Monthly Archives: August 2017

អ៊ុំ សំអាន និង ហុង សុខហួរ ជាប់ឃុំឃាំងយ៉ាងអយុត្តិធម៌ រឿងការពារបូរណភាពទឹកដីខ្មែរ ប៉ុន្តែបក្ស​កាន់អំណាច ហ៊ុន សែន បែរជាជួយ យួន

3da07c75-5310-496b-add3-21bee161be6b

លោក អ៊ុំ សំអាន គឺជាតំណាងរាស្រ្តខ្លាំង និងជាអ្នកស្រឡាញ់ជាតិទឹកដី ព្រមទាំងជាអ្នកប្រឆាំងជំទាស់សនិ្ធសញ្ញាព្រំដែនថ្មី ឆ្នាំ២០០៥ ហើយផែនទីព្រំដែន ដែលវៀតណាម ឲ្យរដ្ឋាភិបាល ហ៊ុន សែនបំពេញតាមបំណងរបស់ខ្លួន។ លោក សំអាន ធ្លាប់ដឹកនាំចលនានិស្សិត តវ៉ាទាមទារឲ្យវៀតណាម គោរពបូរណភាពទឹកដីខ្មែរ តាំងពីឆ្នាំ២០០០ មកម្ល៉េះ លុះដល់ក្លាយជាតំណាងរាស្រ្ត នៃបក្សសង្គ្រោះជាតិ ក៏បន្តបេសកកម្ម រឿងព្រំដែនទឹកដីបន្តទៀត។ នាយករដ្ឋមន្រ្តី ហ៊ុន សែន បញ្ជាចាប់ឃុំខ្លួនលោក អ៊ុំ សំអាន ថ្ងៃទី១១ ខែមេសា ឆ្នាំ២០១៦ ទាំងលោកនៅមានអភ័យឯកសិទ្ធិ ជាតំណាងរាស្រ្ត នៅឡើយ។ ការចាប់ខ្លួនលោក ទាំងនៅមានអភ័យឯកសិទ្ធិ គឺជាការរំលោភរដ្ឋធម្មនុញ្ញ មាត្រា៨០។
ចំណែកលោក ហ៊ុង សុខហួរ ជាសមាជិកព្រឹទ្ធសភា នៃគណបក្សប្រឆាំង ដូចលោក អ៊ុំ សំអាន ដែរដែលត្រូវចាប់ខ្លួន កាលពីខែសីហា ឆ្នាំ២០១៥ ក្នុងរឿងព្រំដែនកម្ពុជា វៀតណាម។ ការចាប់ខ្លួនលោក ហុង សុខហួរ ទាំងនៅមានអភ័យឯកសិទ្ធិ គឺជាការរំលោភរដ្ឋធម្មនុញ្ញ កាលនោះ។ អត្ថបទខាងក្រោម ក៏មានបញ្ជាក់ហើយដែរ។ (ដោយ ម៉ែន ណាត)

មន្ត្រី​បក្ស​កាន់អំណាច ​ប្រតិកម្ម​ការ​ប៉ុនប៉ង​ធ្វើ​អន្តរាគមន៍​ ឲ្យ​ដោះលែង​លោក អ៊ុំ សំអាន និង​លោក ហុង សុខហួរ

(ដោយ ឡេង ម៉ាលី, RFA, 07-8-2017)
អ្នក​នាំ​ពាក្យ​គណបក្ស​កាន់​អំណាច ប្រតិកម្ម​ចំពោះ​ព័ត៌មាន​ក្រៅ​ផ្លូវការ​មួយ​ដែល​ថា សមាជិក​សភា​អាល្លឺម៉ង់ ប៉ុនប៉ង​ធ្វើ​អន្តរាគមន៍​ជួយ​ឲ្យ​មាន​ការ​ដោះលែង​លោក អ៊ុំ សំអាន និង​លោក ហុង សុខហួរ ពី​ការ​ជាប់​ពន្ធនាគារ ដោយសារ​យល់​ថា លោក​ទាំង​ពីរ​ជា​អ្នក​ទោស​នយោបាយ។

អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ប្រតិកម្ម​ជា​សារ​តាម​តេឡេក្រាម​នៅ​ថ្ងៃ​ទី​៦ សីហា ថា ប្រទេស​អាល្លឺម៉ង់ ដែល​ជា​ប្រទេស​នីតិរដ្ឋ​មួយ​នៅ​ក្នុង​សហគមន៍​អឺរ៉ុប គប្បី​គិតគូរ​ជា​មុន​ឲ្យ​គ្រប់​ជ្រុងជ្រោយ មុន​នឹង​ធ្វើ​អន្តរាគមន៍​ណា​មួយ​លើ​ករណី​លោក ហុង សុខហួរ និង​លោក អ៊ុំ សំអាន។

លោក សុខ ឥសាន មាន​ប្រសាសន៍​ថា សារ​របស់​លោក​ជា​សារ​ព្រមាន​មុន ទៅ​នឹង​ព័ត៌មាន​ដែល​ថា មាន​សេចក្ដី​ព្រាង​របស់​សមាជិក​សភា​អាល្លឺម៉ង់ មួយ​ចំនួន ចង់​ធ្វើ​អន្តរាគមន៍​ដូច្នេះ ហើយ​លេច​ឮ​ចេញ​ពី​គណបក្ស​សង្គ្រោះ​ជាតិ៖ «ខ្ញុំ​និយាយ​តែ​ប្រធានបទ​ទេ ខ្ញុំ​ថា​បើ។ បើ​មាន​ការ​អន្តរាគមន៍​អ៊ីចឹង​មែន ហើយ​មិន​មែន​ជា​សភា​ទាំងមូល​ទេ ជា​សមាជិក​សភា​មួយ​ចំនួន​តូច ហើយ​គាត់​គ្រាន់​តែ​ព្រាង​ទេ តាម​ពិត​នោះ។ តែ​យើង​ថា​ឲ្យ​ហើយ​ទៅ អា​ហ្នឹង​ខ្លឹមសារ​វា​នៅ​តែ​ទិសដៅ​តែ​មួយ​ហ្នឹង»

សារ​របស់​លោក​សរសេរ​ទៀត​ថា ការ​ចង់​អន្តរាគមន៍​នេះ​នៅ​មិន​ទាន់​ដឹង​តាម​វិធី​ណា​ទេ ហើយ​ប្រទេស​អាល្លឺម៉ង់ ជា​ប្រទេស​នីតិរដ្ឋ​មួយ​នៅ​ក្នុង​សហគមន៍​អឺរ៉ុប។ លោក​បន្ត​ថា បើ​មាន​អន្តរាគមន៍​ពី​សមាជិក​សភា​អាល្លឺម៉ង់ មែន​នោះ មាន​ន័យ​ថា អស់​លោក​អាល្លឺម៉ង់ មិន​ចង់​ឲ្យ​កម្ពុជា ដើរ​តាម​គន្លង​លទ្ធិប្រជាធិបតេយ្យ និង​នីតិរដ្ឋ​ទេ ដោយ​ហេតុ​ថា លោក ហុង សុខហួរ និង​លោក អ៊ុំ សំអាន មិន​មែន​ជា​អ្នក​ទោស​នយោបាយ​ទេ តែ​លោក​ទាំង​ពីរ​នាក់​នេះ គឺ​ជា​អ្នក​នយោបាយ​បាន​ប្រព្រឹត្ត​ល្មើស​ច្បាប់​ធ្ងន់ធ្ងរ ហើយ​ត្រូវ​មាន​ទោស។ លោក​ព្រមាន​ថា ឲ្យ​គិត​មុន​ធ្វើ​អន្តរាគមន៍ ប្រយ័ត្ន​សិស្ស​ប្រជាធិបតេយ្យ​ប្រដៅ​លោក​គ្រូ​ប្រជាធិបតេយ្យ។

អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង បដិសេធ​នៅ​ថ្ងៃ​ដដែល​នេះ ដោយ​បញ្ជាក់​ថា ខាង​គណបក្ស​លោក​មិន​មាន​ព័ត៌មាន​អំពី​គម្រោង​អន្តរាគមន៍​របស់​សមាជិក​សភា​អាល្លឺម៉ង់ នេះ​ទេ។

