អត្ថបទសារព័ត៌មាន The Cambodia Daily
23-4-2026
អ្នកឃ្លាំមើលស្ថានការណ៍កម្ពុជា ចាត់ទុកសកម្មភាពតវ៉ារបស់កម្ពុជា ជុំវិញការឈ្លានពានទឹកដីពីសំណាក់ភាគីថៃ រហូតមកដែលគ្មានយន្តការអន្តរជាតិ គ្រាន់តែជាការតវ៉ាដើម្បីស្អំចិត្តពលរដ្ឋប៉ុណ្ណោះ ព្រោះមិនអាចទប់ស្កាត់ថៃ មិនឱ្យឈ្លានពានទឹកដីខ្មែរបន្តទៀតបានឡើយ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២០ មេសា នេះថា បើគ្មានសម្ពាធពីអន្តរជាតិទេ ថៃនឹងមិនបោះបង់ទឹកដីខ្មែរ ដែលពួកគេឈ្លានពានយកទៅកាន់កាប់ឡើយ ដូច្នេះជម្រើសល្អបំផុតរបស់កម្ពុជា ក្រៅពីប្រើយន្តការអន្តរជាតិដែលមានស្រាប់ ដូចជាយន្តការអាស៊ាន យន្តការអង្គការសហប្រជាជាតិ និងយន្តការកិច្ចព្រមព្រៀងទីក្រុងប៉ារីស ជាដើម គឺត្រូវតែប្តឹងថៃ ទៅតុលាការអន្តរជាតិជាចាំបាច់។
លោក ម៉ែន ណាត លើកឡើងថា ទឹកដីខ្មែរនឹងត្រូវថៃ គ្រប់គ្រងជារៀងរហូត បើកម្ពុជានៅតែបន្តចរចាទ្វេភាគីជាមួយថៃ ដោយមិនមានសម្ពាធអន្តរជាតិអមជាមួយ ព្រោះថាបើវិភាគតាមហេតុផលជាក់ស្តែង បើការចរចាទ្វេភាគីដោយសង្ឃឹមថាថៃ នឹងប្រគល់ទឹកដីឱ្យខ្មែរវិញ នោះថៃក៏មិនចាំបាច់វាយដណ្តើមឈ្លានពានទឹកដីខ្មែរទាំងខុសច្បាប់អន្តរជាតិដែរ។
អ្នកឃ្លាំមើលរូបនេះ បញ្ជាក់ថា ដោយសារគ្មានសម្ពាធពីអន្តរជាតិនេះហើយ ទើបថៃ បានបង្ហាញចរិតមើលងាយកម្ពុជា រហូតមក ព្រោះថៃបានបដិសេធចូលតុចរចា ជាមួយកម្ពុជាជាបន្តបន្ទាប់ ដែលទង្វើនេះបង្ហាញថា ពួកគេចង់ចរចាជាមួយកម្ពុជាក៏បាន មិនចង់ចរចាក៏បាន ខណៈកម្ពុជាគ្មានឥទ្ធិពលអ្វីសោះដើម្បីសង្កត់ថៃ ឱ្យចូលតុចរចាជាមួយខ្លួននោះ។
កាលពីថ្ងៃទី១៩ ខែមេសា ឆ្នាំ២០២៦ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានប្រឆាំងនឹងសកម្មភាពរបស់កងកម្លាំងប្រដាប់អាវុធថៃ ក្នុងការពង្រឹងការកាន់កាប់ដោយខុសច្បាប់បន្ថែមទៀត ដែលជាការរំលោភលើអធិបតេយ្យ និងបូរណភាពទឹកដីរបស់កម្ពុជាយ៉ាងធ្ងន់ធ្ងរ។
