Monthly Archives: August 2017

ហ៊ុន សែន «សន្យាកាត់ក» ឆ្នាំ២០០២ បរាជ័យរឿងទប់ស្កាត់ការបំផ្លាញព្រៃឈើ ឥឡូវប្តូរពាក្យថា ​កាប់​បំផ្លាញ​ព្រៃឈើ​ «ដូច​កាប់​ក្បាល ហ៊ុន សែន​»

3-HunSen_27

ឧកញ៉ា ទ្រី ភាព ដែល​មាន​អំណាច​បំផុត ​នៅ​កម្ពុជា ត្រូវ​បាន​គេ​រាយការណ៍​ថា គាត់​ បាន​រក​ចំណេញ​ខុស​ច្បាប់​ជាង ២២០ លាន​ដុល្លារ​អាមេរិក ពី​ការ​កាប់​ឈើ​ប្រណីត​ រយៈ​ពេល ៣ ឆ្នាំ នៅ​ជួរ​ភ្នំ​ក្រវាញ {ដោយមិនទាន់រាប់បញ្ចូលពីតំបន់ផ្សេងៗទៀតផង} (កាសែតភ្នំពេញប៉ុស្តិ៍ ខែតុលា ២០១៤)។ សូមចុចត្រង់នេះ អានលំអិតលោក ទ្រី ភាព រាប់គ្នាជាប្អូនធម៌របស់លោកស្រី ប៊ុន រ៉ានី ហ៊ុនសែន ជាភរិយានាយករដ្ឋមន្រ្តី ហ៊ុន សែន។

ចំណែកក្រុមហ៊ុន ឧកញ៉ា គិត ម៉េង ក៏ចូលរួមកាប់បំផ្លាញ និងរកស៊ីឈើប្រណិត នាំចេញទៅកាន់ប្រទេសវៀតណាម។ លោក គិត ម៉េង គឺជាឈ្មួញដែលជិតស្និទ្ធនឹងលោក ហ៊ុន សែន និងគ្រួសាររបស់លោកតែម្តង ព្រមទាំងជួយឈរឈ្មោះឲ្យក្រុមហ៊ុនមួយចំនួន ជូនលោកស្រី ហ៊ុន ម៉ាណា ជាកូនស្រីលោក្ ហ៊ុន សែន ដូចតំបន់កំសាន្ត កោះរ៉ុង ជាដើម។ សូមចុចអានលំអិត

ក្រៅពីនេះនៅមាន ពួកឧកញ៉ា រកស៊ីបំផ្លាញព្រៃឈើជាច្រើនទៀត ដែលគេអាចរាប់ឈ្មោះបាន ដូចជា ហ៊ុន ជា ជាក្មួយប្រុសរបស់លោក ហ៊ុន សែន, ភរិយាលោក ហ៊ុន ណេង ជាបងថ្លៃរបស់លោក ហ៊ុន សែន, លឹម ប៊ុណ្ណា ជាសាច់ញាតិរបស់ក្រុមគ្រួសារលោក ហ៊ុន សែន និង សឹង សំអុល ជាដើម។ល។ (អត្ថបទដោយ ម៉ែន ណាត)


ហ៊ុន សែន «សន្យាកាត់ក» ពីឆ្នាំ២០០២ បរាជ័យរឿងទប់ស្កាត់ការបំផ្លាញព្រៃឈើ ប៉ុន្តែឥឡូវប្តូរពាក្យថា ការ​កាប់​បំផ្លាញ​ព្រៃឈើ​ «​ដូច​កាប់​ក្បាល ហ៊ុន សែន​»!


លោក​ ហ៊ុន សែន ចាត់ទុក​ការ​កាប់​បំផ្លាញ​ព្រៃឈើ​ «​ដូច​កាប់​ក្បាល» ​របស់​លោក

(Phnom Penh Post, ផាក់ ស៊ាងលី, 23-8-2017)

ភ្នំពេញៈ លោក​នាយក​រដ្ឋមន្ត្រី ហ៊ុន សែន បាន​ថ្លែង​ជា​សាធារណៈ​ថា​ស្អប់​អ្នក​កាប់​បំផ្លាញ​ព្រៃឈើ​ និង​ចាត់ទុក​ការ​កាប់​បំផ្លាញ​ព្រៃឈើ​ «​ដូច​កាប់​ក្បាល​» ​របស់​លោក ខណៈ​ដែល​សកម្មជន​បរិស្ថាន​ បាន​ធ្វើការ​រិះគន់​តាំងពី​យូរ​មក​ហើយ​ថា បទល្មើស​ព្រៃឈើ​ ដែល​នៅ​តែ​កំពុង​បន្ត​កើតឡើង​ រាប់​ទសវត្សរ៍​មក​ហើយ​នេះ​ ភាគច្រើន​បង្ក​ឡើង​ដោយ ឧកញ៉ា និង ​មន្ត្រី​មាន​អំណាច ​មួយ​ចំនួន​។

