សមាគមរោងចក្រនៅកម្ពុជា (GMAC) បានឲ្យដឹងថា គិតមកដល់ថ្ងៃទី ០៤ ខែឧសភា ឆ្នាំ២០២០ រោងចក្រកាត់ដេរ និងស្បែកជើងចំនួន ១៨០ បានព្យួរការងាររបស់ខ្លួន និងចំនួន ៦០ ទៀត ក៏កំពុងឈានទៅព្យួរការងារផងដែរ។ នេះបើតាមសេចក្តីអំពាវនាវរបស់សមាគមនេះ ចេញផ្សាយនៅថ្ងៃទី ០៤ ឧសភា (សូមទាញយក Download)។
សមាគម GMAC បង្ហាញក្តីព្រួយបារម្ភថា ករណីរោងចក្រព្យួរការងាររបស់ខ្លួននេះ កើតឡើងបន្ទាប់ពីអ្នកបញ្ជាទិញផលិតផលពីកម្ពុជា បានលុបចោលការបញ្ជាទិញ និងផ្អាកការបញ្ជាទិញ ដោយសារការរីករាលដាលជំងឺកូរ៉ូណា ឬកូវីដ១៩ នៅជុំវិញពិភពលោក ហើយប្រទេសនីមួយៗ បានបិទប្រទេសរៀងៗខ្លួន ដែលធ្វើឲ្យមានផលប៉ពាល់យ៉ាងខ្លាំង ដល់វិស័យឧស្សាហកម្មការដេរនៅកម្ពុជា។
សមាគមនេះ អំពាវនាដល់អ្នកបញ្ជាទិញទាំងអស់ ឲ្យគោរពតាមលក្ខខណ្ឌទូទាត់ប្រាក់ សម្រាប់ទំនិញដែលបានទទួលរួចហើយ និងដែលកំពុងដឹកទៅឲ្យអ្នកបញ្ជាទិញទាំងនោះ។
ក្នុងសេចក្តីអំពាវសមាគម GMAC បញ្ជាក់ថា កម្មករជាង ១៥ ម៉ឺននាក់ ជាអ្នករងផលប៉ះពាល់ដោយផ្ទាល់ ដោយការព្យួរការងារជាបណ្ដោះអាសន្នរបស់ពួកគេ។ ហើយកម្មករជិត ២០ ម៉ឺននាក់ទៀត នឹងត្រូវព្យួរការងារ នាពេលឆាប់ៗខាងមុខ។ ការព្យួរការងារនេះ ធ្វើឲ្យសមាជិកគ្រួសារប្រមាណ ២ លាននាក់ រងផលប៉ះពាល់ដោយប្រយោល។
មុនពេលផ្ទុះការរីករាលដាលមេរោគកូរ៉ូណា ក្រុមអ្នកជំនាញ និងក្រុមសហជីព បានទទូចឲ្យរដ្ឋាភិបាលលោក ហ៊ុន សែន ថែរក្សាប្រព័ន្ធអនុគ្រោះព័ន្ធ EBA របស់អឺរ៉ុប និងប្រព័ន្ធ GSP របស់អាមេរិក។ ពេលនោះរដ្ឋាភិបាល បានប្រកែកដោះសា ដោយសារសំអាងទៅលើប្រទេសចិន ជាមិត្តដែកថែប និងជាឆ្អឹងខ្នងដ៏សំខាន់ ក្នុងការផ្តល់ប្រាក់កម្ចីដល់កម្ពុជា និងអះអាងជួយទិញផលិតផលពីកម្ពុជា ខណៈប្រទេសចិនខ្លួនឯង នាំទំនិញរបស់ខ្លួនទៅកាន់ទីផ្សារអឺរ៉ុប និងអាមេរិកដែរនោះ។
ក្រោយបរិបទនៃជំងឺរាតត្បាតកូវីដ១៩ ស្ថានភាពពិភពលោក នឹងផ្លាស់ប្តូរឥរិយាបថថ្មី ហើយប្រទេសចិន ដែលជាប្រភពនៃការរីករាលដាលមេរោគកូរ៉ូណានេះ ត្រូវជួបផលវិបាកធ្ងន់ធ្ងរ ដោយសារប្រទេសឧស្សាហកម្មធំៗ គេនឹងសម្លឹងមើលជម្រើសថ្មី។
ដូច្នេះ ប្រទេសកម្ពុជា ត្រូវប្រញាប់ប្រញាលពិចារណានូវជម្រើសថ្មិ និងឱកាសថ្មីរបស់ខ្លួនផងដែរ ពោលគឺត្រូវពិនិត្យឡើងវិញ នូវប្រព័ន្ធអនុគ្រោះព័ន្ធ EBA របស់អឺរ៉ុប ខណៈដែលគណៈកម្មការអឺរ៉ុប បានព្យួរ ២០% ពីកម្ពុជារួចហើយ កាលពីខែកុម្ភៈ កន្លងទៅ។
កម្ពុជា ចាំបាច់ត្រូវតែវិលទៅរកការស្តារស្ថានភាពសិទ្ធិមនុស្ស និងលទ្ធិប្រជាធិបតេយ្យឡើយវិញ បើសិនមានបំណងស្តារសេដ្ឋកិច្ច និងអភិវឌ្ឍប្រទេសជាតិពិតប្រាកដ ទៅតាមបំណងរបស់ពលរដ្ឋខ្មែរ និងសហគមន៍អន្តរជាតិ រួមទាំងអង្គការសហប្រជាតិផង៕
គ្រីស្ទានសាន់ (ប្រទេសន័រវេស៍) ថ្ងៃទី០៥ ខែឧសភា ឆ្នាំ២០២០
លោក ម៉ែន ណាត
ប្រធានក្រុមប្រឹក្សាឃ្លាំមើលកម្ពុជា)
.
CWCI Cambodia 