អត្ថបទដោយ CWCI Cambodia / 13-7-2020
ចលនានិស្សិតដើម្បីលទ្ធិប្រជាធិបតេយ្យ ដែលមានមូលដ្ឋាននៅអាមេរិក បានចេញលិខិតចំហ ទៅកាន់លោក ហ៊ុន សែន មេដឹកនាំកម្ពុជា ដោយប្រតិកម្មជំទាស់នឹងការលើកឡើងរបស់មេដឹកនាំវៀតណាម លោក ង្វៀង ភូ ត្រុង ដែលស្នើឲ្យកម្ពុជា ជួយសម្រួលរបស់ពលរដ្ឋរបស់ខ្លួន បន្តរស់នៅកម្ពុជាមានសិទ្ធិស្របច្បាប់។ ក្នុងលិខិតចំហនេះ ចុះហត្ថលេខាដោយលោក ទូច វិបុល ប្រធានប្រតិបត្តិ នៅថ្ងៃទី១៣ ខែកក្កដា ឆ្នាំ២០២០ នេះ បានរំលឹកលោក ហ៊ុន សែន ឲ្យចេះយកចិត្តទុកដាក់ពលរដ្ឋខ្មែររបស់ខ្លួន ជាជាងជាតិសាសន៍ដទៃដែលរស់នៅខុសច្បាប់នៅកម្ពុជា ហើយបានជំរុញឲ្យលោក ហ៊ុន សែន ហ៊ានស្នើទៅវៀតណាម ឲ្យគោរពសិទ្ធិសេរីភាពរបស់ពលរដ្ឋខ្មែរកម្ពុជាក្រោម ដែលម្ចាស់ទឹកដីនៅកម្ពុជាក្រោម។ សូមទាញយក លិខិតចំហ (Download) ឬអានលំអិតខាងក្រោម៖
លិខិតចំហ
ចំពោះលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ចលនានិស្សិតដើម្បីលទ្ធិប្រជាធិបតេយ្យ យល់ឃើញថា កិច្ចសន្ទនាតាមទូរស័ព្ទរបស់លោក ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា ជាមួយលោក ង្វៀន ភូ ត្រុង អគ្គលេខាធិការមជ្ឈឹមបក្សនៃគណបក្សសង្គមនិយមវៀតណាម និងជាប្រធានរដ្ឋវៀតណាម កាលពីអំឡុងកណ្ដាលសប្ដាហ៍មុន មានតម្លៃត្រឹមតែជាអត្ថន័យនៃប្រវត្តិសាស្ត្រ រត់តាមពីក្រោយមហិច្ឆតាប្រយោជន៍វៀតណាម ដើម្បីបង្កើតសមិទ្ធផលដ៏ធំធេងឲ្យវៀតណាម ពីកិច្ចសហប្រតិបត្តិការស៊ីជម្រៅ លើ គ្រប់វិស័យជាមួយកម្ពុជាប៉ុណ្ណោះ។
យើងខ្ញុំកត់សម្គាល់ឃើញថា ក្រៅតែពីសាររីករាយនឹងការសន្ទនា, ការអបអរសាទរចំពោះសមិទ្ធផលនៃទំនាក់ទំនង, ការសរសើរអំពីជោគជ័យរបស់វៀតណាម, ការសម្ដែងការជឿជាក់លើវៀតណាម, និងការវាយតម្លៃខ្ពស់នៃកិច្ចសហប្រតិបត្តិការនោះ លោក ហ៊ុន សែន មិនបានធ្វើសំណូមពរអ្វីសោះ ទៅកាន់លោក ង្វៀន ភូ ត្រុង ខណៈពេលកងទ័ពវៀតណាម បន្តបោះតង់ យ៉ាងតិច ៣០០តង់ នៅតាមព្រំដែន រំលោភអធិបតេយ្យភាពកម្ពុជា