ក្នុង​វេទិកា​ជាតិ​លើក​ទី​២ ​ស្តីពី​ «​ការ​ការពារ និង ​អភិរក្ស​ធនធាន​ធម្មជាតិ​» ​នៅ​វិមាន​សន្តិភាព​កាលពី​ម្សិលមិញ​ ដែល​មាន​អ្នក​ចូលរួម​ប្រមាណ​ ៨០០ ​នាក់​ មកពី​ស្ថាប័ន​ពាក់ព័ន្ធ លោក​នាយក​រដ្ឋមន្ត្រី​បាន​ថ្លែង​ថា ​លោក ​ស្អប់​អ្នក​បំផ្លាញ​ព្រៃឈើ​ ហើយ​ចាត់​ទុក​ការ​កាប់​ឈើ​ ដូចជា​ «​ការ​កាប់​ក្បាល» ​របស់​លោក​អ៊ីចឹង​ដែរ​។

លោក​ថ្លែង​ដូច្នេះ​ថា​៖ «​ការ​កាប់​បំផ្លាញ​ព្រៃឈើ​ណា​មួយ វា​មិន​ខុស​ពី​ការ​កាប់​ក្បាល​ខ្ញុំ​ករុណា​ខ្ញុំ​ទេ​។ អ៊ីចឹង​បាន​ខ្ញុំ​ករុណា​ខ្ញុំ​ស្អប់​ណាស់​ អា​មនុស្ស​កាប់​ឈើ បំផ្លាញ​ព្រៃឈើ​នេះ​។ រៀងរាល់​ប្រជុំ​គណបក្ស ខ្ញុំ​តែង​រំឭក​ហើយ​ថា​ កុំ​អត់​ឱន​ជាមួយ​អ្នក​ប្រព្រឹត្ត​អំពើ​អនាធិបតេយ្យ​ អំពី​បញ្ហា​ការ​កាប់​បំផ្លាញ​ព្រៃឈើ ទោះបី​អ្នក​នោះ​មាន​ឋានៈ​ស្អី​ក៏ដោយ​»​។

លោក​នាយក​រដ្ឋមន្ត្រី​ បាន​លើក​ឡើង​ដោយ​មិន​បញ្ចេញ​ឈ្មោះ​ថា ​អ្នក​ខ្លះ​រស់នៅ​​ក្នុង​រាជធានី​ភ្នំពេញ តែ​ទៅ​កាប់​បំផ្លាញ​ព្រៃឈើ​នៅ​ ខេត្ត​ព្រះវិហារ ឧត្តរមានជ័យ រតនគិរី ឬ​ខេត្ត​មណ្ឌលគិរី​ជាដើម​។ អ៊ីចឹង​នៅ​ភ្នំពេញ​ គេ​ចាត់​ទុក​ថា​ «​ជា​ឈ្មួញ ឬ​ឧកញ៉ា​ល្អ​»​។ ប៉ុន្តែ​សម្រាប់​ពលរដ្ឋ​នៅ​មូលដ្ឋាន​ ឯ​ខេត្ត​ទាំង​នោះ​ ដែល​ខាត​ផលប្រយោជន៍​ ដោយ​ការ​កាប់​ព្រៃឈើ​នោះ​ គឺ​បាន​ចាត់​ទុក​អ្នក​កាប់​ឈើ​នោះ​ថា​ «​ជា​ឧក្រិដ្ឋជន​ក្នុង​តំបន់​នោះ​ទៅ​វិញ​ទេ​»​។

