អត្ថបទ ៖ VOD Khmer ដោយ សូត សុខប្រាថ្នា
07th-8-2022
លោកនាយករដ្ឋមន្ត្រី ហ៊ុន សែន បានចេញបញ្ជាភ្លាមៗ ឱ្យលុបចោលទាំងអស់ ចំពោះការអនុញ្ញាតឱ្យដោះដូរ និងអភិវឌ្ឍន៍តំបន់ភ្នំតាម៉ៅ ក្រោយមានប្រតិកម្មពីមហាជនយ៉ាងច្រើន ស្នើឱ្យរាជរដ្ឋាភិបាល ពិចារណាក្នុងការផ្តល់ដីព្រៃតំបន់ភ្នំតាម៉ៅ ស្ទើរតែទាំងស្រុង ទៅឱ្យក្រុមហ៊ុនឯកជន ដោយត្រូវរក្សាទុកតំបន់នេះ ជាតំបន់អភិរក្សសម្រាប់ក្មេងជំនាន់ក្រោយឡើងវិញ។
ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃអាទិត្យ នេះ បានលើកឡើងថា នាប៉ុន្មានថ្ងៃមកនេះ មានសំណូមពរជាច្រើន មកកាន់រាជរដ្ឋាភិបាល ដើម្បីរក្សាទុកព្រៃនៅក្បែរសួនសត្វភ្នំតាម៉ៅ ទោះបីក្រសួងកសិកម្ម បានពន្យល់ថា សួនសត្វភ្នំតាម៉ៅ មិនមានប៉ះពាល់ក៏ដោយ។
ដោយសារសំណូមពរទាំងនោះ លោក ហ៊ុន សែន អះអាងថា លោកបានបញ្ជាឱ្យលុបចោលទាំងអស់ ចំពោះគម្រោងដោះដូរដី និងអភិវឌ្ឍន៍នៅតំបន់ ភ្នំតាម៉ៅ ហើយបញ្ជាក្រុមហ៊ុនដែលឈូសឆាយបញ្ឈប់សកម្មភាពជាបន្ទាន់ និងត្រូវដាំដើមឈើ នៅតំបន់ដែលខ្លួនបានឈូសឆាយឡើងវិញ។
ហ្វេសប៊ុកលោកនាយករដ្ឋមន្ត្រី ហ៊ុន សែន បន្តថា ៖ «ក្នុងនាមជាអ្នកទទួលខុសត្រូវខ្ពស់បំផុត នៃរាជរដ្ឋាភិបាល ខ្ញុំសូមចេញបញ្ជា ១. លុបចោលទាំងអស់ នូវរាល់ការអនុញ្ញាតឱ្យធ្វើការដោះដូរ និងអភិវឌ្ឍន៍។ ២. រក្សាទុកដី និងព្រៃ នៅជុំវិញសួនសត្វភ្នំតាម៉ៅ ជាដីដែលត្រូវការពារ និងអភិរក្សដោយក្រសួងកសិកម្ម។ ៣. ក្រុមហ៊ុនដែលបានឈូសឆាយ ត្រូវបញ្ឈប់សកម្មភាព និងត្រូវដាំដើមឈើឡើងវិញ លើដីដែលបានឈូសឆាយ»។
ការសម្រេចរបស់រាជរដ្ឋាភិបាលពេលនេះ កើតឡើងភ្លាមៗ ក្រោយពេលមហាជន ពិសេសអ្នកប្រើប្រាស់បណ្តាញសង្គមហ្វេសប៊ុកយ៉ាងច្រើន បានបញ្ចេញប្រតិកម្មរិះគន់ ឬ សម្តែងការមិនពេញចិត្ត ទៅនឹងរាជរដ្ឋាភិបាល ចំពោះការផ្តល់ដីព្រៃធម្មជាតិ តំបន់សួនសត្វភ្នំតាម៉ៅ ទៅឱ្យក្រុមហ៊ុនឯកជន ក្រោមហេតុផលដើម្បីអភិវឌ្ឍន៍ ដោយថា នឹងធ្វើឱ្យប៉ះពាល់ដល់បរិស្ថាន និងជម្រកសត្វព្រៃធ្ងន់ធ្ងរ នៅតំបន់នោះ។