លោក ហុង សុខហួរ អតីត​សមាជិក​ព្រឹទ្ធសភា​គណបក្ស សម រង្ស៊ី ត្រូវ​បាន​ចៅក្រម​សាលា​ដំបូង​រាជធានី​ភ្នំពេញ សម្រេច​កាល​ពី​ថ្ងៃ​ទី​៧ ខែ​វិច្ឆិកា ឆ្នាំ​២០១៦ ផ្ដន្ទាទោស​ដាក់​ពន្ធនាគារ​ចំនួន ៧​ឆ្នាំ ក្រោម​បទ​ចោទ​ចំនួន​៣ ទាក់ទង​នឹង​បញ្ហា​ព្រំដែន​កម្ពុជា-វៀតណាម។

កាល​ថ្ងៃ​ទី​២៩ ខែ​មិថុនា សាលា​ឧទ្ធរណ៍​ចេញ​សេចក្ដី​សម្រេច​តម្កល់​ការ​ចោទ​ប្រកាន់ និង​ការ​ផ្ដន្ទាទោស​តាម​សាលក្រម​សាលា​ដំបូង​រាជធានី​ភ្នំពេញ ដោយ​ឲ្យ​លោក ហុង សុខហួរ ជាប់​ឃុំ ៧​ឆ្នាំ​ដដែល។

មេធាវី​ការពារ​ក្ដី​ឲ្យ​លោក ហុង សុខហួរ គឺ​លោក​មេធាវី ជូង ជូងី ចាត់​ទុក​ការ​សម្រេច​របស់​សាលា​ឧទ្ធរណ៍ ថា​មិន​បាន​ផ្ដល់​យុត្តិធម៌​សម្រាប់​កូន​ក្ដី​លោក​ទេ ព្រោះ​តុលាការ​មិន​បាន​បញ្ជា​អ្នក​ជំនាញ​ផ្នែក​សន្ធិសញ្ញា​មក​បំភ្លឺ​ក្នុង​សវនាការ។ លោក​បាន​ប្ដឹង​សារទុក្ខ​ទៅ​តុលាការ​កំពូល បន្ត​ទៀត។

តុលាការ​ក្រុង​ភ្នំពេញ បាន​ចេញ​ដីកា​ឲ្យ​ឃុំ​ខ្លួន​លោក ហុង សុខហួរ កាល​ពី​ថ្ងៃ​ទី​១៤ ខែ​សីហា ឆ្នាំ​២០១៥ គឺ ២​ថ្ងៃ​បន្ទាប់​ពី​លោក​នាយក​រដ្ឋមន្ត្រី ហ៊ុន សែន បញ្ជា​ឲ្យ​ចាប់​ខ្លួន​ពេល​ដែល​លោក​នៅ​មាន​អភ័យ​ឯកសិទ្ធិ​ជា​សមាជិក​ព្រឹទ្ធសភា​នៅ​ឡើយ។ លោក ហុង សុខហួរ ត្រូវ​បាន​ចោទ​ប្រកាន់​ថា ក្បត់​ជាតិ ដែល​ហ៊ាន​លួច​ក្លែង​ឯកសារ​សន្ធិសញ្ញា​ព្រំដែន​កម្ពុជា-វៀតណាម ឆ្នាំ​១៩៧៩ ដោយ​អះអាង​ថា​ជា​សន្ធិសញ្ញា​រំលាយ​ព្រំដែន​ប្រទេស​ទាំង​ពីរ។

