ពុជា មិនដែលហ៊ាននិយាយ ឬតវ៉ាជំទាស់វៀតណាមម្តងណាសោះ។ បណ្តាញសង្គម៖ «រូបសំណាក ឬស្តូបអនុស្សាវរីយ៍នានានៅកម្ពុជា គប្បីត្រូវបំបាត់ចោល ដើម្បីបញ្ចប់ការឈឺចាប់របស់ពលរដ្ឋខ្មែរ និងកសាងកិត្យានុភាពខ្មែរ»។
កាលពីថ្ងៃទី២៧ ខែមិថុនា គណបក្សប្រជាធិបតេយ្យមូលដ្ឋាន (គ.ប.ម.) ត្រូវបានសារព័ត៌មានវីអូឌី (VOD) ចុះផ្សាយសេចក្តីអំពាវនាវមួយរបស់ខ្លួន ទៅកាន់រដ្ឋាភិបាល លោក ហ៊ុន សែន ដោយផ្តល់យោបល់ថា «សាងសង់ស្តូប រំឭកគុណវីរបុរសខ្មែរទាំងឡាយ ដែលបានបូជាចំពោះការការពារជាតិ ឬរូបសំណាក តំណាងឱ្យខេត្ត តំបន់ឱ្យបានធំ និងល្អប្រណិត ជំនួសឱ្យស្តូបរំឭកគុណជាតិសាសន៍ដទៃ ដើម្បីជាការលើកស្ទួយដល់ការកសាងមោទកភាពជាតិខ្មែរឡើងវិញ»។ សេចក្តីអំពាវនាវបន្តថា «រាជរដ្ឋាភិបាលដែលដឹកនាំដោយបក្សប្រជាជន មានការខំប្រឹងប្រែងយ៉ាងខ្លាំង ក្នុងការកៀរគរធនធានកសាងស្តូបរំឭកគុណវៀតណាម នៅគ្រប់រាជធានី-ខេត្ត ក្នុងប្រទេសកម្ពុជា ដែលយើងគិតថា ជារឿងមិនល្អ សម្រាប់អនាគតជាតិខ្មែរ»។
សារព័ត៌មានវីអូឌី (VOD) ដដែល ដកស្រង់សេចក្តីថ្លែងការណ៍របស់ ក្រុមប្រឹក្សាឃ្លាំមើលកម្ពុជា កាលពីថ្ងៃទី០១ ខែមិថុនា បានអំពាវនាវថា «រដ្ឋាភិបាល ត្រូវផ្អាកគម្រោងសាងសង់ស្ដូបមិត្តភាពកម្ពុជា-វៀតណាម ឬស្ដូបអនុស្សាវរីយ៍ នៃនយោបាយឈ្នះ-ឈ្នះ នៅតាមរាជធានី-ខេត្ត ដោយបារម្ភថា ស្តូបនេះ បង្ហាញរូបភាពកម្ពុជា ចុះខ្សោយក្លាយជារដ្ឋចំណុះឱ្យប្រទេសជិតខាង»។
ទោះបីជាយ៉ាងណាក្តី ស្ថានទូតវៀតណាមប្រចាំកម្ពុជា ឱ្យដឹងថា «សព្វថ្ងៃ ស្តូបចំនួន ១៧ បានសម្ពោធរួចជាស្រេច ចំណែកស្ដូប ៤ ផ្សេងទៀត នៅខេត្តប៉ៃលិន ព្រៃវែង កំពង់ស្ពឺ និងឧត្តរមានជ័យ គ្រោងបើកការដ្ឋានសាងសង់ចុងឆ្នាំនេះ»៕
អត្ថបទទាក់ទង
– ក្រុមប្រឹក្សាឃ្លាំមើល អំពាវនាវរដ្ឋាភិបាល ឲ្យផ្អាកសង់ស្ដូបវៀតណាម នៅកម្ពុជា
– ក្រុមប្រឹក្សាឃ្លាំមើលកម្ពុជា ជំទាស់គម្រោងសាងសង់បន្ថែមស្តូបវៀតណាម ឬស្តូបនយោបាយឈ្នះ-ឈ្នះ
– ស្តូបវៀតណាម សង់គ្រប់ខេត្ត-ក្រុង នៅកម្ពុជា និងវិមានឈ្នះ-ឈ្នះ មានខ្លឹមសារដូចគ្នា
.