លោក​មាន​ប្រសាសន៍​ថា​៖ «​គេ​កាប់​បំផ្លាញ​ព្រៃឈើ​នៅ​ខេត្ត​ព្រះវិហារ ​ក្នុង​នាម​ជា​អ្នក​កាប់​ឈើ តែ​គេ​មក​ចូលរួម​កសាង​បន្តិចបន្តួច នៅ​ខេត្ត​កំពង់ចាម កណ្តាល រួច​ហើយ​អ្នក​ខេត្ត​កំពង់ចាម កណ្តាល គិត​ថា​អា​នេះ​វា​ល្អ​។ ចេះ​តែ​នាំ​គ្នា​ថា​ល្អ​ទៅ ប៉ុន្តែ​ត្រូវ​មើល​ប្រវត្តិ​»​។ លោក​បន្ត​ថា​ បើ​មាន​បាន​ដោយសារ​ការ​រកស៊ី​កាប់​ឈើ ឬ​បំផ្លាញ​ព្រៃឈើ​នេះ​វា​គឺជា​រឿង​ «​ត្រូវ​ពិចារណា​ឲ្យ​បាន​ហ្មត់ចត់​»​។

ទោះ​យ៉ាង​ណា​ប្រមុខ​រដ្ឋាភិបាល​ បញ្ជាក់​ថា​៖ «​អ៊ីចឹង​អា​រឿង​ព្រៃឈើ​នេះ យើង​បាន​ខិតខំ​ច្រើន​ណាស់​។ តែ​ដូច​បាន​និយាយ​អ៊ីចឹង​។ អស់​អា​ធំ​ [​បទល្មើស​ធំ​] វា​នៅ​សល់​អាតូច តែ​អា​ធំ ក៏​នៅ​មាន​…​ដែរ ព្រោះ​ឥឡូវ​រណារ​បច្ចុប្បន្ន​នេះ អស់​ទាស់​ហើយ​។ ពី​ដើម​ប្រើ​ដឹង កាប់​ ៣ ​ថ្ងៃ​មិន​ទាន់​រលំ​ ១ ​ដើម​ផង​។ តែ​ឥឡូវ​ដាក់​ប៉ាច់​ដួល កាត់​ជា​កង់ៗ​ដឹក​ទៅ​…​ថា ​គ្រឿង​ញៀន​ទៅ​វា​លំបាក គេ​លេប​ក្នុង​ពោះ​…​តែ​ឈើ​ វា​ទៅ​រួច​ ព្រោះ​ឈើ​វា​ដាក់​លើ​ឡាន​ពេញៗ​»​។

បើ​តាម​លោក ហ៊ុន សែន កម្ពុជា​បាន​ចាប់ផ្តើម​ហាមឃាត់​ការ​នាំ​ចេញ​ឈើ​ តាំងពី​ឆ្នាំ​ ១៩៩៨ ​មក​ម៉្លេះ ហើយ​រយៈពេល​ជិត​ ២០ ​ឆ្នាំ​មក​នេះ​បម្រាម​នេះ​ នឹង​នៅ​តែ​បន្ត​ទៅ​មុខ​ទៀត ​ដែល​រួមមាន​ទាំង​ការ​មិន​ដំណើរការ​ឡើង​វិញ​ នូវ​ការ​កាប់​ឈើ​ហុប​យក​ទៅ​កែច្នៃ​ ក្នុង​រោងចក្រ​វិញ​នោះ​ទេ​។ ប៉ុន្តែ ​លោក​បាន​ឲ្យ​ក្រសួង​កសិកម្ម ​ធ្វើការ​ពិចារណា​លើ​ការ​កាប់​ឈើ​ សម្រាប់​តម្រូវការ​ក្នុង​ស្រុក ដូចជា​ ធ្វើ​សាលារៀន វត្ត​អារាម ធ្វើ​អុស និង​ លំនៅឋាន​ពលរដ្ឋ​។

ជាមួយ​គ្នា​នេះ​ លោក​ ហ៊ុន សែន ក៏​បាន​ធ្វើការ​រិះគន់​ក្រុម​បរទេស​ដូចជា​ អង្គការ​ឃ្លាំ​មើល​បរិស្ថាន​ពិភពលោក Global Witness ថា​ជា​​ស្ថាប័ន​ «​ចង្រៃ​សុទ្ធ និង​មេ​ពេស្យា​»​។ «Global Witness រឿង​ចាប់ផ្តើម​ពី​ទៅ​យក​ប្តី​គេ​។ ខ្ញុំ​និយាយ​ទៅ​ច្បាស់​ទៅ​យក​ប្តី​គេ​ទេ​។ ដល់​ប្រពន្ធ​គេ​ទៅ​​រក​រឿង​ថា ​ថៅកែ​កាប់​ឈើ​អ្នក​ទៅ​រក​រឿង​។ បាន​ចេះ​តែ​កើត​ជា​រឿង​បន្តបន្ទាប់ៗ​។ ឥឡូវ​សរសេរ​សុទ្ធ​តែ​រឿង​អី “​ប្រទេស​កម្ពុជា​ជា​ប្រទេស​សម្រាប់ លក់​”​។ រួច​ហើយ​ចេះ​តែ​បន្ត​ទៅ​។ ចាប់ផ្តើម​ចេញ​ពី​អាហ្នឹង ក៏​ប្រមាថ​ចំពោះ​ត្រកូល​ ហ៊ុន ​រហូត​ដល់​ហ៊ាន​…​គេ​សម្លាប់​ត្រកូល​ ហ៊ុន សូម្បី​តែ​កូន​ក្នុង​អង្រឹង​។ ​ត្រង់​ចំណុច​នេះ​ហើយ​ខ្ញុំ​ប្រកាស​សង្គ្រាម​មុន​តែ​ម្តង ​មិន​ឲ្យ​អ្នក​ឯង​ធ្វើ​ផ្តេសផ្តាស​។ ត្រកូល​ ហ៊ុន ​មិនមែន​ជា​ត្រកូល ​សម្រាប់​អ្នក​ឯង​សម្លាប់​ទេ​»​។ Read more

