តាមគេហទំព័រវីអូឌី (VOD News) បានចុះផ្សាយថ្ងៃទី ០៤ ខែមីនា ឆ្នាំ២០២០ ឲ្យដឹងថា ក្រុមមេដឹកនាំនៃ សមាគមខ្មែរក្រោម បានប្រតិកម្មទៅនឹងសេចក្តីព្រាងច្បាប់ ស្តីពី កិច្ចព្រមព្រៀងផ្ទេរអ្នកទោស រវាងកម្ពុជា-វៀតណាម ថាអាចជាការធ្វើឡើងតាមការចង់បានរបស់វៀតណាម។ សមាគមខ្មែរក្រោម ដាក់ការព្រួយបារម្ភថា កិច្ចព្រមព្រៀងនេះ មានចរិតគាបសង្កត់ខ្មែរក្រោម ដែលមានសញ្ជាតិវៀតណាម នៅកម្ពុជា ដូចរដ្ឋាភិបាលវៀតណាម សង្កត់សង្កិនបងប្អូនខ្មែរ នៅលើទឹកដីកម្ពុជាក្រោម ជាទឹកដីកំណើតរបស់ខ្លួនដែរ។
កាលពីកាលពីថ្ងៃទី ០៣ មីនា ២០២០ ក្រសួងយុត្តិធម៌កម្ពុជា បានបញ្ជូនកិច្ចព្រមព្រៀងចំនួន ២ ទៅកាន់រដ្ឋសភា របស់លោក ហេង សំរិន នៃរបបដឹកនាំរបស់លោក ហ៊ុន សែន ដើម្បីពិនិត្យ និងអនុម័ត។ កិច្ចព្រមព្រៀងទាំងពីរ រួមមាន ទី១. កិច្ចព្រមព្រៀងស្តីពីការផ្ទេរទណ្ឌិត ឬអ្នកទោសប្រទេសទាំងពីរ និង ទី២. កិច្ចព្រមព្រៀងស្តីពីការជួយគ្នាទៅវិញទៅមកលើផ្នែកច្បាប់ ក្នុងវិស័យព្រហ្មទណ្ឌ រវាងកម្ពុជា និងវៀតណាម។
គេហទំព័រវីអូឌី បានដកស្រង់សំដី លោក សឺន ជុំជួន អគ្គលេខាធិការនៃ សមាគមខ្មែរកម្ពុជាក្រោមដើម្បីសិទ្ធិមនុស្ស និងការអភិវឌ្ឍ ថា «ប្រសិនបើកិច្ចព្រមព្រៀងនេះ លេចចេញជាផ្លូវការ ពលរដ្ឋខ្មែរក្រោម ដែលមានសញ្ជាតិវៀតណាម នឹងត្រូវបញ្ជូនទៅឃុំខ្លួន បន្តនៅប្រទេសកុម្មុយនិស្ត ហើយនឹងមានការគាបសង្កត់សិទ្ធិសេរីភាពពួកគាត់ធ្ងន់ធ្ងរជាក់ជាមិនខាន»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានឆ្លើយតបទៅមន្រ្តីសមាគមខ្មែរកម្ពុជា ថា «ការព្រួយបារម្ភចំពោះកិច្ចព្រមព្រៀងនេះ ដែលអាចធ្វើទុក្ខបុកម្នេញ ដល់ពលរដ្ឋខ្មែរកម្ពុជានោះ គឺជារឿងយល់ខុស ប្រាសចាកពីគោលដៅនៃ កិច្ចព្រមព្រៀងនោះទាំងស្រុង»។ លោក បញ្ជាក់ថា «ការផ្ទេរទណ្ឌិត គឺយើងជាជនល្មើស បានប្រព្រឹត្តបទល្មើស បានន័យថា ត្រូវបានគេផ្តន្ទាទោស និងអនុវត្តទោស។ អីចឹង កិច្ចព្រមព្រៀងនេះ គឺឱ្យប្រទេសសាម៉ី ផ្ទេរពលរដ្ឋគេ ដែលជាទណ្ឌិត យកមកអនុវត្តទោស នៅប្រទេសដើម ឬប្រទេសកំណើត។ អីចឹង វាអត់មានទាក់ទងការធ្វើទុក្ខបុកម្នេញ ទៅដល់ខ្មែរកម្ពុជាក្រោមអីនោះទេ។ វាអត់ទាក់ទងសោះតែម្តង»។