តាមរូបភាពពីប្រព័ន្ធផ្កាយរណប បង្ហាញថា គ្រឿងចក្រជាច្រើនគ្រឿង របស់ក្រុមហ៊ុនឯកជន បានឈូសឆាយដីព្រៃ ជុំវិញសួនសត្វភ្នំតាម៉ៅ អស់ប្រមាណ ១៣០ ហិកតា ក្នុងរយៈពេលតែប៉ុន្មានថ្ងៃប៉ុណ្ណោះ ស្របពេលអ្នករាយការណ៍ព័ត៌មាន វីអូឌី កាលពីថ្ងៃសុក្រ បានបង្ហោះដ្រូន ជាថ្មីម្ដងទៀត បង្ហាញថា ការឈូសឆាយដីព្រៃភ្នំតាម៉ៅ មានសន្ទុះកាន់តែលឿន និងកាន់តែជិតដល់វត្តថ្មអន្ទង ដែលស្ថិតនៅក្នុងបរិវេណសួនសត្វ ភ្នំតាម៉ៅ។
ភ្នំតាម៉ៅ ដែលមានចំងាយប្រមាណ ៤០ គីឡូម៉ែត្រ ពីរាជធានីភ្នំពេញ មានផ្ទៃដីសួនសត្វ ៤០០ ហិកតា និងផ្ទៃដីទំហំ ២ ៣០០ ហិកតា ជាព្រៃដែលព័ទ្ធជុំវិញសួនសត្វ។ ប៉ុន្តែក្នុងចំណោមផ្ទៃដីទំហំ ២ ៣០០ ហិកតានេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ធ្លាប់ប្រាប់ វីអូឌី ថា ដីទំហំប្រមាណ ១ ៥០០ ហិកតា ត្រូវបានរដ្ឋាភិបាល ប្រគល់ឱ្យក្រុមហ៊ុនឯកជន ក្រោមហេតុផល ដើម្បីអភិវឌ្ឍសាងសង់ជាលំនៅឋាន និងសំណង់អគារ ព្រមទាំងជាកន្លែងចិញ្ចឹមសត្វ ជាដើម។
បើតាមការចុះផ្សាយរបស់សារព័ត៌មាន Southeast Asia Globe កាលពីពេលថ្មីៗនេះ បានឱ្យដឹងថា ក្រុមហ៊ុនឯកជនចំនួន ៣ ដែលគេដឹងថា ជាប់ពាក់ព័ន្ធការទទួលបានដីព្រៃប្រមាណ ១ ៥០០ នៅតំបន់ភ្នំតាម៉ៅ ពីរដ្ឋាភិបាលនោះ រួមមាន ក្រុមហ៊ុន «បាទី ធួរីសឹម ឌីវីឡុបម៉ិនថ៍ (Bati Tourism & Development)» ក្រុមហ៊ុន «ធីភី ម៉ូរ៉ាល់ គ្រុប (TP Moral Group)» និងក្រុមហ៊ុន «ឆាយណា ប៉ោយប៉ែត សែ៍ថឺឡាយន៏ ស៊ីធី ឯ.ក (China Poipet Satellite City)»។
ប្រភពដដែលឱ្យដឹងទៀតថា លោក ឡេង ភត្រា ហៅ ឡេង ណាវ៉ាត្រា ជានាយកក្រុមហ៊ុនអចលនទ្រព្យ ឆាយណា ប៉ោយប៉ែត សែ៍ថឺឡាយន៍ ស៊ីធី ក៏ដូចជាក្រុមហ៊ុន Galaxy Navatra Group និង Galaxy Navatra Investment។ ដោយឡែក ក្រុមហ៊ុន ធីភី ម៉ូរ៉ាល់ គ្រុប ត្រូវបានដឹកនាំដោយលោក ឃុន ទី លោក ឃុន សេងផេង និងលោក ឃុន សៀ ហើយលោក ឃុន សៀ មានអចលនទ្រព្យជាច្រើន នៅកម្ពុជា។
នៅថ្ងៃអាទិត្យនេះដែរ បើតាមទំព័រហ្វេសប៊ុករបស់លោក ឡេង ណាវ៉ាត្រា បានសរសេរថា លោកគាំទ្ររាជរដ្ឋាភិបាល ក្នុងការលុបសេចក្តីជូនដំណឹង ឬ ស.ជ.ណ តំបន់ភ្នំតាម៉ៅទាំងអស់ ហើយសុំឱ្យពលរដ្ឋ ដែលស្រលាញ់កូនឈើ មកដាំកូនឈើ ជាមួយលោក៕
.
CWCI Cambodia 