អ្នកឃ្លាំមើលថា នៅក្នុងជម្លោះព្រំដែនជាមួយថៃ កម្ពុជាគួរតែតតាំងដោយកម្លាំងយោធា និងយុទ្ធសាស្ត្រការទូត
TFA Khmer /ដោយ យ៉ង ចាន់តារា
12th-12-2025
អ្នកឃ្លាំមើលលើកឡើងថា ក្នុងជម្លោះព្រំដែន ភាគីថៃ បានប្រើប្រាស់យុទ្ធសាស្ត្រ និងឧបាយកលគ្រប់ទម្រង់ ទាំងនៅក្នុងវិស័យយោធា ព័ត៌មាន និងការទូត ដើម្បីយកប្រៀបលើភាគីកម្ពុជា។ ពួកគាត់យល់ថា នៅក្នុងបរិបទនេះ កម្ពុជាគួរតែវាយបក ដោយប្រើប្រាស់សិទ្ធិការពារខ្លួនខាងផ្នែកយោធា និងម្ខាងទៀត កម្ពុជា ត្រូវរកវិធីបង្ហាញព័ត៌មានឱ្យពិភពលោកដឹងថា ថៃដែលជាប្រទេសមានកម្លាំងយោធាធំ បានឈ្លានពានកម្ពុជា ដែលជាប្រទេសទន់ខ្សោយ។
យោធាថៃ បានបង្កើនការវាយប្រហារកាន់តែខ្លាំង ទោះបីជាកម្ពុជា ដែលជាគូភាគី បានបើកភ្លើងខៀវ សម្រាប់ចរចាយ៉ាងណាក្ដី។
ប្រធាននៃស្ថាប័នអធិបតេយ្យភាពជាតិព្រំដែន និងអន្តោប្រវេសន៍នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន ប្រាប់ទូរទស្សន៍អាស៊ីសេរី នៅថ្ងៃទី១១ ខែធ្នូ ថា យុទ្ធសាស្ត្រទ័ពរបស់យោធាថៃ គឺពឹងផ្អែកសំខាន់ទៅលើយន្តហោះចម្បាំង ដ្រូនពិឃាដ និងកាំភ្លើងធំ ក្នុងការវាយប្រហារសន្ធប់មកលើកងទ័ពខ្មែរ មុននឹងបញ្ជូនទ័ពថ្មើរជើង ឱ្យចូលមកវាយប្រហារតាមក្រោយ។ លោកបន្តថា ចំពោះយុទ្ធសាស្ត្រនេះ កម្ពុជាគួរតែប្រើប្រាស់ ហេតុផលទល់នឹងហេតុផល ពោលគឺ បើយោធាថៃ មកវាយប្រហារខ្មែរ ដោយអាងថា ជាការប្រើប្រាស់សិទ្ធិដើម្បីការពារខ្លួន កម្ពុជាក៏អាចប្រើប្រាស់ហេតុផលនេះបានដូចគ្នា ដោយប្រើប្រាស់កាំជ្រួចប្រឆាំងយន្តហោះថៃ ឬសំណាញ់មេឃ ដើម្បីប្រឆាំងនឹងការវាយប្រហារ និងការពារអាយុជីវិតរបស់ទាហានខ្មែរ និងបូរណភាពទឹកដី។
លោក អ៊ុំ សំអាន ៖ «ដើម្បីទប់ទល់នឹងការឈ្លានពានរបស់ថៃ គួរតែដាក់ពាក្យប្ដឹងទៅកាន់តុលាការ ICC ក្នុងករណីទាហានថៃ រំលោភលើស្ត្រីខ្មែរ ការបាញ់ពលរដ្ឋខ្មែរស្លាប់ម្នាក់ នៅភូមិព្រៃចាន់ ហើយថ្មីៗនេះ បានសម្លាប់ពលរដ្ឋខ្មែរជាច្រើន នៅក្នុងសង្គ្រាមពេលនេះ»។
