អត្ងបទ CWCI Cambodia
12th-12-2023
នាយករដ្ឋមន្ត្រីកម្ពុជា លោក ហ៊ុន ម៉ាណែត ទៅទស្សនកិច្ចប្រទេសវៀតណាម ជាផ្លូវការលើកដំបូង ចាប់តាំពីលោកឡើងធ្វើនាយករដ្ឋមន្ត្រី កាលពីថ្ងៃទី២២ សីហា និង ត្រូវបានតែងតាំងជាអនុប្រធានគណបក្សប្រជាជនកម្ពុជា នៅថ្ងៃទី១០ ក្នុងខែធ្នូនេះ បានធ្វើឲ្យមានមតិចម្រុះស្រដៀងៗគ្នា អំពីគោលដៅនៃដំណើរទស្សនកិច្ចរបស់លោក។ ទស្សនកិច្ចនេះ មានរយៈពេល ២ថ្ងៃ នៅទីក្រុងហាណូយ គឺនៅថ្ងៃទី១១ និងទី១២ ខែធ្នូ ឆ្នាំ២០២៣។
នៅទីក្រុងហាណូយ លោក ហ៊ុន ម៉ាណែត មានជំនួបជាមួយនាយករដ្ឋមន្ត្រីវៀតណាម លោក ផាម មិញជីញ (Pham Minh Chinh), លោក ង្វៀន ហ៊្វូចុង (Nguyen Phu Trong) អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាម, លោក វ៉ វ៉ាន់ធឿង (Vo Van Thuong) ប្រធានរដ្ឋ ឬប្រធានាធិបតីវៀតណាម និងលោក វឿង ឌិញហ្វេ (Vuong Dinh Hue) ប្រធានរដ្ឋសភាវៀតណាម។
មេដឹកនាំនៃប្រទេសទាំងពីរ បានបញ្ជាក់ក្នុងបណ្តាញផ្សព្វផ្សាយថា ភាគីទាំងពីរធ្វើជាអធិបតីភាពនៃការចុះហត្ថលេខា លើកិច្ចសហប្រតិបត្តិការចំនួន ៣ រួមមាន ទី១) អនុស្សរណៈយោគយល់គ្នា ស្ដីពីកិច្ចសហប្រតិបត្តិការ លើវិស័យវិទ្យាសាស្ត្របច្ចេកវិទ្យា និងនវានុវត្តន៍ រវាងក្រសួងឧស្សាហកម្មវិទ្យាសាស្ត្របច្ចេកវិទ្យាខ្មែរ និង ក្រសួងវិទ្យាសាស្ត្របច្ចេកវិទ្យាវៀតណាម។ ទី២) អនុស្សរណៈយោគយល់គ្នាអំពីកិច្ចសហប្រតិបត្តិការ រវាងវិទ្យាស្ថានជាតិការទូត និងទំនាក់ទំនងអន្តរជាតិខ្មែរ និងបណ្ឌិត្យសភាការទូតវៀតណាម និងទី៣ អនុស្សរណៈនៃការយោគយល់គ្នា រវាងសភាពាណិជ្ជកម្មខ្មែរ និងសភាពាណិជ្ជកម្មវៀតណាម ។
កាលពីថ្ងៃទី៧ ខែធ្នូ ក្រសួងការបរទេសខ្មែរ បានឱ្យដឹងថា លោក ហ៊ុន ម៉ាណែត ទៅបំពេញទស្សនកិច្ចនៅវៀតណាម តបតាមការអញ្ជើញរបស់នាយករដ្ឋមន្ត្រីវៀតណាម លោក ផាម មិញជីញ ដើម្បីពង្រឹងកិច្ចសហប្រតិបត្តិការលើវិស័យជាច្រើន រួមមាន ការអប់រំ ពាណិជ្ជកម្ម វិនិយោគ ការតភ្ជាប់ទេសចរណ៍ វប្បធម៌ សន្តិសុខ ការពារជាតិ និងកិច្ចការព្រំដែន ជាដើម។