រីឯ​លោក អ៊ុំ សំអាន ជា​តំណាងរាស្ត្រ​គណបក្ស​សង្គ្រោះ​ជាតិ ត្រូវ​បាន​ចៅក្រម​ជំនុំ​ជម្រះ​សាលា​ដំបូង​រាជធានី​ភ្នំពេញ ផ្ដន្ទាទោស​ដាក់​ពន្ធនាគារ​រយៈពេល ២​ឆ្នាំ ៦​ខែ និង​ពិន័យ​ជា​ប្រាក់​ចំនួន ៤​លាន​រៀល​កាល​ពី​ថ្ងៃ​ទី​១០ ខែ​តុលា ឆ្នាំ​២០១៦ ក្រោម​បទ​ចោទ​ប្រកាន់​ពី​បទ​ញុះញង់​នាំ​ឲ្យ​មាន​ការ​រើសអើង និង​ប្រព្រឹត្ត​បទ​ឧក្រិដ្ឋ​ជាអាទិ៍ ទាក់ទង​នឹង​ផ្សព្វផ្សាយ​ឯកសារ​ផែនទី​ព្រំដែន​កម្ពុជា-វៀតណាម ក្លែងក្លាយ​តាម​ក្រម​ព្រហ្មទណ្ឌ។ លោក​ត្រូវ​បាន​អាជ្ញាធរ​ចាប់​ខ្លួន​កាល​ពី​ម៉ោង​ជាង ១២​យប់​ថ្ងៃ​អាទិត្យ ទី​១០ ឈាន​ចូល​ថ្ងៃ​ទី​១១ ខែ​មេសា ឆ្នាំ​២០១៦ ក្រោយ​ពេល​លោក​វិល​ត្រឡប់​ពី​សហរដ្ឋ​អាមេរិក មក​ដល់​ខេត្ត​សៀមរាប។ ករណី​លោក កំពុង​ឋិត​នៅ​ក្នុង​សមត្ថកិច្ច​តុលាការ​កំពូល។

លោក ជូង ជូងី មាន​ប្រសាសន៍​ថា រហូត​មក​ដល់​ខែ​សីហា នេះ លោក​នៅ​មិន​ទាន់​មាន​ព័ត៌មាន​តប​ពី​តុលាការ​កំពូល នៅ​ឡើយ​ទេ សម្រាប់​ករណី​ទាំង​ពីរ​នេះ៕

Advertisements

ប្រវត្តិ​ការងារ​ ញឹក ប៊ុនឆៃ មុន​ពេល​ តុលាការភ្នំពេញ សម្រេចឃុំខ្លួន

13612133_1238821676190009_7794300099157789923_n

«ប្រវត្តិ​ការងារលោក​ ញឹក ប៊ុនឆៃ មុន​ពេលតុលាការក្រុងភ្នំពេញ សម្រេច​ឃុំខ្លួន។ ការឃុំខ្លួននេះ កើតឡើង​ក្រោយពេលលោក ហ៊ុន សែន ដឹងថា ញឹក ប៊ុនឆាយ មានទំនាក់ទំនងជាមួយ​ បក្សប្រឆាំង ក្រោយការបោះឆ្នោតឃុំសង្កាត់ កាលពីខែ មិថុនា ឆ្នាំ២០១៧។ លោក ញឹក ប៊ុនឆាយ ត្រូវបានចាប់ខ្លួន ថ្ងៃទី០៣ សីហា ២០១៧។ និយាយដោយខ្លី គឺការចាប់ខ្លួនលោក ញឹក ប៊ុនឆាយ ក្រោមហេតុផល គ្រឿងញៀន នោះ វាគ្រាន់តែជាហេតុផលដាក់បន្ទុកប៉ុណ្ណោះ ក្នុងផ្លូវបំភាន់នយោបាយ និង បង្កភាពអាប់អួរ ដល់សង្គម »។ (បន្ថែមដោយ៖ ម៉ែន ណាត) 

 

(ដោយ ម៉ម មុនីរតន៍, RFA, 07-8-2017)
អតីត​ឧបនាយករដ្ឋមន្ត្រី និង​ជា​អតីត​មេ​បញ្ជាការ​ផ្កាយ​បួន កូតា​គណបក្ស​ហ៊្វុនស៊ិនប៉ិច នៅ​ពេល​នេះ ត្រូវ​បាន​កម្លាំង​នគរបាល​ក្រុង​ភ្នំពេញ​ចាប់​ខ្លួន​ហើយ​ពាក់ព័ន្ធ​នឹង​បទល្មើស​គ្រឿង​ញៀន​កាល​ពី​ជាង ១០​ឆ្នាំ​មុន។

តើ​លោក ញឹក ប៊ុនឆៃ ជា​នរណា ហើយ​មាន​ប្រវត្តិ​ការងារ​យ៉ាង​ណា?