ការផ្ទុះអាវុធជាំលើកទី២ រវាងកម្ពុជា និងថៃ នេះ បានចាប់ពន្លកឡើងតាំងពីប្រទេសទាំង២ បានចុះកិច្ចព្រមព្រៀងបទឈប់បាញ់ថ្មីថ្មោង កាលពីថ្ងៃទី២៨ ខែកក្កដា ក្រោមការសម្របសម្រួល ពីប្រធានអាស៊ានប្ដូរវេន គឺប្រទេសម៉ាឡេស៊ី និងសហរដ្ឋអាមេរិក បន្ទាប់ពីភាគីទាំង២ បានវាយប្រហារគ្នាអស់រយៈពេល ៥ ថ្ងៃ គឺចាប់ពីថ្ងៃទី២៤ ដល់យប់ថ្ងៃទី២៨ ខែកក្កដា ដែលបណ្ដាលឱ្យទាហាន និងជនស៊ីវិលរបស់ភាគីទាំង២ ស្លាប់ និងរបួសជាច្រើននាក់។
ក៏ប៉ុន្តែ នៅប៉ុន្មានម៉ោងក្រោយកិច្ចព្រមព្រៀងនេះ ក្រុមយោធាថៃ បានប្រើឧបាយកលចាប់ខ្លួនទាហានខ្មែរ ចំនួន ២១ នាក់ ក្នុងនោះមានម្នាក់បានស្លាប់ និង២នាក់ត្រូវបានដោះលែងវិញ ក្រោមសភាពពិការ និងវង្វេងស្មារតី ខណៈ ១៨ នាក់ទៀត ត្រូវបានយោធាថៃបន្តរក្សាទុកធ្វើជាឈ្លើយសឹក រហូតមកដល់បច្ចុប្បន្ននេះ។
ជាថ្មីម្ដងទៀត យោធាថៃបានលើកយកហេតុការណ៍ជាន់មីនផ្ទុះ នៅតាមបណ្ដាញព្រំដែន មកដាក់សម្ពាធលើកម្ពុជា ហើយបានបញ្ជូនទាហានមករាយបន្លាលួស ព័ទ្ធយកដីភូមិម្កររបស់ពលរដ្ឋខ្មែរ នៅភូមិព្រៃចាន់ និងភូមិជោគជ័យ ស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នៅក្នុងករណីនេះ យោធាថៃបានបង្កហិង្សាដាក់ពលរដ្ឋខ្មែរជាច្រើនដង រហូតដល់មានការបាញ់ប្រហារមកលើពលរដ្ឋខ្មែរ បណ្ដាលឱ្យស្លាប់ទៀតផង។
ជាចុងក្រោយ ថៃបានហែកចោលកិច្ចព្រមព្រៀងសន្តិភាពជាមួយកម្ពុជា ដោយលើកយកករណីទាហានថៃ ដើរជាន់មីន នៅតំបន់ព្រំដែន មកធ្វើជាលេសម្ដងទៀត ទោះបីជាភាគីកម្ពុជា បានថ្នមសភាពការណ៍ និងមានការទទូចពីប្រទេសម៉ាឡេស៊ី និងសហរដ្ឋអាមេរិក ដែលធ្វើជាសាក្សីក៏ដោយ។
ជុំវិញរឿងនេះ អ្នកស្រាវជ្រាវការអភិវឌ្ឍន៍សង្គម បណ្ឌិត មាស នី យល់ឃើញថា ភាគីថៃហាក់បានត្រៀមយុទ្ធសាស្ត្រ និងផែនការយ៉ាងម៉ត់ចត់ មុននឹងបើកការវាយប្រហារមកលើកម្ពុជា ហើយក្នុងកាលៈទេសៈនេះ បើកម្ពុជាចង់ចរចា លុះត្រាតែកម្ពុជា មានប្រៀបទៅលើសមរភូមិប្រយុទ្ធ។ លោកបន្ថែមថា កម្ពុជាគួរតែវាយបកទៅលើភាគីថៃវិញ ដោយប្រើប្រាស់សិទ្ធិការពារខ្លួនខាងផ្នែកយោធា និងម្ខាងទៀត កម្ពុជាត្រូវរកវិធីបង្ហាញព័ត៌មានឱ្យពិភពលោកដឹងថា ភាគីថៃដែលជាប្រទេសមានកម្លាំងយោធាធំ បានឈ្លានពានកម្ពុជា ដែលជាប្រទេសទន់ខ្សោយ។
លោក មាស នី ៖ «ស្ដាយដែរ កម្ពុជាយើងជាង ៣០ឆ្នាំនេះ អត់បានរៀបចំខ្លួន ដើម្បីពង្រឹងសមត្ថភាពកងទ័ពទេ។ យើងហាក់បីដូចជាឆកល្វែងពេក ហើយនៅពេលមានអាសន្នមក យើងបានចាញ់ប្រៀបគេ ជាពិសេសលើផ្នែកយោធា»។