Advertisements

ពលរដ្ឋខ្មែរនៅក្រៅប្រទេស ទាមទារសិទ្ធិបោះឆ្នោត ដូចពលរដ្ឋក្នុងប្រទេស ស្របតាមរដ្ឋធម្មនុញ្ញ

20160220_184636-1-1ដដដ21074201_1887190011298642_1391436753_n

ពលរដ្ឋខ្មែរនៅក្រៅប្រទេស ធ្វើញត្តិគាំទ្រឲ្យមានច្បាប់ សម្រាប់ពួកគេ មានសិទ្ធិបោះឆ្នោត ដូចពលរដ្ឋក្នុងប្រទេសដែរ ស្របតាមរដ្ឋធម្មនុញ្ញ មាត្រា៣៣ កថាខណ្ឌទី២ និង មាត្រា៣៥ កថាខណ្ឌទី១ ។


(RFA Khmer, ដោយ តាំង សារ៉ាដា, 23-8-2017)

សហគមន៍​ខ្មែរ​នៅ​ក្រៅ​ប្រទេស ​ជំរុញ​ឲ្យ​មាន​ការ​អនុញ្ញាត ឲ្យ​ពលរដ្ឋ​ខ្មែរ ​មាន​សិទ្ធិ​ចុះ​ឈ្មោះ​បោះឆ្នោត និង​ បោះឆ្នោត សម្រាប់​ការ​បោះឆ្នោត​ ក្នុង​ប្រទេស​កម្ពុជា នៅ​តាម​បណ្ដា​ប្រទេស ​ដែល​ពួកគេ​កំពុង​រស់​នៅ។ ការ​ទាមទារ​នេះ ស្រប​ពេល​ដែល ​គណៈកម្មាធិការ​អចិន្ត្រៃយ៍ ​នៃ​ រដ្ឋ​សភា ​ក្នុង​ប្រទេស​កម្ពុជា បាន​ទទួល ​សេចក្ដី​ស្នើ​កែប្រែ​ច្បាប់​បោះឆ្នោត ដើម្បី​អាច​អោយ​ពលរដ្ឋ​ខ្មែរ ​នៅ​ក្រៅ​ប្រទេស​មាន​លទ្ធភាព​ បោះ​ឆ្នោត​ជ្រើសរើស​មេដឹកនាំ​ប្រទេស ​តាម​ឆន្ទៈ​របស់​ពួកគេ។