កើត​ក្នុង​ត្រកូល​កសិករ និង​ផ្ដើម​ជីវិត​ល្បីល្បាញ​ពី​ការ​តស៊ូ​នៅ​ជាយដែន​ខ្មែរ-ថៃ អតីត​មន្ត្រី​ជាន់​ខ្ពស់​ពី​ខាង​គណបក្ស​រាជា​និយម​ហ៊្វុនស៊ិនប៉ិច រូប​នេះ​ដែល​ធ្លាប់​កាន់​កិច្ចការ​រដ្ឋ​នៅ​តាម​ស្ថាប័ន​ជាតិ​កំពូលៗ​មួយ​ចំនួន ពេល​នេះ​ត្រូវ​ធ្លាក់​ខ្លួន​ជា​ជន​ជាប់​ចោទ​ក្នុង​សំណុំ​រឿង​គ្រឿង​ញៀន​វិញ​ម្ដង។

លោក ញឹក ប៊ុនឆៃ ដែល​នរណាៗ​ក៏​ដឹង និង​ស្គាល់​ឈ្មោះ​ថា​ជា​អតីត​មេ​ទ័ព​ដែល​ពូកែ​ទាំង​ខាង​យុទ្ធសាស្ត្រ និង​មន្ត​អាគម​ផង​នោះ ឥឡូវ​នេះ​ត្រូវ​បាន​តំណាង​អយ្យការ​ក្រុង​ភ្នំពេញ លោក សៀង សុខ ចេញ​ដីកា​ឲ្យ​ចាប់​ខ្លួន​កាល​ពី​ថ្ងៃ​ទី​៣ សីហា។

កើត​នៅ​ភូមិ​តាអុងខាងលិច ឃុំ​ស្វាយចេក ស្រុក​ថ្មពួក ខេត្ត​បាត់ដំបង មុន​នឹង​ប្ដូរ​មក​ជា​ខេត្ត​បន្ទាយមានជ័យ វិញ លោក ញឹក ប៊ុនឆៃ មាន​ឪពុក​ឈ្មោះ ញឹក ឆេន និង​ម្ដាយ​ឈ្មោះ អូន សាម៉េត។ សៀវភៅ​ដែល​មាន​ចំណង​ជើង​ថា “សំណាង​មួយ​ក្នុង​មួយ​ពាន់​គ្រោះថ្នាក់” របស់​លោក ញឹក ប៊ុនឆៃ បាន​រៀបរាប់​ថា អ្នក​តស៊ូ​នៅ​តាម​ជាយដែន​រូប​នេះ​ធ្លាប់​សិក្សា​បញ្ចប់​ថ្នាក់​វិទ្យាល័យ​នៅ​សាលា​សិរីសោភ័ណ ក្នុង​អំឡុង​ឆ្នាំ​១៩៧៥។

ស្ថិត​ក្នុង​គ្រួសារ​ដែល​មាន​ឪពុក​ជា​ជាង​ឈើ និង​ម្ដាយ​ជា​ស្ត្រី​មេ​ផ្ទះ ហើយ​មាន​មុខ​របរ​លក់ដូរ​បន្តិចបន្តួច លោក ញឹក ប៊ុនឆៃ មាន​បង​ប្អូន​បង្កើត​ចំនួន ១០​នាក់ ក្នុង​នោះ​លោក​គឺ​ជា​កូន​ទី​២ ក្នុង​គ្រួសារ។ អតីត​មេ​បញ្ជាការ​យោធា​រូប​នេះ​កើត​នៅ​ថ្ងៃ​ទី​៧ ខែ​កុម្ភៈ ឆ្នាំ​១៩៥៨។