នៅក្នុងការប្រយុទ្ធគ្នាជាលើកទី២ នេះ យោធាថៃបានប្រើប្រាស់យុទ្ធសាស្ត្រវាយប្រហារមកលើកម្ពុជា ជាជំហាន ដោយនៅពេលវាយប្រហារមកលើកម្ពុជារួច ពួកគេបានចោទថា ទីតាំងនោះគឺជាមូលដ្ឋានទ័ពរបស់ទាហានខ្មែរ និងលើកហេតុផលថា នេះជាការប្រើប្រាស់សិទ្ធិការពារខ្លួន។ ក្រៅពីរៀបក្បួននៅលើសមរភូមិប្រយុទ្ធ យោធាថៃបានប្រើយុទ្ធសាស្ត្រការទូត និងប្រព័ន្ធផ្សព្វផ្សាយ តាមរយៈការផ្ដល់សម្ភាស និងបញ្ជូនព័ត៌មានទៅកាន់ស្ថាប័នផ្សព្វផ្សាយ របស់អន្តរជាតិល្បីៗ ដើម្បីផ្សាយអំពីហេតុការណ៍នៅក្នុងទឹកដីថៃ ឱ្យសម្បូរបែប ដែលធ្វើឱ្យស្ថាប័នអន្តរជាតិធំៗមួយចំនួន ដកស្រង់នូវការចុះផ្សាយទាំងនេះ យកមកធ្វើជាឯកសារយោង។
យ៉ាងណាក៏ដោយចុះ អ្នកឃ្លាំមើលយល់ឃើញថា ទោះបីជាជម្លោះព្រំដែននេះ កើតឡើងដោយសារការទាញប្រជាប្រិយភាពរបស់អ្នកនយោបាយ ក្នុងចំណោមមេដឹកនាំនៃភាគីណាមួយ ឬកើតចេញពីជម្លោះប្រវត្តិសាស្ត្រក្ដី មេដឹកនាំកម្ពុជាគួរតែ បើកលំហសេរីភាពសារព័ត៌មាន និងពង្រឹងវិស័យយោធាឡើងវិញ ដោយពួកគាត់បានលើកឡើងថា នៅក្នុងប្រវត្តិសាស្ត្រនៃសង្គ្រាមឈ្លានពាន ប្រទេសដែលមានប្រជាជន និងយោធាមានចំនួនតិច នៅតែអាចការពារខ្លួន និងវាយបកទៅកាន់សត្រូវវិញបាន ដោយអាស្រ័យលើគុណភាព និងការធ្វើទំនើបកម្មនៅក្នុងវិស័យការពារជាតិ៕
អ្នកឃ្លាំមើលថា កម្ពុជាក្រៅពីប្រើសិទ្ធិការពារខ្លួនផ្លូវយោធា ក៏ត្រូវតែប្ដឹងថៃ ទៅតុលាការអន្តរជាតិ
TFA Khmer /ដោយ សុ ជីវី
11th-12-2025
អ្នកឃ្លាំមើលថា កម្ពុជាក្រៅពីប្រើសិទ្ធិការពារខ្លួនតាមផ្លូវយោធា គឺត្រូវតែប្ដឹងថៃ ទៅតុលាការអន្តរជាតិ ពាក់ព័ន្ធអំពើឧក្រិដ្ឋកម្មសង្គ្រាម និងការឈ្លានពានទឹកដីកម្ពុជា ខណៈដែលសហគមន៍អន្តរជាតិ កំពុងតែតាមដានជុំវិញការឈ្លានពាននេះ។
ការផ្ទុះអាវុធជាថ្មីរវាងកម្ពុជា-ថៃ នៅតាមខេត្តជាប់ព្រំដែន ចំនួន ៤ ថ្ងៃ [តាំងពីថ្ងៃទី០៧ ខែធ្នូ] ជាប់គ្នាមកនេះ បានបង្កផលប៉ះពាល់ដល់អាយុជីវិត ទាហាន ជនស៊ីវិល ផ្ទះសម្បែង និងសម្បត្តិសាធារណៈជាច្រើន។ ទន្ទឹមគ្នានោះ គេឃើញថា ទាហានថៃ បានប្រើប្រាស់អាវុធទំនើបៗ បាញ់ប្រហារ លើទីតាំងកងទ័ព និងជនស៊ីវិលខ្មែរ យ៉ាងកម្រោល បណ្ដាល ឱ្យពលរដ្ឋខ្មែរ ស្លាប់ និងរងរបួស ជាបន្តបន្ទាប់។