ទោះជាយ៉ាងណាក៏ដោយ លោក គឹម សុខ អ្នកវិភាគនយោបាយ និងជាប្រធានវេទិកាពលរដ្ឋ បានថ្លែងក្នុងកិច្ចសម្ភាសន៍កម្មវិធី Idea Talk នៃសារព័ត៌មាន The Cambodia Daily ថ្ងៃទី១១ ធ្នូ ថា លោក ហ៊ុន ម៉ាណែត ទៅកាន់ប្រទេសវៀតណាម ដើម្បីចូលស្បថកាន់មុខតំណែង ឲ្យវៀតណាមទទួលស្គាល់ នូវតំណែងដែលទើបឡើងជានាយករដ្ឋមន្ត្រីកម្ពុជា និងជាអនុប្រធានគណបក្សប្រជាជនកម្ពុជា គឺស្បថ ឬធ្វើសច្ចាប្រណិធាននៅចំពោះមុខមេដឹកនាំបក្សកុម្មុយនីស្តឥណ្ឌូចិន ដែលវៀតណាម គឺជាមេកោយ។
លោក គឹម សុខ បន្តថា ទាំងបក្សកាន់អំណាច ទាំងលោក ហ៊ុន សែន និងលោក ហ៊ុន ម៉ាណែត នៅតែស្ថិតក្រោមការជួយសម្របសម្រួលពីវៀតណាម ដើម្បីការពារអំណាចត្រកូល ហ៊ុន ហើយនៅតែត្រូវបម្រីនយោបាយឲ្យវៀតណាម ដដែល។
ចំណែកលោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា មានមូលដ្ឋាននៅប្រទេសន័រវែស (Norway) ត្រូវបានវិទ្យុអាស៊ីសេរី ដកស្រង់សម្តីនៅថ្ងៃទី១១ ធ្នូដែរថា ដំណើរទស្សនកិច្ចរបស់លោក ហ៊ុន ម៉ាណែត ទៅវៀតណាម ជាការទៅបង្ហាញមុខ ក្នុងនាមជាមេដឹកនាំរដ្ឋាភិបាលថ្មី ជាអ្នកដឹកនាំគណបក្សប្រជាជនកម្ពុជា និង ទៅរាយការណ៍ជូននាយករដ្ឋមន្ត្រី ប្រមុខរដ្ឋ និងអគ្គលេខាធិការបក្សកុម្មុយនិស្តវៀតណាម អំពីសមិទ្ធផលនានា ដែលបក្សប្រជាជនកម្ពុជា បានធ្វើកន្លងមក។ លោកជឿជាក់ថា មេដឹកនាំវៀតណាម នឹងស្នើជាថ្មីទៀតឱ្យមេដឹកនាំក្រុងភ្នំពេញ យកចិត្តទុកដាក់មើលថែដល់ពលរដ្ឋរបស់ខ្លួន នៅកម្ពុជា។
លោក ម៉ែន ណាត បញ្ជាក់ថា «នេះជាផែនការរបស់វៀតណាម។ អ៊ីចឹង អ្វីដែលលោក ហ៊ុន ម៉ាណែត ទៅហ្នឹង ដើម្បីរាយការណ៍ អាហ្នឹងហើយធម្មតា បើគាត់ទៅក្នុងនាមជានាយករដ្ឋមន្ត្រី ហើយគ្រាន់តែជាសមាជិកអចិន្ត្រៃយ៍របស់បក្ស វាអត់គ្រប់គ្រាន់ អីចឹងបានជាឪពុក{គាត់}ដំឡើងតំណែងគាត់មួយកម្រិតទៀត ឱ្យបានដល់អនុប្រធានបក្សហ្នឹង ដើម្បីឱ្យគាត់ទៅនិយាយជាមួយវៀតណាម ឱ្យវាស្មើមុខស្មើមាត់ តាមប្រពៃណីពួកកុម្មុយនិស្តផ្ដាច់ការ ហ្នឹង គេត្រូវការមុខមាត់អ៊ីចឹង។ អ៊ីចឹង គេត្រូវដំឡើងតំណែងកូនគេឱ្យបានធំទៅ ដើម្បីវាស្រួលមានប្រតិកម្មពីវៀតណាម។ បើទៅមិនមានការតែងតាំងតំណែងថ្មី ឱ្យលោក ហ៊ុន ម៉ាណែត វាអាចមានប្រតិកម្មពីវៀតណាមច្រើន»។
អ្នកសិក្សាផ្នែកច្បាប់ លោក វ៉ន ចាន់ឡូត ត្រូវបានវិទ្យុអាស៊ីសេរី ដកស្រង់សម្តីដែរថា «ក្នុងជំនួបនេះ ក៏មិនខុសពីថ្នាក់ដឹកនាំខ្មែរកំពូលៗ មុនៗដែរ ដែលកម្ពុជាបានចាញ់ប្រៀបវៀតណាម លើគ្រប់វិស័យ»។ លោកបញ្ជាក់ថា ក្នុងអំឡុងពេលឡើងកាន់តំណែងជាង ១០០ថ្ងៃមកនេះ លោក ហ៊ុន ម៉ាណែត ហាក់មិនទាន់បង្ហាញពីឯករាជភាព ដើម្បីធ្វើឱ្យប្រទេសមានឯករាជ្យពិតប្រាកដ នៅឡើយទេ។