មុន​នឹង​ត្រូវ​ចូល​កាន់​តំណែង​ជា​មន្ត្រី​ជាន់​ខ្ពស់​នៅ​តាម​ស្ថាប័ន​កំពូលៗ​របស់​ជាតិ​មួយ​ចំនួន លោក ញឹក ប៊ុនឆៃ ធ្លាប់​ជា​យុវជន​ឆ្លង​កាត់​សង្គ្រាម និង​តស៊ូ​យ៉ាង​ស្វិតស្វាញ​នៅ​តាម​ជាយដែន​ខ្មែរ-ថៃ រំដោះ​ប្រទេស​ជាតិ​ពី​ការ​គ្រប់គ្រង​ដោយ​របប ប៉ុល ពត និង​ការ​ឈ្លាន​ពាន​ពី​ប្រទេស​វៀតណាម មក​លើ​កម្ពុជា។ សៀវភៅ​ដែល​សរសេរ​ដាក់​ចំណង​ជើង​ថា “សំណាង​មួយ​ក្នុង​មួយ​ពាន់​គ្រោះថ្នាក់” បាន​រៀបរាប់​ថា នៅ​ក្នុង​អំឡុង​ឆ្នាំ​១៩៧៩ អតីត​ឧបនាយករដ្ឋមន្ត្រី លោក ញឹក ប៊ុនឆៃ បាន​រៀបការ​ជាមួយ​អ្នកស្រី សម សុភាព ហើយ​មាន​កូន​ស្រី ២​នាក់​ជា​ចំណង​ដៃ។ ប៉ុន្តែ​ឯកសារ​ខ្លះ​បាន​លើក​ឡើង​ថា លោក ញឹក ប៊ុនឆៃ ធ្លាប់​រៀបការ​ប្រពន្ធ​ទី​មួយ​ម្ដង​រួច​មក​ហើយ ប៉ុន្តែ​ជា​អកុសល​ត្រូវ​ស្លាប់​នៅ​ក្នុង​របប ប៉ុល ពត ហើយ​មាន​កូន​ស្រី​មួយ​ដែរ។ Read more

ទស្សនៈចំពោះកម្ពុជា កែសម្រួល និងផ្លាស់ប្តូរប្រព័ន្ធដឹកនាំ ទៅថ្ងៃអនាគត

20160220_184636-1-1

កិច្ចពិគ្រោះយោបល់ អំពីការជជែកដេញដោលចំហ (Debate) លើប្រព័ន្ធដឹកនាំជាតិ!

កាពិគ្រោះយោបល់នេះ ធ្វើឡើងជាញឹកញាប់ជាមួយក្រុមការងារ កាលពីឆ្នាំ២០១៦ កន្លងទៅ សំដៅទៅលើការកែទម្រង់ប្រព័ន្ធដឹកនាំ ក្នុងជួរគណបក្សនយោបាយ (ប្រជាធិបតេយ្យ) និង ប្រព័ន្ធដឹកនាំរដ្ឋផង។ យើងមិនលំអិតក្នុងអត្ថបទនេះទេ ប៉ុន្តែយើងសូមធ្វើការកត់សម្គាល់ខ្លះ ដូចខាងក្រោម ដើម្បីងាយយល់។

ពលរដ្ឋគ្រប់រូប មានសិទ្ធិចូលរួមក្នុង ជីវភាពនយោបាយ ក្នុងគណបក្សមួយ ដោយបើកចំហ ដោយមាន ការប្រគួតប្រជែងស្មើភាពគ្នា ជ្រើសរើសតំណាងរបស់ខ្លួន ពីថ្នាក់មូលដ្ឋាន ដល់ថ្នាក់ជាតិ។ ការណ៍នេះ គេធ្វើតាមរយៈ ការជជែកដេញដោលជាចំហ (Debate) ក្នុងចំណោម សមាជិក ឬអ្នកចូលរួម ដើម្បី​ចំម្រាញ់​បេក្ខភាពនីមួយៗ ចេញពីឆន្ទៈពលរដ្ឋ និងចូលរួម។ គណៈកម្មធិការវាយតម្លៃ ត្រូវពិភាក្សាលំអិត អំពីគោលការណ៍នេះ ទៅតាម ស្ថានភាពជាក់ស្តែង ផ្សារភ្ជាប់ទីតាំងភូមិសាស្រ្ត និងប្រពៃណីទំលៀមទំលាប់ របស់ពលរដ្ឋ។