អ្នកជំនាញផ្នែកទំនាក់ទំនងអន្តរជាតិ និងភូមិសាស្ត្រនយោបាយ បណ្ឌិត រ៉ូ វណ្ណៈ ប្រាប់ទូរទស្សន៍អាស៊ីសេរី នៅថ្ងៃទី១០ ខែធ្នូថា បើទោះជាពេលនេះ គ្មានប្រទេសមហាអំណាចណា ចេញថ្កោលទោស ការឈ្លានពានរបស់ថៃក្ដី ក៏សហគមន៍អន្តរជាតិខ្លះ បានចេញសេចក្ដីថ្លែងការណ៍ ព្រួយបារម្ភជុំវិញ ជម្លោះកម្ពុជា-ថៃ ហើយបាន អំពាវនាវឱ្យប្រទេសទាំងពីរ ទៅរកតុចរចាឡើងវិញ។ បន្ថែមពីនោះ លោកថា កម្ពុជា គួរតែប្រមូលភស្តុតាងឱ្យបានច្រើន ដើម្បីបង្ហាញសហគមន៍អន្តរជាតិ និងត្រៀមប្ដឹងថៃ ទៅកាន់តុលាការអន្តរជាតិ។
ជាមួយគ្នានោះ លោកថា កម្ពុជាត្រូវយកបញ្ហានេះ ទៅដោះស្រាយ តាមរយៈកិច្ចការទូត និង កោះប្រជុំជាមួយអង្គការសហប្រជាជាតិ ដោយប្រើប្រាស់យន្តការអាស៊ាន ដែលមានប្រទេសម៉ាឡេស៊ី ជាអ្នកសម្របសម្រួល ក្នុងការកៀរគរប្រទេសដទៃទៀត ដើម្បីដាក់សម្ពាធទៅលើភាគីថៃ ឱ្យចូលតុចរចា។ ពិសេសជាងនោះ លោកថា កម្ពុជាត្រូវពង្រឹងសមត្ថភាពឱ្យខ្លាំង និងរួបរួមសាមគ្គីជាតិឱ្យរឹងមាំ នោះទើបធ្វើឱ្យកម្ពុជា កាន់តែស្វាហាប់ លើឆាក់អន្តរជាតិ។
បណ្ឌិត រ៉ូ វណ្ណៈ៖ «អ៊ីចឹងរឿងចាំបាច់បន្ទាន់នៅពេលនេះ គឺការពារបូរណភាពទឹកដីផង និងប្រើប្រាស់យន្តការការទូតផង ដើម្បីធ្វើយ៉ាងណាកុំឱ្យសង្គ្រាមឈ្លានពានរបស់ថៃមកលើកម្ពុជានេះ វិវត្តន៍ទៅជាសង្គ្រាមរយៈពេលវែង»។
រីឯអ្នកច្បាប់ និងអ្នកវិភាគឯករាជ្យ លោក វន់ ចាន់ឡូត បានបង្ហោះនៅលើហ្វេសប៊ុករបស់លោក នៅថ្ងៃទី១០ ខែ ធ្នូថា លោក គ្មានជំនឿទាល់តែសោះ លើការពឹងឱ្យអន្តរជាតិ មកជួយកម្ពុជា ក្នុងគ្រាលំបាកបែបនេះ ប្រសិនបើអ្នកនយោបាយខ្មែរ មិនសាមគ្គីគ្នា តស៊ូ ពុះពារប្រឆាំងនឹងថៃ ឱ្យបានម៉ឺងម៉ាត់ ដោយខ្លួនឯង។ ជាក់ស្ដែង លោកថា ជាង ៥ខែនេះ កម្ពុជាបានគោរពកិច្ចព្រមព្រៀងបទឈប់បាញ់ និងកិច្ចព្រមព្រៀងសន្តិភាពកូឡាឡាំពួរក្ដី ភាគីថៃ ធ្វើអ្វីតាមអំពើចិត្ត ប្រើហិង្សាលើពលរដ្ឋខ្មែរស្លូតត្រង់ រំលោភបូកលើពលការិនីខ្មែរ និងបាញ់ជនស៊ីវិលស្លាប់នៅភូមិព្រៃចាន់ ស្រុកអូរជ្រៅ ហើយគ្មានអន្តរជាតិណា ចេញមុខថ្កោលទោសថៃ នោះទេ រហូតមកទល់ពេលនេះ ថៃបើកការបាញ់ប្រហារទាំងកម្រោល មកលើកម្ពុជាយ៉ាងគឃ្លើន។