សមាជិកសភានៃអតីតគណបក្សសង្គ្រោះជាតិ លោក អ៊ុំ សំអាន ត្រូវបានសារព័ត៌មាន The Cambodia Daily ចុះផ្សាយថា «សព្វថ្ងៃនេះ រដ្ឋាភិបាលកុម្មុយនីស្តវៀតណាម បានដាក់បញ្ចូលប្រទេសកម្ពុជា ជាអាណាខេត្តមួយរបស់គេរួចទៅហើយ បើទោះបីជាវៀតណាម មិនទាន់ឈ្លានពានលេបត្របាក់យកប្រទេសកម្ពុជាទាំងស្រុងក៏ដោយ» ព្រោះថាកន្លងមក រដ្ឋាភិបាលវៀតណាម មិនដែលដាក់តាំងទង់ជាតិកម្ពុជា នៅពីក្រោយខ្នងលោក ហ៊ុន ម៉ាណែត ទេ រាល់ពេលដែលមានជំនួបរវាងភាគីទាំងពីរម្តងៗ អំឡុងពេលដែលលោក ហ៊ុន ម៉ាណែត កាន់តួនាទីជាមេបញ្ជាការកងទ័ពជើងគោករបស់កម្ពុជា កាលពីពេលកន្លងទៅនោះ។
សារព័ត៌មានវៀតណាម (Vietnam News) បានចុះផ្សាយនៅថ្ងៃទី១១ ធ្នូនេះថា «នាយករដ្ឋមន្ត្រីវៀតណាម លោក ផាម មិញជីញ បានថ្លែងអំណរគុណរដ្ឋាភិបាលកម្ពុជា ដែលជួយសម្រួលដល់ជនជាតិវៀតណាម ឲ្យមានសិទ្ធិស្របច្បាប់ នៅប្រទេសកម្ពុជា»។ ការថ្លែងរំឭកនេះ ធ្វើឡើងនៅក្នុងជំនួបជាមួយលោក ហ៊ុន ម៉ាណែត នាយករដ្ឋមន្ត្រីកម្ពុជា នៅទីក្រុងហាណូយ។
បើតាមរបាយការណ៍ព័ត៌មាននៃវិទ្យុអាស៊ីសេរី បានគូសបញ្ជាក់ថា «ថ្មីៗនេះ វៀតណាម បានស្នើភាគីកម្ពុជាចំនួន ២ ដង ក្នុងរយៈពេលតែ ៤ ថ្ងៃប៉ុណ្ណោះ ដើម្បីក្រើនរំឭកឱ្យរដ្ឋាភិបាលរបស់លោក ហ៊ុន ម៉ាណែត យកចិត្តទុកដាក់ចំពោះសមាគម និង ជួយគាំទ្រពលរដ្ឋវៀតណាម ដែលរស់នៅកម្ពុជាបន្តទៀត។ ក្នុងនោះ លើកទី១ ស្នើនៅថ្ងៃទី១ ធ្នូ ក្នុងអំឡុងពេលប្រធានរដ្ឋសភាថ្មីកម្ពុជា អ្នកស្រី ឃួន សុដារី ទៅប្រជុំនៅទីក្រុងហាណូយ ប្រទេសវៀតណាម ខណៈលើកទី២ នៅពេលគណៈប្រតិភូ ក្រសួងការបរទេសវៀតណាម បំពេញទស្សនកិច្ចនៅកម្ពុជា កាលពីថ្ងៃទី៣០ វិច្ឆិកា ដល់ថ្ងៃទី៣ ធ្នូ»។ ការស្នើម្ដងហើយម្ដងទៀតនេះ ស្របពេលជនជាតិវៀតណាម ជាង ១០ម៉ឺន (១០០.០០០)នាក់ បានទទួលបានប័ណ្ណស្នាក់នៅស្របច្បាប់ ក្នុងប្រទេសកម្ពុជា ហើយបច្ចុប្បន្ន ពួកគេកំពុងបំពេញលក្ខខណ្ឌរបស់ក្រសួងមហាផ្ទៃ ដើម្បីទទួលបានសញ្ជាតិខ្មែរ ខណៈជនជាតិវៀតណាម ជិត ១០០នាក់ ទទួលបានសញ្ជាតិខ្មែរពេញលេញ៕
