បម្រាមគោចរ ឬបទបញ្ជាស្តីពីការបិទស្រុកខ-ណ្ឌ ក្នុងខេត្ត-ក្រុងនានានៅកម្ពុជា អំឡុងពេលចូលឆ្នាំថ្មីប្រពៃណីខ្មែរ ត្រូវបានកែសម្រួលឲ្យមានលក្ខណៈធូរស្រាលវិញហើយ នៅថ្ងៃទី ១០ ខែមេសា ឆ្នាំ២០២០ នេះ។ (សូមអានលំអិត ឬទាញយកត្រង់នេះ Download)។
ការកែសម្រួលបទបញ្ជានេះ ចុះហត្ថលេខាដោយលោក ហ៊ុន សែន នាយករដ្ឋមន្រ្តី បញ្ជាក់ខ្លឹមសារ ២ ចំណុចដូចតទៅ៖
១. ភូមិសាស្រ្តរាជធានីភ្នំពេញ និងខេត្តកណ្តាល ត្រូវបានចាត់ទុកជាតំបន់តែមួយ ដែលមិនស្ថិតក្រោមវិសាលភាពនៃការហាមឃាត់ការធ្វើដំណើរឆ្លងកាត់ទៅវិញទៅមកនោះទេ។
២. លុបចេញនូវការហាមឃាត់ការធ្វើដំណើរឆ្លងកាត់ ពីស្រុកមួយទៅស្រុកមួយទៀត នៅក្នុងខេត្តតែមួយ ដោយរក្សាទុកជាធរមាននូវ ការហាមឃាត់ការធ្វើដំណើរឆ្លងកាត់ពីខេត្តមួយទៅខេត្តមួយទៀត។
បម្រាមនេះ តម្រូវឲ្យប្រកាសអនុវត្តបន្ទាន់ ចាប់ពីក្នុងថ្ងៃទី ១០ ខែមេសា រហូតដល់កណ្តាលអាធ្រាត ថ្ងៃទី ១៦ ខែមេសា នៅក្នុងអំឡុងពេលចូលឆ្នាំថ្មី ដើម្បីបង្ការការរីករាលដាលមេរោគកូរ៉ូណា ឬកូវីដ១៩។
គួររំលឹកថា បម្រាមគោចររបស់លោក ហ៊ុន សែន កាលពីថ្ងៃទី ០៩ មេសា ម្សិលមិញ មានការរឹតបន្តឹងហួសហេតុ ដែលធ្វើឲ្យពលរដ្ឋ មានប្រតិកម្មទ្រង់ទ្រាយធំ ដោយសារតែរដ្ឋាភិបាល «ហាមប្រាមពលរដ្ឋ មិនឲ្យធ្វើដំណើរពីស្រុកមួយ ទៅស្រុកមួយទៀត នៅក្នុងខេត្ត-ក្រុងនីមួយៗ» ប៉ុន្តែនៅថ្ងៃទី ១០ មេសានេះ បទបញ្ជានេះ ត្រូវបានកែសម្រួលធូរស្រាលឡើងវិញហើយ៕
(CWCI Cambodia /អត្ថបទដោយ នគរ / ១០ មេសា ២០២០)
—————–
មានភ្ជាប់អត្ថបទបម្រាម ពីថ្ងៃទី ០៩ ខែមេសា៖ លោក ហ៊ុន សែន ចេញបម្រាមគោចរ ហាមប្រាមពលរដ្ឋ មួយសប្តាហ៍ អំឡុងពេលចូលឆ្នាំថ្មី
.
CWCI Cambodia 