និងស្របពេលវៀតណាម កំពុងបំពានយ៉ាងធ្ងន់ធ្ងរលើសិទ្ធិបងប្អូនខ្មែរកម្ពុជាក្រោម។ រីឯលោក ង្វៀន ភូ ត្រុង ក្រៅតែពាក្យបញ្ជោរ និងការអរគុណលោក ហ៊ុន សែន នោះ ប្រធានរដ្ឋ វៀតណាម បានជំរុញលោក ហ៊ុន សែន ឲ្យបន្តអនុវត្តន៍កិច្ចសន្យារវាងគ្នា ឲ្យបានល្អ និងបានលើកសំណើឲ្យលោក ហ៊ុន សែន ជួយមើលថែជនជាតិវៀតណាមនៅកម្ពុជា ទាំងមិននិយាយដល់ពាក្យ«ខុសច្បាប់ ឬស្របច្បាប់»ផង ហើយលោក ហ៊ុន សែន បានសន្យាបន្តសម្រួលតាមបំណងរបស់វៀតណាម។
លោក ង្វៀន ភូ ត្រុង បានសម្តែងសេចក្តីប្រាថ្នា «សូមឲ្យភាគីកម្ពុជា បន្តការជួយសម្រួល និងបង្កលក្ខណៈងាយស្រួល ដើម្បីបងប្អូនមានដើមកំណើតវៀតណាម អាចមានជីវភាពរស់នៅប្រកបដោយស្ថិរភាព បានរៀនសូត្រ និងប្រកបមុខរបរយូរអង្វែង នៅប្រទេសកម្ពុជា … » ហើយលោក ហ៊ុន សែន បានអះអាងថា «កម្ពុជានឹងបន្តការជួយសម្រួល និងបង្កលក្ខណៈងាយស្រួល ដល់បងប្អូនមានដើមកំណើតវៀតណាម ដើម្បីបងប្អូនមានលំនឹងចិត្ត បន្តការរស់នៅក្នុងប្រទេសកម្ពុជា»។ នេះពុំមែនជាលើកទីមួយ ទេ ដែលពួកមេដឹកនាំវៀតណាម បានលើកសំណើបែបនេះ និងកន្លងមក រហូតដល់ធ្វើសំណូមពររបៀបបង្គាប់ឲ្យក្រុមមេដឹនាំរដ្ឋាភិបាល និងរដ្ឋសភាកម្ពុជា មានលោក ទៀ បាញ់, លោក ស ខេង, លោក ហេង សំរិន … ផ្តល់សញ្ជាតិខ្មែរងាយៗ ដល់ជនជាតិវៀតណាមនៅកម្ពុជា ហើយក្រុមប្រមុខរដ្ឋអំណាចកម្ពុជា សុទ្ធតែស្ម័គ្រទទួលយកមកអនុវត្តន៍ សម្រួលតាមសេចក្ដីប្រាថ្នា របស់វៀតណាម។
ចលនានិស្សិតដើម្បីលទ្ធិប្រជាធិបតេយ្យ វាយតម្លៃថា នៅចំពោះមុខលោក ង្វៀន ភូ ត្រុង ដែលបានដើរតួនាទីយ៉ាងស្វាហាប់ ក្នុងការបម្រើប្រយោជន៍ជាតិវៀតណាមនោះ លោក ហ៊ុន សែន ពុំបានបំពេញកាត្វកិច្ចស្របតាមរដ្ឋធម្មនុញ្ញ ដើម្បីការពារប្រយោជន៍ប្រជាជាតិខ្មែរទេ។ រដ្ឋធម្មនុញ្ញកម្ពុជា មាត្រា៣៣ ចែងថា «ប្រជាពលរដ្ឋខ្មែរ ដែលកំពុងរស់នៅបរទេស ត្រូវបានរដ្ឋគាំពារ» និងមាត្រា៣៥ ចែងថា «សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលពិនិត្យ និងដោះស្រាយយ៉ាងហ្មត់ចត់ ពីអង្គការរដ្ឋ»។