ប្រភពដដែល អះអាងថា កងកម្លាំងប្រដាប់អាវុធថៃ បានពង្រឹងការកាន់កាប់ដោយខុសច្បាប់បន្ថែមក្នុងទឹកដីខ្មែរ ចំនួន ៣ ខេត្ត រួមមានខេត្តព្រះវិហារ ស្ថិតក្នុងឃុំស្រអែម ស្រុកជាំក្សាន្ដ ដោយការសាងសង់ប៉ុស្តិ៍យាមសង្កេតការណ៍ នៅក្នុងតំបន់តាថាវ ដែលស្ថិតនៅចន្លោះប្រាសាទព្រះវិហារ និងតំបន់៥មករា។ ចំណែកខេត្តឧត្ដរមានជ័យ គឺស្ថិតនៅស្រុកអន្លង់វែង ភាគីថៃ បានបន្តសាងសង់ផ្លូវនៅជិតបង្គោលព្រំដែនលេខ២ សព្វថ្ងៃនេះ និងនៅតំបន់ដើមតាត្រាវ ស្រុកត្រពាំងប្រាសាទ ខណៈស្រុកបន្ទាយអំពិល ក៏ត្រូវបានភាគីថៃ ជីកលេណដ្ឋាននៅតំបន់ច្រកទ្វារអន្តរជាតិជប់គគីរ ដែរ។
ជាងនេះទៀត សង្កាត់កូនក្រៀល ក្រុងសំរោង កងកម្លាំងប្រដាប់អាវុធថៃ បានសាងសង់ប៉ុស្តិ៍យាមសង្កេតការណ៍ នៅភាគខាងកើតនៃតំបន់ជប់ដើមខ្នុរ និងបានបន្តសកម្មភាពឈូសឆាយដី នៅភាគខាងជើងនៃតំបន់នេះ ខណៈតំបន់ថ្មដូន ភាគីថៃ ក៏បានបន្តសាងសង់ផ្លូវថ្មើរជើង ព្រមទាំងសាងសង់លេណដ្ឋាន និងផ្លូវនៅតំបន់ចូកគ្លេសភាគខាងកើត ច្រកទ្វារអន្តរជាតិថ្មដូន ថែមទៀត។
រីឯខេត្តពោធិ៍សាត់ វិញ គឺស្ថិតនៅឃុំថ្មដា ស្រុកវាលវែង ត្រូវបានកងកម្លាំងប្រដាប់អាវុធថៃ ប្រើប្រាស់គ្រឿងចក្រធុនធ្ងន់ ដើម្បីធ្វើសកម្មភាពឈូសឆាយដី នៅតំបន់អូរភ្លុកដំរី បន្ថែមទៀត។
រដ្ឋាភិបាលកម្ពុជា អំពាវនាវឱ្យប្រទេសថៃ បញ្ឈប់រាល់សកម្មភាពឯកតោភាគីបន្តទៀត នៅក្នុងតំបន់ទាំង ៦ នៃខេត្តទាំង ៣ ដែលពួកគេកំពុងឈ្លានពាននាពេលនេះ រួមទាំងតំបន់ផ្សេងទៀតផងដែរ ដើម្បីកាត់បន្ថយភាពតានតឹង និងពង្រឹងជំនឿទុកចិត្តគ្នាទៅវិញទៅមក។
ជុំវិញបញ្ហានេះ គណបក្សប្រឆាំងបានអះអាងថា បន្ទាប់ពីសង្គ្រាមខ្មែរ-ថៃ ទាំងពីរលើក ទាហានថៃ បានគ្រប់គ្រងទឹកដីខ្មែរជិត ៦០ ទីតាំង (៥៨ ទីតាំង) ខណៈទឹកដីដែលបាត់មុនការផ្ទុះសង្គ្រាមទាំងពីរលើកនេះ គឺមានរហូតដល់ ៨ ទីតាំងឯណោះ ដូច្នេះបើសរុបទាំងអស់ គឺមានចំនួន ៦៦ ទីតាំង។
យ៉ាងណាក៏ដោយ កាលពីថ្ងៃទី១៥ ខែមេសា ឆ្នាំ២០២៦ មេដឹកនាំបក្សកាន់អំណាច លោក ហ៊ុន សែន បានបញ្ចេញខ្សែអាត់សំឡេងប្រវែងជិត ៤០នាទី (៣៦,៥៩នាទី) ដើម្បីប្រតិកម្មទៅកាន់ក្រុមប្រឆាំង ដោយអះអាងថា ទឹកដីខ្មែរដែលភាគីថៃ កំពុងកាន់កាប់ជាច្រើនហិកតានោះ មិនមែនបានន័យថាទឹកដីទាំងនោះក្លាយជាទឹកដីរបស់ថៃ ជាស្ថាពរនោះទេ។
លោក ហ៊ុន សែន បញ្ជាក់ថា កម្ពុជាត្រូវតវ៉ាយកទឹកដីទាំងនោះ មកវិញតាមសន្តិវិធី មិនមែនដោយការប្រើប្រាស់កម្លាំង ឬធ្វើសង្គ្រាមឡើយ៕