ប្រធានសមាគមខ្មែរកម្ពុជាក្រោម លោក ថាច់ សេដ្ឋា មើលឃើញថា «មូលហេតុដែលជំរុញឲ្យមានកិច្ចព្រមព្រៀងនេះ ចេញរូបរាងនៅពេលនេះ គឺរដ្ឋាភិបាលបច្ចុប្បន្ន ដឹកនាំដោយឯកបក្ស គ្មានសំឡេងជំទាស់អ្វីទាំងអស់។ នោះជាការធ្វើឡើង តាមការចង់បានរបស់វៀតណាម។ លោក ព្រួយបារម្ភចំពោះកិច្ចព្រមព្រៀងទាំងនេះ ត្បិតកន្លងមក ការអនុវត្តច្បាប់របស់អាជ្ញាធរកម្ពុជា មិនបានត្រឹមត្រូវ ហើយតែងធ្វើតាមការស្នើសុំរបស់វៀតណាម ដែលជាហេតុធ្វើឱ្យពលរដ្ឋខ្មែរក្រោមមួយចំនួនរងគ្រោះ»។
អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង មានប្រសាសន៍ថា ខាងរដ្ឋសភា បានទទួលកិច្ចព្រមព្រៀងទាំងពីរនោះ និងបានបញ្ជូនទៅ គណៈកម្មការទី៦ រដ្ឋសភា ដែលជាគណៈកម្មការនីតិកម្ម និងយុត្តិធម៌ ដើម្បីសិក្សាលម្អិត។ លោក ថាកិច្ចព្រមព្រៀងបែបនេះ កម្ពុជា ចាប់ផ្តើមធ្វើដំបូងគេ ជាមួយវៀតណាម ហើយគ្រោងនឹងធ្វើជាមួយបណ្តាប្រទេស ក្នុងតំបន់អាស៊ាន ក្នុងគោលបំណងដើម្បីប្រយោជន៍ប្រជាជាតិខ្មែរ។
មុនមានកិច្ចព្រមព្រៀងផ្ទេរអ្នកទោសរវាងប្រទេសទាំងពីរ កម្ពុជា-វៀតណាម ក៏ធ្លាប់បានចុះសន្ធិសញ្ញាមួយ កាលពីចុងឆ្នាំ ២០១៣ ស្តីពីការផ្តល់បត្យាប័ន ចាប់បញ្ជូនជនល្មើសឱ្យគ្នាទៅវិញទៅមក តាមការស្នើសុំរបស់ភាគីម្ខាង។ សន្ធិសញ្ញាបត្យាប័ននេះ ធ្វើឡើងក្នុងគោលបំណង សហប្រតិបត្តិការ ឱ្យមានប្រសិទ្ធភាព ក្នុងការបង្ក្រាបបទល្មើសរវាងប្រទេសទាំងពីរ ដោយឈរលើមូលដ្ឋានគោរពអធិបតេយ្យភាព សមភាព និងប្រយោជន៍រួមរវាងប្រទេសទាំងពីរ។ ប៉ុន្តែ សន្ធិសញ្ញាបត្យាប័នដដែលនេះ បានបដិសេធការធ្វើបត្យាប័ន ឬការបញ្ជូនខ្លួនសាម៉ីជន ពាក់ព័ន្ធបទល្មើសនយោបាយ បទល្មើសយោធា បទល្មើស ដែលមានលក្ខណៈធ្វើទុក្ខបុកម្នេញផ្នែកពូជសាសន៍ ជាតិពិន្ធុ ជំនឿ សាសនា ឬទស្សនៈនយោបាយជាដើម។
យ៉ាងនេះក្តី លោក ជិន ម៉ាលីន ថាជានីតិវិធី ក្រោយគណៈកម្មការជំនាញសិក្សារួច កិច្ចព្រមព្រៀងទាំងពីរ នឹងត្រូវបញ្ជូនត្រឡប់ទៅគណៈកម្មាធិការអចិន្ត្រៃយ៍វិញ ដើម្បីកំណត់កាលបរិច្ឆេទ លើកយកទៅអនុម័តក្នុងកិច្ចប្រជុំពេញអង្គនៃ រដ្ឋសភា ព្រមទាំងព្រឹទ្ធសភាផង មុននឹងដាក់ថ្វាយទៅព្រះមហាក្សត្រ ដើម្បីឡាយព្រហស្តលេខា ទទួលស្គាល់ជាផ្លូវការ៕
(ប្រភពគេហទំព័រ វីអូឌី (VOD News) /អត្ថបទដោយលោក សូត សុខប្រាថ្នា / អត្ថបទបន្ថែម និងសម្រួលខ្លឹមសារដោយ នគរ / ០៥ មីនា ២០២០)
.