យើងខ្ញុំបានធ្វើសម្ភាសន៍ដោយផ្ទាល់ ជាមួយបងប្អូនខ្មែរកម្ពុជាក្រោម អំពីស្ថានភាពរស់នៅរបស់ពួកគាត់ក្រោមសម្ពាធដ៏តឹងរ៉ឹងរបស់វៀតណាម។ ពួកគាត់បានរៀបរាប់អំពីយុទ្ធនាការនៃការធ្វើទុក្ខបុកម្នេញដោយវៀតណាម តាំងពីការចាប់ខ្លួន និងបន្តចាប់ខ្លួនពលរដ្ឋខ្មែរក្រោម ដោយគ្មានមូលហេតុច្បាស់លាស់, ការបិទទំនាក់ទំនងប្រជាពលរដ្ឋខ្មែរក្រោម ជាមួយបងប្អូនសាច់ញាតិ នៅក្រៅប្រទេស, ការរឹតបន្តឹងពលរដ្ឋខ្មែរក្រោម មិនឲ្យជួបជុំគ្នាលើសពី ៣នាក់…។ សារពត៌មានព្រៃនគរ បានផ្សាយថា តាំងពីឆ្នាំ ២០១៧ មក កម្មករខ្មែរក្រោមជាង ២០០នាក់ នៅខេត្តវាលប្រើស (ដុងណាយ ជាភាសាវៀតណាម) ត្រូវសួនឧស្សាហកម្មវៀតណាម ដេញចេញពីការងារ ដោយហេតុផលនយោបាយរើសអើងពូជសាសន៍ និងប៉ះពាល់ សណ្ដាប់ធ្លាប់សាធារណៈ។
ចលនានិស្សិតដើម្បីលទ្ធិប្រជាធិបតេយ្យ ចាត់ទុកថា កាយវិការការទូតរបស់លោក ហ៊ុន សែន ចំពោះមេដឹកនាំវៀតណាម គឺជាទង្វើរំលោភខ្លឹមសារដ្ឋធម្មនុញ្ញកម្ពុជា និងមិនបម្រើប្រយោជន៍ជនជាតិខ្មែរទូទៅ ជាពិសេសពលរដ្ឋខ្មែរ នៅលើទឹកដីកម្ពុជាក្រោមសព្វថ្ងៃ ប្រសិនបើលោក ហ៊ុន សែន និងរដ្ឋាភិបាលរបស់លោក ព្រមទាំងរដ្ឋសភាកម្ពុជា នៅតែធ្វើព្រងើយកន្តើយ ចំពោះរឿងទាំងអស់នេះ ពុំព្រមលើកយកទៅនិយាយរកដំណោះស្រាយ ជាមួយមេដឹកនាំវៀតណាម។
យើង ក៏ចាត់ទុកករណីបន្តព្រងើយកន្តើយរបស់រដ្ឋាភិបាលលោក ហ៊ុន សែន និងរដ្ឋសភាកម្ពុជា ថា ជាផែនការជួយជ្រោមជ្រែងយុទ្ធសាស្ត្រឈ្លានពានរបស់វៀតណាម មកលើបូរណភាពទឹកដីកម្ពុជា, ការបន្តបង្ហូរជនជាតិវៀតណាមខុសច្បាប់ចូលកម្ពុជា ហើយលេងល្បែងបំភ័ន្តភ្នែក ដេញចេញតិចតួចតាមផ្លូវធំ និងឲ្យចូលវិញតាមផ្លូវតូច, និងរឿងវៀតណាមរំលោភសិទ្ធិពលរដ្ឋខ្មែរកម្ពុជាក្រោម ដែលកំពុងរស់នៅលើទឹកដីប្រវត្តិសាស្ត្រដូនតាខ្មែរ ក្រោមការត្រួតត្រាដោយវៀតណាមសព្វថ្ងៃ។
រដ្ឋធានីវ៉ាសុីនតុន ថ្ងៃទី១៣ ខែកក្កដា ឆ្នាំ២០២០
ប្រធានប្រតិបត្តិ
(ហត្ថលេខា)
ទូច វិបុល
.