ប្រធាន​អង្គការ​សម្ព័ន្ធមិត្ត​ខ្មែរ-​អាមេរិកាំង លោក ទូច វិបុល ជំរុញ​ឲ្យ​រដ្ឋាភិបាល​ទីក្រុង​ភ្នំពេញ បើក​សិទ្ធិ​ឲ្យ​ពលរដ្ឋ​ខ្មែរ ​នៅ​ក្រៅ​ប្រទេស អាច​ចេញ​ទៅ​បោះឆ្នោត​ នៅ​តាម​ស្ថានទូត ឬ​តាម​ស្ថាន​កុងស៊ុល​ដែល​មាន​ពលរដ្ឋ​ខ្មែរ ​រស់​នៅ​ច្រើន។ លោក​បន្ត​ថា ធ្វើ​ដូច្នេះ​គឺ​ដើម្បី​អាច​ពលរដ្ឋ​ខ្មែរ​ នៅ​ឯ​នាយ​សមុទ្រ​ បង្ហាញ​ឆន្ទៈ​របស់​ខ្លួន ​ក្នុង​ការ​ចូលរួម​សម្រេច​លើ​ជោគវាសនា​ នៃ​ប្រទេស​កំណើត​ របស់​ពួកគេ ស្រប​តាម​គោលការណ៍​ប្រជាធិបតេយ្យ និង​ស្មារតី​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស៖ «ក្នុង​នាម​សម្ព័ន្ធមិត្ត​ខ្មែរ​អាមេរិកាំង និង​ពលរដ្ឋ​ខ្មែរ​ នៅ​តាម​សហគមន៍​នានា ជុំវិញ​ពិភពលោក​ហ្នឹង​គឺ​ថា អំពាវនាវ​ដល់​អ្នក​នយោបាយ​ខ្មែរ​យើង​ហ្នឹង ​ដល់​ពេល​វេលា​ដែល​ត្រូវ​បើក​បេះដូង​ អោយ​ទូលាយ និង​មាន​ឆន្ទៈ​ការ​រៀបចំ​អោយ​បាន​ទូលំទូលាយ ហើយ​ល្មម​ផ្ដល់​ឱកាស​ អោយ​បង​ប្អូន​នៅ​ក្រៅ​ស្រុក​ហ្នឹង ​មាន​ឱកាស​ចូលរួម​កំណត់​ជោគវាសនា ក៏​ដូចជា​ការ​ជ្រើសរើស ​មេដឹកនាំ​របស់​ខ្លួន»

លោក ទូច វិបុល មាន​ប្រសាសន៍​ថា ដោយសារ​តែ​អង្គការ​របស់​លោក ​មាន​ទំនាក់ទំនង​ល្អ ​ជាមួយ​ក្រុម​តំណាងរាស្ត្រ ​សហរដ្ឋអាមេរិក លោក​ នឹង​ជំរុញ​ឲ្យ​សភា​នៃ​ប្រទេស​មហា​អំណាច​មួយ​នេះ ​ប្រើ​យន្តការ​របស់​ខ្លួន ​ដើម្បី​ជំរុញ​ឲ្យ​រដ្ឋសភា​កម្ពុជា ធ្វើ​ការ​អនុម័ត​ទៅ​លើ​ការ​ធ្វើ​វិសោធនកម្ម​នេះ។

លោក​បន្ត​ថា លោក ​នឹង​ធ្វើ​ចលនា​នៅ​ទូទាំង​ពិភពលោក​ ដើម្បី​ឲ្យ​ពលរដ្ឋ​ខ្មែរ​នាំ​គ្ នា​ជំរុញ​ឲ្យ​រដ្ឋាភិបាល​កម្ពុជា បង្កើត​ស្ថានីយ​បោះឆ្នោត​នៅ​ក្រៅ​ប្រទេស៖ «អ្វី​ដែល​យើង​អាច​ធ្វើ​បាន​ គឺ​មិន​ត្រឹមតែ​បញ្ចុះ​បញ្ចូល​រដ្ឋាភិបាល​ របស់​សហរដ្ឋអាមេរិក ដែល​ជា​ប្រទេស​ម្ចាស់​ហត្ថលេខី​នៃ ​កិច្ច​ព្រមព្រៀង សន្តិភាព​ទីក្រុង​ប៉ារីស​ ប៉ុណ្ណឹង​ទេ។ យើង​ នឹង​អំពាវនាវ​អោយ​សហគមន៍​ខ្មែរ​យើង​ នៅ​ប្រទេស​អូស្ត្រាលី និង​នៅ​អឺរ៉ុប អោយ​បញ្ចុះបញ្ចូល​តំណាង​របស់​ពួកគេ​ ធ្វើ​យ៉ាង​ណា​អាច​ជំរុញ​អោយ​ រដ្ឋ​សភា កម្ពុជា ​អនុម័ត​វិសោធនកម្ម​ ច្បាប់​បោះឆ្នោត​នេះ»