#បញ្ជាក់៖ បក្សនយោបាយ គឺអង្គការនយោបាយ របស់ក្រុមមួយ ដែលមានគំនិត និងគោលការណ៍ដូចគ្នា សំដៅទៅបម្រើកិច្ចការជាប្រយោជន៍របស់ពលរដ្ឋ និង ជាតិជាធំ តាមរយៈឃុំ សង្ការ រដ្ឋសភា និ​ងរដ្ឋាភិបាល ដែលកើតចេញពីការបោះឆ្នោតគាំទ្រ របស់ពលរដ្ឋ។ ធ្វបក្សនយោបាយ មិនសំដៅទៅការស្វែងរកអត្ថប្រយោជន៍ ពីអ្នកនយោបាុយ ឬពីឈ្មួញរកស៊ី ឬក៏អ្នកនយោបាយកាន់អំណាច ដើម្បីបំផ្លាញ ផលប្រយោជន៍សាធារណជន និង ជាតិបានទេ។

ឯកសារនេះ កំណត់មូលដ្នានគ្រឹះនៃ យុទ្ធានាការដេញដោលបើកចំហ (Debate) និង កំណត់រយៈពេល ជាក់លាក់ ក្នុងកម្មវិធីនយោបាយ ដែល ជាយន្តការថ្មី សម្រាប់ប្រទេសកម្ពុជា។ មេដឹកនាំ បក្សនយោបាយ នឹងលែងក្លាយជាអ្នកនិយាយតែម្នាក់ឯង ឬជាគ្រូឧទ្ទេសន៍ ថ្លែងឲ្យពលរដ្ឋចំហមាត់ស្តាប់ ទៀតហើយ។ ពលរដ្ឋ ដែលចូលរួមក្នុងកម្មវិធីយុទ្ធនាការ អាចជ្រើសរើស តំណាងរបស់ខ្លួន។ ពលរដ្ឋ និង បេក្ខជនជាតំណាង គឺជាអ្នកផ្តល់យោបល់ផ្ទាល់ និង ជាអ្នកបង្ហាញ អំពីសមត្ថភាព ព្រមទាំងគោលការណ៍ទទួលខុសត្រូវនានា ដើម្បីអភិវឌ្ឍមូលដ្ឋាន និង មណ្ឌល របស់ខ្លួន សម្រាប់ក្រោយពេលជាប់ឆ្នោត ជាតំណាងរាស្រ្ត ឬជាសមាជិកក្រុមប្រឹក្សាណាមួយ។ យុទ្ធនាការនេះ ត្រូវបញ្ចប់ ឲ្យបានមុន គណបក្សនយោបាយ បញ្ជូនបញ្ជីឈ្មោះបេក្ខជន ទៅគណៈកម្មាធិការជាតិរៀបចំការបោះឆ្នោត (គ.ជ.ប) តាមការកំណត់។ ទម្រង់នៃយុទ្ធនាការ នីមួយៗ មានលក្ខណៈដូចគ្នា ដូចបានបញ្ជាក់ខាងក្រោម៖

– ឧទាហរណ៍៖ បេក្ខជន សម្រាប់ការបោះឆ្នោតជ្រើសរើស ក្រុមប្រឹក្សាឃុំ/សង្កាត់ និង ខេត្ត/ក្រុង ត្រូវធ្វើជាមួយគ្នា និង ត្រូវរៀបចំ យុទ្ធនាការរយៈពេល ៦ ខែ គឺពីខែធ្នូ ដល់ខែឧសភា សម្រាប់ អាណត្តិនីមួយៗ។
– ឧទាហរណ៍៖ បេក្ខជន សម្រាប់ការបោះឆ្នោតជ្រើសរើសតំណាងរាស្រ្ត និងបេក្ខភាព នាយករដ្ឋមន្រ្តី ត្រូវធ្វើ និងត្រូវរៀបចំយុទ្ធនាការ រយៈពេល ៥ គឺពីខែសីហា ដល់ខែធ្នូ សម្រាប់ អាណត្តិនីមួយៗ។

នេះជាចំណែកមួយនៃឯកសារ ដែលកំពុងចងក្រង ហើយឯកសារនេះ នឹងក្លាយជាមូលដ្ឋានគំនិត ដ៏សំខាន់ សម្រាប់ពលរដ្ឋខ្មែរ និង យុវជនជំនាន់ថ្មី ដែលមានបំណងធ្វើនយោបាយ ទៅថ្ងៃក្រោយ។

(ក្រុមពិគ្រោះយោបល់៖ ប៉ាង សុខខឿន, លោក ម៉ែន ណាត, លោក ទូច វិបុល។ /អត្ថបទ ម៉ែន ណាត)