លោកបន្ថែមថា ដើម្បីអាចវាយបំបាក់ភាពអំនួតរបស់ភាគីថៃបាន កម្ពុជាត្រូវតែប្រយុទ្ធឱ្យគេកោតខ្លាច កុំទៅសុំឱ្យគេជួយ និងបន្តឱ្យគេប្រមាថ ទោះបីជានៅសល់តែកាំបិត ពូថៅ ដំបង ត្រូវតាំងចិត្តថា នឹងប្រយុទ្ធការពារជាតិដល់ទីបញ្ចប់។ លោកថា បើកម្ពុជាមិនប្ដេជ្ញាម៉ឺងម៉ាត់ ពីឥឡូវទេ ប្រជាជាតិ នឹងរស់ក្នុងការប្រមាថជារៀងរហូត។
ចំណែក អ្នកស្រាវជ្រាវការអភិវឌ្ឍន៍សង្គម បណ្ឌិត មាស នី បានបង្ហោះសារលើហ្វេសប៊ុក របស់លោកថា ដើម្បីចម្លងប្រទេសកម្ពុជា ឱ្យរួចផុតពីការ គំរាមពីប្រទេសជិតខាង ដូចជា ថៃ និងវៀតណាម កម្ពុជា មិនត្រូវធ្វើ ខ្លួនឱ្យគេអាណិត អាសូរទេ តែត្រូវធ្វើឱ្យគេសរសើរ និងកោតក្រែង នោះទើបហៅថា កម្ពុជាខ្លាំង និងអាចការពារទឹកដីបានយូរអង្វែង។ បន្ថែមពីនោះ លោកថា ការប្រើប្រាស់ យន្តការច្បាប់ប្ដឹងថៃ ទៅកាន់ស្ថាប័នអន្តរជាតិ ក៏ជារឿងចាំបាច់ផងដែរ។
ជុំវិញរឿងនេះទូរទស្សន៍ អាស៊ីសេរីពុំអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតប បានទេនៅថ្ងៃទី១០ ខែធ្នូ។ រីឯ អ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ លើកឡើងយ៉ាងខ្លីថា ពេលនេះរដ្ឋាភិបាល គិតតែរួមគ្នាការពារទឹកដីប្រឆាំងសត្រូវឈ្លានពាន។
ចំណែកប្រព័ន្ធឃោសនារបស់រដ្ឋាភិបាល Fresh News នៅថ្ងៃ ដដែលនេះបានផ្សាយថា ក្រោយពីជនស៊ីវិលខ្មែរចំនួន ៩នាក់ រួមនិងទារកម្នាក់បានស្លាប់ ដោយសារតែ ការបាញ់ប្រហារពីទាហានថៃចំនួន៥ថ្ងៃជាប់គ្នានេះ មន្ត្រីជាន់ខ្ពស់របស់រដ្ឋាភិបាលកម្ពុជា កំពុងប្រមូលភស្តុតាង ដើម្បីប្ដឹងទៅតុលាការព្រហ្មទណ្ឌអន្តរជាតិ ICC ។
ការលើកឡើងនេះ ក្រោយពីរដ្ឋបាលប្រធានាធិបតីអាមេរិក ដូណាល់ ត្រាំ (Donald J. Trump) កាលពីយប់ថ្ងៃទី៩ ធ្នូ បានបង្ហាញក្ដីព្រួយបារម្ភ ចំពោះការប្រយុទ្ធគ្នាជាថ្មីរវាងកម្ពុជា និងថៃ ក្រោយកិច្ចខិតខំប្រឹងប្រែងរកបទឈប់បាញ់ និងសន្តិភាពរបស់អាមេរិក កំពុងបរាជ័យដោយសារយោធាថៃ មិនគ្រប់កិច្ចព្រមព្រៀង។
រីឯ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរ៉េ (António Guterres) នៅថ្ងៃទី៨ ខែធ្នូ ក៏បានលើកឡើងថា វិវាទព្រំដែនរវាងកម្ពុជា-ថៃ បានបណ្ដាលឲ្យមានជនស៊ីវិលស្លាប់ និងរបួសយ៉ាងច្រើន។ លោកជំរុញឲ្យភាគីទាំងពីរត្រូវតែការពារជនស៊ីវិល និងជួយសម្រួលដល់ការជួយសង្គ្រោះមនុស្សធម៌។ ចំណែក ប្រទេសបារាំង និងអូស្ត្រាលី បានបង្ហាញក្ដីព្រួយបារម្ភចំពោះការកើនឡើងនៃភាពតានតឹងនៅតាមបណ្ដោយព្រំដែនកម្ពុជា-ថៃ ដោយអំពាវនាវឱ្យភាគីទាំងពីរគោរពតាមកិច្ចព្រមព្រៀងបទឈប់បាញ់ អនុវត្តការអត់ធ្មត់ជាអតិបរមា និងចាត់វិធានការជាបន្ទាន់ដើម្បីបន្ថយភាពតានតឹង។