ការ​ទាមទារ​ឲ្យ​ពលរដ្ឋ​ខ្មែរ ​មាន​សិទ្ធិ​បោះឆ្នោត ​នៅ​ក្រៅ​ប្រទេស ស្រប​ពេល​ដែល​ តំណាងរាស្ត្រ​គណបក្ស​សង្គ្រោះ​ជាតិ ចំនួន ៣៣​ រូប កាល​ពី​ថ្ងៃ​ទី​១១ ខែ​សីហា ២០១៧ បាន​ផ្ញើ​សេចក្ដី​ស្នើ​ធ្វើ​វិសោធនកម្ម ​ច្បាប់​បោះឆ្នោត​ សម្រាប់​ពលរដ្ឋ​ខ្មែរ​នៅ​ក្រៅ​ប្រទេស ​អាច​ចុះ​ឈ្មោះ​បោះឆ្នោត និង​ បោះ​ឆ្នោត​បាន ​នៅ​ប្រទេស​ដែល​ខ្លួន​ កំពុង​ស្នាក់នៅ និង​ធ្វើការ។ សេចក្ដី​ស្នើ​ច្បាប់​នេះ ត្រូវ​បាន​គណៈកម្មាធិការ​អចិន្ត្រៃយ៍​នៃ​រដ្ឋសភា​ សម្រេច​បញ្ជូន​ទៅ​ គណៈកម្មការ​នីតិកម្ម​ ដើម្បី​ពិនិត្យ។

​អ្នកនាំពាក្យ​រដ្ឋ​សភា លោក ឡេង ប៉េងឡុង ឲ្យ​ដឹង​ថា តាម​នីតិវិធី​នៅ​ពេល​ គណៈកម្មការ​ជំនាញ ​ពិនិត្យ​ រួច​ហើយ​នឹង​ប្រគល់​មក​ គណៈកម្មាធិការ​អចិន្ត្រៃយ៍ ​រដ្ឋសភា ​វិញ ដើម្បី​សម្រេច​ថា នឹង​បញ្ជូន​ទៅ​ជជែក​បន្ត​ទៅ​សភា​ពេញ​អង្គ ឬ​ទម្លាក់​ចោល​ត្រឹម​ គណៈកម្មាធិការ​អចិន្ត្រៃយ៍​ រដ្ឋសភា។ ប៉ុន្តែ​អ្នកនាំពាក្យ​ គណបក្ស​ប្រជាជន​កម្ពុជា លោក សុខ ឥសាន ធ្លាប់​ចោទ​ប្រកាន់​ក្រុម​តំណាងរាស្ត្រ​របស់​បក្ស​ប្រឆាំង​ថា ការ​ស្នើ​ធ្វើ​វិសោធនកម្ម ​ច្បាប់​ប្រភេទ​នេះ គឺ​ដើម្បី​បុព្វហេតុ​កេង​ ចំណេញ​នយោបាយ និង​ ចង់​វាយ​បំបែក​ឆ្នាំង​បាយ​ របស់​ក្រុម​ ពលករ​ខ្មែរ​ចំណាកស្រុក​ប៉ុណ្ណោះ។

នៅ​ក្នុង​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​រាត្រី​ថ្ងៃ​សុក្រ ទី​១៨ ខែ​សីហា តំណាងរាស្ត្រ​គណបក្ស​សង្គ្រោះ​ជាតិ លោក សុន ឆ័យ ដែល​ជា​អ្នក​សកម្ម ​ក្នុង​ការ​ដឹក​នាំ​ ឲ្យ​មាន​ការ​កែប្រែ​ច្បាប់​បោះ​ឆ្នោត​នេះ ថ្លែង​ថា សំណើ​របស់​បក្ស​ប្រឆាំង ​ធ្វើ​ឡើង​ក្រោយ​ពី​មាន​ការ​ជំរុញ​របស់​ ក្រុម​អង្គការ​សង្គម​ស៊ីវិល​ជា​ច្រើន ​ដែល​ពួកគេ​ធ្លាប់​បាន​ស្នើ​ទៅ​ គណៈកម្មាធិការ​ជាតិ​រៀបចំ​ការ​បោះឆ្នោត ដើម្បី​ជំរុញ​ឲ្យ​មាន​ការ​រៀបចំ​ស្ថានីយ​បោះឆ្នោត ​នៅ​បរទេស៖ «ការ​រៀបចំ​គឺ​ធ្វើ​យ៉ាង​ម៉េច​អោយ​ បងប្អូន​យើង​ នៅ​ប្រទេស​ជិត​ខាង ដូច​ថៃ អី​ជា​ដើម​ហ្នឹង ទី​មួយ​ មាន​ក្រុម​ចល័ត ​ដែល​អាច​ចូល​ទៅ​ចុះ​ឈ្មោះ​ នៅ​ក្បែរ​ទីតាំង​ដែល​មាន​ពលរដ្ឋ​ខ្មែរ​យើង​ ធ្វើការ​ច្រើន​ហ្នឹង តាម​រយៈ​ការ​ជំរុញ​អោយ​ ក្រសួង​ការបរទេស​យើង​ធ្វើការ​ទាក់ទង សុំ​ការ​អនុញ្ញាត​ទៅ​ប្រទេស​ថៃ។ ទី​២ យើង​អាច​ធ្វើ​ការិយាល័យ​ចុះ​ឈ្មោះ​បោះឆ្នោត​នៅ​តាម​ព្រំដែន​ ដើម្បី​អាច​អោយ​បងប្អូន​យើង​ ដែល​នៅ​ក្បែរ​ហ្នឹង ​អាច​ឆ្លង​ដែន​ មក​បោះឆ្នោត​បាន»