ប្រធានអ្នកឃ្លាំមើលកម្ពុជា លោក ម៉ែន ណាត លើកឡើងថា ខណៈពេលនេះ លោកគាំទ្រឱ្យរដ្ឋាភិបាល ប្រើប្រាស់សិទ្ធិការពារខ្លួនដោយអង់អាច និងម៉ឺងម៉ាត់ ក្នុងការបាញ់ប្រឆាំងទៅនឹងភាគីថៃ ដែលបានឈ្លានពានទឹកដីកម្ពុជា ដោយមិនត្រូវបន្ធូរបន្ថយឡើយ។ ជាមួយគ្នានោះ លោកថា កម្ពុជាក៏មិនត្រូវភ្លេចដែរ ក្នុងការប្រមូលភស្តុតាង ប្ដឹងថៃ ទៅតុលាការយុត្តិធម៌អន្តរជាតិ ICJ និងតុលាការព្រហ្មទណ្ឌអន្តរជាតិ ICC ពាក់ព័ន្ធទាហានថៃបានប្រព្រឹត្តឧក្រិដ្ឋកម្មសង្គ្រាម ដូចជា ការប្រើយន្តហោះ F-16 និង ដ្រូន (Drone) ទម្លាក់គ្រាប់កម្ទេចប្រាសាទតាក្របី ប្រាសាទព្រះវិហារ និងបាញ់សំដៅលើ តំបន់ជនស៊ីវិលខ្មែរបណ្ដាលឱ្យស្លាប់ និងរងបួសជាច្រើននាក់។
លោកជឿជាក់ថា កងទ័ពកម្ពុជា មានកម្លាំង និងយុទ្ធសាស្ត្រ គ្រប់គ្រាន់ ក្នុងការច្បាំងជាមួយទាហានថៃ ព្រោះថាទាហានកម្ពុជា មានបទពិសោធន៍ច្រើនក្នុងសមរភូមិ សង្គ្រាម ហើយស្គាល់ភូមិសាស្ត្រ ឈរជើងច្បាស់ ជាងកងទ័ពថៃ។
លោក ម៉ែន ណាត ៖ «ជាមួយគ្នានឹង ក៏យើងអំពាវនាវដល់រដ្ឋាភិបាលកម្ពុជាដែរ គឺរដ្ឋមន្ត្រីការបរទេសកម្ពុជា និង នាយករដ្ឋមន្ត្រីខ្មែរ ត្រូវតែ បន្តយន្តការការទូតជាមួយនឹងអន្តរជាតិ រៀបរាប់ប្រាប់គេ ថា យើងជាជនរងគ្រោះបើទោះបីជាយើង ប្រឹងគោរពបទឈប់បាញ់រយៈពេល ៥ ខែមកនេះក្ដី តែថៃ មិនបានគោរពម្ដងណាសោះ។ អ៊ីចឹងយើងបង្ហាញឯកសារទៅគេទៅថា យើងពិតជាជនរងគ្រោះដោយសារតែ ការគឃ្លើនរបស់ថៃ មកលើកម្ពុជាមែន»។
គិតត្រឹមថ្ងៃទី១០ ខែធ្នូ ម៉ោង១២ ថ្ងៃត្រង់ ចាប់តាំងពី យោធាថៃបើកការបាញ់ប្រហារមកលើកម្ពុជា ចំនួន ៤ ថ្ងៃជាប់ៗគ្នាមក មានជនស៊ីវិលចំនួន ៩ នាក់ ហើយបានស្លាប់ រួមនឹង ទារក ១នាក់ ហើយអ្នក រងរបួស មានចំនួន៤៦នាក់។ ក្នុងនោះ ពលរដ្ឋជាង ១២សែន (១២៧ ១៣៣) នាក់ នៅខេត្ត ព្រះវិហារ ឧត្តរមានជ័យ បន្ទាយមានជ័យ ពោធិ៍សាត់ និងបាត់ដំបង បានភៀសសឹកទៅកន្លែងសុវត្ថិភាព៕