​សំណើ​របស់​ក្រុម​តំណាងរាស្ត្រ​បក្ស​ប្រឆាំង​ ធ្វើ​ឡើង​ផ្អែក​តាម​ មាត្រា ៣៣ នៃ​រដ្ឋធម្មនុញ្ញ ​របស់​កម្ពុជា ដែល​ចែង​ថា «ពលរដ្ឋ​ខ្មែរ​ដែល​កំពុង​រស់​នៅ​បរទេស ត្រូវ​បាន​គាំពារ​ដោយ​រដ្ឋ» ហើយ​ពលរដ្ឋ​ខ្មែរ​ទាំង​ពីរ​ភេទ មាន​សិទ្ធិ​បោះឆ្នោត និង​ឈរ​ឈ្មោះ​ ឲ្យ​គេ​បោះឆ្នោត។

លោក សុន ឆ័យ បាន​ផ្ដល់​អនុសាសន៍​ដល់​ រដ្ឋាភិបាល​កម្ពុជា​ថា ដោយសារ​កម្ពុជា ប្រើ​ប្រព័ន្ធ​បោះ​ឆ្នោត​បែប​សមាមាត្រ​ដោយ​យក​ខេត្ត និង​រាជធានី​ជា​មណ្ឌល​បោះឆ្នោត ដូច្នេះ គ.ជ.ប អាច​បង្កើត​ធុង​ចំនួន ២៥ តំណាង​ឲ្យ​រាជធានី-​ខេត្ត​ទាំង​នេះ ​ដាក់​តាម​ស្ថានទូត និង​ស្ថាន​កុងស៊ុល នៃ​បណ្ដា​ប្រទេស​ ដែល​មាន​ពលរដ្ឋ​ខ្មែរ​កំពុង​រស់ និង​ស្នាក់​នៅ។ ពលរដ្ឋ​ទាំង​នោះ​ អាច​បោះ​ទម្លាក់​ចូល​ក្នុង​ធុង​ណា​ដែល​ជា​ធុង​នៃ​ ខេត្ត​កំណើត ឬ​មណ្ឌល​របស់​ពួកគេ។ លោក​បន្ត​ថា ពលរដ្ឋ​ទាំង​នោះ​ បញ្ជាក់​ស្រុក​កំណើត​របស់​ពួកគេ​ បាន​តាម​រយៈ​លិខិត​កំណើត ឬ​អត្តសញ្ញាណប័ណ្ណ​របស់​ពួកគេ។

​តំណាងរាស្ត្រ​អូស្ត្រាលី ប្រចាំ​រដ្ឋ​វ៉ិកតូរីយ៉ា (Victoria) ដែល​មាន​ដើម​កំណើត​ខ្មែរ លោក ហុង លីម ប្រាប់​អាស៊ីសេរី តាម​ទូរស័ព្ទ​ថា លោក​ គាំទ្រ​ឲ្យ​ពលរដ្ឋ​នៅ​ក្រៅ​ប្រទេស ​អាច​មាន​លទ្ធភាព ​ក្នុង​ការ​បោះឆ្នោត​ជ្រើសតាំង ​តំណាងរាស្ត្រ ​សម្រាប់​ប្រទេស​កម្ពុជា។ ​លោក​បន្ត​ថា ធ្វើ​ដូច្នេះ គឺ​មាន​ប្រយោជន៍​ជា​ខ្លាំង​ដើម្បី​ឲ្យ​ពលរដ្ឋ​ខ្មែរ​យក​ចិត្ត​ទុកដាក់​អំពី​ប្រទេស​កំណើត​របស់​ពួកគេ និង​អាច​ចូល​រួម​សម្រេច​ជោគវាសនា​ទាំង​មូល​របស់​ជាតិ ដូច​បណ្ដា​ប្រជាជាតិ​នៃ ​ប្រទេស​ជឿន​លឿន​ដទៃ​ទៀត៖ «ការ​អនុញ្ញាត​ឲ្យ​ពលរដ្ឋ​ខ្មែរ​នៅ​ក្រៅ​ប្រទេស ​អាច​បោះឆ្នោត​បាន​ហ្នឹង វា​កាន់​តែ​ធ្វើ​ឲ្យ​ពួកគេ​ យក​ចិត្ត​ទុក​ដាក់​អំពី​បញ្ហា​ស្រុក​ខ្មែរ និង​ស្ថានការណ៍​ស្រុក​ខ្មែរ»

​រហូត​មក​ទល់​ពេល​នេះ មាន​ប្រទេស​ចំនួន ៩៣ ក្នុង​ពិភពលោក ​ដែល​ប្រកាន់​របប​លទ្ធិប្រជាធិបតេយ្យ​ បាន​រៀបចំ​ឲ្យ​អោយ​ពលរដ្ឋ​របស់​ខ្លួន អាច​មាន​សិទ្ធិ​ចូលរួម​ការ​បោះ​ឆ្នោត ​នៅ​ក្រៅ​ប្រទេស។ ប្រទេស​ទាំង ៩៣ នោះ​រួម​មាន​បណ្ដា​ប្រទេស​ក្នុង​ទ្វីប​អាហ្វ្រិក អាមេរិក​ខាងត្បូង អាស៊ី និង​បណ្ដា​ប្រទេស​មួយ​ចំនួន​នៅ​អឺរ៉ុប​ជាដើម។

​អ្នក​អង្កេត​ខាង​កិច្ចការ​នយោបាយ​កម្ពុជា និង​ ជា​អតីត​ប្រធាន​ចលនា និស្សិត​ដើម្បី​លទ្ធិប្រជាធិបតេយ្យ លោក ប៉ាង សុខឿន មាន​ប្រសាសន៍​ថា រដ្ឋាភិបាល​គួរ​សាទរ ​ចំពោះ​ការ​ទាមទារ​ណា​មួយ ​ឲ្យ​បង្កើត​ប្រព័ន្ធ​បោះឆ្នោត​ នៅ​ក្រៅ​ប្រទេស។ លោក​ បន្ត​រដ្ឋាភិបាល​ ប្រញាប់ប្រញាល់​ធ្វើ​កិច្ចការ​ជា​អាទិភាព​ ដើម្បី​អាច​អោយ​ពលរដ្ឋ​ នៅ​ទូទាំង​ពិភព​លោក ​អាច​ចូល​រួម​ការ​បោះឆ្នោត​ជាតិ​ នៅ​ឆ្នាំ​២០១៨ ខាង​មុខ៖ «ប្រទេស​ជា​ច្រើន​នៅ​ក្នុង​ពិភពលោក ក្រៅ​ពី​ប្រទេស​កុម្មុយនិស្ត គេ​បាន​អនុវត្ត​ប្រព័ន្ធ​បែប​នេះ​រួច​ទៅ​ហើយ»

យ៉ាង​ហោច​ណាស់​មាន​ ពលករ​ចំណាក​ស្រុក​ ប្រហែល​ជិត ២ ​លាន​នាក់ កំពុង​ធ្វើ​ការ​ស្របច្បាប់​ផង និង​ខុសច្បាប់​ផង ​ក្នុង​ប្រទេស​ថៃ ខណៈ​ពលករ​ជាង ៦ ​ម៉ឺន​នាក់​ផ្សេង​ទៀត កំពុង​ធ្វើ​ការ​ក្នុង​ប្រទេស​កូរ៉េខាងត្បូង ជាង ៣​ ម៉ឺន​នាក់​នៅ​ប្រទេស​ម៉ាឡេស៊ី និង​ ប្រហែល​ជាង ១​ ម៉ឺន​នាក់ នៅ​ប្រទេស​ជប៉ុន។ ជាង​នេះ​ទៅ​ទៀត មាន​ពលរដ្ឋ​ខ្មែរ​ ប្រមាណ​ជាង​កន្លះ​លាន​នាក់​ផ្សេង ទៀត​កំពុង​រស់​នៅ​បរទេស។ អ្នក​ទាំង​នោះ​ ភាគ​ច្រើន​រស់​នៅ​សហរដ្ឋ​អាមេរិក បារាំង អូស្ត្រាលី កាណាដា និង​បណ្ដា​ប្រទេស​មួយ​ចំនួន​ក្នុង​សហគមន៍​អឺរ៉ុប៕

Captureចដវដថង